اسفة شوف لك غيري

الجــزء الســادس
~~)(~~ اسكني حب واسكني فرقا .. ان صبرت اشقى وهجرت اشقى .. العمر يمضي .. والجروح تبقى .. اختر الحل الصعب ياتفارق يا تحب ~~)(~~

تم راشد يالس ع البحــر اكثر من ساعه .. يالس ويطالع البحر .. يحاول يتمالك اعصابه يحاول يهدي نفسه يهدي عمره بس مب قادر .. عمره ما تخيل نفسه في يوم وليلة يحب وحده كان يلعب عليها .. يفكر كيف يخليها تحبه هي لين الحين مب مصدق انه تغير كل شي فيه تغير حتى حركاته حتى كلامه قبل كان واحد تافه ماعنده شي غير اكل وشرب ورقاد ومغازل ... بس الحين تغير صار انسان ثاني
صار راشد شخص غير عن قبل .. بروحه مستغرب من عمره ..

اسكني حب واسكني فرقا
ان صبرت اشقى وان هجرت اشقى
العمر يمضي والجروح تبقى
اختر الحل الصعب ياتفارق يا تحب
لاتحدد مراحل لالا يا تجيني حب
ياتودعني راحل هذي ورده للهوى
هذي جروحك عطني روحي سيدي او خذها روحك
وشبقى ضاعت سنيني يا بعد قلبي وعيني
اختر الحل الصعب يا تفارق يا تحب
لا تردد في غرامي لالا ابتسامي دمع
وسكوتي كلامي افتح يدينك لشمسي
ولهمومي كحل عيونك بدمعي وشحوبي
واعشق الهم اللي فيني هذا كانك تبيني
اختر الحل الصعب ياتفارق ياتحب

