سفير المنتدى تايه في جزيرة لاتعرف للرجل قيمة !!!!

فـي يـوم مـن الليــالي قــررت اهـاجـر واتــرك الـديــره .... حسيــت ان العــالم كلــه ضــدي

... وكنــت اصبــر نفســي واقــول ان كــل العبــاقــره والمفكــرين كـانــوا منـبــوذين من المجتمــع << نيوتن على غفلة

المهم ... شريت لي قارب وقررت اني اسـافر في البحار اللين القى مكان فيه ناس يقدروني ويحترموني ...
وركبت البحر .. وجلست اجدف وانا اتأمل البحر والأسماك من حولي مجتمعه تنظر الي .. وكأن هذه الأسماك عرفت ان الشخص الماثل امامها .. <<<< الولد في محكمة
اقول شكلها حست اني عبقري مع ان الناس ماعرفوا هذا الشي .... << مو موطيها قريب ..

وفجأه .... هبت عاصفه قويه اكلت الأخضر واليابس ..
وقمت من النوم على صياح وازعاج
... ويوم فتحت عيوني ..
لقيت اني مربوط من ايديني ورجليني في عمود وبنتين كل وحده ماسكه طرف من العمود وشايليني .. _ مثل افلام كرتون _ ... ووراهم جيش كبير من البنات ... >>> مأثرة عليه افلام الكرتون

وكل اللي في الجزيره بنات مافيه ولا رجال _ الا انا طبعا !! _ ...
المهم ... ودوني لمجلس رئيستهم .. وكانت عجوز تطيح الذباب من السمـاء من شينها واسمهـا عمشا .. طويلـه ودبه ..<<< شكلها كانت باص مدرسه قبل ماتجي للجزيره >> ابو التعليق يا شيخ ..

وأول ماشافتني صار لونها اخضر وانتفخت وطلع لها قرون .... وقالت للبنات فكوه خلوني اتفاهم معاه ..... وفكوني ...
قالت لي والشـرار يتطاير من عينيها اللي كنها طفاية سجاير : وش جابك هنــا ؟؟؟؟


قلت : ابد والله .. كنت رايح اجيب اخواني من المدرسه وضيعت الطريق <<<< ما يعرف يصرف الكمخه

قالت : هـذا انتم يالرجاجيل .. ماتخلون البنات في حالهم .. تطاردونهم حتى لو راحوا المريخ

انا على بالي باستخف دمي قدام البنات وقلت : وين الرجاجيل اللي تتكلمين عنهم ما شوف احد غيرك ..

وانتفخت عمشا زياده .. وقربت ورفستني ذيك الرفسه على ...... ظهري << لا احد يدقق


وقالت : انتم يالرجاجيل ناكرين للمعروف .. يعني الحرمه لو تبيع عيونها عشان واحد منكم ما يعجبكم وتدورون وحده ثانيه غيرها .. لانكم تعتبرون الحرمه وسيلة تسليه لكم مثلها مثل البلاي ستيشن والكوره ..


قلت: بالعكس حنا نقدر الحرمه كثير .. والدليل ان الشباب اذا شافوا بنت يجتمعون عليها وكل واحد فيهم يحاول يعطيها رقمه عشان اذا احتاجت شي يساعدها ...<<<< واحد على نياته

قالت لي : اسمع حنا متفقين ان اي رجال يدخل الجزيره هذي راح نعدمه ونقطع راسه .. ونخليه عبره .. لكن انا باعطيك يوم تتمشى في الجزيره .. علشان تشوف بعيونك اننا عايشين بدون الرجاجيل احسن عيشه ....... وطلبت عمشا من وحده من البنات اسمها (نوير) انها تاخذ فيني جوله على الجزيره ....

نوير هذي كانت آيه في الجمال شعرها اسود ويوصل اللين ركبتها (صاروخ - ناقه منفلته - حاشي - طخمه - ) اختاروا ماينسبكم من بين الاقواس * وعيونها واسعه * وخشمها دلة قهوه ..>>>>>>> وصف رايح في اللفه ..

