للايام قرار اخر

وطلع مبارك ويا سعيد صوب ميلس هزاع يكملون السهرة هناك ... اما في البيت فكانت روضه تغلي من داخل بس ما تدري ليش هي اصلا مزاعله سعيد وما تكلمه .. بس ما تشوف ان نورة هاي تناسب سعيد ولا في أي شي ... ولا تتستاهل تاخذ واحد مثل سعيد او سعيد بالاخص ... ولد عمها السخيف التافه في رايها بس بعد ولد عمها وتحاول تقنع نفسها بانها ما تحاتيه هو تحاتي عوشه وبسوم كيف بيعيشن وياها ... بعد هي ما تطلع من البيت .. كيف تخلي عمها وبنات عمها حق هاي تاخذهم منها هي
***
مر الويك اند وروضه في بالها هالموضوع اكثر من سالفة عرسها هي ... أما حمده فقررت انها تروح المستشفى يوم السبت الصبح تفحص وتشوف ليش ما حملت لين الحين ... وبتمر على فطوم المدرسة تروح وياها وبتردها بعدين ... سعيد نسى سالفة الخطوبة هاي ولا كأنه رمس امه ... وظل الوضع على ما هو عليه بينه وبين روضه ما تكلمه ولا تقعد وياه ... لو انه تعود على تجاهلها له بس بعده يحز في خاطره الحال اللي هو عليه وياها

يوم السبت الضحى طلعت حمده ويا فطوم المستشفى وسوت حمده التحاليل وقالتلها الدكتورة ايمرن باجر يشوفن نتيجة الفحص ... وفطوم تحاول تطمن حمده اللي اصلا راحت المستشفى دون حتى ما تقول حق خالد ... ووعدتها انها اتيي وياها المستشفى بالباجر ...

سعيد في المكتب قاعد يشتغل .. دخل عليه محمد ربيعه وبعد ما سلم طلب له سعيد كوب عصير من الفراش وقعدوا يسولفون ويا بعض شوي

محمد: فاتتك انت ولد عمك روحة دبي يوم الخميس ... وناسة وعلى فكرة كان في شقة فاضل مكان لكم انتوا الاثنين
سعيد: يا ريال ... الوالد محرج علينا ما يخلينا نروح مكان
محمد: هاهاها صراحه الوالد ما شاء الله عليه شباب .. انت خله ايي معانا مرتين ثلاث وانا اضمن لك ان يرتب لنا الطلعات بعدين
سعيد: هااهاهاهاها حسبي الله على بليسك انت تبغيني اخبر الوالده عليك
محمد: الا صدق بتخبرك ... امس اسمع سلطان يقول بتناسبون سيف بن بطي المحيربي
سعيد: هيه نعم خاطب بنت عمي
محمد: وانتوا اتخبرتوا عنه زين
سعيد: هوه من اهل حرمة عمي الله يرحمها ... وتخبر عنه خالهن
محمد: ما ادري يا سعيد .. بس انت شرات اخوي ويعلم الله انه اهلك شرات اهلي .. وانا ملزوم اقولك اللي اعرفه وانتوا على راحتكم .. اذا تعرفونه ولا لا
سعيد: شعندك قول .. شو فيك
محمد: العمارة اللي فيها شقة فاضل ... تدريبها شقة شباب والعمارة كلها تقريبا شباب
سعيد: زين شو المشكله .. في بنايتهم هي
محمد: لا ... الشقة اللي مجابلة نفس الطابق ... شقة فيها مغربية .. تذكرها انت رايح ويانا كذا مرة
سعيد: هيه اذكرها
محمد: يقولون انه سيف بن بطي ماخذنها هالمغربية ... وصراحه انا ما ادري هو ماخذنها ولا انها ربيعته بس .. وانا شايف سيارته كذا مرة تحت العمارة ... ومرة لقيته جدام باب الشقه ...
سعيد: لا يا محمد اللي تقوله من وراه خراب بيوت
محمد: لا اتحرى اني مرتاح ولا مستانس اني اقولك هالكلام ... بس ما ارضى انكم تنغشون .. ولو في ريال ياي يناسبنا وتعرف عنه شي شين اتريا منك تخبرني مب ادس وتقول خلهم عرفوا عرفوا ولا ما عرفوا بكيفهم
سعيد: ما اعرف شو اقولك ... بس السالفة لازم انتأكد منها
محمد: يحق لكم .. واللي يناسبكم سووه
***

بالنسبة للمستجدات اللي صارت ما عرف سعيد شو يسوي ... او يقول لمنوه بعد ما طلع محمد عنه .. قعد يفكر يخبر خالد ولا ابوه ولا يكلم روضه ويخبرها .. روضه في احتمال انها ما اتصدق الرمسة اصلا وخساسا فيه تاخذ سيف .. بس كيف يسمح لها بالرعم من كل اللي بينهم انها تدمر حياتها .. هذي في النهاية بنت عمه ... في الاخير قرر يتصل في حمد خال روضه ويقوله اللي سمعه من محمد ... ويعطيه عنوان الشقة عشان يتأكد من هالكلام ...
**
اتصل سعيد في حمد خال روضه وحمده وخبره بالكلام اللي سمعه من محمد وعطاه عنوان الشقة عشان ايتأكد بالطريقة اللي يشوفها مناسبة يسأل سيف بن بطي أو يروح الشقة ... المهم يتأكد قبل لا يخبر ابوه .. وطلب منه انه ما يقولهم انه هو اللي قاله عن سالفة المغربية لا حق ابوه ولا حق بنات عمه
حمد ما قدر يصبر وما حس بنفسه الا جدام العمارة اللي فيها الشقة ... نزل من السيارة وراح الدور ال15 وين ما نعتله سعيد ... دق على باب الشقة 1502 وفتحتله حرمة الشقة وهنيه انتبه على نفسه وما عرف شو يقول

حمد: هذي شقة سيف بن بطي
الحرمة: ايوه
حمد: ((هوه موجود الحين ... ((وكان يدري ان سيف مب موجود في دوامه
الحرمه: لا والله موموجود ... بس اذا قالك تلاقيه هنيه بيجي اكيد
حمد: وانتي شو تصيريله
الحرمة(( بتردد)) : انا زوجته في شي
حمد: لا مافي شي .. مشكورة ما تقصرين انا بمر على سيف المكتب

نزل حمد وركب سيارته بس ما قدر يرد يداوم .. اتصل في سعيد وخبره انه راح الشقة وشافها المغربية اللي يرمسون عنها ... وانها قالتله انها حرمة سيف

سعيد: زين يا بو سعيد وشو ناوي تسوي الحين
حمد: والله ما ادري يا سعيد ... انا ما اريد افضح الريال ولا تكلم فيه جدام العرب هوه ولد عمتي .. بس ما اريد بعد روضه تاخذه
سعيد: زين قولها هيه وخل ابوي يكلمهم ويقولهم ان البنت ما تريد دون ما يخبرهم عن ولدهم
حمد: شورك وهداية الله يا سعيد .. ومشكور ما قصرت
سعيد: شو تقول يا بوسعيد روضه بنت عمي قبل كل شي
حمد: زين ليش انت ما تخبرها
سعيد: لا انا ما اريدها اتعرف اني انا اللي قلتلك عن سيف بن بطي
حمد: ليش انت سويت فيها خير
سعيد: انت خالها وانا الا ولد عمها .. وما اريدها ولا اريد ابوي بعد يعرف
حمد: ان شاء الله انا اليوم بعد صلاة العصر بروح العين وبكلم روضه
سعيد: خلاص الاقيك هناك ... انا بعد بصلي العصر هنيه وبرد العين
حمد: ياللا عيل الحين بخليك ... شي في خاطرك
سعيد: سلامة راسك ما تقصر الله يحفظك
***

