{ نهاية حبك إعدامي } ...(قصة مميزة.. الإدارة)

مرت الايام وفارس ومناف عايشين احلى ايام الحب والغرام .. وفرحتهم ما تنوصف بعد ما ارتبطوا ببعض .. فاطمه ويوسف عصافير الحب .. عايشين حياة حب واستقرار .. مريم وخالد وترقب لمستقبل مجهول .. الجوهره وابراهيم ولولوالصغيره اللي ضافت البهجه في حياتهم .. هنادي واقتراب موعد ولادتها .. وحب نواف لها .. ايمان وتغيرها للاحسن ناحية فارس وحبها لمناف زوجة فارس .. الريم واقتناعها بان هي اوهمت نفسها بحب فارس .. عبدالعزيز وجده وحياتهم وسوالف المواعد والمقالب .. هيا وغضبها على زواج فارس من مناف .. الجده وفرحتها بزواج فارس وحبها لمناف وتوصياتها لفارس على مناف .. بوفارس وخوفه من ام فارس بخصوص مناف وامها .. سلطان واحمد وجاسم و حياتهم البريئه البعيده عن مشاكل الكبار .. فهد الطفل الغير ناطق .. اسماء وريما وصداقة طفوله ما تنتهي .. سلمان وهموم قلبه وحياته اللي طغت عليه .. ام محمد وشخصيتها الطيبه وحبها لعيالها .. بومحمد وصراعه من اجل فارس ومناف و وقفته مع اخوه .. فاضل يستعد حاليا للسفر عشان يكمل دراسته برا .. علي وحياته الطبيعيه بعد نركه لحياة الشرب والانحلال اللي عاشها من قبل .. ام مناف وفرحتها بالخطوه اللي قام فيها فارس ناحية مناف .. عبدالله وفيصل وبرأتهم اللي محببه الناس فيهم .. محمد وحياته اللي تداعت اساساتها من بعد طلاقه .. عياله صار ما يشوفهم الا مرتين او 3 مرات بالاسبوع .. ساره والحزن اللي طغى عليها من بعد الطلاق .. ابطالنا سايروا الزمن بمشاكله ومصايبه .. سايروا الزمن بحلاوته وفرحته .. حياتنا مثل الطوفان .. مره يغضب ويرتفع ويخرب الدنيا .. ومره يهدى وتستقر الامور .. واحيانا يغضب طوفان بكشل مفاجئ وغريب .. ولازم علينا نستعد لهطوفان المفاجئ .. ونواج بقوه وعزم .. لان لو هالطوفان طغى علينا بنخسر كل مشاعرنا واحلامنا وآمالنا .. وهاذي حياتنا سواء عجبتنا او لا .. لازم نسايرها ونعيش فيها بحلوها ومرها ..
بأختصار .. ابطالنا يواجهون مستقبل مجهول .. كلن شاغله همه واللي يهمه .. وتمر عليهم الايام حلوه بالنسبه للبعض .. و قاسيه للبعض الآخر ..
ام فارس ركبت السياره مع السايق وطلبت منه ياخذها بيت مناف .. طبعا راحت من غير ما تخبر حد .. وصلت عند البيت وكانت مستغربه من المكان اللي ساكنين فيه .. وقف السايق عند باب البيت .. ام فارس نزلت من السياره وكانت قرفانه من كل شي حولها .. طقت الباب وطلع لها عبدالله مبتسم ..
عبدالله: نعم ..
ام فارس: امك وين ؟
عبدالله: امي داخل .. تفضلي ..
ام فارس استغربت ذرابة عبدالله .. دخلت وراه وكانت تشوف بيتهم باستغراب ..
ام فارس " شلون عايشين في هالخرابه .. مب من شي هالبنت قصت على ولدي " ..
عبدالله ركض عند امه وقالها ان في وحده تنتظر برا .. ام مناف حطت شيلتها على راسها وطلعت بسرعه برا .. اول ما شافت ام فارس ما عرفتها ..
ام مناف: هلا ومرحبا .. تفضلي ..
ام فارس: انتي ام فيضل ؟
ام مناف: اي نعم ..
ام فارس طالعتها ياحتقار: سمعيني انتي وبنتج .. ولدي ابتعدوا عن دربه .. بنتج لحست عقله بكلمتين عشان فلوسه ..