المهم ... تجولنا في الجزيره .. وكانت كلها بنات .. ومليانه اسواق ومحلات .. وكلها محلات ادوات تجميل ومكياج واكسـسوارات وملابس جاهزه ومطاعم _ _ اللي قاهرني ليش المطاعم مع ان كلهم حريم .. يعني عجزوا يطبخون _ _ ..... واللي يبيعون في المحلات كلهم اندنوسيات _ _ صدق ان الحريم ما يقدرون يستغنون عـن الاندنوسيات


وعملتهم في الجزيره .. هي ادوات المكياج ... يعني الفستان الايطالي بخمسه ارواج وكريم اساس ... والفستان الفرنسي بثلاثه ارواج ومسكره واحمر خدود ....... يعني بدل الوحده ماتشيل بوك ولا محفظة فلوس تحصلها شايله علبة مكياج في جيبها .... <<<< حاس ان بنات المنتدى يبغون يروحون هناك الحين ( اركدوا بس )

سألت نوير ... وقلت لها : انتي وش اللي جابك هنا حرام تسجنين نفسك في هالجزيره .. وين اهلك ..؟؟؟ قالت : شفت البنات اللي هنا كلهم ... كلنا اخذتنا عمشا وحنا صغار وجابتنا للجزيره هذي .. ووفرت لنا كل اللي تحتاجه البنات .. وصراحه كل البنات اللي تشوفهم عايشين احسن عيشه..

قلت :
لكن ليش تكرهون الرجاجيل ؟؟؟؟ .... قالت : شف .. لا انا ولا وحده من البنات قد شفنا رجال .. وانت اول رجال نشوفه .. >>>>>>> عاد انتفخ رأسي ذيك الساعة ولا حد قدي

.... وكل اللي نعرفه ان عمشا تعرف الرجاجيل زين .. وتقول ان الرجاجيل انذال يتسلون في الحريم ويضربونهم .. لا وتقول انهم يآكلون لحوم البنات بعد
مع اني اشوف انك غير اللي تقول عنهم شكلك رقيق وحنون عاد انا انحرجت وصارت خدودي صفرا
قلت : شكرا دا من زوئك <<< هذه الصورة خارجة عن النص لان المخرج عاوز كده

المهم سألتها : طيب من يحميكم في الجزيره .. يعني لو صادفتوا مشكله ولا قراصنه من اللي يدافع عنكم ؟؟؟ .. ... وهنا تنهدت نوير .. وقالت : هذي المشكله اللي نواجا .. لأن فيه ديناصور كبييييير مرررره كل لحظه والثانيه يهجم على الجزيره ويخرب كل شي تصدق انه اكل ثنتين من الاندنوسيات .... قلت في نفسي .. اكيد بياكل الاندنوسيات لأنهم ضعيفات .. لكن انتم من يقدر عليكم .. وبعدين لحمكم مــررررر .... المهم .. قلت لها خلاص رجعيني لعمشا ... ابغاها ضروري .... >> اعقي بارامبوو

ورجعنا لعمشا ....
وقالت : وش رجعك .. اكيد انك يوم شفت عيشتنا بدونكم فضلت انك تموت من القهر ...
قلت : اسمعي انا سمعت ان فيه ديناصور كبير دايم يهاجمكم .. وانا ابغى اعقد معاك صفقه ...
قالت : والله انت اللي يبغالك صفقه .. مسوي نفسك رامبو ...
قلت : مالك دخل رامبو ولا محمد عبده ..>>>> وش دخل محمد عبده المهم اذا ذبحت الديناصور وش لي ؟؟؟؟
قالت : اذا ذبحته بنعفي عنك وبنخليك ترجع لديرتك
قلت : لا لا .. انا ما ابغى ارجع لديرتي .. والله لأبيعهم كلهم .. انا في ذيك الساعه لما اعيش في جزيره كلها بنات .. ومافيه رجال الا انا .. يعني مافيه احد ينشب لي .. وكل البنات ماقدامهم الا حل واحد اذا بغوا يحبون ... انا وبس نيااهاهاهاها <<< ضحكت شر

قالت : لكن قانون الجزيره يمنع اي رجال يدخل .. اجل كيف اللي بيعيش بيننا ... لكن خلني اجمع البنات وأسألهم ....
اكيد بيرفضون .. لانهم يقدرون يتحملون الديناصور ... لكن مايقدرون يتحملونك

جمعت البنات وسألتهم .. وكلهم وافقوا بالاجماع اني اذا ذبحت الديناصور اعيش عندهم ..