ردت روضه من الجامعه الساعة اربع العصر ... وبعد ما غيرت اثيابها وصلت نزلت هي وعوشه وراحن بيت حمده .. لان بسوم كانت تدرس وفطوم راقده وما حصلن حد في الصالة لا امها ولا ابوها .. وفي بيت حمده حصلنها قاعده تشوف التلفزيون ... دخلن وسلمن

عوشه: عيل وين خالد
حمده: راح المزرعة ومن هناك بيمر المكتب
روضه: وليش انتي قاعده هنيه وين عمتي
حمده: ما ادري .. ما رحت هناك من رديت بعد الغدا ..
روضه: شو فيج ... ليش مضيجه
حمده: مب مضيجه ... اقول خالي اتصل طالع ياي العين
روضه: والله من متى ما مرعلينا
حمده: وميرة كلمتني تقول .. اذا ما ترومين تروحين بوظبي بيطرشون من خياط اليزبث عشان ياخذون مقاساتج ... وبيطرشولج تصاميم تختارين
روضه: اوكي متى
حمده: ما ادري
عوشه: وانتي ...
حمده: بخليهم ياخذون قياساتي بالمرة
عوشه: نحن ما كلمنا لا نيكولاس ولا جورج حبيقه
حمده: خلي فطوم اتكلمهم باجر او اليوم بعد المغرب هيه وينها
روضه: راقده

رن تيلفون حمده خالها متصل فيها
حمده: الو
حمد: الو السلام عليكم
حمده: هلا خالي وينك انت وصلت ولا بعدك
حمد: انا الحين داخل بيتكم ... عمج وين
حمده: عمي محد طلع ويا خالد
حمد: عيل تعالن ياللا ... انا ما بدخل لين ما اتي وحده فيكن برع
حمده: اوكيه خالي ... الحين نحن يايين مع السلامه

بندت حمده عن خالها وطلعت هيه وروضه من بيتها وراحن بيت عمهن ودخلن خالهن الميلس وقعدن وياه بعد ما قالن حق الخدامه اتييب لهن العصير والقهوة الميلس

حمد: هاه شحالكن
حمده: بخير الحمده شحالك انت وشحال ام سعيد والعيال
حمد: الحمدلله بخير .. عيل سعيد ولد عمج وين بعده ما وصل
حمده: سعيد في بوظبي ما ادريبه اذا بيي اليوم ولا لا
روضه: خالي شو فيك شكلك مهموم ... حتى ما قلت عني اني احلى بنت في الدنيا
حمد: (ابتسم) خلاص المفروض انج تتأكدين من هالشي ...
روضه: انا متأكده بس استانس يوم اتقولي اياه
حمد: الله يعين اللي بياخذج على غرورج هذا
روضه: ليش بعده سيف ما يدري عنه
اتغير شكل حمد من طرت روضه سيف ولاحظن عليه هالتغيير
روضه: خالي شو السالفة .. شي صاير في سيف او في بيت عمتي مزنه
حمد: روضه انا ما ابغيج تاخذين سيف
روضه: ليش خالي .. شو فيه
حمد: بس ما ابغيج تاخذينه وبس
حمده: خالي العرس بعد ثلاث اشهر والناس كلها تعرف .. وانت ما بتقول هالشي الا اذا عارف شي جايد
روضه: خالي قولي ليش ما تريدني اخذه
حمد: الريال متزوج
روضه+ حمده: شووووو
حمده: كيف متزوج ومنوه بنته وكيف نحن ما نعرف وكيف اييون تيخطبون عندنا دون ما يقولولنا ولا لانها يتيمه ايتحرونها رخيصه ومحد يبغيها
حمد: لا انتي تدرين ان روضه غاليه والكل يدري بغلاتها وانها بيت عمها قاعده شيخه مب ناقص عليها شي
حمده: شو السالفه عيل ... كيف اييوون ايخطبون وما يقولون ان ولدهم معرس ...
حمد: محد يدريبه معرس
حمده: بعد
حمد: ماخذ مغربية بالسر
حمده: كيف عرفت
حمد: عرفت
حمده: كيف عرفت خالي .. منوه خبرك
حمد: انا رحت وشفتها في شقتها
حمده: بعد فاتحلها شقة
حمد: وين عيل تبينه يعرس بها في الشارع
اما روضه فكانت ساكته من الصدمة مب مستوعبه اللي يصير يالفضيحه .. اللي يبغي ياخذها وعاندت فيه اختها وبنات عمها عشان تاخذه طلع متزوج ... شو بتقول حق ربيعاتها كيف لها ويه تجابل اختها او بنات عمها
حمده: خالي حلفت عليك تقولي من خبرك انه متزوج ... ورفجه يا خالي تقول
حمد: سعيد ولد عمج كلمني الصبح وقالي
وهنيه روضه يوم سمعت ان سعيد اللي قال لخالها ما قدرت تسكت وقالت: لا والله وليش يخبرك الحين لو صبر بعد شوي وقبل العرس باسبوع قال ... يوم انه يعرف انه متزوج ليش ما رمس من قبل لا يصير كل هذا
حمد: ( منصدم من رد روضه ) ما كان يدري انه متزوج اليوم عرف وخبرني
روضه: وما قدر يسأل هذا اللي قاله غير اليوم ... اذا عرف اليوم كان يقدر يعرف من قبل

وطلعت روضه من الميلس وخلت خالها ويا حمده اللي اتفقت وياه انهم يوم يفصخون الخطوبه ما يقولون انه مزوج وانهم يقولون ان روضه غيرت رايها وما تريد .. طلع حمد من بيت بو خالد قبل لا يوصل سعيد أما حمده فراحت فوق تشوف روضه اللي دخلت حجرتها وقفلت الباب ... وهي مغيضه هذا سعيد ما بيخليها في حالها ما لقى الا الحين يقول ان سيف اللي اقلمت نفسها على الزواج منه متزوج ... دقت حمده عليها الباب بس ما طاعت تفج لها وبعد ما يئست حمده راحت بيتها وخلتها ... كانت عوشه قاعده بيت خالد ويوم ردت حمده ورضه مب وياها اتخبرتها اذا خالهن راح

حمده: هيه راح
عوشه: وين روضه
حمده: في حجرتها قافلة الباب
عوشه: شو صار
حمده: سيف طلع معرس بالسر ماخذ مغربية
عوشه: شووو ... والعثرة تعثره وليش ياي يخطب عندنا دامه متزوج
حمده: روحي شوفي روضه واذا طاعت تفج لج الباب اتصلي تيلفون بيي اشوفها
عوشه: اوكي

