{ نهاية حبك إعدامي } ...(قصة مميزة.. الإدارة)

التكمله




طلعوا متجهين للكوفي شوب اللي تعودوا عليه .. اول ما دخلوا هنادي حست بفرحه من داخلها ماعرفت سببها .. اختاروا لهم طاوله وطلبوا المعتاد ..
هنادي كانت تدور صاحب الجريده .. اما الجورهر فكانت تتناقش مع خالها عن ترتيبات الحلفه ..
سلمان: انا رتبت مع صاحب المطعم .. وهو ماقصر بصراحه ..
الجوهره: وحده قالت لي نفس الكلام .. كانت حاجزه عنده وتقول ماقصر معاهم من ناحية الخدمه والاكل وراعاهم فالسعر بعد ..
سلمان: لا مبين عليه طيب .. وعليه طلب بصراحه ..
الجوهره: كسب زباينه من طيبه ..
فجأه دخل يمشي بهيبه .. سحب الكرسي وقعد .. طلع جواله من جيبه وحطه على الطاوله .. التفت يمين وتلاقت عيونه بعيون هنادي الحايره اللي كانت تدور عليه من اول مادخلوا .. نزلت راسها بخجل .. وعرفت سر الفرحه اللي في قلبها ..
هنادي " والله زمان يا صاحب الجريده" ..
نواف " حيالله هالشوف " ..
هنادي: خالي مب هاي صاحبك راعي محل المجوهرات ..
سلمان التفت مبتسم: اي والله هاي نواف .. قام يسلم عليه ..
نواف: هلا وغلا .. شحالك الغالي ..
سلمان: طيب الله يسلمك .. اعلومك .؟
نواف: الحمدلله .. وينك ما بينت ؟
سلمان: انشغلت شوي مع الاهل ..
نواف: يعطيك العافيه ..
سلمان: الله يعافيك ..
نواف: بتقعد مع الاهل ولا معاي .. بصراحه طمعان بالقعده معاك لي زمان ما شفتك ولا اخذت اخبارك ..
سلمان مبتسم: بس اعطيهم خبر وراجع ..
نواف ابتسم: حياك الله ..
راح سلمان عند بنات اخته ..
سلمان: بناتي .. بقعد مع الريال شوي وبرجع لكم ..
هنادي" ما تاخذني معاك خالي": خذ راحتك خالي ..
الجوهره: خذ راحتك ..
سلمان التف على نواف اللي كان يتعبث بجواله ..
سلمان: لي وصل الطلب برجع لكم ..
الجوهره: خالي عادي .. احنا حولك لا تشيل هم .. خذ راحتك مع صاحبك ..
سلمان مبتسم: خلاص طرشوا طلبي ..
هنادي" ما يصير اكون طلبك": ان شاءالله خالي ..
راح سلمان عند نواف .. وتموا يسولفون وياخذون اخبار بعض .. اما هنادي والجوهره تموا يسولفون مع بعض وهنادي عقلها وقلبها مع نواف ..
هنادي " احسدك يا خالي " .. رن جوال الجوهره والمتصل ( اخذت القلب ) ابتسمت وردت ..
الجوهره: مرحبا ..
ابراهيم: هلا وغلا ومليون ترحيب بجوهرتي ..
الجوهره: شحالك ؟
ابراهيم بخبث: صادوه .. من عندج .؟
الجوهره: طالعه مع اختي وخالي ..
ابراهيم: انتوا وين ؟
الجوهره: في الكوفي شوب ..
ابراهيم: يا ليتني الكوفي شوب والله ..
الجوهره بصوت واطي: اوريك يالدب ..
ابراهيم: خالج حولج ؟
الجوهره: لا مع رفيجه بعيد عنا .. تبي تكلمه ؟
ابراهيم: لا قلت لو حولج بسلم عليه .. خلاص بتصل فيه وقت ثاني ..
الجوهره: ان شاءالله ..
هنادي بهمس: حلاه عليها تكلم الريل ..
الجوهره انحرجت و ويها صار احمر ..
