{ نهاية حبك إعدامي } ...(قصة مميزة.. الإدارة)

التكمله

يوسف: شتشربون يا جماعه ؟
بوفارس: عيب يا يوسف .. انت الضيف .. انا بنزل تحت اشوف الكوفي شوب او المطعم عندهم شلون ..
يوسف: خذ راحتك الغالي ..
بوفارس: اكيد اخذ راحتي ..
يوسف انحرج: ه
بوفارس ابتسم ليوسف و طلع .. فاطمه كانت قاعده على الكرسي تراقب يوسف .. يوسف التفت عليها مبتسم .. فاطمه انحرجت ونزلت راسها .. قرب منها يوسف وقعد جنبها .. مسك يدها وباسها ..
يوسف: وحشتيني حياتي ..
فاطمه صاحت وحضنت يوسف بشوق ..
فاطمه: وحشتني يوسف ..
يوسف طوقها بيدينه وحضنها بقوه ..
يوسف: وانتي اكثر حياتي ..
فاطمه وسط دموعها: حياتي يا يوسف ..
يوسف: فديت دموعج حبيبتي ..
مسح دموعها وباسها على جبهتها ..
يوسف: فديت ريحتج يا حياتي .. اشتقت لعيونج وكل شي فيج ..
حضنها مره ثانيه .. تم حاضنها ومغمض عيونه ..
يوسف: زين حبيبتي انا بدخل اخذ لي شور سريع .. ممكن تجهزين لي ملابس ..
فاطمه مبتسمه: ان شاءالله حياتي ..
دخل يوسف ياخذ له شور .. وفاطمه فتحت شنطته وطلعت له بنطلون جينز وفانيله برتقاليه غامجه .. خلص من الشور وطلع من الحمام وهو لاف الفوطه على خصره ..
يوسف: يا زين الماي ..
فاطمه: نعيما حبيبي ..
يوسف: الله ينعم عليج ..
فاطمه: تفضل ملابسك ..
يوسف: مشكوره فديت قلبج ..
خذ ملابسه وراح غرفة تبديل الملابس .. لبس وطلع لها .. كان شكله يجنن وشعره مبلل .. فاطمه كانت واقفه اطل من الدريشه .. قرب منها و طوقها من خصرها ..
يوسف: شاللي تفكرين فيه ؟
فاطمه مبتسمه: ولا شي حبيبي ..
يوسف: زين ابوج ما اتصل ؟
فاطمه: لا ..
يوسف: زين يلا ننزل له ؟
فاطمه: يلا فديتك ..
مسك يدها وطلعوا من الغرفه .. نزلوا اللوبي عند بوفارس اللي كان قاعد يتقهوى .. قربوا منه مبتسمين ..
بوفارس: يا زينكم والله ..
فاطمه: شدعوه تتقهوى بدونا ؟
بوفارس: ه .. طلبوا محد مسكم ..
الكل: ..
فاطمه كانت اسعد انسانه بوجود يوسف جبنها .. اما يوسف فرحته ما تنوصف .. لما شاف فرحة فاطمه تطمن وارتاح .. لانه كان يحاتيها وخايف عليها .. فاطمه و يوسف وبوفارس قضوا يوم حلو .. بوفارس وفاطمه رجعوا الشقه ويوسف رجع الفندق وكله شوق لحب حياته فاطمه ..
بومحمد: وين رحتوا ؟
بوفارس: فاطمه راحت تتقابل مع صديقتها ..
بومحمد: اي ..
بوفارس: شو اخباركم اليوم ؟
بومحمد: والله استاتسوا في الملاهي اليهال .. يقولون يبون يروحون البحر بكره .. شو رايك ؟
بوفارس: لا خلوها الاسبوع الجاي ..
بومحمد: ليش ؟
بوفارس: باودي فاطمه عند صديقتها ..
بومحمد: عيل بكره بنروح متحف الشمع ..
بوفارس: ابوي بيروح معاكم ؟
بومحمد: لا .. بيروح عند ربعه في الحديقه ..
بوفارس: زين .. انتبهوا على اليهال ..
بومحمد: مافي غير هالميانين الثلاثه .. جسوم وسلطانو واحمد رفيجهم ..
بوفارس: ه .. مقاليع ..
بومحمد: مايخلون شي في حاله .. ولا يخلون الاوادم في حالهم .. امس فالحديقه ما مر من جدامهم حد الا تطنزوا عليه ولا كلموه واستعبطوا عليه ..
بوفارس: مادري على من طالعين جي ..
بومحمد: .. الله يحفظهم ..
تموا بوفارس واخوه يسولفون وينسقون جدولهم حق باقي السفره .. اما فاطمه كانت في عالم ثاني .. عالم مافيه الا هي ويوسف .. اتصل لها يوسف يتطمن عليها ..