وطلعت عوشه ردت بيتهم وراحت فوق عشان تدق على روضه الباب .. وشافت سعيد ياي بيدخل حجرته بس يوم شافها وقف عشان اتسلم عليه ويرمسها

سعيد: حمد خال روضه وحمده يا ولا بعده
عوشه: يا وراح بعد ... بس تدري ليش ياي
سعيد: هيه ادري .. كلم روضه وحمده
عوشه: هيه كلمهن
سعيد: وابوي
عوشه: لا ما كان موجود

روضه يوم سمعت صوت سعيد يكلم عوشه عند باب حجرتها من الغيض اللي فيها بطلت الباب وهي تصارخ على سعيد قالت
روضه: شو حضرتك ياي اتشمت .... خسارة فاتك المشهد تأخرت شوي
سعيد: انتي شو تقولين .. شو اتشمت هاي
روضه: انت اصلا من سمحلك او عطاك الاذن انك تدور ورا سيف او اتخبر عنه .. انا قايتلك انه مالك خص فيني اسوي اللي ابغيه واخذ اللي ابغيه ... رحت تقول حق خالي عشانك تعرف انه ما بيخليني اخذه وهو متزوج وعشان تقهرني
سعيد: شو هالخبال اللي تقولينه انتي ... اكيد ينيتي .. شو اقهرج
روضه: لا والله حضرتك بعد ما الناس كلها عرفت اني بخذه واني انخطبت ييت اتقول انه متزوج ... لو اتريت قبل العرس باسبوع وقلت انه متزوج كانت الفضيحه اللي بتصير اكبر


بسوم طلعت وقفت عند باب حجرتها تشوف شو السالفة وتقول في خاطرها الحين سعيد بيصطرها طراق ثاني وفطوم نشت على الحشرة اللي صايره وهي متفاجأة من اللي يصير أما عوشه فواقفه ساكته وهي مبهته
سعيد: انتي ما تستاهلين حد يسوي فيج خير ... لكن الشر هب عليج على اللي يخاف على مصلحتج ويحاتيج
روضه: (باستهزاء) اوووه كسرت خاطري سعيد ... اثر فيني اهتمامك وايد خلاص انا سامحتك وانت بعد سامحني مرة ثانية ما بنخطب الا بشورك (( وهنيه رفع سعيد يده يريد يعطيها طراق ثاني بس وقف قبل لا يضربها))
روضه: لا اضربني اضربني ... تراها حلاوة هيه كل ما عصبت او ما عرفت اترد علي ضربتني ... ما عندي حد يرد عني يتيمه حليلني ... اضربني يا سعيد بس هالمرة بخبر عمي واحلم تدخل هالبيت مرة ثانية

نزل سعيد يده وراح صوب الدري نزل بيطلع من البيت وتمن نص دقيقه على نفس وقفتهن وبعدها دخلت روضه حجرتها وقفلت الباب

فطوم: شو السالفة .. شو استوى
عوشه: سمعتيه كل اللي ستوى
وهنيه سمعن سعيد وهو يطلع من البيت ويشوح ويل وشكله يسوق بسرعة ومعصب
فطوم (شهقت): سعيد ... لا اييه شي طالع معصب .. عوشه اذا تعرفين رقم مبارك سرعة اتصلي فيه خليه يشوف سعيد وين بيروح ولا يخليه يسوق وهو جيه
عوشه: شو اقول حق مبارك ... سعيد وروضه مضاربين
فطوم: لا لا تقوليله شي .. قوليله سعيد طالع معصب خليه يكلمه
عوشه: زين .... ((راحت عوشه صوب الدري عشان تنزل))
فطوم: انتي وين رايحه
عوشه: مب قلتيلي اكلم مبارك
فطوم: كلميه من موبايلج
عوشه: مب حافظه رقمه بييبه من دفتر الارقام

نزلت عوشه تتصل في مبارك لو انها تدري ان سعيد بيذبحها لو عرف انها اتصلت فيه بس هو الحين اهم عندها من أي شي ثاني ... وفي خاطرها تقول يا ربي شو هالمصايب اللي اتينا من كل صوب نحن ما صدقنا ان سالفتهم المرة الاولى تبرد الحين هاي السالفة متى بنخلص منها .. يعني لو هالخبلة تريد تاخذ هالمعفن سيف تاخذه معرس ولا مب معرس شو دخلك يا سعيد خلها تولي .. اتصلت في مبارك

مبارك: الو
عوشه: الو ... مبارك
مبارك: الو ... منو ام لسان
عوشه: مبارك مب متفيجتلك الحين ممكن تسكت عني
مبارك: انتي متصله شو تبين
عوشه: سعيد
مبارك: شوفيه
عوشه: طلع من البيت معصب ... وانا خايفه اييه شي اتصل فيه شوفه وين لا تخليه بروحه
مبارك: ليش شو فيه .. شو صار
عوشه: شولك خص انت الثاني اتصل فيه وبس
مبارك: عن الغباء انتي الثانيه شو اتصل فيه وخلاص قوليلي ويا منوه متواجع ويا عمي
عوشه: لا ابوي محد
مبارك: ويا منوه .. انا احيد سعيد عاقل .. وما يعصب بسرعه
عوشه: مبارك عن اللقافه .. بتتصل فيه ولا شو الحين
مبارك: اوكيه انا بشوفه وين ...
عوشه: مشكور ياللا باي كلمه الحين
مبارك: حاضر عموه .. اوامر ثانيه
عوشه: لا بس ... ياللا مع السلامه
مبارك: مع السلامه

ردت عوشه فوق ولقت بسوم قاعده ويا فطوم في حجرة بسوم ايترينها عشان اتخبرهن شو السالفه
فطوم: كلمتي مبارك
عوشه: كلمته ...وقالي انه بيتصل فيه الحين
فطوم: شو صار
عوشه: اللي اعرفه ان خال روضه حمد يا وقالهن ان سيف بن بطي معرس ماخذ مغربية بالسر وانهم لازم بفجون الخطبة
فطوم: زين
عوشه: بس هذا اللي قالتلي اياه حمده... واللي فهمته من الضرابة اللي صارت جدامكن كلكن ان سعيد هو اللي قال حق حمد ان سيف معرس
فطوم: وليش روضه احتشرت على سعيد .. هذا بدل ما تقوله مشكور ما قصرت ولا كانت تريد تاخذه وترد مطلقة يوم اتعرف انه مزوج
عوشه: والله عاد سئليها ... روضه اتخبلت
بسوم: لا لانها منقهرة من سعيد من ذاك اليوم ... وانقهرت اكثر لانه هو اللي كشف لها حقيقة اللي تريد تتزوجه
عوشه: حتى لو كانت منقهرة مب جيه
بسوم: زين طلعن انا بكمل دراسة .. خلهم يحلون مشاكلهم روحهم
عوشه: اعوذ بالله انتي ما تحسين ... شفتي المصيبه اللي بنت عمج فيها
بسوم: زين وحسيت وبعدين شو اسوي ... خلاص اللي صار صار انا ما بضيع وقتي في التفكير في شي ما منه فايده
فطوم: تعالي نطلع ... خليها تدرس عافانا الله مرض

