بتوحشني ............قصة رومنسيةجناااااااااااان.

واقوال تقبلوا خالص تحياتي
أخوكم
عضوا جديد فى اجمل منتدى واجمل مشاركين

الجزء الثامن عشر ..

طلعت رغد وراحت لبيت عمها وهي فعلا حاسه ان كل شئ انهار انتهت حياتها تحطمت وتدمرت دخلت لبيت عمها
ولحسن الحظ ماكان موجود الا خالتها ام سعود الي خافت من شافة رغد منهاره وتصيح
ام سعود قامت وراحت لها....رغد امي شفيك بدر فيه شئ
رغد...خلاص خالتي طلقوني منه تعبت تعبت
ارتاحت ام سعود صح الطلاق صعب لكن اهون من شئ ثاني جاء ببالها
ام سعود حضنت رغد رغد لي كانت منهاره مره وحاولت تهديها
ام سعود...يابنتي اذكري الله ومابيصير الا كل خير
رغدومن بين دموعها....ضربني ياخالتي ضربني
ام سعود وحطت يدها على قلبها ...ضربك بدر
رغد هي نفسها مو مصدقه ان بدر ممكن يستخدم هالاسلوب ابدا وبهالحظه نزلت ريم الي من الصدمه
وقفت مكانها اكيد فيه احد مات تقول بخاطرها لكن ام سعود ابعدت هالتفكير بسرعه
ام سعود...ريم خذي رغد عندك ولايدري احد عنها وخصوصا ابوك
ام سعود وتكلم رغد...روحي رغد عند ريم وانا بروح افهم الموضوع من بدر
اخذت ريم رغد وسكتت ماقالت شئ لانها مو فاهمه شئ رغد من دخلت الغرفه ارتمت عالسرير وبدت تصيح من جديد
حاولت ريم تهديها لكن ماقدرت رغد كانت مصدومه من تصرف بدر معها
وام سعود راح لبيت بدر وحصلت بالصاله منزل راسه للارض وواضح انه معصب وواصل حده من الغضب
ام سعود...السلام عليكم
قام بدر وراح يسلم على امه لكنها صدته وقالت اجلس مكانك
بدر عرف ان امه عرفت انه رفع يده على رغد وسكت ماقال شئ
ام سعود ...ماانت والله بدر الي ربيته ماانت بدر الي آمنك عمك على بنته ولا انت بدر الي ينضرب به المثل
ترفع يدك على بنت عمك افا والله انا ماعرفت ليه رفعت يدك لكن انا جايه بعرف فهمني اشوف يالله
بدر ساكت هو في قمة غضبه ماهو قادر يشرح ويوضح
ام سعود....انا خليت رغد تجلس عند ريم واحمد الله ان ابوك ماهو بالبيت والا كان صار شئ ثاني
البنت تقول تبي تتطلق منك
بدر من سمع كلمة طلاق خلاص حس كل غضبه راح يتفجر ...تتطلق ..
ام سعود ...ايه اجل ترفع يدك عليها وتبيها تجلس تضحك لك لو سلطان رفع يده على اختك بترضى
بدر ....يايمه الله يخليك الي فيني كافي خلاص الموضوع بيني وبين رغد وأنا بحله
ام سعود وعصبت على بدر ....وهي خدامتك تنتظرك لين تهدى وبعدين تحل الموضوع قولي ليه ضربتها
بدر وعرف ان امه زعلانه من تصرفه....اقولك ان بنت اختك المحترمه لمى هي السبب او اقول لك ان زوجتي ماتثق فيني
او اقول انها تعمدت تستفزني او اقول اني رفعت يدي من غير احساس شو اقول يمه
ام سعود وهي متفاجأه .....لمى بنت اختي
بدر وقال لامه سالفة لمى من الاول الى الى لحظة مارفع يده على رغد وهو الى الان مايعرف لمى شقالت لرغد
ام سعود...تعال معي وكلم زوجتك ولاتكبر الموضوع وحتى لو صار حط ببالك أنا ماني راضيه عن ضربك لها
بدر...يمه اسمحي لي انا معصب وهي معصبه الموضوع بيتعقد الحين اتركيني عالاقل ساعه لحد مااهدى
ام سعود سكتت بعدين قالت ....ابوك مابقوله شئ والبنت بهديها لاتتأخر وطلعت للبيت
اما بدر جلس يفكر بالي صار وكيف يقدر يحط عينه بعين رغد وكلمتها تتردد بباله تتوقع ..هذي رجوله
تتوقع هذي رجوله ...ضرب عالطاوله بقوه وصرخ....لا مو رجوله انا غبي ..انا الغبي
ااما رغد فحالها كان اصعب من بدر عمرها ماتوقعت ان بدر يرفع يده وظلت تصيح وريم تركتها لحالها
حتى تقدر تفكر من غير اي تأثير رغد حست بخوف لكن تعوذت من الشيطان وراحت توضت وصلت
ودعت الله يدلها على الخير لها ولبدر ..
بعد تقريبا ساعتين قدر بدر انه يتمالك اعصابه واتخذ قراره وراح لرغد دخل البيت ولاحصل غير امه وريم
سلم عليهم وطلع لرغد طق الباب ودخل رغد كانت جالسه عالارض متسنده عالسرير وهي عالسجاده ودموعها على خدها
لما شافت بدر نزلت راسها وزادت دموعها انعادت اللحظه الي رفع بدر يده عليها لكن بدر تقدم عندها
ونزل وباسها على جبينها ....اسف رغد
رغد ساكته وتقول بخاطرها الاسف كلمه مالها اي معني اذا مافيه حب صادق منك يشفع لك اخطاءك
بدر ....رغد ياليت تسمعيني انا اعرف اني اخطيت عليك وخطأ كبير لكن غصب عني كلامك استفزني
ماهي سهله انك تتهميني هالاتهام انتي تصورتي كل شئ ببالك انا صح مااعرف هالحقيره اش قالت لك لكن
مهما كان لازم ماتصدقينها بكل كلمه تقولها عني المفروض قبل ماتتصوري حسب كلامها
تسأليني وبشكل مباشر بدل ماتتعمدين انك
تستفزيني ادري كلامي ماهو مقنع لك ولاهو مبرر لفعلي لكن انا متأكد ان قلبك طيب وبيسامح
رغد....خلاص مافيه قلب يحس حتى يقدر يسامح وقامت وجلست عالسرير
بدر ويحاول يكون هادي جدا ....رغد ممكن اعرف لمى اش قالت لك
رغد. وتحاول تمسح دموعها .....مو مهم الي قالته المهم الي صار بينا
بدر....رغد ارجوك انا لازم افهم
رغد... وبسخريه .....تفهم بعد بعد عشر شهور توك تفكر تفهم بعد ماخليت لمى تستغل رفضك لي ويصير كل هذا تبي تفهم
بدر انا لما تزوجتك كنت اعرف انك رافضي ولا انت حاب هالزواج من اصل وقلتها لك قبل تزوج غيري اذا ماتبي تطلقني
لكن الحين اقولها لك وبكل ثقه انا خلاص مااقدر اتحمل اكثر والله مااقدر لما انا اخذت الحبوب من غير علمك زعلت عصبت
وتوقعت اني ارفضك يعني جربت احساس انك تكون مرفوض مع اني ماكنت اقصد هالشئ والله العالم لكن تعرف الاصعب
انك تتزوج شخص تعرف انه رافضك ومع هذا تضغط على نفسك وتحاول وتضحك وتضحي وتتنازل وترضى وبعد هذا
كله ..اغلب تصرفاته مافيها حتى نظرة رضى بالله عليك منو يتحمل هالذل كله مين ..مين
بدر ويحس كلام رغد اقوى من الكف على وج ....رغد كلامك على عيني وراسي لكن خلينا بالموضوع الاساسي لمى شقالت لك
رغد....لمى قالت انك مسافر بتقول لي بس مابتسافر وانها اتصلت تتطمن عليك لها ايام ماسمعت صوتك
بدر وبدأ يعصب من سمع كلام رغد....وصدقتيها ..؟..
رغد....كان لازم اتأثر من كلامها واصدقه لانك اكدته بسفرك
بدرراح عندها....رغد شوفي انا صح بسافر وقلت لك مافيه احد يعرف غير خالي كيف وصل الخبر مايعنيني لاني واثق
من نفسي و انا قدمت سفري اليوم بدل بكرا وهذا لمصلحتي ومصلحتك لازم نبعد عن بعض وهالسفره بوقتها
واذا مو واثقه بكلامي احب اقولك ان الي بنت خالتي ماتعرفه ان خالد ولد عمي معي مسافر وتقدري تتأكدي
انا بسافر لكن قبل مااسافر بقول لك شئ موضوع الطلاق انسيه لانه مستحيل واكرر اسفي لك لكن تأكدي رغد اني انسان
اخاف الله وارعيه بكل تصرفاتي بعد هذا كله الي عنده زوجه مثلك تتوقعين لمى تلفت نظره عموما انا اتفقت مع عبدالله
يمرك وعندك اسبوع ترلتاحين مني صدقيني مااملك غير اني اقول ....سكت بعدين قال مع السلامه وراح
وعند الباب التفت وقال ..مابتردين علي
رغد بصوت واطي ....مع السلامه
طلع بدر ورغد ظلت تبكي ماتعرف شو تعمل لكن وصل عبدالله وطلعت له وراحت عند اهلها اسبوع على اساس
بدر مسافر وبالسياره
عبدالله....رغوده حبيبتي المشاكل بكل بيت لكن من الشخص الذكي الي يتجازوها بأقل الاضرار
رغد.....من قال لك
عبدالله....بدر قال لي انه فيه سوء فهم بينكم وطلب مني اخفف عنك
رغد....فيه الخير والله
عبدالله.... رغوده بنتفاهم بالموضوع بالبيت اوكي الحين انسي حبيبتي

اما في بيت ابوسعود كانت ريم وامل ونوف عندهم واتفقت نوف وامل انهم يلعبون بأعصاب ريم
نوف...امل صح شصار على البنت الي يحبها خالد
ريم كانت تعرف انه بيخطب لكن يحب انتبهت وبدأت تركز على الكلام
امل....مااعرف يااختي ذبحني كل مااسأله يقول بتعرفينها اذا خلاص تقررت الخطبه
امل....طيب منين يعرفها
امل..والله مااعرف لكن شكله يمووت عليها
اما ريم طفشت من كلامهم وقامت وطلعت
نوف... حرام عليك امل
امل....الحين اناواثقه انها تميل لخالد هذا اذا ماكانت تحبه
نوف....صدقيني توقعتها ماتحبه
امل....وليه هالتوقع
نوف..ه لانهم من طينه وحده
امل....ه على قولك خليهم الله يعينهم
اماريم ضاق صدرها من سمعت هالكلام رغم انها حاولت على قد ماتقدر ماتبني احلام على خالد لكن غصب
عنها احلامها تروح له ..
اما خالد قرر انه يكلم عمه يوم الجمعه ويخطب منه ريم وريم المسكينه ماتعرف تخطيط نوف وامل ..

