{ نهاية حبك إعدامي } ...(قصة مميزة.. الإدارة)

&حوراء& · #1 (**permalink**) 06-07-2007, 08:21

التكلمه

دخل فارس: احم احم ..
الجده: ووووويه لوع الله جبدك ..
فارس سلم عليها: اهلا اهلا ..
هيا: عيالك مسوين لامي وابوي جو ..
بوفارس مبتسم: .. فيهم خبال عيالي ..
فارس: شحالج الشيخه ؟
الجده صاده عنه: الحمدلله ..
فارس واقف عندها: يعني ما راح تسأليني ؟
الجده: شو اسألك .؟
فارس: عن اخباري ؟
الجده: من زين ويهك اسأل عنك ..
فارس: نعم نعم .. سمعيني مره ثانيه الشيخه ..
الجده: والله العظيم لو ما فارقت ويهي باكسر ضلوعك ..
فارس ضحك عشان ينرفز الجده: هااااااااي .. ليكون الشيخه تلعبين كاراتيه ؟
الجده اطالع الصوب الثاني: استغفر الله العظيم ..
بوفارس: امي عكس ابوي .. بالها طويل وتصبر .. ابوي على طول يرفع الخيزران ..
هيا: اي والله .. حمد طلع على ابوي ..
بوفارس: مسوي لهم رعب فالبيت ..
هيا: اي والله .. التفتت على فارس .. يعني متى بتسلم على عمتك يا حلو ؟
فارس مبتسم ورافع حاجب: هلا وغلا عميمه .. شحالج ..
هيا: فديت هالابتسامه يا فارس .. ماشاءالله عليك مزيون .. عيني عليك بارده ..
فارس باسها على خدها: مووووح .. فديتج عميمه ..
الجده بصوت واطي: من حلاته هالعفريت ..
فارس التفت عليها: عيدي كلامج الشيخه ..
الجده طالعته بنظره: الله يعطيك عقل ..
هيا وبوفارس: ه
دخلت مريم وهي منحرجه: السلام عليكم ..
هيا والجده وام فارس لولشوا: كللللوووووووووووش ..
الجده قامت: فديت قلب الريم .. والله انج عروس يالعروس ..
مريم منحرجه: هلا يدتي .. شحالج ؟
الجده: طيبه طاب حالج .. انتي شحالج يمه ..؟
مريم: الحمدلله بخير ..
هيا خذت مريم بالاحضان: مبروك حبيبة قلبي .. انتي وخالد لايقين لبعض .. الله يهنيكم يا رب ..
مريم: الله يبارك فيج عميمه .. وحضنت عمتها .. فديت قلبج عميمه ..
فارس: بلا افلام هنديه خلاص ..
الجده: وانت شعليك منهم ؟
فارس: ما علي منهم شي .. علي ثيابي .. مالبس ثياب حريم ..
الجده بذهول: شوفوا شو يقول هالخبل .. والله ان هالولد انرج ..
فارس يستعبط: ليش شايفتني قرشه عشان انرج ..
الجده: انت تجنن اللي ما يتجنن .. خبل خبل ..
فارس متخصر: يا ربي يقتهرون من جمالي ودلالي ..
الجده: بيجيب لي الجلطه هالولد بكلامه ..
مريم: سمالله عليج يدتي ..
فارس وبوفارس: ه
دخلت ايمان: هلا وغلا .. حيالله من جانا ..
الجده: فديت ايمان انا .. تعالي فديت قلبج .. والله انج سنعه ..
ايمان تبوس راس يدتها: شحالج يدتي .. ان شاءالله طيبه ؟
الجده مبتسمه: طيبه بشوفتج يا غناتي ..
ايمان: هلا والله عميمه .. شحالج ؟
هيا مبتسمه: طيبه حبيبتي .. انتي شحالج حياتي ؟
ايمان: الحمدلله طيبه ..
ام فارس: مريم يبه .. سلمتي على يدج ؟