ابراهيم: زين حياتي لي رجعتي البيت كلميني ..
الجوهره: ان شاءالله ..
سكرت والتفت على اختها ..
الجوهره: يجي لج يوم يا هنود ..
هنادي ميته من الضحك: .. روعه شكلج وانتي تكلمينه باحراج وخجل ..
الجوهره: هنود يالدبه ..
هنادي: ..
الجوهره طرشت لزوجها مسج .. وكان كالتالي ..
(( لا تفتكر برد عليك .. للحين ما قررت لو بكلمك او لأ ))
ابراهيم قرى الرساله ..
ابراهيم: لا لا لا .. بتذبحني هالبنت .. رد عليها ..
(( ارجوج يا غلا ابراهيم انتي ردي وخلي عنج هالسوالف .. بانتحر لو ما سمعت صوتج قبل النوم ))
الجوهره قرت المسج وضحكت .. وردت عليه ..
(( شلون بتنتحر ؟؟ ))
ابراهيم رد عليها ..
(( باطب من السرير وباموت على طول ))
الجوهره ماتت من الضحك على طريقة انتحاره العجيبه .. ردت عليه ..
(( لا ارجوك شوف لك مكان اوطى من السرير .. اخاف تتألم و ماتموت بسرعه ))
ابراهيم قرى مسجها و مات من الضحك .. رد عليها ..
(( خلاص غيرت رايي .. بانهي حياتي بطريقه بشعه ))
الجوهره قرت المسج واستغربت .. ردت عليه ..
(( طريقه بشعه!! كيف ؟ ))
ابراهيم قرى الرد مبتسم .. رد عليها ..
(( باكل تفاحة سنو وايت ( بياض الثلج ) عشان تبوسيني و ارجع للحياة بفضل بوستج ))
الجوهره قرت الرد وماتت من الضحك ..
الجوهره" فديت قلبك يا برهوم .. عليك سوالف تجنن " .. ردت عليه ..
(( بصراحه افحمتني بردك .. بس ما راح ابوسك بخليك تقوم بنفسك من القهر ))
ابراهيم " عقدتني هالبنت " .. رد عليها ..
(( يلا عاد حياتي .. يعني ما كسرت خاطرج يوم قلت بانتحر .. يعني ما قلتي حبيبي برهوم بينتحر وبيخلص من الدنيا .. ))
الجوهره " ه حلوه ذي بيخلص من الدنيا ".. ردت عليه ..
(( لا ما كسرت خاطري كلش .. ولو بتخلص من الدنيا ما راح يصير شي بالدنيا .. بالعكس بتترك مساحه لغيرك عشان يعيش .. ))
ابراهيم قرى المسج وكان شوي ويصيح .. ما رد عليها ..
ابراهيم " تصبر علي هالبنت .. باعقدها الليله " ..
لما الجوهره كانت تمسج ابراهيم .. هنادي عاشت عالم ثاني هي ونواف .. كانوا يتحاكون عبر دقات قلوبهم البريئه الطاهره .. كانت هنادي سرحانه بحركات نواف .. كانت تتفكر في ملامحه وجاذبيته .. اما نواف كان يسولف مع سلمان وقلبه وعقله مع هنادي .. كان يحاول يلتفت عليها بس احترم سلمان ..
سلمان: والله سوالفك ما تنمل يا نواف .. بس طولت على الاهل ..
نواف: خذ راحتك .. بس يبيلنا قعده على رواقه ..
سلمان: ان شاءالله ..
قام سلمان وسلم على نواف ورجع لبنات اخته ..
هنادي: هلا خالي ..
سلمان: السموحه .. بس هالريال لي فتره ما شفته ..
الجوهره: عادي خالي خذ راحتك ..
قعد سلمان مع بنات اخته .. بعد ما خلصوا واستانسوا طلعوا رايحين البيت .. فالسياره رن جوال سلمان .. والمتصل ابراهيم ..
سلمان: حيالله النسيب ..