اما ام سعود كانت محتاره بعد كلام بدر الي قاله لها بعد مانزل من رغد قال لها
بدر...يمه لمى اذا ماوقفتوها عند حدها والله اني اعرف شلون انا اعدلها أنا
حاولت قبل وعديت الموضوع والحين تكررها لكن انا مابنتظرها لحد ماتحاول وتدمر لي حياتي
ام سعود ...خلاص انا بكلم نوف ونشوف بعد اختي وشاقول لها اخاف تروح فيها
بدر..شوفوا لكم حل معها والا انا بشوف وطلع وام سعود قالت مالي الا نوف مادامها هي الي تعرف بالسالفه
قالت لها الموضوع وتضايقت نوف كثير على رغد والي ضايقها اكثر تصرف بدر لكنها وعدت امها انها تنهي موضوع
لمى بنفسها وفعلا طلعت من امها واتصلت على جوال لمى
لمى وبصوت ناعم...الو
نوف...السلام عليكم
لمى....وعليكم السلام هلا نوف
نوف....لمى اسمعيني زين وافهميني انتي حاولت محاولتين انك تدمرين حياة بدر وفشلتي هالمره هالكلام من بدر
يقولك والله لو تقربين لزوجته انه يعرف يعدلك وانتي عارفه منهو ابوك اذا عصب فاابعدي عن بدر وحياته
لمى ........
نوف....انا حذرتك لكن احب اقول لك ان امي عرفت الموضوع لكن احتراما منا لخالتي ماقلنا لها لكن اذا صار
شئ منك مااعرف تصرف امي ولا بدر مع السلامه
سكرت نوف وقالت بتصل برغد احاول اهديها واتصلت لكن جوالها مغلق قالت بتركها ترتاح وبكرا اكلمها

اما رغد حاولت ماتبين لامها انها متضايقه وخصوصا ان سلطان وريوف بيوصلون بكرا وحمدت ربها
ان ريوف بتوصل على الاقل تجلس معها ..
يوم السبت موعد رجعت سلطان وريوف بعد ماقضوا شهر كامل كان من اجمل ايام حياتهم
وقرر بو سعود يو السبت يجتمعون كلهم عندهم ويعملون عزيمه صغيره بمناسبة رجعت ريوف وسلطان
وفعلا وصلت ريوف وسلطان والكل انبسط لكن ريوف لاحظت على رغد الحزن
ريوف....كل هذا شوق للحبيب الغايب
رغد....شوق الا كل هذا الم من جرح الحبيب الغايب
نوف....رغوده سامحي
ريوف وهي مو فاهمه شئ ....شصار فهموني
رغد....الحين بنرجع للبيت واقول لك لكن ارجوكم قفلوا عالموضوع الحين
وبالبيت قالت رغد لريوف الي صار
ريوف....رغد مو لان بدر اخوي لكن انتي المفروض ماقلتي كذا
رغد...وتصرفه صح
ريوف....اطبعا بدر مافيها كلام غلطان لكن لولا كلامك ماصار كل هذا
رغد...يعني انا الغلطانه
ريوف....لا حبيبتي لكن المفروض ماتصدقين لمى
رغد....ريوف قولي لي بدر اعطاني الثقه بحبه حتى ماصدق لمى بدر كان يقول او يبتسم لي
وبعدها احسه يندم ريوف لو تعرفون هالقلب شكثر تحمل والله تبكون رحمه عليه
ريوف....طيب حبيبتي رغوده تكلمي ليه ساكته قولي لي الي فيك
رغد...ماعندي شئ اقوله مااقدر اوصف قلبي المجروح ولا احساس الخذلان ولا الخوف
ريوف...رغد حاولي انك تفكري بهدوء حللي الموقف الي صار بينكم
رغد...ان شاء الله اطلعي ارتاحي انتي تعبانه مانمتي كويس
طلعت ريوف وتركت رغد بالصاله تفكر لحد مادخل عبدالله وجلس يسولف معها

وفي بيت ابو سعود ريم كانت تكلم عبير ...
عبير....ريم اقول لك شئ ولاتعصبين علي
ريم....الله يستر قولي
عبير...اشتقت لوجوده بالمنتدى
ريم....وجع يوجعك اسكتي فضحتينا عبير ماانتي صاحيه
عبير...ادري
ريم....ماقلنا لاتبنين امل على وهم
عبير....ريم والله مالي خلق اكتب خلاص ولااشارك باي منتدى
ريم....ابرك لك اتركي النت كله
عبير....وبعدين اجلس اقابل الجدران
ريم....اقول عبير خالك ليه مايزوركم كثير
عبير...ريم انتي تعرفين خالي مشغول دائما بشغله وزوجته احنا اخر اهتمامتها
ريم...الله يعينك شرايك ازوجك نواف وتسكنين عندي
عبير....لا الله يخليك انا بفتك منك الحين
ريم...ه هين تشوفين
عبير...شوفي ريمووه بروح انام ابرك لي اضيع وقت
ريم....اوكي باي

نرجع لرغد وعبدالله الي تركناهم يسولفون
عبدالله ....ليه قافله جوالك
رغد...اريح
عبدالله....بدر اتصل ويسأل عنك
رغد.........
رغوده .....نكون صرحين مع بعض
رغد...تفضل
عبدالله.....رغد كل الناس يختلفون يزعلون واحيانا يتطلقون لكن تعرفين المشكله ين
رغد...وين
عبدالله..ويأشر على قلبه.....هنا ايوه حبيبتي انتي تحبين بدر مهما حاولتي تنكرين وهالشئ
يعني انك تتقبلينه مثل ماهو مو مثل ماانتي تحبين صح السلوك الخطأ نوضحه لكن من الي
يعرف الاسلوب الصحيح الي يوضح لطرف الاخر الخطأ الحين انتي مختلفه معه وقفلتي جوالك هذا بنظري خطأ تدري ليه
رغد ودائما تحب تسمع عبدالله لان كلامه منطقي....ليه
عبدالله...لانك سديتي الطريق بوج ومنعتيه من انه اما يوضح وجهة نظره او يعتذر
او يمكن انتي الغلطانه والمفروض تعتذرين رغد انا مااعرف الي بينكم لكن بقول لك شئ
وهذا ينطبق على كل علاقتك مو بس زوجك اذا انتي زعلانه او مختلفه مع شخص
لابد انك تحترميه بااعطاءه الحق بتوضيح وجهة نظره وبعدين حبيبتي اذا الموضوع له اكثر من احتمال
حتى نقول من المخطي اسمعيني امسكي ورقه وقلم واكتبي كل احساسك من بداية المشكله وشصار
كلامكم من البدايه لنهايه اتركيها بعدها بساعات او يوم اقري الورقه وشوفي الي لك والي عليك
صدقيني بتقدرين تحددين حجم خطأك وخطأه ..
رغد وتبتسم له
عبدالله....ابتسامه رضى
رغد.....والله يابختها فيك
عبد الله.....ه منهي
رغد.... مين ماكانت
عبدالله....رغوده يمكن ويابختي انا فيها
رغد....يعني فيه وحده ويابختك فيها
عبدالله ....الحين مااقدر اقول الي كلمه وحده لاني تعبان وبنام ....ايه فيه
رغد....مين
عبدالله ... بكرا اقول لك تصبحين على خير
طلع عبدالله وترك رغد تفكر بكلامه وقررت تعمل الي قاله لها وكتبت الورقه وقررت تفتح جوالها
اما بجده بدر ماقدر ينام يمكن الاحساس بالذنب تجاه رغد او ان رغد بعيده عنه او انه لاول مره يحس
انه جرحها وبشكل كبير كان جالس عالبحر ويتذكر اشياء كثيره بحياته من بداية زواجه وفجأه يوصله مسج
اول ماشاف المسج انبسط لانه تقرير ان مسجاته وصلت لرغد يعني فتحت جوالها وقال بتصل عليها الحين
اما رغد من فتحت الجوال حصلت مسجين من بدر الاول يقول فيه
" يمكن مايهمك لكن حبيت ابلغك اني وصلت" وهنا ابتسمت رغد
اما الثاني" رغد ماهو حل انك تقفلي جوالك اتمنى اني اسمع صوتك"
شوي ويتصل بدر وترددت رغد لكن بعد كلام عبدالله اخوها قررت تسمع بدر حتى لو هو الغلطان
رغد...الوو
بدر...السلام عليكم
رغد...وعليكم السلام
بدر....شلونك رغد
رغد...تمام
لحظة صمت ...بدر..مابتقولي حتى الحمدالله عالسلامه
رغد....الحمدالله عالسلامه
بدر....رغد انتي حاسه انك انظلمتي معي ..؟؟
رغد.............
بدر.....مو انتي الي تعاني بس انا مثلك والله يارغد لكن ياليت تريحني بكلمه سماح منك
رغد.....بدر انت مدرك انت شو عملت انت رفعت يدك
بدر ....والله وربي يارغد من غير احساس ماكنت اقصد
رغد.....
بدر.....رغد مافيه شخص معصوم من الخطأ والله سبحانه يغفر ويسامح
انا كلمت امي بخصوص لمى ونوف انهت الموضوع لكن اتمنى يكون فيه ثقه بينا
رغد..........
بدر....وعرف انه مابينفع معها الا هالاسلوب.....رغد ريحيني حرام من امس مانمت ولااكلت شئ
ارجوك احس اني تعبان مو قادر حتى افكر
رغد وكسر خاطرها مهما كان هذا بدر الغالي ......خلاص بدر
ابتسم بدر .....شو خلاص اسكر او سامحتيني
رغد.....يمكن اسلوبي انا استفزك لكن هذا مايبرر تصرفك لكن انسى الموضوع
بدر....وربي كنت صادق بالاسم الي اخترته لك
رغد وبأبتسامه غصب عنها طلعت .....وشو الاسم
بدر.....اذا رجعت شوفيه بجوالي
رغد....اوكي الحين خلاص يالله سكر واكل لك شئ ونام
بدر....اوكي تصبحين على خير باي
رغد....تلاقي الخير باي
بدر حس بالراحه ورغد استغربت كيف قدر يخليها تسامحه وتنسى لكن تذكرت كلمة عبدالله
الي دائما يرددها " دائما نكره ونقرر ونرفض ولكن عند الالقتاء نتمنى النسيان فالحب اقوى
من المشاكل والعثرات لذلك عند اتخاذ القرارت المصيريه بحياتنا لنتخذها وجها لوجه "
ابتسمت رغد ونامت مرتاحه وحتى بدر مرتاح لان رغد سامحته ..