تم راشد محتار شو يسوي بعمره خلاص هو مب قادر يستحمل اكثر من جذي
ماقدر يمنع نفسه يتصل فيها مره ثانيه .. اتصل بس ما ردت عليه تم يفكر شو يسوي في هالـ عاليه اللي مخبلتنه .. فقرر يتصل في ربيعه مايد يمكن يساعده ولا يلقط فكره من افكار مايد وينفذها ..
اتصل في مايد وهو بعد ما يشل التلفون اكيد راقد هذا اللي فكر فيه راشد
عقب خمس دقايق .. اتصل فيه مايد ..
مايد: مرحبا الساع
راشد بعصبيه: ليش شليت تلفونك
مايد: كنت بزي .. ولا حرام اكون بزي
راشد: انزين ما علينا ..
مايد: شو صار معاك ؟ رمسيتها ولا شو
راشد: هيه رمسيتها بس هي لين الحين ما تصدقني
مايد: قلت لك اتزوجها اكيد ابوها بيوافق هي بتستحي من ابوها وبترضى فيك
راشد: لالالا هاي الفكره شلها من بالك يا حبيبي
مايد: ليش الزواج ستر .. خذها وفك عمرك وحلوا مشاكلكم بروحكم
راشد: ياخي انته ما تفهم شي ( يرفع ايده من حرته) عاليه خلالالالاص ما تبغيني
مايد: ياخي تبغيك بس تكابر ..
راشد: خلها تكابر انا وراها وراها .. لين ما تحبني
مايد: الصراحه راشد بس لاتزعل انته ذال عمرك ع الفاضي ..
راشد: عادي بذل عمري حتى لو كرامتي راحت بعد انا بركض وراها لين ما تحبني
مايد: خيبه خيبه مب حب هذا .. الله لا يذلني عسب حب بنيه ..
راشد: زين زين
مايد: شو زين زين .. وينك انته .؟؟
راشد: انا ع البحــر
مايد: خيبه تخيبك في هالحر شو ما تموت حر
راشد: لا ما اموت الجو لاباس فيه تعال
مايد: لا ابويه مب ذابح عمري روح زين
راشد: عيل لاتسأل
مايد: ماعرف شو سالفتك كل ما تبغي ترمس حبيبتك ترمسها ع البحر ماعرف شو ياينك ترمسها برع البيت اللي يشوفك يتحسبك قطو متشرد
راشد: لاني انفعل بسرعه ومابغي قوم امي يسمعوني ارمسها يالذكي
مايد: ليش تخاف
راشد: انا مب خايف لاني ارمس عاليه بالعكس .. بس الخوف من امي لو سمعت سيده بتخبر خالتي وخالتي اكيد بتقول حق بنتها .. وبنتها ما شاء الله نشارت خبور .. ماخلت حد ما حشت فيه .. آه بس لو ازخها اضربها ضرب واذبحها الساحره
مايد وهو منفعل: اووووف ليش كل هذا ؟؟؟ جيه بنتها شو مسويه فيك ؟؟
راشد: ثراك ما تعرفها هذي الساحره .. تدري محد خرب بيني وبين عاليه الا هااي .. اموت وااعرف هذي شو قصتها معااي كارهتني كره وانا اكر عشان هالسالفه.. ياخي كرهتني عيشتي خربت حياتي .. العذاب اللي انا فيه سبته هاي السوسه .. لو بس ازخها بربطها وبحرقها في الشمس لين ما تذوب بعفنها هناك .. كرهت اسير بيت خالتي والسبه بنتها .. شو اقولك عنها شيطانه ام لسانين ..
مايد: وانته شلك فيها (بعد ما استوعب كلااام راشد ان روضه تصير ربيعة عاليه) يالذكي ليش ما فكرت فيها
راشد: اتزوجها لالا شو مينون ( قاطعه مايد(
مايد: لالالا انا مب قصدي تتزوجها انا قصدي ليش ما فكرت فيها انك تحل المشكله عن طريق بنت خالتك
راشد بكل انتباه: كيف ؟!!
مايد: انا بقولك كيف ... بنت خالتك تصير ربيعة عاليــه انزين.. وعاليه اكيد تسمع كلام بنت خالتك مدام بنت خالتك اللي خربت بينكم ..وجذي انته سير وقول حق بنت خالتك كل اللي يصير فيك وقول انك تحبها وتبغي تزوجها بس تبغي عاليه تكون راضيه عليك .. انزين
راشد : انزين وبعدين ..
مايد: انزين .. سير عندها وقول قصتك كلها .. وهي اكيد بتتعاطف معاك ..سير قول لها انك تحب ربيعتها .. وهي طبًعًا ما بتقصر بتسير على طووول بتخبر عاليه على كل شي .. وان شاء الله عاليه ترد لك وشكرًا لحسن تعاونكم معنا .
راشد: لالالا كيف راحت عن بالي هالسالفه .. افا يا راشد مخك وينه من الصبح
مايد: في جيبه هاهاهاااي
راشد: ماعلينا الحين .. يعني اكيد الخطه مضمونه ؟؟
مايد: اكيد مدامها من هالراس .. اكيد انته سير عند بنت خالتك وانته مغمض هاهاهاي وقول كل شي وهي بتساعدك ان شاء الله
راشد: ياريت ..
مايد: الحين بعد ما حلينا سالفتك .. استودعك الله ابغي ارقد
راشد: زين روح ارقد ابويه سير زين حفظك الكلمه استودعك الله
مايد: يعني لازم تغثني قبل لا ارقد ياخي بلاك
راشد: لاحوول لاتعور راسي جنك عيوز
مايد: فديت عيوزي
راشد: الله يخليها لك
مايد: آمين ومع السلامه
راشد: الله وياك

فكر راشد يطرش مسج لعالــيه
تذكر صاحبك وارجع
تقرب له ولو بالصوت
على آخر نفس واقف
تجي ولا يجيه الموت
واظن الموت أقرب منك
واظن انك تبي موته
واخاف انك بعد موته
تحن وتفتح التابوت
واخاف من القهر يقفل في وجهك باب تابوته


-------------------------------------
بيت عاليه ..
بالتحديد في غرفتها..
------------------------------------

