{ نهاية حبك إعدامي } ...(قصة مميزة.. الإدارة)

رجعت الريم من المدرسه .. وقالت لها امها ان فارس اتصل كان يبيها .. بس ما قالت لها انه يبي غرض له من غرفة اخوها محمد ..
الريم باستغراب: يمه فارس اتصل يبيني ..
ام محمد: اي يمه .. عاد قلت له انج فالمدرسه .. وقال بيتصل العصر ..
الريم " فارس يبيني .. شو يبي فيني ؟"
ام محمد: يلا يمه بدلي ملابسج وتعالي تغدي ..
الريم: مابي اتغدى ..
ام محمد: ليش يمه؟
الريم وهي رايحه: كلت فالمدرسه ..
ام محمد: زين يمه .. اللي تشوفينه ..
راحت الريم الغرفه وكل تفكيرها بمكالمة فارس ..
الريم" ياربي شو يبي فارس .. ؟؟" بدلت ملابس المدرسه وطلعت كتبها عشان تحل واجباتها ..
مر الوقت ولا حست بنفسها من كثر ما كانت مندمجه مع الكتب .. الا الخدامه اطق عليها الباب ..
الخدامه: مدام ريم ..
الريم: نعم ..
الخدامه: ماما يقول تعالي في تلفون ..
الريم تركت الكتب وبسرعه نزلت " اكيد فارس "
اول ما وصلت الصاله خذت السماعه من يد امها من غير من غير حتى ما تسألها من المتصل ..
الريم: الووو
فارس: السلام عليكم ..
الريم ويها صار احمر: عليكم السلام ..
فارس: شحالج الريم .. شو مسويه ؟
الريم: الحمدلله طيبه ..
فارس: اليوم طالعه مكان؟
الريم مستغربه وزاد ارتباكها: لا .. لالا مو طالعه مكان ..
فارس" شو فيها متوتره": زسن بامر عليج عشان اعطيج التلفون اللي قالج عنه محمد ..
الريم بخيبه: اي التلفون .. زين الساعه كم بتمر؟
فارس: الساعه 6 ان شاء الله .. ويقولج محمد جهزي له ثياب .. والتلفون هو مخزن فيه رقم واحد بس .. وحاطه على الصامت .. تحملي تتعبثين فيه .. ويقولج خشي الجوال لاحد يشوفه عندج ..
الريم: ان شاء الله .. في شي ثاني بعد ..
فارس: لا لو في شي .. بيتصل لج محمد على الجوال ..
الريم تنافخ: زين ..
فارس " شو فيها ذي؟": يلا مع السلامه ..
سكرت قبل ما يخلص فارس كلامه ..
فارس" يه .. شو هالحركه بعد "
اما الريم سكرت وهي مقهوره .. على بالها ان فارس متصل يبي يقولها شي .. او يبين اعجابه فيها لانها اكبر بنات عمه ومن زمان ما شافوا بعض ..
الريم " مالت عليه .. متصل يوصل لي رساله من محمد .. على بالي متصل يبي يسمع صوتي "
راحت واحلام المراهقه في بالها عن فارس .. عشمت نفسها بحبه لها ..
الريم " لا اكيد هو قال لمحمد انا بتصل .. عشان يسمع صوتي .. فديته "

طلع عبدالعزيز من المحاظره .. سلم على ربعه وركب السياره محرك بيروح البيت .. مر خذ له كرك على دربه واتصل بيوسف ..
عبدالعزيز: حيالله الغالي ..
يوسف: هلا والله بوسعود ..
عبدالعزبز: شحالك ؟
يوسف: طيب الله يسلمك ..
عبدالعزيز: آمرني بوخليفه ..
يوسف: السموحه وترتك ..
عبدالعزيز: يعني مو وايد ..
يوسف: ه .. زين بوسعود بغيت في شغيله صغيره عشان الاهل ..
عبدالعزيز: عيوني لك والله ..
يوسف: اختك الكبيره تدرس لغه انجليزيه فالجامعه صح ..
عبدالعزيز: توأمي .. اي تدرس انجليزي ..
يوسف"ايه عليها": الله يسلمك اختي ماخذه مواد اختياريه .. و عندها بحث .. بس ماعندها فكره عن الماده جديده عليها .. وتبي مساعده في البحث ..
عبدالعزيز: ولا يهمك .. اكلم اختي اليوم .. بس عطني اسم الماده واخليها تجهز لها كل شي ..