بالصباح نزلت رغد وجلست مع امها وابوها وهي مرتاحه تحس انها رحعت طفله وهي بينهم
وشوي ويدخل عليهم سلطان ..
سلطان...السلام عليكم
الكل....وعليكم السلام
سلطان....والله بيتنا منور ياشيخه
رغد....ه خلاص منور بناس ثانين الحين
سلطان....ه صح بس انتي غير انتي نور البيت
رغد....سلطان وين عبدالله
سلطان.....بالمجلس
رغد...بروحله اشوفه
راحت لعبدالله الي حيرها من امس بكلامه ودخلت وسلمت عليه وعرف شو عندها
عبدالله .... عرفت تعالي اجلسي واقولك من هي هالانسانه
رغد وبأبتسامه ...يالله قول
عبدالله.....اول شئ هالانسانه انتي تعرفينها
رغد.....اعرفها مين..؟؟
عبدالله ....لكن بقولك قبل ان هالانسانه احتلت مساحه كبيره من قلبي وعقلي ووقتي لكن هالاحساس
من طرف واحد الي هو انا
رغد...انت تحبها وهي لا طيب مين هي
عبدالله....ياشيخه لاتحطميني وتقولي لا يمكن تحبني
رغد.... طيب قول مين
عبدالله .....عبير حياة بلا حياة
رغد ومن الصدمه بصوت واطي عبير....
عبدالله....ايه عبير وقال لرغد الموضوع من اوله
رغد...تصدق عبدالله بالبدايه حبيت انك تعرف هالانسانه لانها عاجبتني لكن بعدين غيرت رائي وقلت يمكن
ماتعجب البنت الطريقه رغم ثقتي بااخلاقك
عبدالله....الحين المهمه عليك رغوده ابي توصلي للبنت كل هذا يعني موافقتها علي لابد قبلها تفهم الموضوع
رغد...ولايهمك خلي كل شئ علي
ودق جوال عبدالله وابتسم وقال....مافتحتي جوالك
رغد...فتحته بس تركته بغرفتي
عبدالله...شاطره قومي شوفي زوجك ازعجني
رغد وهي تضحك ..ان شاء الله
ومر الاسبوع بسرعه رغد كانت تكلم بدر ويكلمها لكن مهما كان رغد تحس بحاجز انبى بينهم وتحاول وبدر يحاول انه يزيله
مع هذا رغد مهما حاولت ماتقدر تخفي وتكابر احساس الشوق لبدر الغايب اسبوع الي بالنسبه لها
كل يوم فيه عن سنه كانت بالبدايه تحاول تكون جافه معه بااتصالاته لكنه يعرف نقطة ضعفها ويستغلها وتنتهي المكالمه
مريحه لطرفين وتحدد موعد رجعت بدر وخالد يوم الخميس والجمعه موعد الجمعه المعتاده ببيت ابو سعود
رغد قالت بتجي الجمعه لان بدر بيوصل بالليل متاخر وخالد قرر يخطب ريم الجمعه ..
الجزء التاسع عشر

بيوم الجمعه الصباح صحت رغد بدري وهي مو قادره تحدد احساسها هو فرح او خوف او اشتياق او توتر
انشراح لانها بتشوف بدر وبترجع لبيتها الي اشتاقت لكل ركن فيه اشتاقت لمكانها لبيتها الي سمع ضحكتها ومسح دمعتها
او كانت خايفه من لحظة لقاءها ببدر ماتعرف هل فيه تغير بيكون سواء منها او منه بعد الي صار ..
اما بدر كان ماخذ على خاطره من رغد لانها فضلت ترجع الجمعه ومع انه فضل انها تستقبله هي ببيتهم ومع
هذا قال بنفسه لازم اتغاضى وانسى هالشئ مهما كان الي صار مو سهل لكنه حتى هو مشتاق لبيته ولرغد ووجودها بحياته ..
ومع هذا كان مقرر بدر انه يغير معاملته لرغد لكن احساسه غير التصريح الي اقنع نفسه فيه بدر يحاول يقاوم
احساسه برغد ويقول لنفسه انه اخطأ عليها ولازم يعوضها ويحاول يغير معاملته معها للاحسن ..ماهو قادر يعترف بمشاعره الحقيقه تجاها

وصلت رغد مع اهلها قبل الصلاة دخلت بيت عمها لانها شافت عمها عند الباب وسلمت عليهم بعدين راحت لبيتها توقعت
تحصل بدر طلع لصلاة لكنها اول مادخلت البيت تفاجأة بالهدوء ولاكأن احد موجود بلحظه حست انها
محتاجه تشوف كل ركن تضم كل غرض بهالبيت الي حبته لانه جزء كبير من حلم سنين وهي طالعه فوق
صادفت بدر الي وواضح انه كان يفكر وسرحان ولاهو منتبه لرغد
رغدوهي بأول الدرج ....هلا بدر
بدر بأبتسامه ...هلا والله ونزل وسلم على رغد
رغد...الحمد الله عالسلامه
بدر...الله يسلمك
بدر وبنظره كلها احساس ....مااشتقتي للبيت
رغد وتحاول ماتجي عينها بعينه ...والله كثير كثير
بدر وبأبتسامه ...بس البيت ..؟؟
رغد...البيت مايسوى بدون اصحابه
بدر...ه اجابه غير مباشره لكن نرضى فيها لان مافيه وقت عالصلاة باي
رغد..باي
ابتسمت وقالت بخاطرها والله وحشتني حتى وانت قاسي يابدر وحشتني وحتى وانت تضغط على نفسك
حتى تقنعني بأشتياقك..وحشتني حتى وأنت الي هديت الحلم واحرقت الفرحه والله وحشتني ابتسمت لرغد
وطلعت لغرفتها وبمجرد مادخلت للغرفه نزلت دمعتها وبصوت واطي قالت ..كم مره بتشهدي على دموعي ياغرفتي