كانت يالسه عاليه وسرحانه مب عارفه شو تسوي براشد هي الحين ما تباه هو ليش متعلق فيها هالكثر.. وبعدين ليش يالس يتصل فيها الحين هو مب يبغي ينساها خلاص .. ليش يالس يجذب عليها مره ثانيه... وهي يالسه تفكر وهي سرحانه .. صوت المسج قطع افكارها
شافت مسج من راشد ..
وهي مب قادره تتخيل راشد .. هي قبل بالعافيه كانت تحصل مسجات من راشد حتى يوم كان يتصل فيها .. ما كان يرمسها وايد كان يتعذر لها يقول عنده شغل ولا معزوم عند ربعه ولا ولا ولا .................. الـــخ
وكانت هي تركض وراها .. والحين العكس ..يركض وراها ويتمنى كلمه منها ونظره ..

فطرشت له مسج ترد عليه
لا تعتذر بدموع هذي نهايه
إبعد وانا ابعد ما ورا البعد تجريح
إن قلت او ما قلت ردي كفاية
خل الفراق يحل كل المواضيع
ماتلتقي في الدرب غاية وغاية
الدرب واحد مايجي فيه تنويع

عاليه: هذا متى بيفهم اني خلاص ما ابغيه شو ما يحس مافيه دم.. شو نوعه هذا .. خلاص ما ابغيك لاتحاول معاي.. ما ابغيك ابتعد عني اففففف متى بتفك منه من وي

)وهي يالسه ترمس روحها ..شافت مسج ثاني من راشد (

لاجارت الدنيا ترى
الروح تفداك
مادام قلبي يابعد
عمري يهواك
ومادامني حي
مستحيل أنساك
وبأبقى أحبك
إلى يوم ألقاك
وإذا حال الزمن
بيننا ياملاك
أرجوك ماتنسى
قلب أغلاك
عايش بدنياه وهو
باقي على ذكراك

سخيف يتحسبني برد له بمسج ولا مسجين .. مسكين حالك يا رشود
وطرشت له مسج ثاني
خلاص يكفيني معاناة وياك
ارحل وبرحل مابقا شي فيني
اتعبتني وياك واتعبني رضاك
واتعبت قلبي ياشقاي ونيني
محدن ترى فيني يسوي سواياك
محدن غيرك اهمومه تجيني

ما مرت الساعه دقايق الا وراشد مطرش لها مسج ثاني
اكتبي ما ابيك بالخط العريض
وأضربي في حبنا حايط جفاك
واتركي دمعي على خدي يفيض
يمكن انه لأنتثر يروي ضماك
في فراش الموت خليني مريض
أنتظر موتي ولا أعيش برجاك
اشهد اني يوم فارقتك حضيض
لو نهاية رحلتي صارت هلاك

فطرشت لها مسج وخلت تلفونها على سايلنت ورقدت ..
عسب تفتك منه وحشرته
مع السلامه

مانبي غير فرقااك
دامك مقفي
مالنا فيك قدره

------------------------------
بيت راشــد
بالتحديد في الصــاله
--------------------------------
ام راشد كانت ترمس سعيد اخو راشد على اساس يدورون حق راشد حرمه من قرايبهم وطبعًا راشد ماعنده خبر بالسالفه
ام راشد: ياسعيد راشد محتاي حرمه تهتم فيه وتعاونه وانا ماقدر على طلباته انا بروحي تعبانه وريلي ما تشلني وكيف تباني اتراكض لطلبات راشد
سعيد: راشد مب مال حرمه راشد حق الهياته وما يستحي هذا بيفضحنا جدام العرب اذا خذ بنتهم ..
ام راشد: الزواج ستر حق الريايل والحريم خله يزوج وشوف كيف بيتغير بصير سنع .. بيحس بالمسؤوليه
سعيد: اقص ايدي اذا هذا غدا شرات الاوادم
ام راشد: نسيت عمرك يوم كنت كبره ها يا سعود
سعيد: امي انا غير هو غير ..
ام راشد: لا غير ولا شياته راشد بعد غير
سعيد: محد مخربنه غير دلعج الزايد ..
ام راشد : مثل ما دلعتك دلعته .. وانتوا عندي نفس الشي ومحبتكم وحده