يوسف: حياتي ..
فاطمه مبتسمه: هلا وغلا حبيبي ..
يوسف: شخبارج حياتي ؟
فاطمه: الحمدلله .. والله اني طايره من الوناسه حبيبي ..
يوسف: فديت قلبج والله .. ان شاءالله دوم هالوناسه ..
فاطمه: الله يفرح قلبك يا يوسف .. زين بكره وين بنروح ؟
يوسف: يقول ابوج بنطلع برا لندن .. انا اول مره اجي هالبلاد ..
فاطمه: لندن اعرف كل شوارعها .. ولا يهمك بادليك كل مكان فيها ..
يوسف: فديت قلبج والله ..
فاطمه: زين حبيبي بروح اشوف امي شتبي فيني .. وبرجع اتصل لك ..
يوسف: زين انتظرج ..
سكر منها وهو يطالع الخاتم اللي جابه لها .. هو كان مقرر انه يلبسها الخاتم قبل ما يسافر .. بس غير رايه وقرر انه يلبسها الخاتم بكره .. راحت فاطمه عند امها .. ولقت الكل متجمع فالصاله قعدت معاهم وتموا كلهم يسولفون ويضحكون .. بعد هالقعده العائليه الحلوه .. بومحمد خذ عياله وراحوا شقتهم .. تموا عائلة بوفارس مع الجد والجده .. جاسم قام ينط على ابوه ويتصارع معاه ..
جاسم: يلا .. انتظرك ..
بوفارس فصخ فانيلته وتم بالصروال ..
بوفارس: تعال اوريك الشغل العدل ..
جاسم قلد ابوه وفصخ فانيلته وتم بالصروال .. ركض ناحية ابوه وتم متعلق في رقبته اونه يتحداه .. ام فارس والجد وايمان كانوا يشجعون جاسم .. اما فاطمه والجده يشجعون بوفارس ..
الجده: عندك اياه هالنتفه ..
بوفارس قلب جاسم على ظهره ..
ام فارس: قوم لا يغلبك ..
ايمان: جسوم لاتفشلنا .. يلا عندك اياه ..
جاسم قام من مكانه بسرعه وتم ينط مكانه اونه بيهجم على بوفارس ..
جاسم: انا تقلبني .. اوريك ..
وركض ناحية ابوه بسرعه .. بوفارس مسكه وسدحه على ظهره مره ثانيه ..
بوفارس: ياخي انت مب قوي ..
الجد: تعال جسوم بقولك ..
ايمان: لو سمحتوا بريك .. نبي نكلم بطلنا شوي ..
فاطمه راحت تجيب الكيمره عشان تصور .. الجد كان يهمس في اذن جاسم .. وايمان ميته من الضحك .. بوفارس كان يطالعهم بشك ..
بوفارس" الله يستر من ابوي .. ما يندرى شو وراه " ..
بوفارس: يلا خلص البريك ..
جاسم قام يصفق: احم .. يلا الحين بغلبك .. آآآآآآآآآه ..
ركض ناحية ابوه وتعلق فرقبته .. وقام الجد جاب ثلج وخشه في ثيابه .. بوفارس سدح جاسم على ظهره ..و الجد بسرعه ركض وحط الثلجه في يد جاسم ورجع مكانه .. بوفارس ما انتبه للجد .. قام جاسم بسرعه ونط على ابوه مره ثانيه و الثلجه في يده .. خذها وتم يمسحها على جسم ابوه .. بوفارس تحرقص .. الكل ضحكوا على شكل جاسم وهو يمسح الثلجه على جسم ابوه وبوفارس متحرقص يبي يبعد جاسم عنه ..
بوفارس: يالغشاشين .. اوريكم ..
مسك يد جاسم وخذ الثلجه من يده .. وراح صوب ابوه وحط الثلجه في ملابسه .. الجد تحرقص وقام يناقز مكانه .. خذ الثلج اللي الجد كان خاشه في ملابسه وحطه بعد في ملابس ايمان .. وايمان قامت تصارخ .. جى دور ام فارس اللي استسلمت ..
ام فارس بتوسل: واللي يسلمك مالي خص فيهم ..
بوفارس: بس ضحكتي معاهم ..
ام فارس: الله يخليك ..
الجده: عندك اياهم ..
بوفارس راح صوب فاطمه اللي كانت مندمجه وتصورهم وحط ثلجه في ملابسها .. خلاها تصرخ وتتحرقص .. تموا يضحكون على بعض لين كل منهم قام وحذف نفسه على سريره ونام .. ام فارس وبوفارس كانوا في غرفه وحده ومعاهم جاسم .. ايمان وفاطمه كانوا في غرفه وحده .. الجد والجده كانوا بالغرفه الثالثه ..