و في بيت ابوسعود خطب اخوه ريم لخالد منه والكل انبسط واتفاجئ بقرار خالد
لانهم متوقيعن يتزوج من برا العايله لكن هالموقف فرحهم كثير ووعدهم ابوسعود خير وقال بسأل البنت ولابتلاقي
احسن من ولد عمها والعصر في بيت ابو سعود الكل موجود البنات والعيال قال ابوسعود
ابوسعود..ريم ابوي تعالي عندي
راحت ريم وجلست جنب ابوها بدر وسعود عرفوا ان ابوهم بيقول لها الحين
ابوسعود ..ام سعود قلتي لعروسنا عن الموضوع
ريم عرفت على طول السالفه وانقهرت وشللون بترد والكل موجود الحين حست انها ماتقدر تتقبل الموضوع
هي بنت احلامها مع صورته شلون تتقبل الواقع شلون
ام سعود...لا والله ماقلت لها شئ
نوف....خير ابوي فرحنا
ابو سعود وهو حاضن ريم....والله ريما الغاليه خطبوها اليوم
حس ابو سعود ببنته ورفع راسها وقال.....مااحد بيغصبك على شئ لكن اذا علي ياابوي مابلاقي احسن منه
ولابتلاقين رجال يصونك ويحميك مثله
ريم وسرحت بأفكارها .....وتقول بخاطرها استاهل ماكان المفروض افكر واحلم فيه
سعود..... ريم مابيذبحونك
بدر....زين قولوا لها من الي خطبها الحين
ابو سعود....يابنتي خالد ولد عمك خطبك اليوم فكري واستخيري وبعدين ردي علينا
ريم من الصدمه هزت راسها وجات عينها بعين نوف الي ابتسمت وقالت ان شاء الله وطلعت لغرفتها
نواف.....الحين الكل تزوج ولاظل غيري زوجوني
ام سعود..الساعه المباركه ابوي ابشر
سعود....هواية امي المفضله بتدور لك المره السنعه الحين بتقول
ام سعود....اشوف ياسعود الحين ذوقي مايعجبك
سعود..افا الغاليه من يقول
ام سعود..ايه المره السنعه والا زوجتك ماهي سنعه
سعود....دائما امي تحرجني ه
بدر.... تستاهل انت الي تجيبه لنفسك
سعود...غصب عني مااقدر اسكت لازم اقول الي بخاطري
نواف...الغاليه انا زوجتي اختارتها وحده من بناتك بس مابنصرح بالوضوع الحين
ام سعود....منهي من بناتي خليني اعرف ذوقها
سعود.....ه يمه نواف منهي من خواتي 24 ساعه معه ريمووه
ام سعود وهي قايمه.....عز الله اختارت لك السنعه خلها تنفعك بروح اصلي وطلعت وتركتهم يضحكون
ابوسعود....رغد ابوي
رغد..سم عمي
ابو سعود....ان شاء الله هالسنه بتكملين دراستك
رغد..ان شاء الله عمي
ابو سعود...الله يوفقك يابنتي
نواف..والله على بالي خلصت رغد الله يعينك
نوف..الله يعين ناس على ناس يارب
سعود..افا الاخت العزيزه شايله على ابو احمد
نوف..والله ابو احمد مافيه مثله
سعود..امل انتي قايله لنوف شئ عني
نوف...ه دائما تشك بنفسك
بدر ..وهو طالع عن اذنك ابوي بطلع ارتاح
ابو سعود وهو يناظر نوف....الله معك ابوي
نوف وبصوت واطي .....انا اعرف شو اعمل لااحد يناظرني كذا
طلع ابو سعود وتركهم لحالهم ..ورغد طلعت لريم ولاظل غير نوف وامل وسعود

وبغرفة ريم ..رغد..السلام عليكم العروس
ريم وبأبتسامه ....وعليكم السلام هلا رغد
رغد...زوينك من طلعت ماعاد شفناك كل هذا حيا ء
ريم...لا والله بس تفاجأة
رغد....تبين الحق حتى انا
ريم...محتاجه اتكلم مع احد وربي احس اني تاي
رغد....ريم اقول لك شئ بصراحه
ريم....قولي
رغد....انتي ترتاحين لخالد صح
ريم وسكتت فتره بعدين قالت ....ارتاح له صح لكن خايفه
رغد..من
ريم....خالد شخصيته مختلفه افكاره اسلوبه
رغد....ريم انا مااعرف مشاعرك تجا لكن انا ليه صابره على بدر لسبب اقوى مني حبي له
وانتي اذا ترتاحين له او تحبه راح تتجاوزي كل شئ وتأكدي من شئ واحد ان خالد مااحد اثر عليه
بقراره وخذيها نصيحه مني خذ من يحبك ولاتأخذ من تحب
ريم....رغد حرام عليك وربي يوجعني قلبي اذا تحكين كذا صدقيني بدر يحبك انا واثقه
رغد....قويه يحبني ريم والي يحب يسوي الي سواه بدر
ريم..رغد انسى الي صار
رغد...آه ياريم ياليت يقدر بدر ينسيني ياليت
ريم..حاولي
رغد....لا أنا خلاص كله اسبوع ونرجع لدراسه والي يصير يصير اما اني ارجع اضغط على اعصابي لا
ريم..رغد تفاءلي وان شاء الله بيتغير
رغد....خلينا مني وفكري انتي
جلست رغد مع ريم وارتاحت ريم بالكلام معها وبعدين قالت بجلس يومين بعدين اقولهم قراري
اما خالد كان حاب يعرف رد فعل ريم قال مافيه غير امل اتصل عليها وسلم وبعدين قال
خالد....امل شصار عمي قال لريم
امل..ايه قال لها
خالد..اوكي صوتك مايطمن وشصار بصراحه امل
امل..خالد انا بصراحه ماتوقعة رد فعلها كذا ماشفت الفرحه الي توقعت
خالد..يعني ..؟؟
امل..والله يااخوي ماادري عموما لازم تأخذ وقتها بالتفكير
خالد...ماقلت لك اول خذي موافقتها
امل..خالد ليه الحين انت معصب
خالد..لان هالشغل هذا مايعجبني المفروض انك سمعتي كلامي وتأكدتي
امل..لهالدرجه خالد تعني لك ريم
خالد..ياامل افهميني مهما كانت مكانتها عندي مافيه شخص يحب انه ينرفض
امل..تطمن اخوي
خالد..اوكي باي
امل..مع السلامه

نرجع لرغد الي راحت للبيت وحصلت بدر بالصاله يقرأ الجريده سلمت ولا قالت شئ
وعلى هالاسلوب مرت حياتهم لمدة شهر تقريبا بدر رفض هالاسلوب ماعجبه ابدا اما رغد
بعد الي صار بينهم صارت ماتقصر بشئ لكن ماتحاول تكسب بدر وتخليه يحبها فقدت الامل منه
بدر يحاول يغير اسلوبه ورغد صايره جافه معه ماتقدر تعطي اكثر خلاص ...

اما ريم كانت متردده بقرارها وراحت تكلم عبير وتتكلم معها بالموضوع
عبير..ريم ليه الخوف طيب مو هو الشخص الي كنتي تتمنين
ريم..صح كنت اتمنى اني ارتبط بخالد لكن الحين احس اني خايفه من هالارتباط كثير
المشكله مافيه احد قادر يفهمني خالد اسلوب حياته مختلف عني كثير وهذا الي مخوفني
عبير....ريم خالد ماهو مختلف لكن انتي تتوقعين الكل مثل اخوانك لا ياريم خالد ماهو متحرر
مثل مالكل متصور انتي قلتي لي قبل ان خالد انسان واقعي وصريح ماهو انسان غامض واضح
ريم..صح لكن مااعرف ساعه احس اني فرحانه وساعه اخاف
عبير..ريم استخيري ربك والله يوفقك يارب ويكتب لك الخير

ظلت ريم أيام تفكر وخالد متوتر لكن اخيرا اعلنت الموافقه والكل انبسط وارتاح خالد وتحدت الملكه
بعد نهايه هالمستوى يعني بعد تقريبا شهرين ..

وفي بيت بو سعود كل البنات موجودين ومبسوطين ريوف تحاول تشوف رغد وتكلمها لكن
رغد ماكانت معها كان عندها احساس قوي ان فيه شئ تحس بقلبها مقبوض وكل ساعه تسال عن بدر
ويقولون ماوصل وجواله مقفل وعالساعه تسع دخلت نوف وهي مو عارفه شو تقول لرغد
نوف.....رغوده شرايك تنامين عند اهلي بنام عندهم انا
رغد وعرفت ان نوف تحاول تضغط على نفسها......لا ماابي بنام ببيتي
امل....وانا بنام بعد
ريووف.....وشفيكم
نوف....ولاشي نبي رغد تنام هنا
رغد.....ريوف اتصلي بسلطان اسأليه عن بدر ماشافه
نوف.....بدر بالبيت
رغد واستغربت....من يقول
نوف....سعود يقوله
قامت رغد ....بروح اشوفه
مسكتها نوف.....لا رغد خليك بدر
رغد ونزلت دموعها.....انا عارفه فيه شئ قولوا بسرعه
امل....رغد مافيه شئ بدر تعبان معه صداع
نوف....وانتي تعرفين هالصداع من زمان ماجاء لبدر وتعرفين كيف تكون حالته وانه مايحب احد يكون عنده
ريووف.....نامي هنا احسن انا اعرف بدر اذا كان معه هالصداع وبكرا ان شاء الله يصير بخير
رغد وخلاص مو قادر ومن بين دموعها......انتم تعرفون الي تتكلمون عنه وتعبان هناك من يكون هذا عمري
تعرفون شو يعني عمري وتركت يد نوف وطلعت بسرعه لبيتها
نوف وهي فعلا خايفه.....يارب الله يعين هالاثنين على الي بيجيهم
ريم....الحين رغد مانست الي صار شلون بتتحمل كلام بدر الحين
نوف..تعبت أنا مع هالاثنين والله هي تحبه وتموت عليه وهو مو قادر يفهم
ريوف.....رغد مهما حاولت تكون قاسيه او بارده بتعاملها مع بدر ماتقدر تخفي خوفه او حبها له
تأكدوا رغد حب بدر بقلبها راح يروض قلبه مافيه أحد يتحمل كل هذا الي قلب صادق بحبه
دخلت رغد للبيت وكان ظلام قفلت الباب وطلعت له للغرفه بالصاله حست بباب الغرفه مفتوح لكن الغرفه ظلام مافيه غير نور خفيف مرره لشمعه وقفت بالصاله بعدين قررت انها تشغل قرآن بصوت منخفض بحيث انه يعم ذكر الله بالبيت ويحس بدر بالطمائنينه شغلت القرآن
ودخلت للغرفه بكل هدوء جلست جنب بدر الي واضح انه مو نايم لكنه حاط ايدينه على راسه جلست رغد وبكل خوف من ردت فعل بدر
حاولت تعمل له مساج على الرقبه والراس خفيف لكن شوي ترتخي ايد بدر بعدين ترجع تشد على راسه وظلت تقريبا ساعتين على هالحاله
بعدها حاولت تعمل له كمادات بارده ببخل التفاح ورجعت تعمل المساج وظلت على هالحال الى الساعه ثلاث تقريبا الفجر ودموعها على
خدها لان الم بدر يعني المها وجعها وبعد ماتأكدت انه نام راحت ببدلت ملابسها وحاولت تنام لكن نزلت قبل تحت واخذت جوالها
الي حصلت فيه مكالمات من الكل وواضح انهم خايفين لان بدر ماكان يحب احد يتكلم معه
او يجلس معه ويزعجه كان يحب يجلس بالظلام والهدوء والتكييف بارد مره وهو معه صداع لكن هم نسوا ان رغد
من حبها لبدر قبل الزواج كانت تعرف كل شئ عنه اخذت الجوال وطلعت تنام وتوها مالها نص ساعه الا اذن الفجر صحت وصلت
وقفت عند بدر كسر خاطرها توه قدر ينام لكن قالت لازم يصحى لصلاة وحطت ايدها على كتفه
رغد...وبصوت هادي.......بدر بدر اصحى لصلاة الفجر
بدر وحس فيها لكن الالم مازال موجود هز راسه ورغد نزلت بسرعه وعملت كأس حليب دافي لبدر وطلعت حصلته يصلي
انتظرته وراحت جلست قريبه منه ....ماخف الالم
بدر ومايقدر حتى يقوم من مكانه حط راسه على ركبته ..
رغد...بدر حياتي قلبي انت اشرب هالكاس دافي وقوم سريرك وان شاء الله يخف يارب
اخذ منها الكأس وشرب شوي منه وساعدته رغد وجلست جنبه وعملت له كمدات من جديد لحد مانام بعدها عالساعه ست نامت