مريم: ما شفته ..
الجده: هايت مع عزوز .. خرب الصبي هالشيبه ..
فارس: حتى الشيبه تقتهر منه .. يا ربي ..
ام فارس: اسكت عن يدتك يا فارس ..
بوفارس: الله يغربلك يا فارس ..
فارس يهمس: احب العوزها .. شي يدتي .. بالها طويل ودوم مروقه ..
بوفارس وفارس:
الجده اطالعهم بغضب: وحطبه على روسكم انتوا الثنين .. شوله هالضحك ؟
بوفارس: ما في شي الغاليه ..
ام فارس: مريم يبه روحي سلمي على يدج ..
مريم: وينه ؟
ام فارس: اكيد مع عزيز فوق ..
مريم: ان شاءالله ..
هيا: وين النتفه وفطيم ؟
ايمان: جسوم راح مع سلطان يجيبون افلام ..
بوفارس: وهذول حياتهم افلام ..
الجده: خله على راحته لا تضايقه ..
هيا: فديت قلبه والله .. خله على راحته .. زين وين فطامي ؟
فارس تذكر ان اخته زعلانه " فديت قلب فطيم " ..
بوفارس: ايمان يبه ..
ايمان: نعم بابا ..
بوفارس: روحي نادي اختج .. قولي لها عميمه هني ..
ايمان وهي طالعه: ان شاءالله ..
فارس كان سرحان .. والجده انتبهت انه سرح ..
الجده: فارس ..
فارس: نعم ..
الجده: الله ينعم عليك .. وين رحت ؟
فارس ابتسم: معاكم ..
الجده: سمالله عليك .. مره وحده صخيت ..
فارس: لا ما فيني شي .. وابتسم ..
الجده تغيضه: ما يندرى عنك في من تفكر ؟
فارس مبتسم: عيدي كلامج الشيخه ..
الجده: مو اذن عليك ..
فارس: لا مثلج ..
الجده: وجع يا فروس ..
فارس: عادي ما يأثر في نفسيتي ..
الجده: محمد شوف ولدك جنني ..
بوفارس وهيا وام فارس:
راحت ايمان غرفة فاطمه وطقت الباب ..
ايمان: فطوم .. فطوم .. ودخلت عليها .. شافتها نايمه .. ليش نايمه الحين ..؟ طلعت من الغرفه ونزلت تحت ..
ايمان: فطيم نايمه ..
بوفارس بخوف: نايمه .. والكل انتبه لخوف بوفارس ..
ام فارس: ويه توها معانا ..
بوفارس قام من مكانه وراح لها الغرفه ..
فارس: شو فيه ابوي قام متخرع ؟
هيا: مادري .. خل اقوم اشوفه ..
ام فارس والجده قاموا وراها ..
الجده: فروس ..
فارس: هلا ..
الجده: شلني .. ماقدر على الدري ..
فارس: من عيوني .. شل يدته و راح ورى امه .. تمت ايمان فالصاله بروحها ..
ايمان: يه انا ليش واقفه بروحي .. خل اروح وراهم ..
دخل بوفارس غرفة فاطمه و قلبه مقبوض وخايف عليها .. شافها نايمه وباين عليها الحزن .. قعد على السرير
بوفارس: فطيم .. حياة ابوها قومي ..
فاطمه: من ؟
بوفارس: انا بابا .. قومي .. شو فيج نايمه الحين ؟ تعبانه ؟
فاطمه فتحت عيونها بتعب: بابا ..
بوفارس: عيونه انتي .. تعبانه يبه ؟
فاطمه: اي تعبانه شوي ..
دخلت ام فارس و وراها هيا ..
ام فارس: فطيم ماما شو فيج ..
بوفارس: ما عليها شر بس فيها نوم الكسوله .. بوفارس ماحب يلفت انظار الكل لفاطمه .. هو خايف عليها من ذيك الليله يوم صاحت وكانت خايفه ..