)دخل راشد الصاله وحالته حاله ... وتم سعيد يشوفه من فوق لين تحت .. جنه شايف شي غلط .. (

راشد : بلاك جذي تطالعني جنك شايف شي
سعيد: طالع شكلك تقول واحد شارب
راشد: انا شارب ...؟؟؟ كنت برد عليك رد يسكتك بس الله يسامحك
سعيد: من وين طالعه الشمس
راشد: من فوق راسك
سعيد: الله يهديك
راشد: ويهديك
ام راشد: ما تستحون انا هني وانتوا جذي ترمسون مب عيب عليكم
راشد وهو يلوي على امه : فديت هالويه امي فديتج نحن نحشمج ونحبج بس سعيد الله يهديه مخبلبي
سعيد: هيه صح انا اللي اخبل وانته بلسم للجروح
راشد وهو يتنهد: آآآه هيه صح
ام راشد: بلاك فديتك شو فيك
راشد: ها ..... ماشي .. اسمحولي انا بسير ارقد تعبان حدي
ام راشد: روح فديتك ربي لايتعبك ..
سعيد: هيه هيه سير ابويه سير
ام راشد: يوز عن الولد خله يروح يرتاح ما تشوف وي غادي اصفر .. وعليه ما ياكل شرات قبل .. حتى ما يضحك شرات قبل شوفه جيف صاير فديتك روح ارتاح ..

)قام راشد وسار غرفته .. مع كل خطوه يفكر في عاليه .. حتى قلبه صار ينبض بسم عاليه كل شي فيه عاليه .. عاليه .. عاليه ..
مب قادر يشل هالانسانه من باله صارت عاليه اكله و شربه وحتى نومه
صارت عاليه بطلة احلامه .. (

ويـــن يا من تسهر عيوني مت ولا حي يالغالي
اذكر انك مصدر جنوني وكل ما يطري على بالي
ان نسيت انساك وتهوني في دقيقه ينقلب حالي
كيف ترضى عايش بدوني وانته بك تتعلق امالي
ما تحمل تصدق ضنوني لو تغيب الناس تبقالي
غصب عن منهم يلوموني وكل عذالك وعذالي
هي خلاصت حبي وشجوني وانته دوم الكوكب العالي
بس لاتغدر ولا تخوني يالعرب ما تولد اللالي


الجـــزء السابــع
~~)(~~ كفى ماجرالــي ياغلا منك وجاني كفاني ترا حكم الجفى منك يكفيني~~)(~~

كفى ماجرالــي ياغلا منك وجاني
كفاني ترا حكم الجفى منك يكفيني
عيوني لكم ذاقت ورمشي و جفاني
ونار الشقى والشوق في القلب تكويني
انا الشوق من جور الجفا بان في عياني
وانا الوجد من جود العنا عاد مشكيني
حلى الحسن في رمشك على الحب وزاني
تباعتك ولا ادري وين؟! دربك موديني
سلبت الخفوق وايش تبغي بعد ثاني
ترا الروح في كفك وحبك معنيني
تعبت اشتكي منك وحبك تبلاني
تعبت اطلب وصالك ولا تبغي تجيني

تم راشد متحسف على اللي سواه في عاليه .. صدق ان الدنيا دواره
بعد ما باعها الحين يباها ..

كان يحاول يرقد بس مب قادر يرقد .. يحاول يمحي عاليه من خياله مب قادر
حتى في صلاته قام يفكر فيها .. اتي في احلامه .. والشي اللي ذابحنه انه يحلم فيها وهي ميته ..
هالشي اللي يخوفه عليها وايد .. تمت عاليه مسيطره على راشد طول الوقت صارت عاليه كل شي في حياة راشد ...
اللي يشوف راشد الحين يتعجب ويستغرب قبل راشد شو كان والحين راشد شو صار فيه .. صار انسان ثااني غير عن قبل..
المسكين مب قادر يرقد والسبه عاليه ..
تم يفكر فيها لين الصبح .. وهو تعبان يبا يرتاح بس مب قادر .. يبغي يرقد يبغي لو دقايق ينسى عاليه ويريح عمره .. مب قادر حتى يحقق حلم كان يتمناه ..