وعالساعه عشره الصباح صحى بدر وحس براحه لاول مره يجيه هالاحساس بعد الم الصداع كان يجيه الصداع
من فتره لفتره اذا كان ضاغط على نفسه بشكل كبير يحس بتعب كبير وصداع لكن له اكثر من سنه مارجع له هالصداع
لكن التفت وحصل رغد نايمه وشكلها تعبانه ابتسم وقال بخاطر ...والله مااستاهلك وتركها تنام على راحتها وبدل ملابسه
وراح لبيت ابوه ودخل ولاحصل غير امه وريم
بدر وهو مبتسم....السلام عليكم
الكل..وعليكم السلام
ام سعود..هلا والله ابوي شلونك الحين بشرني
ريم ...وتقول بخاطره الله يستر اول مره بدر اشوفه كذا لايكون طلق رغد
بدر..مثل ماانتي شايفه الغاليه مرتاح بس جووعان
ام سعود,,,ابشر ابوي ريمووه قومي هاتي فطور لاخوك
ريم ...ان شاء الله بس فيه سؤال بخاطري اجابته فيه ناس كثير تنتظرها
بدر.. الله شو هالسؤال المهم
ريم..رغد وينها لاتكون طلقتها
ام سعود..... ريمووه الله لايقوله شو هالحكي
بدر....هااي
ريم..أنا متأكده انت مو طبيعي اليوم
بدر..طبيعي ورغد نايمه
ام سعود..خير لاتكون تعبانه ماهي عادتها
بدر....مانامت الي متأخر وكسرت خاطري
ريم....احم احم
بدر....ه فهمت قومي هاتي لي شئ اكله
ريم..وهي طالعه ..رغيده تكسر خاطره وانا اتعب
بدر..اسمها رغد لو سمحتي
ريم..وهي تضحك ....طيب والله تطورات
الجـــزر العشرون
سوووووووري على التاخير

الجـــزر العشرون (( الأخــــــيـر ))

صحت رغد على أذان الظهر واستغربت لانها كانت ضابطه الساعه لكنها موقفه توقعت انه بدر
وابتسمت وصحت اخذت لها دش وصلت ولبست وراحت بيت عمها دخلت وسلمت عالكل ولاحظت ابتسامة ريم
رغد...خير ان شاء الله شفيك
ريوف....ه رغوده من اليوم وهي تقول عندي لكم مفاجأه تخص رغد
رغد....أنا ..؟؟
ريم...ايه
نوف....ريمووه ترى بهالمخده قولي شعندك
رغد ...اقول انا بطلع اشوف بدر واتطمن عليه
ريم.....ه ياعيني روحي عند امي بالمطبخ هو
ابتسمت رغد وطلعت وصادفها بدر عند الباب
بدر معصب ....بدري لا ارجعي نامي
رغد..تقول بخاطرها بسم الله .....الحين منو قافل الساعه
بدر...اي امزح معك نوم العافيه
رغد وهي مستغربه ...الله يعافيك انت شلونك الحين
بدر..مارد ظل يناظر رغد بأبتسامه ......
رغد ووجا صار احمر.....شفيكم اليوم بس تبتسمون ليه ماترد
بدر ....ومسك يدها ..تسلمين رغد وجودك معي امس كان دواء لي
رغد وحست انها بتمووت بمكانها ولا رفعت رأسها لكن بدر رفع راسها
بدر...رغد انتي عرفتي الاسم بجوالي
رغد وكانت ناسيه ....صح لا شو الاسم
بدر..كان ........بس بغيره بأسم ثاني اليوم
رغد...طيب شو كان
بدر...الحنونه
رغد...ولاول مره تحس انها ملكت العالم كله ....بروح اشوف خالتي
بدر....ه اوكي روحي لكن اسمحي لي اقدم لك شكري بطريقتي
ورفع يدها وباسها رغد من كثر مااستحت ماعرفت شو تعمل رجعت عند البنات واول مادخلت
ريم.... ماقلت لكم هذي المفاجأه شوفوها والكل ضحك لان رغد واضح عليها
نوف....رغد شفيك
ريووف....شفتي بدر
رغد.....لا بدلتوه مو بدر الي اعرف
وكان عند الباب...بدر....لا مابدلوه بس كان اعمى وفتح
رغد من كثر ماانصدمت انه سمعها ماقدرت تتحرك لكن بدر ماحب يحرجها اكثر تركها وطلع
والبنات مبسوطين اتصلت عبير وقالت انها بتجي عند ريم وانبسطت ريم والكل راح لبيته
ماظل غير رغد قالت بتروح ترتاح شوي وترجع وشافتها فرصه تكلم عبير بموضوع عبدالله ..
بعد ماارتاحت رغد
راحت رغد عند البنات وسلمت على عبير لكن هالمره بشكل مختلف نظرتها كانت فيه تدقيق وتقول بخاطرها
والله انها لايقه لعبدالله
رغد....عبير كيف المنتديات معك
عبير....اضيع وقت استفيد وابني امل واهدم امل
رغد....وليه تهدمين
عبير.....لان حياتي الظاهر مستحيل يستمر فيها اي شئ ابنيه
ريم..عبوره خلي عنك التشاءم
عبير وبأبتسامه .....بالتفاءل ابني حياتك وبالامل استقبلي
رغد وكملت عن عبير ....فجرك وبالحب ابدائي كل عطاءتك
عبير سكتت وريم استغربت من نظرة رغد ومن سكوت عبير
عبير وهي مستغربه ....منين عرفتي هالكلمات
ريم..اي كلمات انتي وياها
رغد وبابتسامه ......الي قالتها عبير وكملتها
ريم...ايوه طيب شفيها
عبير.....انتي تستخدمي النت رغد
رغد وتعمدت تلعب بأعصاب عبير....لا
عبير..طيب وين سمعتي هالكلام
رغد.....امل الحياة
ريم وعبير تفاجؤا من الاسم الي قالته رغد عبير نزلت راسها وريم ماعرفت شو تقول
ريم...رغد ماله داعي هالاسلوب
رغد قامت وجلست جنب عبير ورفعت رأسها ..... هذي الكلمات لامل الحياة اخوي عبدالله ياعبير
ريم.....شوووووووووو
عبير..اخوك رغد ..عبير لاتنزلي رأسك انتي بنت الكل يتشرف فيها واخوي لما ابتعد عن المنتدى
كان يبحث عن مصلحتك اول شئ لانه انسان يراعي الله بكل تصرفاته
عبير....شلون انا ماني فاهمه شئ
ريم..ولا انا فهموني
رغد وقالت لهم الموضوع من اوله عبير بالبدايه ماعجبها الموضوع لكن حست بالراحه لما عرفت
ان هالانسان مابنى الامل حتى يهده بحياتاه وانبسطت اكثر انه معجب بأخلاقها وحاب يتزوجها وانبسطت اكثر
ما قربت رغد التيلفون واتصلت على بيتهم وهي تكلم بالسبيكر
رغد....هلا عبدالله
عبدالله ..هلا والله
رغد..شلونك عبداله اهلي شلونهم
بدر.تمام الحمد لله بشريني عنك الغاليه
رغد .تمام
عبدالله ...دوم يارب
رغد ....تعرف عبدالله وحشتني قصايدك
عبدالله...كل القصايد لخاطر عيونك بس شرفينا
لرغد..لا سمعني الحين
عبدالله...ولايهمك الغاليه انا بحياتي كم رغد هي وحده الله يخليها نور حياتنا
رغد....تسلم لي اخوي حبيبي والله
عبد الله ..
حبيبي جيت لمصافح مواعيد الفرح بيديك...وجيت اعطي يمينك حب ماتدريبه شمالك
اشوفك واسمعك قبل اعرفك واشتاقلك وابيك ..واحس آمال عمري من عرفتك تشبه امالك
انا ماعشت قبل اعيش بااحساسك وقبل اجيك..حبيبي جيتك بقلبي ولو ماجيتك جالك
احاسيس كريمه وانت تستاهل كرم غاليك ..ترى لو مااشرقت شمسك وصل رحت اتبع ظلالك
يقولون العرب "دار بلا مغليك ماتغريك" ...واقول انك بليا حب كنك عايش لحالك
انا لاجيت اسولف عن شعوري قمت اسولف فيك ..وانا ادري رغم كل الشوق مامريت في بالك
دريت ان الغلا مثل القدر يرضيك لو يبكيك ..ولاينفعك بعلوم الغلا عمك ولاخالك
مابين الحلم والواقع يصيبك حظي ويخطيك ..متى تصبح نصيب الي وقف بآماله اقبالك
(( للمبدع سعد آل سعود "منادي" ))
عبدالله..وسلامتك
ابتسمت رغد لعبير لما نزلت راسها لكن هالمره لانها استحت من عبدالله
رغد..صح لسانك
عبدالله صح بدنك الغاليه
رغد...ماقلت لي هالقصيده بمن
عبدالله.... للي خذت من عقلي التفكير ومن قلبي الاحساس
رغد....الله عبدالله اقول الظاهر الوضع صعب عندك مرره
عبدالله...والله فيه وحده اسمها رغد قالت اترك كل شئ علي ولا الحين ماشفت شئ
رغد.... ان شاء الله حبيبي لاتقلق
عبدالله....ان شاء الله
رغد..اوكي سلم لي على اهلي
عبدالله...يوصل سلمي عالكل الله معك
قفلت رغد وابتسمت لعبير وهي طالعه وقلت..والله ياعبير اذا انتي من نصيب اخوي يابخته واذا هو من نصيبك يلبختك
طلعت رغد وتركت عبير تحكي لريم الي مو مستوعبه كل الي صار ماتعرف تبكي فرح او خوف او شو هالاحساس الي تحسه تجاه عبدالله الانسان الي بناء الامل بحياتها من جديد والي حاولت تقنع نفسها انه وهم ..