ابراهيم: هلا وغلا .. شحالك ؟
سلمان: طيب طاب حالك .. علومه النسيب ..
ابراهيم: اليوم متصل اشتكي على بنت اختك الظالمه ..
سلمان يضحك: .. شنهي شكوتك عليها ؟
الجوهره التفت على خالها ..
ابراهيم: معاقبتني ما تبي تكلمني ..
سلمان: .. خلاص اليوم بنسوي محكمه وبشوف محاميها يوسف ..
ابراهيم: .. امزح معاك ..
سلمان: الله يقطع سوالفك يا ريال .. شحال امك عساها بخير ..
ابراهيم: الحمدلله طيبه .. الا ما قلت لي شلون كانت رحلتكم ؟
سلمان: والله الحمدلله .. الامور كلها تمام ..
ابراهيم: الحمدلله ..
سلمان: لا مرتبين لها صح ..
ابراهيم: كنت احاتي حد يصير له شي .. بس الحمدلله كل شي سار تمام ..
سلمان: الحمدلله ..
ابراهيم: تامرنا على شي الغالي ..
سلمان: يسلم راسك ..
ابراهيم: استأذن ..
سلمان: الله وياك ..
ابراهيم: مع السلامه ..
التفت سلمان على الجوهره: لعوزتي الريال .. تتغلين عليه ..
الجوهره منحرجه: احم
هنادي: حلو حلو ..
سلمان: على قلبك بوالشباب ..
هنادي وسلمان:
الجوهره " معليه يا برهوم دواك عندي "
اتجهوا للبيت بعد الوناسه ..

فاطمه كانت تكتب رد على رسالة يوسف لها .. وبتحطها بنفس المكان .. بس كانت متردده ..
فاطمه " بكره العشى في بيتنا .. والريايل بيروحون الميلس .. اخاف حد يشوف الورقه وانفضح .. احطها ولا لأ؟ ماراح اكتب اسمي ولا اسم يوسف " كتبت الرساله وعطرتها بعطرها المفضل .. طلعت من الغرفه وراحت صوب الميلس من برا .. حطت الورقه ورجعت غرفتها وهي على اعصابها .. طبعا لما حطت الرساله تحت الصيص .. خشتها تحت الصيص بالكامل .. ما خلت ولا شي يبين .. لان يوسف خلاص اتفق معاها على هالمكان .. خذت جوالها واتصلت بصديقتها لطيفه ..
لطيفه: هلا وغلا ..
فاطمه: حيالله عروستنا ..
لطيفه منحرجه: الله يحيج يا قلبي انتي ..
فاطمه: شحالج ؟
لطيفه: الحمدلله طيبه ..
فاطمه: خلاص بدا العد التنازلي ..
لطيفه: اوه سكتي .. متوتره حدي يا فطيم .. عقبالج ان شاءالله ..
فاطمه مبتسمه: تسلمين حبيبتي ..
لطيفه: فطيم ..
فاطمه: عيونها ..
لطيفه: فديت عيونها انا .. خلاص كلمتي امج عشان تكونين معاي من الصبح ..
فاطمه: اي خلاص كلمتها وهي وافقت ..
لطيفه: ماعرف شو بسوي من دونج يا فطيم ..
فاطمه: فديتج يا لطوف احنا خوات .. الا تعالي قولي لي شو اخبار ولد خالتج ؟
لطيفه: مو عاجبه شي ..
فاطمه: وليش؟
لطيفه: شدراني عنه ذي بعد ..
فاطمه: زوجته ما حملت ؟
لطيفه: لا تقول ماتبي تحمل الحين .. وهو ميت يبي ياهل .. الحين لهم 8 شهور من تزوجوا تقريبا .. عاد هي وايد تدلع .. وكانت تدري بسالفتنا .. فكانت كل ما تجينا او نروح بيت يدي تقعد وتحرني وتسوي لها حركات بس انا حاقرتها وهاي اللي قهرها .. بس يوم درت اني ملجت ماتت قهر ..
فاطمه: ما عليج منها لطوف .. الله عوضج بريال يسواها هي وطوايفها ..