الساعه صارت 5 الصبح وراشد واعي .. لين ما تغلب النوم عليه ورقد
وهو راقد حلم في عاليه .. لابسه فستان عرس وهو كان المعرس بس كل ما كان يحاول يوصل لكوشه مب قادر يحاول يتقرب منها اكثر واكثر وهي تبعد وتبعد وهو يحاول يزخها بس مب قادر وكل المعازيم ناس غرب .. اشكالهم تخوف غير ..
الكوشه كانت سوده وكلها سواد .. والناس لابسين اسود وشعرهم احمر وعيونهم تخوف.. وعاليه كانت بريئه بنسبه لهالأشكال .. كانت لابسه ابيض ومنوره .. ويا ابيييييض .. تقرب منها يوم تقرب منها طارت واختفت ..
فز من نومه وهو خايف .. يتصبب عرق .. من شدة خوفه اتصل في عاليه
بس محد كان يرد عليه .. خاف على عاليه .. حس ان فيها شي بس كيف يوصل لها .. هو يتمنى يكون قريب منها في هاللحظه ..
بدون ما يحس قام وشل سويج سيارة .. وسار صوب بيت عاليه ووقف جدام بيتهم يالس ويشوف بيتهم .. وهو قلبه يدق يدق يدق جنه طبل ..
وهو يتحرقص في مكانه يبغي يسير ويشوفها .. من شدة انفعاله فتح باب سيارته ونزل سار عند بيتهم .. هو عند الباب حس بعمره .. فرجع مكانه وركب سيارته وتم فيها .. وهو يالس ويتريا حد من بيتهم يظهر حتى لو البشكاره .. حتى لو كان الدريول ..
بس بعد شوي غير رايه وفكر انه يرجع بيتهم ويتريا لين الساعه 10 الصبح ويسير محل الورود ويطرش لها احلى باقة ورد مثل هذيج المره ..
لان هو يعرف ان عاليه تحب الورود ..

تم راشد في بيتهم لين الساعه 10 الصبح .. وسار على طول محل الورود .. وخلى الريال السوري يسويله باقة عوده وحلوه .. وفي البطاقة كتب
"وحشتيني" واخر شي كتب " راشد"

وركب الريال اللي يشتغل في المحل معاه ووصله لين بيت عاليه وطرش الريال مثل هذيج المره ..
وتم راشد يفكر الحين عاليه اذا شافة الباقه شو بتسوي .. اكيد بتتفاجأ
يمكن تعصب ..
اكيد بتدعي عليه .. تم يفكر ويفكر مب عارف كيف يتصرف ..