رغد راحت للبيت وظلت لحالها بغرفتها تفكر بعبدالله اخوها وبسلطان بريوف يالله بسرعه مرت الايام دخل بدر وحس ان رغد
شكلها كانت تصيح جلس جنبها
بدر....رغد فيك شئ
رغد حست انها قادره تهدي الحب للكل الا لهالانسان الي قبالها كل الحب يصده قلبه ومن غير احساس نزلت دموعها
حضنها بدر وقال..ليه ليه رغد هالدموع شفيك
رغد...ومن بين دموعها ...مالها سبب بس محتاجه ارتاح
ظل بدر معها لحد ماهدت شوي وابتسمت وقالت....غباء ان الانسان يصيح من غير سبب
بدر وبأبتسامه هالمره حنونه ...لا مو غباء بحياتنا تمر علينا ضغوط كثير ونجاهلها لكن تتراكم وبلحظه ما نتحملها
بدر..يالله رغد ماابي اشوف دموعك مع ان عيونك حلوه وهي مليانه دموع
رغد من الصدمه مارفعت راسها معقوله هذا بدر اليوم مو طبيعي لكن بدر مااعطاها فرصه تستوعب هالكلام رفع راسها بيده
بدر...لكن من غير دموع احلى يالله قومي غسلي وجهك وخلينا ننزل نجلس تحت
رغد وم غير تركز هزت رأسها وراحت تغسل وبدر نزل للمكتب تحت

....رغد بعد ماغسلت وبدلت ملابسها نزلت لبدر حصلته بالمكتب وقفت عند الباب تتأمل
بدر وهو ماهو داري عنها ظلت عشر دقايق وهي واقفه ولو قالوا لها اجلسي طوال اليوم بتوافق رفع رأسه
بدر فجأه وحصلها وظل هو كمان يناظرها ولانزل عينه لكن رغد بالاخير انتبهت لانها مسافره بصوره
زوجها وحبيبها وولد عمها
رغد....بروح اعمل لك عصير
ابتسم بدر وعرف انها تهرب من هالاموقف لان وجها صار لونه احمر ورجع يكمل شغله

مرت الأيام ورغد بلغت عبدالله انها قالت لعبير وانها طلبت مده تفكر وتتخذ قرارها اما رغد كانت متوتره خايفه
وقالت مالها الا ريوف راحت لبيت اهلها عند ريوف وقالت لها
رغد....ريوف تعرفين بعدين يومين شو يصادف
ريووف ..وتحاول تتذكر شو
رغد....ذكرى زواجنا
ريووف...صح الله شو بتعملي
رغد....خايفه
ريووف واستغربت....من شو رغد بدر تغير كثير
رغد...ريوف انا انصدمت كثير من بدر قبل زواجي وبعد زواجي تحملت كثير ولااتوقع ان استهتاره بمشاعري
بهاليوم راح تكون سهله يمكن تكون نقطة النهايه
ريوف....لا رغد مهما كان بدر مو قاسي او اناني
رغد....آه ياريووف لو اقولك ان كل تصرفات بدر والتغير الي تشوفونه احسه مو من قلبه من باب الواجب بس
يبتسم لي يواسيني يهتم فيني اذا تعبت يعني بمواقف احس الواجب هو الدافع لتصرفه لكن عمري ماحسيت بمبادره
صادقه منه كلمه او حتى نظره يعني لازم فيه سبب انه يقول تسلمين او يبتسم اخاف ياريوف اخاف
ريووف....رغد نسيتي الصندوق الصغير للحين عندي مو قلتي اول هديه بذكرى زواجكم بتكون الصندوق بكل الي
فيه للحين حافظه لك هالصندوق عندي
رغد ..ريوف هالصندوق كنت احلم اهديه بدر واقول له اقرأ احساسي لكن الحين تغير كل شئ
ريوف...يعني هالصندوق ارميه
رغد وسكتت فتره بعدين قالت ....لا عطيني الصندوق وبعتبرها اخر محاوله ياتصيب او تعلن الفشل النهائي
ريوف.....رغد وربي احس بدر يحبك
رغد...الكل قدر بدر يوصل له احاسس انه يحبني الا أنا

اقتنعت رغد انها تعمل اخر محاوله وبيوم الثلاثاء الي هو يوم الذكرى لزواجهم رغد كانت خايفه ومتوتره
بدر صحى مثل العاده وطلع ورغد بدت تحضر بيتها ونفسها وكل ترتيباتها لكن انصدمت عالساعه تقريبا
ثلاث بمسج من بدر يقول" رغد احتمال اتأخر لخمس او اكثر"
رغد لحظتها بكت حست انها فشلت لكن قالت لا بتكمل الشئ الي بتدت فيه واكيد عالمغرب بيوصل
وتابعت تجهيزها ..

والحين بنروح لبدر بالمكتب الي انتهى دوامه من الساعه ثلاث ومازال موجود للحين والساعه عالسبع
المغرب ....بدر كان واضح انه مرهق وتعبان ومحتار ..
خايف من هاليوم كان متاكد ان رغد تنتظره وان اليوم ذكرى زواجهم وهذا سبب له خوف كبير
كان خايف من مشاعره وكان متردد من احساسه مايعرف شو يعمل او شو يقول خايف يقولها الحقيقه
وتزعل او يسكت وتزعل لازم يوضح وهالتوضيح اتعبه ظل بدر على هالحال لكنه عالساعه ثمان اتخذ قراره
انه يرجع البيت ويقولها كل شئ ولا فكر حتى يأخذ لها اي هديه لانه يعرف بعد الكلام الي بيقوله مابتقبل شئ
ولاتقبل اي هديه لكذا قرر مايأخذ شئ ..

ريوف كانت خايفه من الي بيصير لانها شافت رغد وكيف هي ضاغطه على نفسها لكنها ظلت تدعي من الله
انه يحنن قلب بدر ولايذبح هالبنت الي حبته من عشر سنوات حب حقيقي صادق