فاطمه استغربت دخول الكل عليها .. تمت اطالهعم باستغراب .. تلاقت عيونها بعيون فارس .. ونزلت راسها على طول .. حظنت ابوها وغمضت عيونها ..
بوفارس: تبين تنامين بابا ..
فاطمه: لا خلاص مافيني نوم .. رفعت راسها مبتسمه .. بس غفت عيوني شوي ..
الجده: سمالله عليج غناتي ..
فاطمه قامت من السرير وباست راس يدتها: شحالج يدتي ؟
الجده: بخير غناتي ..
راحت عند عمتها وباستها: شحالج عميمه ؟
هيا مبتسمه: طيبه فديت قلبج ..
فاطمه: شو فيكم كلكم دخلتوا مره وحده ؟
بوفارس: خفنا لتكونين تعبانه ..
فاطمه مبتسم: لا مو تعبانه الحمدلله .. بس دخلت الغرفه وكانت بارده وما قدرت اقاوم السرير ..
الكل: ه ..
بوفارس: زين يبه دام تطمنا عليج .. عيل ننتظرج تحت ..
فاطمه: ان شاءالله ببدل وبانزل ..
الكل طلع من الغرفه الا فارس .. كان واقف ويطالع اخته بندم .. فاطمه كانت متجاهله وجوده .. فارس نزل راسه وطلع ..
فارس " فطيم حساسه .. الحين هي ماخذه على خاطرها مني .. بس تهدى وبكلمها على رواقه " ..
فاطمه كانت حاسه بالذنب لانها تجاهلت فارس ..
فاطمه " فديت قلبك يا فارس .. اعذرني بس غصبن عني سويت جي .. سامحني اخوي الغالي "
فاطمه نزلت تحت .. وفارس دخل غرفته وهو متضايق .. ملجأه الوحيد ( مناف ) ..
مناف: هلا حبيبي ..
فارس تنهد: آآه .. فديتج يا قلبه انتي ..
مناف بخوف: شفيك فارس ؟
فارس: مافيني شي .. بس تعبان شوي ؟
مناف: ما تشوف شر حبيبي .. شفيك تعبان ؟
فارس: مصدع ..
مناف: سمالله عليك حبيبي .. قوم خذ لك شور دافي ونام لك شوي ..
فارس مستناس ان مناف مهتمه فيه: مو الحين حبيبتي ..
مناف: متى حبيبي ؟
فارس: ما شبعت من صوتج ..
مناف منحرجه: فديت قلبك يا حياتي .. بس انا ما راح اطير .. روح خذ لك شور وبعدها كلمني ..
فارس: لا حياتي بعدين ..
مناف: فارس اسمع الكلام ..
فارس: اي كلام ..
مناف: لا تستعبط ..
فارس: ه .. زين بس 5 دقايف وبقوم اخذ شور ..
مناف: باحسبها لك ..
فارس مبتسم: زين .. اتصل له محمد على الخط الثاني .. مناف حبيبتي لحظه بشوف الخط الثاني ..
مناف: خذر احتك ..
رد على محمد ..
محمد: روح يا انتظار ..
فارس منحرج: خير شو تبي ؟
محمد ميت من الضحك: ه .. ابيك يا بعد طوايفي ..
فارس: دمك خفيف ..
محمد: فديت خفة دمي والله ..
فارس: اخلص علي ..
محمد يستعبط: ممممممم
فارس: حمود ..
محمد: زين زين .. كلمني سلمان ..
فارس باهتمام: زين ..
محمد: وقالي لازم نتلاقى الساعه 1 في بيتهم ..
فارس رفع حاجب: خير ان شاءالله .. خل اخلص من اللي بيدي وبكلمك ..
محمد يغلس: شو اللي بيدك ؟
فارس: حمودي بتصفق الحين ..
محمد: لا تنطرها وايد .. بعدين تزعل ..
فارس: فارق .. حسابك بعدين .. سلام .. رجع لمناف اللي كانت تنتظره ..
مناف: هلا حياتي ..
