العيـد حـل وكـل هـمٍ طرالـي

العيـد حـل وكـل هـمٍ طرالـي
سهرت ليلي والمخاليـق ساليـن

كتمت سري ليـن بـان انفعالـي
واصبحت انا ماميّز الزين والشين

جاني خبر والقلـب زاد اشتعالـي
جابوه نـاسٍ بالصداقـه وفييـن

سألت قالو وش يفيـد السؤالـي
راح الحبيب اللي تحبه من سنيـن

قلت اذكـر الله لاتزيـد انشغالـي
خلك ثقيلٍ واترك المـزح ياشيـن

حلف يمين وقال يابـن الحلالـي
ماقلتلك غير الذي شفـت بالعيـن

والله يابو سلطان لو منت غالـي
ماكان جينا تالـي الليـل عانيـن

حاول امورك كان فيهـا مجالـي
كلـم اهلهـا دام عنـدك قريبيـن

وعرفت منهم موعد العرس تالـي
في شهر سبعه يوم تسعه وعشرين

ظاقت بي الدنيا وانا كنت سالـي
وتوقفت دقات قلبـي مـن البيـن

سبة زمانٍ جـار فينـي ومالـي
وقتٍ ظلمني وزود الهـم هميـن

جينا لابوهاوقـال هـذا محالـي
ماأعطيك بنتي لو تحبك من اسنين

هذا الذي تبغاه صعـب المنالـي
ماني مزوج واحدٍ عـاش بالديـن

بنتي تربـت بيـن عـز ودلالـي
ماتحتمل عيشة فقارى ومساكيـن

قلت اعترف.مافيه عندي حلالـي
ولاني من اللي يملكون الملاييـن

المـال دايـم عرضـةٍ للزوالـي
ولايبقى الا راعي الخلق والديـن

دنياك هاذي لـو صفتلـك ليالـي
اعلم ترى دنياك تمشي بوجهيـن

لاتحسب ان العوز عيب الرجالـي
العيب لامن قيـل عنهـم ردييـن


عايش على المقسوم مرتاح بالـي
وعندي غناة النفس تسوى بلايين

كنت احسب اني عندك اليوم غالي
لاكن حسافه صارو الغير غاليـن

نسيتني واغليـت واحـد بدالـي
وارخصتني من شان ناسٍ بعيدين

طاوعتبي هرجـة قفـا وافتعالـي
وفشلتنـي قـدام نـاسٍ كثيريـن

حطمتني واشقيت قلبـي وحالـي
وخليتني عايـش وحيـدٍ بناريـن

مابك رحم قلبك من الحب خالـي
حطمت نـاسٍ دون ذنـبٍ برييـن

أول رحـوم وينظربّـك مثـالـي
اليوم جاك القطع يالعفن من ويـن

مابـي نسبكـم جعلكـم للهبالـي
لو ان غلا بنتك من الموت يحيين

خايف عفنكم ينتقل فـي عيالـي
والحمد لله يوم بينـت لـي زيـن

حنا الحرار اللي نـروم المعالـي
نلقى من احرار الحمايل شياهيـن

منقول آمل ان تعجبكم

الهائل

الموضوع الاصلي  من روعة الكون