طلعن عن بسوم اللي صكت الباب على عمرها وردت تدرس ولا كأنها سمعت شي او صار شي جدامها واتصلت عوشه في حمده عشان اتيي عندهن وخبرنها باللي صار بين روضه وسعيد .. بس ما قالن لها عن اللي صار او انقال اخر شي
**
كانت حمده قاعده مع فطوم وعوشه يوم رجع بو خالد وخالد من المكتب ... أما سعيد فمن طلع ما درن عنه شي حتى مبارك ما تصل يقول شافه او كلمه ... بس عوشه ما تجرأت تتصل فيه مرة ثانيه وحطن في بالهن ان عدم اتصاله خير ... وانه اكيد لقى سعيد وقعد وياه ... وهو بالفعل كلم سعيد بس سعيد كعادته خلا نفسه طبيعي وقاله انه رايح العزبه ومبارك ما حب يفضح عوشه ويقوله انها اتصلت فيه عشان ايدوره وانه يعرف انه طالع معصب من البيت ... وبينه وبين نفسه قال اذا هو ما حب يخبرني انا ما بجبره يقول شي وخلاه على راحته على اساس انه اذا بيطول في العزبة بيلحقه بعد صلاة المغرب ... وراحله العزبة بعد ما صلوا المغرب ....

في البيت فطوم وعوشه نزلن عند ابوهن واخوهن لان امهن محد أما حمده فردت تدق على روضه عشان اتشوف بلاها وبالمرة ينهن هالموضوع الليلة ... حمده من داخلها كانت مستانسة لان موضوع زواج روضه من سيف واللي ما كانت مقتنعه فيه بيتكنسل خلاص وماشي مثل هالحجة عشان اتكنسله حتى لو قالت حق عمها انه مزوج وحتى لو فضحته جدام اهله ... فتحت روضه لحمده الباب ودخلت عندها الحجرة

حمده: روضه ممكن اعرف ليش كل هذا
روضه: حمده.. شو اكثر من هالفضيحه اللي بنفضحها .. الكل يعرف اني انخطبت
حمده: لا انتي اول ولا اخر وحده يفجون خطبتها
روضه: بعد شو اقول للناس والله طلع مزوج مغربية
حمده: لا قولي انا غيرت رايي وما اريد اتزوج الحين وهم مستعيلين
روضه: بس
حمده: لا بس ولا هم يحزنون .. وبعدين تعالي شو الكلام اللي قلتيه حق سعيد هذا يزاته انه قال وما حب انج تتورطين في هالعرس
روضه: هو ماله خص ... انا كنت منقهره
حمده: بس مهما يكون عيب عليج ... هذي روضه اللي انا اعرفها واللي تربيت وياها بيت امي ... هذا الادب اللي تعلمتيه بيت ابوج قبل لا تيين هنيه
روضه: انتي قلتيها بيت ابوي قبل لا ايي هنيه ... يعني هذا مب بيتنا ... انا الوحيده اللي غريبه هنيه ... اما انتي خلاص حرمة خالد وعندج بيتج ... وعوشه وبسوم وفطوم هذا بيتهم من قبل ما ايي انا
حمده: انتي شو تقولين روضه
روضه: يعني انا كنت اريد اتزوج سيف بن بطي حبا فيه انا ما اعرفه ولا جد في حياتي شفته ... اللهم الوصف اللي قالي اياه عبود يوم الخطبه ... انا كنت اريد احس اني في بيتي انا ... مب ضيفه عند حد
حمده: انتي مب ضيفه عند حد ... وهذا عمج ملزوم بج ... ومحد اجبره يسوي هالشي وانتي ما تقدرين تقولين انه قصر وياج انتي بالذات في شي ... جد قلتيله بغيتي شي وقالج لا ... حتى عوشه وبسوم خلاهن يباتن بيت خالج عشانج انتي وهن ولا عمرهن باتن ليلة وحده برع البيت دون امهن او واحد من خوانهن
روضه: انا ادري ان عمي يحبني
حمده: عيل ليش تقولين جيه ... انا قصرت وياج في شي
روضه: انتي انشغلتي في خالد وبيتج وما تسئلين فيني مثل قبل
حمده: قبل انتي كنتي صغيره ... الحين انتي حرمه واذا انا قصرت وياج كان لازم اتيين تقوليلي انا مب تروحين توهقين نفسج في عرس انتي بعدج مب مستعده له
روضه: زين الحين شو اسوي
حمده: (تبتسم) لو قلتي ما تبين لانج غيرتي رايج ... وما تريدين تعرسين الحين محد بيشك في شي .. ناسية انج روضه اكثر بنت دلوعه وبزيه في العالم والكون
روضه: (تبتسم وهي رافعه حياتها): لا والله انا احلى بنت مب بزيه
حمده: زين روحي دخلي على عمج الليلة وقوليله انج غيرتي رايج .. وهو يبغيها من الله .. ويوم ايي سعيد تتعذرين له
روضه: (تغير شكلها) لا ما بتعذر حق حد لا سعيد ولا غيره
حمده: روضه عيب عليج هذا ولد عمج وما كان يريد غير مصلحتج
روضه: لا ما بتعذر ... حمده لا تحاولين تصلحين اللي بيني وبين سعيد .. خلاص بالنسبة لي عيال عمي مبارك خالد وعبود بس
حمده: وسعيد
روضه: طلعته من الحسبة ومالي خص فيه ولا له خص في
حمده: بس انتي اللي كنتي غلطانه
روضه: ما اريد حمده ما بوطي راسي له ما اريد
حمده: روضه اعتذارج لسعيد ما بينزل من قدرج بالعكس بيرفعه
روضه: ما اريد وخلاص ... بقول حق عمي اللي تبينه سعيد الله يخليج طلعي برا السالفه انتي ما تدرين عن شي
حمده: شو اللي ما ادري عنه
روضه: حمده الله يخليج غيري هالموضوع من اسمع طاريه اتنرفز واكره حياتي
حمده: زين خلاص ... المهم نزلي حق عمي وقوليله اللي اتفقنا عليه وانا بكلم ميرة وبقولها انج غيرتي رايج
روضه: اقول وين عوشه .. اكيد معصبه علي
حمده: لا تنسين ان سعيد اخوهن ... وحتى لو كنتي ما تحبينه ما تريدينه يموت من تحت راسج
روضه: وشو اللي بيموته قطو بسبع ترواح
حمده: ايوه توحي الولد عشان الليله ما يرد
روضه: هاهاها لا خلاص اسحبها .. ما فينا بعد الكل بينجلب علي وبيتحرونه من تحت راسي .. في يوم ثاني ان شاء الله
حمده: ما تيوزين عن سوالفج
روضه: ولا صدق .. برايه عايش خله يتوهق في نوروه بنت خالته بتقصر له عمره ان شاء الله
حمده: (وهي تهز راسها) ماشي فايده ... انا طالعه عنج

طلعت حمده عن روضه اللي ردت طبيعي خلاص .. اصلا هذا اللي اسمه سيف ما هز فيها شعره .. وما يهمها حتى لو مات مب بس طلع متزوج ... كان اللي قاهرنها بينها وبين نفسها تدري ان سعيد كان على حق وكلهم يدرون بهالشي ... بس مستحيل تسلم او تستسلم او حتى تعترف بهالشي
***
في العزبة سعيد كان يتريا مبارك وبعد ما وصل مبارك نزل من سيارته وراح صوب سعيد اللي كان يكلم الراعي اللي حاطينه هناك ..