يوسف: ما تقصر فديتك .. بس انا بجيب لك الكتاب واختي مخططه على اللي تبيه ..
عبدالعزيز: صار الغالي ..
يوسف: بامرعليك المغرب .. بنطلع وبعطيك الكتاب ..
عبدالعزيز: ولا يهمك .. نتلاقى المغرب بأذن الله
سكر يوسف وهو على اعصابه " الله يسر "
وصل عبدالعزيز البيت العصر .. وهو يتغدا فتح الموضوع مع فاطمه ..
عبدالعزيز: فطامي .. اليوم باجيب لج كتاب اخت رفيجي تبي منج مساعده في الماده اللي ماخذتها
فاطمه: اي ماده؟
عبدالعزيز: مادري .. بس هاي ماخذه ماده اختياريه وعندها بحث ومو عارفه تسويه .. تقدرين تساعدينها ..
فاطمه: من عيوني .. افا عليك
عبدالعزيز: جزاج الله الف خير اختي ..
فاطمه " يا ترى من يكون صاحبه ذي "
كمل عبدالعزيز غداه وفاطمه كانت معاه تسولف .. ودخلت عليهم مريم ..
مريم: بالعافيه عزيز ..
عبدالعزيز: الله يعافيج ..
مريم: فطيم .. حاسه بخوف ..
فاطمه التفت عليها: خوف .. من شو خايفه ؟
مريم: مادري .. بس متورتره ..
عبدالعزيز: مسويه شي ؟
مريم: لا والله .. بس متوتره و خايفه ..
فاطمه: وووي .. بسم الله ..
عبدالعزيز: زين قومي صلي ركعتين وان شاء الله تهدين ..
مريم وهي رايحه: ان شاء الله ..
التفت فاطمه على اخوها: شو فيها مرايم ..
عبدالعزيز: مادري .. روحي شوفي اختج ..
فاطمه: ان شاء الله .. طلعت ورا اختها .. وهي رايحه رن تلفون البيت .. وراحت ترد
فاطمه: السلام عليكم ..
ام محمد: عليكم السلام .
فاطمه: هلا مرت عمي ..
ام محمد: شحالج يمه ايمان ؟
فاطمه: الحمدلله .. بس انا فاطمه مو ايمان ..
ام محمد: ه .. اصواتكم تتشابه ..
فاطمه: ه .. آمريني مرت عمي ..
ام محمد: الوالده موجوده ..
فاطمه: اي .. لحظه اناديها لج .. راحت فاطمه تنادي امها .. وبعدين راحت عند اختها ..
دخلت الغرفه وكانت مريم تصلي .. قعدت على السرير وتنتظرها تخلص .. سلمت مريم والتفت على اختها ..
مريم: هلا فطيم ..
فاطمه: ها فديتج .. مرتاحه الحين ..
مريم مبتسمه: اي الحمدلله .. وايد ارتحت ..
فاطمه: الحمدلله .. زين امشي ننزل تحت عند ابوي ..
مريم: يلا .. الا بسألج فطيم فارس وينه .. ما بين اليوم ..
فاطمه " فارس لو تدرين عنه" : اليوم طلع من وقت .. قالي عنده شغل وايد ..
مريم: والله وحشني فديته ..
وهم نازلين كان جاسم طالع من المطبخ ومعاه سلطان ..
جاسم: سلطون .. متى بنروح عاد ..
سلطان: دريولكم موجود ..
جاسم: اعتقد ..
سلطان: تأكد يلا .. لان مافي وقت بيسكر المحل ..
جاسم: زين هات جوالك .. خذ الجوال واتصل في الدريول ..
جاسم: انت وين ؟
الدريول: داخل بيت ..
جاسم: زين شغل الموتر باطلع ..
الدريول: ان شاء الله ..
جاسم: قدام يا ولد ..
مريم: هااااا .. على وين ..
جاسم: ه .. شوي عندنا شغل ..
فاطمه: شو هالشغل .. لازم اعرف ..
سلطان: شغل ريايل .. شو تبون ؟
فاطمه: لا لا .. اعرفكم بتروحون تغازلون ..
جاسم وحط يده على وي: صاااااااااادوه ..
سلطان يطالع جاسم باستغراب ..
مريم: اااااااي .. يالمغازلجين ..
سلطان: تصدقون هالخبل جسوووم
جاسم: لاه لاه لاه .. لاتغير كلامك سلطووون
البنات: ه
جاسم: نمزح .. بنروح نجيب اشرطه حق السوني ..