ام مناف بصدمه: شعنه تتكلمين ؟
ام فارس: انتي وبنتج تعرفون عن شو اتكلم .. بنتج كانت تغازل ولدي على التلفون وتتمسكن له عشان يعطيها فلوس .. ترا احنا ناس متربين وانتي ماربيتي بنتج عدل .. ابتعدوا عن ولدي احسن لكم .. والا احنا مب مستوانا ناس مثلكم ..
ام مناف دارت فيها الدنيا من الكلام اللي سمعته .. حست انها مب قادره تتنفس .. مناف كانت تسمع حشره برا .. طلعت وشافت ام فارس .. التفت عليها ام فارس ..
ام فارس: سمعيني انتي ياللي ما تستحين على ويهج .. ابتعدي عن درب ولدي .. ولا ترا بوريج نجوم الليل في عز القايله .. انتوا ما تستحون على ويهكم ..
مناف تمت واقفه مكانها واطالع ام فارس بخوف .. دموعها سبحت على خدودها الورديه ..
ام فارس: كلامي واضح ومابي اعيده مره ثانيه ..
عطتهم ظهرها وطلعت من البيت ورافعه راسها بكل غرور وتكبر .. ام مناف التفت على مناف اللي كانت تصيح بصمت .. سحبتها من شعرها وتمت تضربها وتصرخ عليها ..
ام مناف: كنتي تعرفينه .. كنتي تكلمينه بالتلفون .. فضحتينا ياللي ما تستحين .. حسبي الله عليج ان شاءالله ..
مناف بألم: آآآآه يمه .. الله يخليج لا تسوين فيني جي ..
ام مناف تتنفس بسرعه: انتي .. انتي مب بنتي .. انتي فضحيتيني ..
تمت ام مناف تصرخ وعبدالله كان واقف يطالعهم ويصيح .. ركض في حضن مناف وكان يحاول يبعد يد امه عنها ..
عبدالله وسط دموعه: لا يمه لا .. حرام تضربين مناف ..
ام مناف: قوم انت الثاني خل أأدب اللي ما تستحي على ويها ..
مناف: حرام عليج يمه .. حراااااااااااااااام ..
ام مناف: انتي مب بنتي .. انا بريه منج ..
فيصل دخل البيت وهو مستغرب من الصراخ .. راح صوب مصدر الصوت .. وتفاجأ بالمنظر اللي شافه .. ركض صوب امه و سحبها عن مناف ..
فيصل: شفيكم .. شصاير ..
ام مناف: اختك فضحتنا .. اللي ما تستحي على ويها ..
مناف: لاااااا يمه .. لااااا ..
عبدالله تم يصرخ ويصيح من الحزن .. ام مناف طلعت من الغرفه ورضخت الباب وراها .. فيصل تم واقف يطالع مناف اللي كانت تصيح وحاضنه عبدالله .. راح صوبها وحضنها بحنان ..
فيصل: خلاص مناف حبيبتي .. لا تصيحين ..
عبدالله: ليش امي تضرب مناف .. مناف حبيبتي لا تصيحين ..
مناف كانت تصيح على لمة اخوانها حولها .. واللي ذبحها موقف امها .. ام مناف دخلت غرفتها وكانت تشوف ايدينها اللي ترجف ..
ام مناف: انا ليش سويت جي في بنتي .. حسبي الله ونعم الوكيل .. قعدت على الارض وتمت تصيح بقهر .. كانت مستغربه موقف ام فارس .. وعرفت ليش ام فارس ما جات تخطب مع الجده وفاطمه ..
ام مناف: يعني بنتي رخيصه .. آآآه يالقهر ..
الوضع في بيت مناف كان حزين .. فيصل كان يهدي مناف وعبدالله .. راح وجاب ماي وسقاهم .. مناف كانت قاعده على الارض وحاضنه عبدالله واطالع الارض .. فيصل طلع من الغرفه وراح الحوش .. اتصل بفارس ..
فارس مبتسم: هلا فيصل ..
فيصل بحزن: فارس ..
فارس بخوف: شو فيك ؟
فيصل: تعال البيت الله يخليك ..
فارس بتوتر: فيكم شي يا فيصل ؟
فيصل: تعال وبتعرف .. ماقدر اتكلم ..
فارس: ان شاءالله ..