مبارك: ماشاء الله سعيد من بوظبي على العزبه على طول ... شو الظاهر انك امس حلمان بالبوش
سعيد: (يبتسم) لا وانت الصادق مليت من الرطوبه والخيسه في بوظبي .. قلت خلني ايي اتنسم هالهوا العليل في العزبة
مبارك: آها ... ومتى ناوي ترد بوظبي
سعيد: ليش الحبيب تروغني انت
مبارك: افااا يا بوعسكور ... الا ابغي اعرف كم بتقعد وفي وقت نمر المقهى .. نروح ميلس سلطان المنصوري ولا هزاع
سعيد: اسميك ما تشبع من هالميالس والهياته .. انت برا البيت اكثر مما انت قاعد فيه
مبارك: شو تريدني اجابل في البيت اليدران ... ابوي مطيح في المكتب او عند ابوك ... ومحمد دافن نفسه في هالمؤسسه ... وانا واحد متفيج ما عندي شي
سعيد: تدري شو في خاطري
مبارك: شو
سعيد: اخذ اجازة واسافر أي مكان .. مليت
مبارك: وشو اللي يمنع .. عزم انت وانا وياك
سعيد: ناسي يالحبيب اني ما كملت سنه من توظفت
مبارك: يا عمي روح .. ونك الحين ملتزم هالكثر .. قدم مرضيه وروح
سعيد: ومن وين المرضيه يالحبيب
مبارك: انت عزم وما عليك ...
سعيد: اقول اذا تقدر عليها خلها حق الصيف .. ونروح انا وانت السنة بروحنا
مبارك: هيه والله .. على الاقل نفتك من حنة خواتك وامهاتنا
سعيد: هاهاهاهاها .. اقول انت خواتي مأزماتنك وايد
مبارك: تبغي الصدق .. كان ودي يكون عندي اخت صغيره .. حلو يوم يكون عندكم بنات في البيت
سعيد: عرس وبيكون عندكم حرمة في البيت وبعد سنة بتيب لك بنيه صغيره تقولك باباه مبارك
مبارك: اقول سعود ... انت ما عندك سالفة .. انا مدمغ ابلي عمري بوحده .. خلني جيه فري ... انا اعشق الحريه
سعيد: زين يا بو الحرية انت .. خلنا نروح الدنيا ليلت
مبارك: صبر شوي .. خل بابوه اييب لي حليب بوش بشرب قبل لا اروح
سعيد: (تنهد) وش حلّ بك يا قلب ضـاري ع لصعـاب... ماحيد لك يالشامـخ الفـذّ عـذروب...
رابي علـى شمـخ الشوامـخ ولا تهـاب... نسل الكرام اللي لهـم شـان محسـوب...
ضاقت بك الدنيا ويا ويـح لسبـاب... وتشربكـت فـي مغزلـك كــلّ لـهـدوب... بسبـاب مـن داس فمحبّتـك لعـتـاب... واسليت وانت اللّي عزيز ٍ ومهيـوب...
رغـم ان طيبـك فـاق مجمـول لحسـاب... ورغم الرجاحه وماخذ الأمر بالدوب...
الاّ ان ظنّـك مخفـق ولا بـعـد صــاب... في من تمـادى بالجفـا وعسـر لذنـوب...
مبارك: صراحه حالتك صعبه .. بس بعد صح لسانك
سعيد: صح بدتك
مبارك: اقول سديت نفسي ما اريد شي خلنا نروح... الا قولي انت متى تكمل قصايدك هاي
سعيد: لا خله اييب لك الحليب
مبارك: ما اريد تعال بنروح بيت عمي اللي هو ابوك وبشرب هناك وياه ... ما رديت على السؤال
سعيد: لا والله ومنو قالك اني بروح البيت الحين
مبارك: لاني انا اريد اروح ... وما جاوبتني للحين
سعيد: اركب اركب سيارتك خلنا نطلع من هنيه وبنتفاهم
مبارك: اهاااا يعني ما تكملها
سعيد: لا اكملها بس في دفتاتري .. جاوبت على السؤال الحين ... خلنا نروح

طلع سعيد مع مبارك من العزبه ولين ما طلعوا من البدع ما اتصلوا في بعض ويوم وصلوا الشارع الرئيسي اتصل مبارك في سعيد يتخبره وين بيروحون .. وفي الاخير قرروا يمرون المقهى لان ربع مبارك قاعدين هناك


بعد ما نزلت حمده وسلمت على عمها وريلها قعدت عدال خالد اللي كان يسولف ويا ابوه عن الشغل وشوي الا وروضه نازلة من فوق وراحت صوب عمها وحبته على راسه وسلمت على خالد وقعدت عدال عمها

روضه: عمي بغيتك في موضوع
بوخالد: خير يا بنتي .. شو بغيتي
روضه: لا عمي خلنا نروح داخل الحجرة

ودخل بو خالد مع روضه الحجرة ... وقعد على الكرسي وهي قعدت على الكرسي اللي مجابلنه
بوخالد: في شي روضه .. ناقص عليج شي يا بنتي
روضه: لا عمي .. بس انا اريد اقولك .... (سكتت ما كملت)
بوخالد: شو بتقولين
روضه: عمي انا ما اريد اعرس خلاص ... ما اريد اروح دبي وملا اريد اطلع من هنيه
بوخالد: (مصدوم) ليش يا بنتي خير شو صار
روضه: بس عمي انا فكرت وايد في الموضوع ... وبعدين سيف اكبر مني بـ 14 سنه وانا ما اعرف اهله زين ما اريد اروح
بوخالد: يا بنتي الريال يوم اتخبرنا عنه ما لقينا فيه شي ينعاب ... وبعدين اهله بتعودين عليهم ولا تسين انهم اهلج بعد
روضه: عمي انا ما اريد اتزوجه من خاطري ما اريد اودر جامعتي ودراستي ... انا احس اني تسرعت وغلطت يوم وافقت على هالعرس ... واذا انت تريد تزوجني اياه انا بخذه بس انا من خاطري ما اريد
بوخالد: شو هالكلام يا روضه انا ما بغصبج على ريال ما تبينه ولا اني عيزان عنج عشان ايوزج .. بس انا بعد ما اريد احس اني قصرت وما نصحتج ...
روضه: عمي انا فكرت زين انا ما اريد اتزوج
بوخالد: خلاص يا روضه اللي يريحج ... قولي حق اختج وعمتج يكلمون الناس وانا بكلم خالج يكلم الريال
روضه: انا قلت حق حمده اني ما اريد اتزوج وهي قالتلي اكلمك
بوخالد: اللي تبينه يا روضه ... ما بيصير غير اللي تبينه

وطلعت روضه من عند عمها وراحت فوق على طول ... حمده طبعا عرفت ان روضه قالت لعمهن انها ما تريد تتزوج .. بس فطوم وعوشه ما كانن يدرن انها رضخت بهالسهوله ولفت فطوم على عوشه تقولها بشوي شوي