شمس يوم جديد تشرق على لندن وتنور البلاد عليهم .. يوسف فتح عيونه واتصل بفاطمه على طول .. فاطمه ردت عليه بنشاط ..
فاطمه: صح النوم يالكسلان ..
يوسف: هلا والله .. الساعه كم الحين ؟
فاطمه: الساعه 8 ونص ..
يوسف: تو الناس ..
فاطمه: يلا قوم خل نلحق على قطار الساعه 10 ..
يوسف: زين ..
فاطمه: متى نمت امس حبيبي ؟
يوسف: الساعه 11 ونص ..
فاطمه: انا نمت الساعه 2 وقعدت الساعه 7 .. مو مثلك يالكسول ..
يوسف: فديت قلبج والله ..
فاطمه: قوم خذ لك شور عشان تتنشط ..
يوسف: ودي اخذ الشور وانتي عندي ..
فاطمه انحرجت: ها ..
يوسف: ودي انتي تجهزين لي ملابسي مثل امس .. عشان اول ماطلع اشوف نظرة الشوق اللي شفتها بعيونج امس ..
فاطمه غمضت عيونها: فديت قلبك يا يوسف ..
تموا ساكتين فتره ..
فاطمه: حبيبي ..
يوسف: قولي يا عيونه انتي ..
فاطمه: يلا قوم اجهز عشان ما نتاخر ..
يوسف: ان شاءالله .. شكثر يبيلكم لين توصلون عندي الفندق ؟
فاطمه: نص ساعه بالباص ..
يوسف: زين خل اقوم اجهز عيل ..
فاطمه: يوسف فديتك اسوي لك نسكافيه ولا شاي واجيبه معاي وانا جايه ؟
يوسف مبتسم: ياليت ..
فاطمه بوناسه: ان شاءالله .. بس شو فخاطرك ؟
يوسف: نسكافيه ..
فاطمه: زين حبيبي ..
سكرت من يوسف وطلعت تسوي له نسكافيه .. كانت ام فارس ومستغربه من تغير فاطمه المفاجئ .. بوفارس كان فرحان ان بنته رجعت تضحك ..
بوفارس: ها فطيم جاهزه يبه ؟
فاطمه: بس بسوي نسكافيه باخذه معاي واحنا طالعين ..
بوفارس ابتسم لها: ان شاءالله ..
ايمان: من هاذي صديقتج ؟
فاطمه مبتسمه: وحده معاي فالجامعه .. ماتعرفينها ..
ايمان: زين باجي معاكم ..
بوفارس يغير الموضوع: ايماني فديت قلبج روحي شوفي بيت عمج جهزوا ولا للحين ؟
ايمان: همممم .. زين ..
بوفارس: يلا يا فطيم ..
فاطمه وهي تسكر غطى الكوب: يلا خلصت ..
خذت جوالها وحطته فالشنطه .. شلت الكوب وطلعوا قبل ما ترجع ايمان .. ركبوا الباص متجهين للفندق اللي فيه يوسف .. اول ما وصلوا لقوا يوسف ينتظرهم في لوبي الفندق .. طبعا فاطمه استقبلته بابتسامة شوق وحب .. يوسف ابتسم لها بفرح .. قرب منهم وسلم على بوفارس وفاطمه ..
فاطمه: تفضل ..
يوسف: جزاج الله خير ..
بوفارس: بسكم سوالف .. يلا نلحق على القطار ..
فاطمه: ه .. شدعوه ما قلنا شي ..
يوسف بهمس: فديت هالضحكه والله ..
فاطمه انحرجت .. مسكها يوسف من يدها ومشوا ورا بوفارس .. ركبوا القطار ويوسف شرب النسكافيه اللي سوته له فاطمه ..
يوسف: تسلم يدج ..
فاطمه مبتسمه: الله يسلمك ..
يوسف: احلى نسكافيه شربته ..
فاطمه بدلع: عن المجاملات ..
يوسف: .. وبهمس .. اموت فالدلع ..
بوفارس: يوسف تبي تشرب شي يبه ؟
يوسف: لا عمي .. توني شارب احلى نسكافيه ..
فاطمه ابتسمت بخجل .. بوفارس كان يطالعهم وهو فرحان .. بوفارس راح وخذ له شاي وجاب لهم شوكلاته ورجع عندهم .. وصلوا محطتهم .. ونزلوا وراحوا يتمشون وسط المراعي الخضرا .. بوفارس كان جايب معاه كتاب قعد يقراه .. وفاطمه يوسف كانوا يتمشون في الحدايق الجميله .. ونوافير الماي كانت مبرده الجو حولهم .. قعدوا تحت شجره كبيره مضله ..





يتبع ..
__________________