رغد والساعه تسع بالليل ومع كل دقه لثواني الساعه تتزل دمعتها جلست بالصاله وحضنت دبدوبها وبدت تبكي
من جيديد .. وهي قررت اليوم تنهي هالزواج الي ابتداء العام بنفس اليوم وفشل
تسع ونص بعد تردد دخل بدر للبيت ولاحست عليه رغد عند الباب انبهر البيت تغير فيه شئ كله ورد طبيعي
وعند الباب دبدوب صغير يحمل استاند لكن واضح ان البطاقه مو موجوده تقدم ودخل وحصل عالطاوله باقة ورد
ابتسم ودخل بهدوء لصاله الي انصدم من اكثر من شئ فيها اولها اللون الاحمر الي غلب عالصاله وبعدين
من رغد الي تبكي ولاهي حاسه فيه والاكثر الاغنيه الي كان صوتها عالي
يعني بطفي الشمعه وحدي
آه لو تدري بشعوري غيبتك تنهي حضوري .
.وغرفتي تنسى وجودي رغم انها امزينه
هذي ليله في السنه
ادري لو كنت اتغلى والا ناوي تعتذر....
جيتك تسوى حياتي ياللي مابعدك عمر
انا مازعلت عينك لو نيسيت اسأل حنيني..
بس ابيك الليله يمي لو الأماني ممكنه
هذي ليله بالسنه
كل اصحابي بقربي شفتهم الا انت لا ...
دمعتي تسأل عيوني وين الي قلبه سلى
ماابي كل الهدايا فرحتي وأنت معايا ..
صرت ادور عن وجودك في كل ورده ملونه
وهذي ليله بالسنه ..
وقف بدر مكانه وهو يسب نفسه كيف قدر يعذب رغد كيف وفجأه انتبت له رغد وقامت بتطلع فوق لكنه مسكها
رغد ومن بين دموعها ....خلاص كل شئ انتهى
بدر وبأبتسامه....لا ياعمري كل شئ ابتداء
رفعت رغد راسها ...ابتداء ..الم جديد او دموع جديده او
قاطعها بدر....رغد والله احبك
ابتسم بدر لرغد الي غمضت عيونها وواضح انها مسكت بدر حتى تتمالك نفسها
رغد..تحبني ..؟؟
بدر...ايه رغد احبك صدقيني مهما حاولت اني اقاوم هالاحساس الله يشهد اني احبك وانك الفرحه بحياتي والامل
رغد كابرت حبك سنه كامله جمدت احساسي سنه لكن حبك اقوى مني حنانك غلبي ملكني قلبك احتل قلبي مهما
قاومت او رفضت
رغد............
بدر..رغد وربي مابسمح بعد اليوم تزل دمعتك وانا موجود ومسح دمعهتا
رغد. ومن بين دموعها ...بدر سنه كامله نزلت حزن خليها اليوم دمعة فرح هذي
بدر.....حبيبي انتي سامحيني عالالم الي سببته لك
رغد رفعت راسها وقالت.....بدر تعال اجلس هنا واسمعني
بدر....لا رغد انسي كل الي كان وخلينا نعيش الحياة من اللحظه هذي
رغد....لا حبي ارجوك اسمعني وجلست هي وبدر
رغد....بدر انا من كنت صغيره كنت اسمع ان رغد لبدر وبدر لرغد عمر مااحد قال لي انه هذا ممكن مايصير
بالعكس الكل كان يأكده عمي خالتي خواتك اهلي الكل واثق من هالشئ كبر هالشئ معي بديت احلم فيك
اتصور حياتي معك وبديت افكر بكل شئ حتى بكلامي معك انتظرك اذا تجي بيتنا من تدخل لحد ماتطلع ماكنت تدري عني
لكن قلبي يقول لي انه يعرف اني موجوده هنا الانسانه الي بيتزوجها واكيد يكن لها مشاعر ولو بسيطه
بعد ماسافرت اسأل ريوف عن دموعي يالله لو العين تحكي لنطقت وقالت خلاص كفايه سبع سنين قضيتها برا
وبكل يوم ابكي فيه مليون مره احسك بعيد بعيد مااقدر اتطمن عليك لكن مرت الايام والامل بداخلي يكبر
اني انا الي بتزوجك وبكون الانسانه الي تهديك السعاده وبعد الخطبه فرحتي تكفي العالم صح خفت لما طلبت
تشوفني لكن قلت حقه ولازم هالشئ وشفتك بوقتها ماحسيت ببرودت نظرتك لاني كنت بعالمي عايشه متصوره
انك مثلي اوهمت نفسي انك تحبني لكن ( وهنا وقفت رغد ) قبل الزواج بعشر ايام انصدمت كل الحب بداخلي انجرح
حسيت ان حلم سنين من عمري تبخر لما اتصلت الظاهر بالخطأ ووقتها كنت تتكلم مع نوف والظاهر انها تعاتبك
لانك ماجيت عندنا بأيام الملكه ( بدر عاقد حواجبه ومركز بيسمع شصار بعدها) سمعت ردك الي ذبح فرحتي اغتال بسمتي
وزرع الخوف والرفض منك بداخلي تعرف بدر شقلت ..نوف انتي تعرفين اني وافقت على هالزواج عشان خاطر ابوي وعماني والا انا ماني موافق خلاص مو كفايه نفذت لكم كل الي تبون لاتطالبوني بشئ ثاني ..انا قلت لك انا مااااابي رغد ولاابي اظلمها معي وانت مافهمتوني لاتطلبون مني شئ مااقدر عليه ..( بدر نزل راسه وضرب بيده على رجله) بوقتها ماكنت اقدر ارفض او انهي الزواج
كان مستحيل احد يوافق لكذا ماكان عندي الا الاستسلام لهذا الواقع المر الي قلب فرحتي حزن والتفت لبدر وقالت
لكذا قررت اخذ حبوب مو لاني مااحبك او ارفضك اخذتها لا اخذتها لاني خايفه من حياتي معك خايفه من رفضك لي
خايفه اني .....وسكتت وقام بدر لها
بدر...لارغد ارجوك لاتقوليها كنت مغفل ضيعنا سنه من حياتنا انتي تتألمين وانا اكابر احساسي تجاهك صح أنا الغلطان
لكن لو قلتي لي من الاول كان اقولك اني ماتزوجت حتى اطلق صح رفضت المبدأ وحملتك مسؤلية رفضي لكن
رغد خلاص انسي الحين كل شئ واضح وهذي غلطه علمتنا اننا مانخبي شئ
عن بعض ونواجه بعض مهما كانت الظروف ابتسمت رغد وقالت ...لحظه واخذت الصندوق وجلست هي وبدر
رغد...افتح هالصندوق بدر هذا الصندوق هديتي لك سنين حبي جمعت لك من بعض ثوانيها هديه قررت تكون
هدية ذكرى زواجنا ..
ابتسم بدر واخذ الصندوق ورفع عينه لها...قبل ماافتحه اتمنى تكون حياتي معك كلها سعاده رغد كل سنه وانتي حبي
رغد ضاعت كل الحروف منها ماعرفت شو ترد وسكتت وبدر فتح الصنودق وتفاجئ من الي بداخله
بدر...رغودتي هذي مناديل
رغد بأعذب ابتسامه....صح لكن افتح كل منديل
بدأ بدر يفتح المناديل ويقرأ كل منديل يحمل تاريخ وذكرى لكن الي يجمع بينهم انها ذكرى لبدر متى بكت رغد لتعبه
او وقت ماسافر او وقت رجعته او حصوله عالشهاده ومع كل منديل كان بدر يبتسم او يضحك وبعد ماانتهى
بدر وبنظره كلها مشاعر....سامحيني رغد
رغد....بدر مو قلنا ننسى خلاص ننسى
بدر.....رغودتي بسألك سؤال محيرني
رغد....اسأل عمري
بدر....رغد هالسلسال تقريبا يوميا عليك شو يعني لك
ابتسم رغد وشالت السلسال من رقبتها واعطته بدر...
رغد....حاول تتذكر
وظل بدر يتأمل السلسال ....مااتذكر
رغد....من اربع سنين قبل اخر سفره لك بالمزرعه اعطيت ريوف هالسلسال وقلت لها انك حصلت عالارض
وكان لي ولان يدك ضمته صار يعني لي ولا صرت استغنى عنه
بدر وبأبتسامه ....رغد انتي مجنونه
رغد. وبخجل ...بحبك
بدر.. والظاهر بتجننيني بحبك ...انزين مابتخليني اعطيك هديتي
رغد وتتلفت باغرفه....وينها
بدر... هديتي غير
رغد....طيب
بدر...هديتي كلمه وحده وظل يتأمل رغد بعدين قال ....أحــــــبك
ابتسمت رغد واستحت ....اغلى هديه بحياتي
وبكذا ارتاح بدر لانه اعطى مشاعره الحريه بالتعبير وريح الانسانه الي حبته ومازالت تحبه وانتهت الليله عليهم حلوه
وكأنها ليلة زواجهم مو الذكرى ..

بالصباح اتصلت ريوف وبشرتها رغد بتغير بدر والي صار وفرحت ريوف من كل قلبها لكن ماامداهم يفرحون
الا وصل لهم خبر كدرهم وبالاخص عبدالله توفت الصباح جدة عبير الي ساكنه عندها واول ماوصل الخبر لريم
راحت عندها وكل البنات وام سعود راحوا لها لان عبير من زمان تعرفهم ويعرفونها وكانت عبير منهاره مو قادره
تستوعب الي صار كيف تعيشش بعد جدتها كيف وظلت عبير تعاني وتتعذب وعبدالله يتطمن عليها من رغد ومرت ايام العزى سريعه
وانتقلت عبير لبيت خالها وهذا الشئ الي ماكانت تتمناه ابدا لكن ريم اصرت عليها تجي عندها العصر تغير جو
ووصلت عبير والحزن واضح على وجا حاولت ريم ورغد وكل البنات انهم يطلعوها من حزنها لكن وين يقدرون
هالانسانه فقدت الامل من جديد
ريم....عبير لاتكوني متشاءمه حرام عليك
وهنا دق جوال رغد ولاول مره تعملها رغد ردت من غير مااحد ينتبه
عبير ولاحست بشئ على طول قالت
...لماذا بعد الفراق ..نبحث عن صديق يفتح لنا ابوابه
عن انسان يجيد استقبال احزاننا في محطات قلبه ..
نثرثر له بهدوء الموتى..وربما بحماسة الثائرين ..
ننزف تفاصيل الحكايه امامه ..ننثر علامات الاستفهام بوج ..
لمذا بعد الفراق ..نمتلئ بالخوف المريع
لاننصت سوى لصوت انيننا ولانشم سواء رائحة الحزن المنبعثه من اعماقنا
ولانتذوق سوى أدمع خلفتها التفاصيل النهائيه لحكايه كانت جميله
لماذا بعد الفراق ..نمارس كل أنواع الموت
فنموت اختناقا
ونموت رعبا
ونموت حزنا
ونموت ندما
ونموت غربه
ونموت وحده
ونزور كل مدن النهايات ..؟؟ ( كتابات عبير بالقصه جميعا للكاتبه المبدعه شهرزاد )
التفت عبير والكل يسمع لها ..تحبون تعرفون ليه
لاني فقدت الأمان فقدت امي وابوي واحتضنتني جدتي ربتني علمتني
اعطتني كل شئ ماقصرت معي حتى براحتها ومن سنوات طاحت مريضه
سهرت عندها بكيت عندها وتحت رجولها كان لوجودها راحه وهيبه لوجودها
حنان ورحمه والحين ماتت ماتت ورحت عندهم لو اموت بغرفتي مااحد عرف خالي
طوال وقته بالشغل ومرته عمري ماشفتها بالبيت وعيالهم برا يدرسون لاتطلبون مني
شئ الامل مات معا مات مات مات وبدت تبكي هنا قفلت رغد الخط
وراحت ريم واحضنت عبير الي كانت تعاني من فقدان الامل
طلعوا البنات وتركوا عبير مع ريم حتى تأخذ راحتها اكثر
وعلى طول اتصلت رغد بعبدالله
عبدالله ...هلا رغد طمنيني
رغد...البنت معذوره الي صار مو سهل
عبدالله...ادري هي كيفها الحين
رغد...متكدره متضايقه حاسه بالغربه
عبدالله...رغد كلميها
رغد..بشوو
عبدالله ...قولي لها بخطبها
رغد...عبدالله انت صاحي
عبدالله....اكون مجنون اذا اشوفها كذا واسكت باي
رغد..عبدالله اسمعني
عبدالله...باي رغد
سكر عبداله وابتسمت رغد وقالت الله يوفقكم لانها تعرف عبدالله مايتمنى اي شخص يعزه ويحبه
يتألم فكيف بالانسانه الي اختارها قلبه وعقله