فطوم: عوشه اخاف روضه اشتكت عند ابوي على سعيد
عوشه: لا ما اظن ما بتوصل السالفة حق ابوي .. ما بدخل الكبار بسوالفنا
فطوم: بس السالفة هاي كبيره

شافن خالد قاعدات ايتصاصرن ...
خالد: اشعندكن انتن ... ما تدرن ان هالحركات عيب
عوشه: لا ماشي ... أنا بروح فوق برايكم

ونشت عوشه راحت فوق تشوف روضه ولقت هالمرة باب حجرتها مفتوح واول ما دخلت ابتسمت لها روضه
عوشه: هاه شو الحين
روضه: ماشي قلت حق عمي اني ما اريد اتزوج سيف بن بطي ... اقول لا يكون تخبرن حد عن السبب
عوشه: لا اتطمني قالت لنا حمده ما نقول
روضه: احسن
عوشه: ويوم انج في الاخير ما بتاخذينه ليش احتشرتي على سعيد من ساعه
روضه: عوشه ممكن تسكرين هالموضوع لا نرمس عنه الحين
عوشه: تدرين انا بروح اقعد ويا حمده عشان اعرف شو بيصير يوم بتتصل فيهم تخبرهم
روضه: احسن روحي خليني الحين بروحي .. وخبريني بعدين شو بيصير
عوشه: اوكي

نزلت عوشه تحت لقت امها قاعده وياهم بعد ما ردت من برع وعدالها ابوها وحمده وخالد وفطوم نفس المكان اللي خلتها فيه وطبعا من كلامهم فهمت ان ابوها قالهم ان روضه ما تريد ولد مزنه

ام خالد: يا بوخالد خلنا نصبر بعد كم يوم يمكن تغير رايها
حمده: عمتي روضه كانت مقرره هالشي من اسبوع وانا خليتها تصبر ... بس بما انها قالت حق عمي معناته خلاص هي ما تبغيهم
بوخالد: انا بكلم حمد وبقوله .. انا ما اقدر اغصب البنيه على شي وهذا عرس هب شي هين
ام خالد: الله يعينا وين نودي ويوهنا من الناس
حمده: ماعليه يا عمتي انتي لا تكلمينهم انا بكلم ميرة وبقولها
ام خالد: لازم اتعذر من مزنه ... ما يصير جيه شقينابهم ويبناهم العين وفي الاخير بنتنا ما تباهم
حمده: هذا نصيب يا عمتي

اتصل بوخالد في حمد وقاله ان روضه ما تريد سيف خلاص وقاله بعد يكلم سيف يقوله ان البنت ما تبغي تعرس غيرت رايها وانه هوه بيكلم بطي المحيربي وبيتعذر له بعدين .. طبعا حمد ما صدق خبر وهو يعرف يتفاهم ويا سيف ويقوله ليش روضه ما بغت بعد ما عرفوا انه معرس وانه ان دس عليه فمب عشان سواد عيونه ولكن عشان خاطر عمته مزنه اللي ما يريد يخيب املها في ولدها الوحيد ويقول عن سواد وي

اتصلت حمده في ميره بعد ما طلعت من الصاله وراحت الميلس ولحقتها عوشه وبعد السلام واخذ العلوم والاخبار

حمده: ميره صراحه انا ما اعرف كيف اقولج الكلام اللي بقوله .. بس اتمنى انه ما يأثر في علاقتنا
ميره: خير يا حمده خوفتيني
حمده: روضه غيرت رايها وما تريد تعرس الحين ..
ميره: جيه العرس بعده شعر سبعه ونحن الا في نص اربعه
حمده: ميرة روضه ما تريد العرس بالمرة ...
ميره: ....
حمده: صراحه نحن مفتشلين فيكم .. بس تدرين هذا عرس ونحن ما نقدر نغصبها ... وروضه بعدها ياهل
ميره: زين ليش شو ياها
حمده: ما ادريبها تقول ما تريد تعرس وتروح دبي وانتي تدرين ان سيف ما بيقعد لها في العين
ميره: لا طبعا
حمده: هذا نصيب يا ميرة ونحن قبل كل هذا اهل ونتم اهل
ميره: اكيد يا حمده .. ومثل ما قلتي هذا نصيب ومقدر ومكتوب .
حمده:...
ميره: انا بخليج الحين ... ادري تبيني اقول حق امايا
حمده: خالي بيكلم سيف ... وعمتي بتتصل تتعذر من عمتي مزنه
ميرة: ما يحتاي يا حمده .. روضه بنتنا شرات ماهي بنتهم وما يحتاي تعذرون عنها

وبندت حمده التيلفون عن ميرة وما خلتها عوشه لين ما قالتلها ميرة شو قالت لها بالضبط وبالحرف الواحد وهن طالعات لقن سعيد ومبارك في الصالة ... وعرفوا باللي قالته روضه .. كان مبارك يطالع روضه ويبتسم وهي طالعه بنظرات تحدي
حمده: السلام عليكم ... شحالك مبارك ... وين رحت سعيد قبل لا نشوفك
مبارك: وعليج السلام ... هاه عوشه شحالج
سعيد: رحت صوب العزبة شوي ورديت .. شو السالفه
عوشه: بخير شحالك انت
بوخالد: عوشه صبي حق ولد عمج كوب حليب وعطيه
عوشه: ان شاء الله

بعد ما صبت عوشه الحليب حق مبارك وراحت بتعطيه الكوب .. ولانه قاعد شوي بعدي قالها بصوت واطي
مبارك: لا تحاتين ما قلتله انج قلتيلي انه طالع معصب ... ادري انه بيعصب عليج
عوشه: وبتذلني لانك سويت جيه
مبارك: صراحه الود ودي .. بس السالفه فيها سعيد ما يهون علي
سعيد: شو تقول انت وياها
خالد: من شوي اقولهم عيب ترمسون بصوت واطي وحد عندكم .. وانت ريال ونك
مبارك: ماشي اتخبرها عن الجامعه ... والدراسه
بوخالد: هاه حمده كلمتي بنت عمتج
حمده: كلمتها وتعذرت لهم .. عمتي اتصلي انتي باجر في عمتي مزنه واتعذري لها
ام خالد: ان شاء الله
***

في دبي بعد ما كلم بوخالد حمد اتصل حمد في سيف يقوله
حمد: الو
سيف: الو السلام عليكم
حمد: وعليكم السلام ... شحالك عساك الا بخير
سيف: الحمدلله ... (طبعا سيف بعد ما خبرته المغربيه شو صار الصبح حس بالموضوع اللي يريد يفتحه حمد وياه وخاصه ان عرف ان حمد اللي ياه الشقه من الوصف اللي عطته اياه المغربيه بس سكت يريد حمد يتكلم قبل
حمد: مبروك
سيف: على شو
حمد: على العروس اللي في بناية القبيسي
سيف: ...
حمد: شوف يا سيف .. خلاص من بعد هالسالفة انت في طريج ونحن في طريج .. وبنتنا ما تباكم
سيف: يا حمد .. انت شو تقول
حمد: شوف نحن ما فضحناك ولا قلنا انك مزوج حتى هلها ما يدرون وانت استر على نفسك وخلنا نخلص هالموضوع على خير ... خلاص ...
سيف: ...
حمد: مع السلامه