لطيفه: تدرين كنت احترق من داخلي لما اشوفهم مع بعض .. كنت اقول بنفسي ان هاي مكاني مو مكانها .. بس الحمدلله الله عوضني باحمد .. ومثل ما قلتي يسواها ويسوا طوايفها ..
فاطمه: الحمدلله .. ولا تتحسرين على شي فات .. عيشي يومج وقطي ماضيج ورا ظهرج ..
لطيفه: الحمدلله على كل حال .. قولي لي فطوم شو خذتوا حق بكره ؟
فاطمه: لا مفاجأه .. بتشوفينا بكره ..
لطيفه: ه .. يالشريره شو اللي ناويه عليه ؟
فاطمه: بكره بتشوفينا قلت لج ..
لطيفه: تعالي شو صار على موضوع عبدالعزيز ؟
فاطمه بحزن: ما صار نصيب والله ..
لطيفه بصدمه: قطيعه ليش ؟
فاطمه: الله مو كاتب .. البنت رفضت
لطيفه: بس انتي قلتي انها وافقت يوم كلمتها مريم اختج ؟
فاطمه: اي .. بس يوم تقدمنا رسمي مادري شو صار عليها والله ..
لطيفه: حرام عليها منت الولد على الفاضي .. ما يستاهل بوسعود ..
فاطمه: الله بيعوضه مثل ما عوضج باحمد الخطير ..
لطيفه: سكتي من ناحية انه خطير انا اشهد ..
لطيفه وفاطمه: ..
لطيفه: تصدقين شوقتيني حق بكره .. ودي اشوفكم .. وخاصه انتي يا فطيم ..
فاطمه: عدي من 1 لين 100 ويجي بكره وتشوفيني ..
لطيفه: سخيفه فطوم ..
فاطمه: ..
لطيفه: زين فارس اخوج وش اخباره هالمزيون ؟
فاطمه: ها .. اشوفج قلبتي على فارس اخوي .. ترا اعلم عليج احمد ..
لطيفه: لا واللي يسلمج يا فطيم تراني اموت فيه هالولد ..
فاطمه: فديت اللي تموت فيه .. وفارس اخوي طيب والحمدلله ..
لطيفه: ما يفكر يعرس ؟
فاطمه: للحين ما كلمنا في موضوع الزواج ..
لطيفه: زين ريم بنت عمج ما تصلح له ؟
فاطمه: ماعتقد .. لان الريم بعدها صغيره هي اكبر من ايماني بسنه .. وبعدين فارس يعاملها مثل اخته .. فماعتقد انه يفكر فيها كزوجه ..
لطيفه: ليكون اخوج شايف له شوفه مني مناك ..
فاطمه " آآه يا فارس": ماعتقد .. لو شايف له شوفه كان قال بعرس ..
لطيفه: يعني فارس اخوج عادي يتزوج وحده كان على علاقه فيها ؟
فاطمه: شوفي ما اجزم لج .. بس فارس اخوي وايد متفتح .. ويؤمن بالحب قبل الزواج ..
لطيفه: تتوقعين يكون قاعد يدور وحده يحبها ويفهمها ويتقبلها عشان يتزوجها ؟
فاطمه: جايز ليش لأ ..
لطيفه: الله يوفقه وينما يروح هالمزيون .. انا ما راح اسميه الا المزيون ..
فاطمه تضحك: ه .. ليش ؟
لطيفه: لانه مزيون والله ..
فاطمه: بس خالد ولد عمي بصراحه احلى منه .. وانتي شفتي خالد ..
لطيفه: مانكر ان خالد غرشوب بعد .. بس فارس اخوج فيه جاذبيه مب طبيعيه .. الله يحفظه
فاطمه: فديته اخوي والله ..
لطيفه: زين حبيبتي بخليج الحين .. باكلم ريلي شوي وبنام .. ونتلاقى بكره ..
فاطمه: خلاص حياتي .. الله وياج ..
لطيفه: مع السلامه ..




يتبع ..
__________________