عبدالله على طول طلع لشركه وكلم ابوه وعمانه الي عارضوه لان البنت جدتها مالها اسبوع متوفيه
عبدالله...معكم حق ادري لكن لهذا السبب انا بخطبها
ابو خالد...عبدالله انت تعرف البنت
عبدالله...هالبنت كلمتني رغد عنها قبل واتفقت معها اني بخطبها لكن القدر ان جدتها تتوفى
ابو سلطان..طيب ياابوي اصبر والا شرايك ياابو سعود
ابو سعود....لا بنخطبها لها ونقول لخالها اننا نبيها ونعرفها من زمان البنت ربيتها مع بنتي
ولاابي احد غريب يأخذها وهي يتيمه وبنت اصول ومتربيه
ابو سلطان..والله يااخوي انت تعرف خالها زين واذا تشوف انه مابيأخذ على خاطره نتوكل على الله
وفعلا راحوا لخال عبير الي ماعارض الزواج ابدا لكن الي انصدمت عبير كيف تتزوج وجدتها توها متوفيه
رفضت لكن ريم اقنعتها بأن عبدالله هو الامان بعد الله ثم فقدان جدتها ووافقت بشرط انها ماتعمل زواج
ووافق عبدالله وقال ....مو مهم الزواج انا لو عملته بعمله لها لخاطر ادخل الفرحه بقلبها واذا كان بيكدرها
لا أنا الي يهمني انها تكون معي
وضغط عبدالله على عبير انها بمدة شهر تكون جاهزه ويتزوجون لكن الغريب هنا ان عبدالله ماشاف عبير
ولما حاولت رغد انه يشوفها قال لها ..الجمال شئ رائع لكن ماخلف الجمال هو الاروع وأنا توصلت
لما خلف الجمال لما اتراجع لارى الجمال ..
رغد.... عبدالله حرام عليك بتذبحني
وتزوج عبدالله وعبير واهدى عبدالله عبير السعاده لما بناء الامل بحياتها لغرض البناء مو الهدم وقدم لها
اسمه وحبه وقلبه وصدقه وثقته ..واعطته عمرها وسعادتها وحياتها كلها ملك ايده

اما ريم فرفضت ان زواجها يكون الحين وقررت انه يكون بنهاية السنه وانقهر خالد منها لكنهم نفس الطينه
وقدروا يتفقون ومرت الايام بسرعه وتزوجت ريم وخالد وكانت الحياة حلوه وتلاشى خوف ريم لان خالد
كان مختلف بأسلوبه لكن اسلوبه هو الصح لكذا قدر يرسم الخطوط الصحيحه لحياته مع ريم ..

باقي شخصيه كان لها تأثير كبير على حياة رغد وبدر ....لمى انخطبت وتحدد زواجها وراحت رغد لزواج
ولما طلعت تسلم عليها
لمى...زلاتوقعين اني تزوجت اني بتركك بحالك
رغد...اولا مبروك والله يوفقك وثانيا انا ماخفت منك وانتي بنت وقلت لك اذا يحبك حلال عليك وبخاف وانتي متزوجه
لكن بقول لك كلمه الحين انتي بينك وبين زوجك ميثاق غليظ الله الشاهد عليه صونيه ولاتحاولين تهدمين حياتك
نزلت رغد وتركت لمى بحالة ذهول من كلامها وشوي طلبت من مها تنادي رغد ولما وصلت لها رغد
لمى...شكرا رغد لانك ذكرتيني ان الله شاهد علي شكرا لانك قدرتي بكلمه تنبهيني شكرا رغد وسامحيني لاني
رغد قاطعتها ...الله يسامح الجميع والله يوفقك

اما نواف قرر انه يكلم امه وتخطب له مها الي عجبته من كلام خواته وحس انها تناسبه ..

وبكذا قدر بدر يعطي رغد الحب بعد مااعطى مشاعره الحريه وقدرت رغد تحضن السعاده بعد الصبر

وبالغرفه رغد تكلم امها دخل بدر بيأخذ اوراق نساها وهو طالع لفت نظره عليه عالطاوله قرب
واخذها والتفت على رغد وقال
بدر...انسي موضوع هالحبوب ابي رغوده صغيره
ابتسمت رغد وابتسم لها بدر وطلع يكمل شغله وهو كله وله وشوق للانسانه الي اهدته السعاده ..


هنا ينهي الجزء




## مــــــــــا بــــــعــــد النـــــهايــه ##

بنهاية القصه أحب ان اوضح للجميع أن المحرك الأساسي هو الاحاسيس والمشاعر
بمعنى الاحداث تتطور بمساحة
المشاعر لذلك نرى هدوء بالقصه لانها تتحرك بالاحساس وليس بالاحداث والمواقف والازمات ..
والأن اسمحوا لي توضيح لبعض أبطال القصه ,,,

# بـدر # انسان متعلم مثقف رجل يعتمد عليه لكن للأسف مع هذا قيد مشاعره واحاسيسه ولم يعطيها
المساحه المطلقه لتعبير وانما جعل اعتبارات وحواجز تتحكم بها وتقيدها ..
والنتيجه عذاب له ولزوجته وضياع من عمره سنه كامله
الشئ الثاني تجاهل كلمه الاهل بأن فلان لفلانه وهذا خطا بل لابد أن يكون لنا مواقف واضحه
وايضا الأهم من هذا انه حمل خطأ الاهل زوجته وهذا الخطأ الاكبر ..

# رغد # انسانه رقيقه صادقه بمشاعرها اعتبرها مثال رائع لشخص المحب المعطاء الذي يضحى
ويتنازل من أجل حبه طالما هذا الحب بالأطار الصحيح دينيا واجتماعيا ( الزواج ) حاولت أن توضح حبها
من خلال بعض التصرفات زلكنها اغفلت نقطه مهمه لكي يصل الحب كما نشعر به لابد
أن نستخدم جميع الحواس قولا وفعلا ونظر ....الخ
ايضا رغد اخطأت لمرتين الاولى عندما حاولت أن تسكت عما سمعت من بدر ولم تواج بل كتمت
هذا الشئ وقد اثر كثير عليها ..
المره الثانيه عندما تخذت اسلوب الهجوم وهي لاتملك دليل من كلام لمى فكانت النتجيه غير مرضيه
لذلك ليتعلم الأزواج أن العلاج الصحيح للمشكله علاجها بالمواج والهدوء واعطاء جميع الاطراف ا
الحق بالدفاع عن نفسه ..

# سعود # شخصيه عكس بدر تماما وهذا الشئ تعمدت ان اوجده بالقصه والفرق واضح بين علاقة
سعود بزوجته وعلاقة بدر برغد رغم ان الطريقه واحده يالزواج لكن سعود اعطى نفسه الحريه بالتعبير
بعكس بدر..

# خالد # شخيه مختلفه عن الشخصيات وهي عكس بدر فهو رفض الزواج على طريقة الاباء وصرح بهذا
الرفض بعكس بدر الذي لم يهتم وعندما اصبح الكل ينتظر موعد عودته لزواج رفض ..

# عبير # انسانه لها ظروف خاصه ذكرتها لوصل شئ واحد أن هناك فتيات فرضن احترامهن بهذه الشبكه
واستخدمنها لاغراض خاصه بهم

# عبدالله # الشخصيه الحالمه والتي احترمها كثيرا تصرفاته يحركها الحب الصادق والنيه الحسنه ذكرته
لاوصل مفهوم مهم وهو لاتعلن الحب لطرف الأخر الا اذا تأكدت من هدفك من هذا الحب وراعي الله بأختيار
الهدف بعدها اعلن الحب ولايكون همسا بل بصوت عالي امام الجميع واجعل الله شاهدا عليه وجميع الخلق ..

بالنهايه أحببت ان اوصل شئ مهم ..الحب عطاء لكنه لابد ان يكون بجميع الحواس
الثقه بالحب وهذا الشئ مهم جدا اذا تحب شخص اعطيه الثقه لتخفف المشاكل الكثير بسبب التذبذب
مابين الحب او الواجب .
الاختلاف لايعني الكره بل التقرب بمحاولة الاتفاق ..


انــــــــــتـــــــهــــــت..’’’’’’’
تحرمونا من الردود الحلوة
وإضافة التقييم
.....................تابعو المواضيع الجديدة .........................................

يسلمووووو على القصة

يعطيكى العااااااااااافيه على القصه الراااااااائعه

يسلموووووووووووووووووووو على المرور

السلام عليكم ورحمة الله وبركاته
الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين
بارك الله بك , شكراً أخي الكريم
تقبلوا خالص تحياتي
أختكم أمورة