وبند حمد التيلفون قبل لا يرد عليه سيف في أي كلمه وهو مرتاح انه طلع بنت اخته من السالفة مثل ما كان بيورطها في هالعرس واخذ عهد على نفسه انه ماله خص في زواجها مرة ثانيه ... وصدق من قال امش في جنازة ولا تمشي في جوازه ...
***

رد سعيد بوظبي في نفس الليلة ... وخبرت عوشه روضه بتفاصيل اللي صار تحت يوم هيه كانت فوق وانتهى هالموضوع تقريبا وما بقى غير اتصال ا م خالد في ام سيف عشان اتعذر وبيطرشون هداياهم اللي يابوها يوم الخطوبه بيت خالها عشان ايردها عليهم ... في الليل ردت حمده تحاتي نتايج فحوصاتها وما قدرت ترقد وتمت طول الليل اتجلب ... اما سعيد فكان مرتاح من ناحية ان روضه خلاص ما بتاخذ سيف بن بطي وانها في النهاية شافت مصلحتها وين ... ولكن خلافه وياها ومواجعهم هم الاثنين العصر اثبت له شي واحد ان روضه شو ما صار مستحيل اتكون له ... يمكن اتأقلم مع هالفكرة في فترة خطوبتها ... بس وهو ساكت كان يحس ان قلبه ينزف صدق ينزف دموع من دم على هالحاله اللي هو فيها
**
راحت حمده المستشفى بعد ما مرت على فطوم عشان اتعرف نتايج فحوصاتها ودخلت فطوم وياها عند الدكتورة بس الدكتورة طمنتهم وقالتلها ان كل فحوصاتها تثبت انها سليمة ميه المية ... وان الاخصاب عندها هالي بنسبة 95% وانه فترة زواجها قصيرة ولازم ما تستعيل .. وعشان تتأكد اكثر كان المفروض ايي معاها زوجها عشان ايسووله فحوصات هو بعد ... في السيارة بعد ما طلعت من المستشفى

فطوم: هاه ارتحتي الحين مافيج شي .. كل شي سليم
حمده: الحمدلله ... والله كنت خايفه من هالشي
فطوم: الصبر زين ... صبري غيرج بالسبع والعشر سنين صبروا
حمده: لا الله يخليج ما اريد اصبر هالكثر
فطوم: زين قولي حق خالد ايي وياج ويسوي فحوصات
حمده: ينيتي انتي ... ما اقدر اقول حق خالد هالكلام ... بعدين خالد مافيه شي لا تفاولين عليه
فطوم: انا ما افاول عليه بس عشان تطمنين اكثر
حمده: خلاص انا اتطمنت

سكتت فطوم عن حمده اللي وصلتها المدرسة وبعد ما نزلت فطوم ردت حمده البيت


في الويك اند بعد ما طلع عبود من الكلية قالوله ان روضه ما تريد تزوج خلاص وانهم فجوا الخطوبه واتعذروا حق الناس ... عبود استانس على هالخبر

عبود: صراحه احسن ... فكه
روضه: ليش ؟؟
عبود: ما ادري كيف كنتي بتعيشين وياه .. دمه ثقيل وشكله واحد خقاق
روضه: زين خلاص انتهينا من هالموضوع من يوم السبت
عبود: وليش ما اجلتي لين اليوم عشان اكون موجود اشهد الاحداث كلها
روضه: لا والله خلاص آسفه عمي الخطوبة الياي
عبود: ماشاء الله ناويه تعيدينها مرة ثانيه
روضه: يمكن ربك
عوشه: الا ما دريت يا عبود ...
عبود: مليون مرة قلت لج عبدالله ما تفهمين كم سنه وبتخرج وتقولي عبود
عوشه: زين زين عبدالله
عبود: هاه شو عندج
عوشه: بيخطبون حق سعيد
عبود: لاه
عوشه: هيه والله
بسوم بدينا حش وقراض في الناس انا لو قعدت وياكم الله ما بيوفقني وبزفت في الامتحانات
عبود: روحي روحي درسي الله يرضى عليج ... كلي الكتب زين
بسوم: بروح ما اترياك تقولي (( ونشت بسوم راحت تدرس وخلتهم يكملون سوالف))
عبود: منو بيخطب
روضه: نوره بنت خالتك شيخه
عبود: والله .. خسارة كنت اريدهم يخطبونها لي يوم اتخرج
روضه: شوووو
عوشه: مالت عليك
عبود: هاهاهاها الظاهر ان الموضوع مب عايبنكم
روضه: اخ عليك ما بغيت غير نورة هاي
عبود: هيه شو فيها حلوة
روضه: والله انا نحن احلى عنها مليون مرة
عبود: عن الخقه والغرور الزايد ... ونكن احلى منها
عوشه: اقول روضه قومي خلينا نروح فوق خليه قاعد بروحه ((ونشن بيروحن))
عبود: هاهاها أي خلاص والله خلاص انتن احلى البنات تعالن قعدن وين بتروحن
وردن يقعدن عنده ... وتموا يسولفون ويا بعض ... وشوي الا سعيد داخل ياي من بوظبي ومن شافته روضه بدون ما تسلم عليه شلت بعمرها وراحت فوق حجرتها ... عبود تعود على هالوضع يوم يدخل سعيد روضه تروح حجرتها وكم كثر سئل يريد يعرف شو السالفة ليش متزاعلين بس محد خبره وبعد ما يأس انه يعرف طنش السالفه وقال متزاعلين روحهم بيتراضون روحهم

عبود: حيالله بو عسكور تو ما نور البيت
عوشه: اهلين سعيد شحالك
سعيد: الحمدلله بخير ... شحالكم انتوا
عوشه+ عبود: الحمدلله
سعيد: الا بتخبرك ليش حاجزينك الاسبوع اللي طاف
عبود: هذا الضابط يتسخف علينا ... متفيج ما عنده شغله
سعيد: لا والله

وبعد ما قعد وياهم شوي راح سعيد حجرته عشان يرقد لأنه كان تعبان .. ومر الويك اند وما شاف روضه لانها ما كانت تنزل الا اذا كان هو محد

ومرت الايام وروضه وسعيد على هالوضع ما يكلمون بعض ولا يقعدون ويا بعض .. حتى سعيد ما حاول انه يكلمها او يعرف شو فيها لان في اخر مرة هي اللي كانت غلطانه وقلت ادبها عليه وايد ولو كانت عوشه او بسوم كان فعلا ضربها ... بدن امتحانات بسوم وطبعا بسوم ما ينخاف عليها ما كانت تنشاف ايام الدراسة العادية الحين حد بيشوفها حزة امتحاناتها .. ما كانت تسوي شي غير الدارسة ... وكانن خواتها بعد مدلعاتنها اللي تباه ايبنه لها لين عندها ...