فارس: سوري .. ولدي عمي كان على الخط الثاني ..
مناف: عادي حبيبي .. زين خلصت الـ 5 دقايق ..
فارس: لااااااا .. ما يصير ..
مناف: وش اللي ما يصير ؟
فارس: الـ 5 دقايق راحت وانا اكلم ولد عمي ..
مناف: محد قالك ترد عليه ..
فارس يتدلع على مناف: عاد حبيبي .. بس خليني شوي ..
مناف: فديت قلبك انته .. بس انا عند كلمتي .. يلا روح خذ شور وارتاح شوي ..
فارس: واللي يسلمج يا قلبه انتي ..
مناف: لا يعني لا ..
فارس: باموت جي .. لا تقسين علي ..
مناف: فديت قلبك حبيبي .. عورت قلبي .. زين قوم خذ لك شور و أول ما تخلص كلمني زين ..
فارس بوناسه: اوكي ..
مناف ضحكت: .. انتظر اتصالك حبيبي ..
فارس: ان شاءالله يا قلبي ..
سكر منها وهو فرحان ..
فارس " فديت قلبج يا مناف .. احبج واموت فيج .. صرتي كل شي بحياتي يا حياتي انتي " ..
دخل خذ له شور سريع .. ورجع اتصل فيها مره ثانيه .. كان يكلمها بفرح .. طقت عليه ايمان الباب ..
ايمان: فارس ..
فارس: لحظه حبيبتي شوي .. راح عند الباب .. نعم
ايمان: يلا الغدا جاهز ..
فارس: مابي غدا .. باطلع بعد شوي..
ايمان: على راحتك ..
فارس سكر الباب ورجع يكلم مناف ..
مناف: ليش ما تبي غدا ..؟
فارس: باطلع ..
مناف: تطلع في القايله ..
فارس: اي عندي شغل مع ولد عمي ..
مناف: اها .. زين كل لك لقمه فديتك ..
فارس: مالي خاطر ..
مناف: بس انت المفروض انك ترتاح بعد هالشور صح ..
فارس مبتسم: المفروض .. بس some thing came up
مناف: اها .. زين متى بتطلع .؟
فارس: بعد شوي ان شاءالله ..
مناف: زين عيل خل اروح اشوف اخواني وامي .. وانت روح خلص شغلك .. وكلمني لي فضيت حبيبي ..
فارس: زين حبيبتي ..
سكر من مناف وعلى طول اتصل بولد عمه ..
فارس: انت وين ؟
محمد: طالع ..
فارس: مرني ..
محمد: ولا يهمك ..
فارس: انا فالانتظار ..
محمد: فالانتظار ولا عندك انتظار .. اااااااي
فارس: اااااي .. تصدق توني مكتشف خفة دمك
محمد: والله مشكلتك اذا توك مكتشف خفة دمي ..
فارس: والله يا حمود لي شفتك مو احسن لك ..
محمد: ااااااي .. اما مزاجك عجيب اليوم ..
فارس: زين انا انتظرك يالدب ..
محمد: من عيوني يا عيوني انت .. موووح ..
فارس: سود الله ويهك ..
سكر من محمد وهو ميت عليه من الضحك .. نزل تحت وكان الكل مجتمع على السفره ..

يتبع ..
__________________

الموضوع الاصلي من روعة الكون

&حوراء& · 06-07-2007, 08:23

&حوراء& · 06-07-2007, 08:25

&حوراء& · 06-07-2007, 08:27

&حوراء& · 06-07-2007, 08:28

&حوراء& · 06-07-2007, 08:29

&حوراء& · 06-07-2007, 08:32

&حوراء& · 06-07-2007, 08:33

&حوراء& · 06-07-2007, 08:34

&حوراء& · 06-07-2007, 08:36

{ نهاية حبك إعدامي } ...(قصة مميزة.. الإدارة)

مــنــتــدى الــحــكــم والــقــصــص