المهم ..... جهزت نفسي لقتل الديناصور .. وعرفت انه يطلع في الليل ..... وجلست احتريه بيدي العاريتين .. فإما حياة تسـر الصديق واما ممات يغيض شباب المنتدى ؟؟

المهم ...
فجأه طلع الديناصور .... والله ياهو كبيييير ... له عين وحده في راسه واذانيه كبااار <<<< حمار ذا مو بديناصور

وأول ما شافني نظر اللي نظرة احتقار ولا عبرني على طول دخل الجزيره ... وانا اللي الحقه .. وقلت له
.... هيييه انت يالحبيب وش دعوه ؟؟ مامليت عينك ؟؟!!
........... وهو ولا كأن احد يكلمه تقول اللي قدامه علبه تونه مووو آدمي ...... ويــوم طفح الكيل ... وانا اللي اجره مع ذيله وامحط به في الجدار ...


والتفت علي وقام يطلع نار من فمه يبغى يشويني وان اللي اطلع طفاية حريق وابخها في وج<<<<لاتـسألوني من وين جت طفاية الحريق مشوها لي ولا تصيـرون قلـق ..

المهم .... وهو اللي يضربني بذيله .. وانا اللي اطييييييير ولا وقعت الا عند نوير

وهي اللي تضمني وتقول : لا تموت الله يخليك .. انا ما أقدر اعيش بدونك .. انا احبك .. لا تخليني

وانا اللي انط كني مقروص ..
وقلت : وش قلتي صدق انتي تحبيني ؟؟؟ ....... وضحكت من الخجل وقامت تركض بعيد عني مستحيه .. وشوي الا اسمع صوت .. أثرها صدمت في جدار ما انتبهـت له ...... المهم .... واستجمع قواي وارجع للديناصور ... واكفخه على راسه بماصوره .. وهو اللي يطلع سكين يبغى يذبحني<<<< يالربع ... شفتوا الصاروخ اللي مر من هنا قبل شوي ... ولا انا غلطاااان

وانا اللي امسك يد الديناصور االلي فيها السكين ... وهو يقربها من وجهي .. وانا ابعدها .. وهو يقربها ... اللين وصلت عند عيني ......>>> يكثر من متابعة افلاام عادل امام

وفجأه مادريت الا ذيك الضربه على راسي
واسمع صوت ابوي يقول
قم لابارك الله فيك من ولد قم رح للغنم وجب لها علف معك .. انا وش اللي الله بلاني فيك يالداشر

وقمت من النوم ولبست ملابسي ورحت للغنم ... وانا مقهور ... آآآآآآآه لو انه تركني شوي بس ... والله كان ذبحت الديناصور وقطعت لحمه وفرقته على البنات عشان يعرفون من هو ابو فيصل ..

<<<< يارجال احمد ربك ان ابوك صحاك من النوم .. ولا كان تلقى هاللحين الديناصور ماسكك مع شوشتك ويمسح فيك الجزيره طول وعرض

ودمتم دمتم دمتم سالمين دمتم

بطولة

الممثل القدير / انا

والممثله الشابه / عمشا

ضيف الحلقه / ابويه

بالاشتراك مع

موبايلي مش حتقدر تغمض عينيك

فوائد الموضوع فائده واحده

ان كان مالك من ذراعك نجده . . . فاراح يأكلك الديناصور

واشوفكم على خير






توقيع سفير المنتدى

الموضوع الاصلي  من روعة الكون