سكر فارس وهو خايف .. ركب السياره وراح صوب بيت مناف .. طول الدرب كان يفكر وألف فكره واحتمال جاوا على باله .. اول ما وصل شاف فيصل واقف عند باب الحوش والحزن باين فعيونه .. نزل وراح صوبه بسرعه ..
فارس: شو صاير عندكم فيصل ؟
فيصل: فارس انا دخلت البيت وشفت امي تضرب مناف اختي ..
فارس: ها ؟؟ ليش ؟
فيصل: مادري .. لقيت عبود يصيح في حضن مناف .. ومناف كانت تقول لامي يمه حرام عليج ..
فارس تنفس بخوف: زين اختك الحين ؟
فيصل: في غرفتها مع عبود ..
فارس: وامك ؟
فيصل: امي في غرفتها .. ماعرفت شاسوي .. فارس انا خايف ..
فارس حط يده على كتف فيصل: لا تخاف يا فيصل .. روح بلغ امك وقولها اني موجود ..
فيصل: ان شاءالله .. زين تفضل الصاله ..
فارس: بارك الله فيك .. " شو السالفه ؟ شو سر هالدموع والغضب اللي في بيتهم " ..
فيصل دخل على امه اللي مسحت دموعها اول ما شافته ..
ام مناف: هلا يمه ؟
فيصل: يمه فرس فالصاله ..
ام مناف بحزن: زين قوله الحين جايه ..
فيصل منزل راسه: ان شاءالله ..
طلع من الغرفه وراح سوا شاي لفارس .. قدمه له وقعد معاه .. ام مناف دخلت الصاله وكانت عيونها حمره من الصياح ..
ام مناف: السلام عليكم ..
فيصل وفارس: وعليكم السلام ..
ام مناف: فيصل يبه خلني بروحي مع نسيبك ..
فيصل: ان شاءالله ..
طلع فيصل من الصاله وترك فارس وامه ..
فارس: يمه عسى ماشر .. شو فيكم ؟
ام مناف دخلت فالموضوع من دون مقدمات ..
ام مناف: فارس انت كنت تكلم مناف بنتي على التفون ؟
فارس نزل راسه: اي نعم ..
ام مناف: وقلت لاهلك انك تعرفها ؟
فارس: لا ما قلت لهم .. بس انا يوم قلت لهم اني بتزوج وقلت ابغي بنت فلان عرفوا ..
ام مناف: وانت تشوف اللي سويته صح ؟
فارس: انا صححت غلطتي يوم دخلت من الباب .. وبعدين لو كنتي مفتكره اني اسغليت بنتح قبل لا املج عليها .. اسمحلي اقولج ترا بنتج اخلاقها عاليه .. ولزمتني حدودي معاها .. وانا عندي خوات وادري ان الدنيا دواره ..
ام مناف ماقدرت ترد على كلام فارس ..
فارس: يمه انا حاط مناف بعيوني .. ولا تفتكرين اني مسترخصها .. بالعكس ترا مناف لها معزه في قلبي وانا سويت المستحيل عشان اخذها بالحلال ..
ام مناف: فارس يبه اتمنى قرارك ما أثر على موقف اهلك معاك ..
فارس بحيره: شلون ؟
ام مناف: يعني اتمنى ان اهلك يكونون راضين على زواجك من بنتي .. ترا انا ما ارضى لبنتي ان غيرها يحسسها انها اقل منهم او انها رخيصه .. ترا الف من يتمناها ..
فارس: بنتج على عيني وراسي .. ومحد بيجرحها دام راسي يشم الهوا .. والله يقدرني واسعدها .. واوفر لها الحياه اللي تستحقها ..
ام مناف: ان شاءالله ..
فارس: صاير شي يمه ؟
ام مناف بارتباك: لا ولاشي ..
فارس: ليش يقول فيصل انج مديتي ايدج عليها ؟
ام مناف: لا خلاف بيني وبينها بس ..
فارس: زين ابغي اشوفها لو سمحتي ..
ام مناف: ان شاءالله بروح اشوفها ..

طلعت ام مناف وتركت الافكار تودي وتجيب فارس .. كان محتار ومب قادر يفكر .. ام مناف دخلت على مناف اللي كان شكلها يعور القلب وهي حاضنه عبدالله اللي نام بحزن في حضنها ..


يتبع ..
__________________