فاطمه: اخاف بس اشرطه حق السوني ..
سلطان بعفويه: جويسم لسانك فارط ..
مريم: يعني صج كلام جسوووووووم
سلطان سحب جاسم وطلع .. اما البنات ماتوا عليهم من الضحك ..
فاطمه: يجنن سلطان ..
مريم: وحليله عسل والله ..
راحوا البنات الصاله وكان ابوهم موجود مع ايمان وعبدالعزيز .. قعدوا معاهم لين الساعه 11 فالليل .. وبعدين كلن توجه لغرفته عشان يرتاح .. ويستعدون ليوم جديد .. فاطمه كانت تفكر في بحث اخت صاحب عبدالعزيز ..
فاطمه " منو من ربع عزيز اللي اخته بالجامعه ؟.. الله يستر بس .. وان شاء الله ابيض ويه اخوي"
اما مريم .. رجع لها الاحساس بالخوف والقلق .. كانت خايفه من شي مجهول وبيصير لها ..
بس مو عارفه شو هالشي .. اما في غرفة ام وابوفارس .. كانوا قاعدين يطالعون التلفزيون ..
التفتت ام فارس على زوجها وهي مبتسمه ..
ام فارس: بوفارس ..
بوفارس: هلا والله ..
ام فارس: اليوم كلمتني ام محمد .. وسكتت ..
بوفارس: زين ..
ام فارس: خالد ولد اخوك طلب مريم فديتها ..
بوفارس مبتسم: هاذي الساعه المباركه ..
ام فارس: والله فرحت يوم سمعت كلامها ..
بوفارس: فديت مرايم والله .. تستاهل .. بس فطامي اكبر منها ..
ام فارس: الولد اختار مريم ..
بوفارس نزل راسه: زين ماختار ..
ام فارس: عسى ماشر بوفارس .؟
بوفارس: الله يكبر حظها مرايم ..
ام فارس: زعلان على فطيم ؟
بوفارس: شوي .. تعرفين معزة هالبنت في قلبي ..
ام فارس: بإذن الله .. بيجي نصيبها .. وبتاخذ خيرة الريايل ..
بوفارس: آمين .. انا بكلم اخوانها .. وانتي شوفي البنت واخي رايها .. من حقها ترفض لو مابغته
ام فارس: صح كلامك .. ولا يهمك ..
بوفارس قام بيروح .. مسكته ام فارس ..
ام فارس: علامك ما فرحت لبنتك ..
بوفارس: والله فرحان بس فطيم كاسره خاطري ..
ام فارس: يا ولد الحلال مافي فرق من اللي تعرس قبل ..
بوفارس ابتسم: خير ان شاء الله .. ومشى راح عند السرير .. حط راسه ونام وفطيم كاسره خاطره
ام فارس " فديت فطيم .. الله يرزقها بولد الحلال اللي يستاهلها .. يا رب العالمين "
في هالاثناء عبدالعزيز كان يحاول ينام ..وفجأه تذكر كتاب اخت يوسف ( المزعوم ) خذ الكتاب وطلع من الغرفه متوجه لغرفة فاطمه .. طق الباب .. فاطمه كانت قاعده تسوي بحث على النت ..
قامت فتحت الباب: هلا عزيز .. حياك
دخل عبدالعزيز: ما نمتي للحين ..
فاطمه: لا اتصفح النت شوي عندي بحث ..
عبدالعزيز: على طاري البحث .. تفضلي الكتاب نسيت اعطيج اياه لما رجعت .. اخت يوسف رفيجي اللي تبي البحث .. عاد هالله هالله فيها .. الريال موصيني .. بس اخذي راحتج فيه .. متى ما خلصتيه عطيني اوديه له ..
فاطمه " يوسف": ان شاء الله اخوي ..
عبدالعزيز: واذا ماعرفتي شي .. قولي لي عشان ابلغه لو تكلمينها يكون احسن ..
فاطمه: لا ولا يهمك .. اعرف هالمقرر .. ماخذته الكورس اللي فات ..
عبدالعزيز بارتياح: زين الحمدلله .. مابي اغلبج الصراحه .. ولا ابي انحرج مع الريال
فاطمه: لا ولايهمك .. باسوي لها شغل يبيض الويه ..
عبدالعزيز: فديتج يا فطيم .. يلا فديتج .. اخليج مع شغلج .. ولا تسهرين نامي بكره عندج دوام ..
فاطمه: ان شاء الله عزيز ..





يتبع ..
__________________