وصل الريال محله .. وتم يحوط في الشوارع .. وهو يالس يفكر اتصل فيه اخوه سعيد
راشد: الوو
سعيد: هلا راشد اشحالك
راشد: اهلين .. لاباس بحالي
سعيد: زين .. ابغي اخبرك .. ان البارحه امي رمستني وتبغي تخطبلك
راشد وهو مب مستوعب: شوو تخطبلي ؟؟ ليش انا قلت ابغي اعرس
سعيد : امي تبغي تزوجك عسب تعقل
راشد وهو معصب: ليش شايفيني مينون .. والله ان سوتها امي لا انا ولدها ولا تعرفني بهج من البيت ولا برجع فاهمين
سعيد: راشد خلك عاقل .. امي تبغي مصلحتك وبعدين امي ما بتخطب لك وحده شينه اذا هالسالفه هامتنك
راشد: ان شاء الله تكون ملكة جمال الكون والله ما تزوجت الا اللي ....
سعيد: الا اللي شو ... ؟؟؟ راشد انته حاط وحده في بالك ولا شو السالفتك
راشد: هيه هيه حاط عندك مانع .. ياخي حلوا عني انا بروحي اللي فيني مكفيني .. اففف منكم كلكم ذابحيني ذبح لا ارتاح من ناس ولا ارتاح في اهلي شو تبغون تذبحوني انتوا
سعيد: شوي شوي هد بلاك ماكل فلفل .. شوي شوي على عمرك حشى شو بلاك
راشد: سعيد حل عندي وخلني بروحي وقول حق امي اني مابغي اعرس ولا ابغي ازوج خلالالالالاص مابغي شي في هالدنيا غير اني اموت افتك من هالعيشه الخايسه اففف
سعيد: بعيد الشر عنك .. انا بقول حق امي .. بس على فكره امي تبغي تخطب لك روضه بنت خالتي
راشد اول ما سمع اسم روضه عصب زياده : لا والله لو كانت آخر بنت في هالعالم ما خذيتها .. انته تعرف انا اشكثر اكر هالأنسانه .. اذا هاي شفتها مكان برتكب فيها جريمه بذبحها تعرف شو يعني بذبحها ..محد خرب حياتي غيرها .. لو تزوجتها هذي بتموت في اول ليلة في عرسي .. بذبحها بسوي لها جنازه في ليلة عرسها ..
سعيد: هيه هيه قول هالرمسه على بنت خالتك .. على الأقل الجريبه احسن من الغريبه اللي مانعرف عنها شي ولا نعرف اصلها من فصلها ..
راشد: انا ابغي الغريبه ما ابغي الجريبه انزين مب عاجبك كيفك انا ابغي الغريبه واموت في الغريبه وابغي الغريبه
سعيد: لا والله جيه على كيفك هو تاخذ اللي تبغيها .. لا ابويه لا صح اني حطيتك على كيفك طول عمرك بس الحين لا هذي سمعة العايله ما بنخليك تزوج وحده من الشارع فاهم
راشد: ان شاء الله تكون من وين ما تكون .. وانا ما اسمح لك تقول عنها بنت الشارع واصلا انته شو عرفك فيها .. هيه يا بابا نسيت ايام وانته طايح حب في اللي خذيتها هيه نسيت ..
سعيد هو قافط : لا انا غير وانته غير
راشد: ذبحيتنا انا غير وانته غير ليش نازل من بطن وحده ثانيه ولا مولود في ايدك ذهب.. وبعدين مب انته اللي تتحكم في حياتي .. وهذا انا اذا شفتوني في البيت ..والله ان خطبتوا لي روضه لا انا ولدكم ولا اعرفكم فاهم ولا تبغيني افهمك
سعيد: انا ما بقول حق امي ولا كلمة بخليها تخطب لك .. شو رايك ؟؟ ولا اقولك رمس امك بروحك انا مب الناطق الرسمي بأسمك فاهم
راشد: برايك ..
سعيد: الله وياك ...
سكر راشد التلفون .. وهو خلاص واصل حده ومصعب مب عارف كيف يتمالك اعصابه ..
من شدة عصبيته اتصل في روضه بنت خالته .. وقرر انه يبين لها ويقول لها انه يحب عاليه .. وجذي اذا امه عاندته وسارت خطبت له روضه .. فـ روضه بترفض راشد عشان خاطر ربيعتها عاليه ..
اتصل فيها اكثر من مره بس روضه ما كانت تشل التلفون .. يمكن لانها ما تعرف رقم راشد ...!!
تم يدق لها ويدق ويدق بس هي ما تشل قال في خاطره يمكن راقده او ماتبغي تشل التلفون لانها ماتعرف رقمي تتحسب رقم حد غريب ..!!
تم متحرقص مب عارف شو يسوي في عمره .. ماقدر يروح بيتهم لانه مايبغي يواجه امه
اكيد سعيد الحين سار وخبر امه على كل شي ..
وهو يالس يسوق سيارته رن تلفونه .. وكان رقم روضه .
رد عليها بسرعه ..
راشد: الوو
روضه: هلا راشد
راشد: اهلين روضه اشحالج
روضه: بخير انته شخبارك
راشد: بخير
روضه: راشد شو كنت تبغي متصل فيني
راشد: وانتي كيف عرفتي اني متصل فيج
روضه: اكيد من رقمك جيه تتحسبني ماعرف رقمك؟؟!!
راشد: هيه .. على العموم ما علينا خلينا ندخل في الموضوع احسن
روضه: انزين .. قول اللي تبغي تقوله
راشد: والله ماعرف كيف اقولج .. روضه انا احب عاليه .. (قبل لايكمل روضه قاطعته(
روضه: تحب عاليه ..؟؟!! وانته شو عرفك اني اعرفها
راشد: عاليه خبرتني
روضه: جيه هي لين الحين ترمسك
راشد: ياريت .. هي مقاطعتني ماترمسني ولا تشل تلفونها ناا ابغي ارمسها ابغي اقول لها اني احبها وهي ما تعطيني فرصه اخبرها..روضه ( وبصوت واطي ) دخيلج
روضه مب مصدقه: جيه شو تتحسب البنيه لعبه عندك .. لا ابويه لادخلني انا في هالمواضيع
راشد: روضه .. انا حاط املي كله عليج لا تخيبين ظني .. روضه تدرين ان امي تبغي تخطبج حقي ؟؟
روضه هي مستغربه: شووو انا آخذك لالالا مابغي جيه شو الدنيا فوضه
راشد: بما انج ما تبغيني .. ؟؟؟ قولي حق عاليه ترد لي .. وقلي لها اني بخطبها اذا تبغي.. قولي لها اني احبها واموت عليها
روضه: تبغيني اجذب على اعز صديقه عندي اسمحلي راشد ما بسويها
راشد: انا ماقلت جذبي عليها .. انا ابغي منج شي واحد بس قولي لها اني احبها والله احبها ياربي ليش ماحد مصدقني .. قولي اني احبهاا وابيييييييها ..
روضه: شو الدليل انك تحبها ..
راشد: بسير اخطبها اذا تبي .. بسير لها وبترجاها .. بسير عندها المهم ابغيها تكون لي انا بروحي .. الله يخليج روضه دخيل والدينج تقولين لها اني احبها
روضه: ماقدر ماقدر اسمحلي راشد ماقدر اقول لها .. انته اللي خربت علاقتك معها انته صلحها انا ماقدر اتدخل بينكم
راشد بعصبيه: لاوالله ماتقدرين .. بس تقدرين تخربين اللي بينا ها ؟؟ تعرفين كيف تسوي عمرج الطيبه اللي تبغي مصلحتها ..يوم ابيها ترجع لي ماتقدرين بس تعرفين تخربين ها ؟؟
روضه: .............
راشد: ليش ساكته ردي ؟؟ قولي شي .؟؟!!
روضه: والله قلت لها الحقيقه و......
راشد: و؟؟ شو قولي
روضه : ولا شي .. انا بسكر امي تبيني
راشد: امج تبيج .. اوجيج روضه .. الله وياج .. بس لاتنسين الله فوق
روضه: مع السلامه (وسكرت (

تم راشد مب عارف شو يسوي .. الحين كيف بيتصرف .. كيف بيحاول مع عاليه ترد له .. كانت روضه الأمل الوحيد الحين شو بيسوي معاها ..
هي مب طايعه ترضا فيه ..

---------------------------------------
في بيت عاليه
في غرفة عاليه بالتحديد
الساعه 11:30 الصبـح
--------------------------------------
نشت عاليه .. وشافت ورده .. عرفت انها من راشد
تقربت من الباقه وشافت البطاقه وقرتها مكتوب في البطاقه وحشتيني مثل ما توقعت طلعت الباقه من راشد ..
فرت البطاقه على الطاوله ولا عطتها اهميه ..
تمت يالسه .. مب عارفه شو تسوي
فتصلت في روضه ..
عاليه: هلا روضه
روضه: اهلين علويه انتي شخبارج وينج يالقاطعه
عاليه: موجوده .. انا بخير وسهاله .. وانتي شخبارج
روضه: انا بخير الحمدلله
عاليه: شو مب ناويه تزوريني ؟ ؟؟
روضه: لا حبيبتي تعالي انتي اخر مره انا ييتج تعالي انتي الحين
عاليه: تدرين ان مالي خلق لطلعه ..
روضه: لا حبيبتي بتين وان ما ييتي بطرش لج الشرطه يسحبونج من شعرج عسب اتين
عاليه: ه خلاص بييج العصر
روضه: زين تعالي العصر عسب علي اخوي مايكون موجود .. امي اليوم بعد بتظهر ..
عاليه: خلاص تم
روضه: يالله سكري خليني اعرف شو بأكلج اليوم ه
عاليه: مابغي أكل
روضه: جيه على كيفك بسوي لج كيكه اللي تعلمت اسويها من كم يوم
عاليه: شو تجربين فيني
روضه: هيه ثراج فار تجارب
عاليه: عيل مب يايه
روضه: بتين وان ما ييت بزعل منج فاهمه
عاليه : انزين حشى مب تهديد هذا
روضه : يالله سكري سكري ابغي اتزهب من الحين
عاليه: انزين باي
روضه : باي

-----------------------------------
في مكتب راشد
------------------------------------
كان راشد يالس وجدامه اوراق وملفات وحالته لله وهو مب منتبه لشغله ويالس حالته حاله رن تلفونه شاف الرقم طلعت روضه ..
راشد: هلا بنت الخاله
روضه: راشد انا مابيني وبينك كلام بس بغيت اخبرك ان عاليه بتي بيتنا اليوم اذا تبغي ترجع لك تعال بيتنا وحل مشكلتك
راشد مب مصدق : حلفي والله بس انا كيف ايي بيتكم .. اخوج بيكون موجود
روضه: اكيد لا بيسير اليوم المزرعه
راشد: وامج مابتكون موجوده ؟
روضه: لا بتسير بيت ربيعتها
راشد: عيل انا مب ياي اسمحيلي
روضه: ليش مب تبغي ترمسها تعال بيتنا وحل مشكلتك فيس تو فيس
راشد: سوري مب متعود ادخل بيوت ناس وبناتهم بروحهم
روضه: انته داش بيت خالتك مب بيت حد غريب
راشد: ماقدر روضه صدقيني ماقدر وبعدين انتي وعاليه بتكونون بروحكم هالشي مب زين شو بيقولون الناس اذا شافوني اظهر من بيتكم وانتي بروحج
روضه: لاحوول تعال من وقت عسب علي اخوي ما يظهر اذا شافك موجود عندنا
راشد: عيل انا بيب امي معاي اليوم خلي امج تقر في بيتها
روضه: بقول لها ان خالوه بتزورنا .
راشد: انزين بس اذا امي رمست عن الخطوبه انتي ارفضي دخيلج روضه
روضه : اكيد برفض
راشد: مشكوره روضه ماقصرتي .. انتي بعد حاولي مع عاليه دخيلج
روضه: لاشكر على واجب وبعدين نحن شرات الاخوان .. وان شاءالله بحاول معاها لاتخاف بس اتمنى تكون صادق هالمره
راشد: والله صادق والله العظيم .. ماقصرتي روضه والله فرحتيني من الخااطر
روضه: الله يسلمك يالله انا بخليك الحين
راشد: برايج ماقصرتي
وسكرت عنه روضه .. وهو مب قادر يشيل عمره من الفرح مب قادر يتصور ان عاليه بتكون في بيت خالته .. بيحاول قدر مايقدر انه يرمسها بدون محد يشوفهم عسب تفهمه ويفهمها ..

اجيك يسلم راسك وشلون ما جيك
وياك انا بالذات صعبه اتغلى
والله مادري من الغلا وين اوديك
تسوى عيوني ولا بعد يمكن اغلى
لا جيت انادي غيرك اسهى و اناديك
غصبًا علي يالين ماركى تدلى
روحي تنادي لك وقلبي يناديك
عليك ومافي دنيتي شي يغلى
آمر تدلل مالك الا اللي يرضيك
قدرك على كل الخلايق تعلى
قلنا تغلى بين زت بتغليك
والناس قالوا من تغلى تخلى