أما فطوم فكانت تداوم في مدرستها وتأقلمت مع جو الدوام وطلعت من حزنها شوي واتأقلمت مع الامر الواقع وان كانت دوم بروحها وما تختلط وايد ويا المعلمات في المدرسة .. وفي يوم كانت نازلة الادارة تدور الوكيلة بتعطيها اوراق .. شافتها وحده من المدرسات

فطوم: هلا بخيته ما شفتي ابلة ميرة
بخيته: جنها في مكتب المديره .. الا قالولج اخوج يترياج في غرفة الانتظار
فطوم: اخوي شو يايبنه الحين
بخيته ما ادري والله .. قالوا اخو ابله فاطمة يترياها وانا على بالي رايحتله
فطوم: محد قالي .. خليني اروح اشوف شو يريد

وراحت فطوم بتدخل غرفة الانتظار وهي تفكر يا ترى ليش خالد ياينها المدرسة .. محد غير خالد بيي لان سعيد في بوظبي وعبود في الكلية .. بس خير ان شاء الله فجت باب الغرفة وكان الريال عاطنها ظهره

فطوم: خير خالد .. شو فيه ليش ياي هنيه
يوم لف الريال وعطاها ويه اكتشفت انه مب اخوها خالد .. واكيد بخيته مغلطه وهذا اخو ابله ثانية وطبعا لانها دخلت عليه دون عباه اول شي سوته ردت غشوتها على ويها وطلعت من الحجرة وهي طالعه شافت فاطمة المهيري وعرفت انه اخوها .. وان بخيته مخرفه
فطوم: هذا اخوج داخل .. قالولي اخوي ودخلت عليه
فاطمه: هاهاها حصل خير بلاج جيه منحرجه
فطوم: من الفضيحه ... ما اتشوفيني كيف دخلت عليه
فاطمة: خلاص حصل خير .. انا كلمته اييب لي اوراق وادريبه بيي ... ما ادري بيزقرونج انتي له
فطوم: استسمحيلي منه
فاطمه: ماعليه خلاص
فطوم: عيل بخليج اتشوفين اخوج ... عن اذنج

وراحت فطوم دورت الوكيله وعطتها الاوراق وردت غرفة المعلمات .. العيال ما كانوا يداومون لان دوامهم خلص من زمان ونتايجهم طلعت ... بس الثانوية العامة هم اللي يمتحنون .... وخلصت امتحانات بسوم وخلصت فطوم دوام وكانوا يتريون نتيجة بسوم ونورة بعد اللي بيخطبونها حق سعيد ... لأنهم متفقين بعد ما تطلع النتيجة يروحون الرياييل يخطبونها وبعدين الحريم يودن الشبكة مرة وحده

طبعا وبدون ادنى شك نجحت بسوم بنسبة98.2% على الدراسة اللي كانت تدرسها اما نورة فنجحت بنسبة 70%
وفي اليوم اللي طلعت فيه النتايج كانن بسوم وروضه وعوشه وفطوم وحتى حمده من الصبح ناشات يترين النتيجة .. ويوم طلعت نتيجتها بسوم وروضه وعوشه قعدن يصارخن من الوناسة وعلى حشرتهن نش عبود

عبود: شعندكن .. تخبلتن
بسوم: لا نجحت
سعيد: (يبتسم) ليش حد كان يشك بنجاحج ... انا كنت اتريا اسمج امس مع الأوائل بس انتي صدمتيني يوم ما طلعتي منهم ... فتأكدت انج اختي ما تسوينها
بسوم: يبت 98.2
عبود: ول يالدحيحه .. شو باصمة الكتب بصم هاي
حمده: ياللا عاد لا تنسى الهدية
فطوم: وبنسوي لها حفلة لا صارت ولا استوت
رن تيلفون عوشه وكان سعيد متصل بعد ما عرف نسبة بسوم يريد يكلمها عشان ايبارك لها
سعيد: مبروووك يا بسوم تستاهلين
بسوم: الله يبارك فيك
سعيد: ياللا شو تبين هدية
بسوم: والله اللي تيبه زين وانت كريم وانا استاهل
سعيد: هاهاهاها ماعليه اللي تبينه بييبه لج
وهنيه يرت عوشه التيلفون عن بسوم عشان تغايض سعيد
عوشه: الا ما تريد تعرف خطيبتك كم يابت
سعيد: منو ؟؟ أي خطيبه
عوشه: شو بعد أي خطيبه نورة
سعيد: كم يابت
عوشه: فشيله 70%
عبود: هاهاهاهاها زين ما غلبتني بوايد
عوشه: ما غلبت ولا حد فينا نحن اشطر
سعيد: زين مبروك عليكم ياللا باي ... بتصل في ابوي ابارك له
عوشه: باي
***

يوم الخميس بعد المغرب البيت كان كله محتشر لان الرياييل بيروحون يخطبون لسعيد بنت خالته ... حمده تدخن ريلها وعمها ... وأم خالد توصيهم لا يردون هل نورة في اللي يبونه ... وفطوم كانت نازلة ويا سعيد من فوق أما روضه وعوشه فقاعدات عدال بعض ويشوفن هالحشرة اللي صايرة

حمده: تعال سعيد بدخنك
فطوم: بدخنه انا عنج .. بس عطيني عوده
عوشه: هيه دخنوه .. معرس اليوم
سعيد: عندج مانع
عوشه: حشا ... ابد مالي خص
خالد: ابوي عمي سلطان وين .. بعد ما يا
سعيد: مبارك توه مكلمني الحين بيوصلون
وفعلا بعد ما خلص جملته سمعوا جرس الباب يدق ودخل سلطان وعياله مبارك ومحمد
سلطان : السلام عليكم
بوخالد: وعليك السلام
حمده: حيالله من يانا شحالك عمي ... ((وقامن كلهن يسلمن على عمهن من بعد ما سلموا عليه سعيد وخالد ))
مبارك: هاه المعرس جاهز .. شو المعنويات
سعيد: يا ريال شو معرس الا خطبة هيه .. والعرس تو الناس عليه
ام خالد: انت اخطب اول
محمد: شحالكن بنات اعمامي .. وين بسوم ببارك لها بالنجاح والنسبة الغاوية هاي
عوشه: شو تباركلها بس جيه ما ينفع الهدية اول (ضحكوا كلهم على كلام عوشه)
بو منصور: اكيد هديتها جاهزة واترياها
عوشه: وينها عمي لازم اول انا اشوفها
مبارك: ليش ان شاء الله مدريرة اعمالها
عوشه: لا اختي على كيفي وياها
بو منصور: في البيت ..يوم بتسوي حفلتها بيتبها لها ام منصور
عوشه: عمي اعترف اعترف ما خذتها بعدك
بومنصور: سلط الله على بليسج يا بنت مبارك ...
بوخالد: عوشه يوزي عن عمج
عوشه: حشا حتى عمي ممنوع اسولف وياه
حمده: الا عبود وينه ما يا بندخنه
عبود: (وهو نازل من على الدري) أنا هنيه من يبغيني
فطوم: وينك انت للحين
عبود: اتسبح .. اتعطر .. اتسفر
فطوم: لا يكون انت المعرس وانا ما ادري
عبود: يا ريت متى ايي دوري
عوشه: عاد انت تحلم .. تشوف تحلم تعرس قبلي .. انا قاصرة حشرة حريمكم في البيت .. يوم اعرس انا عرس بعدين
عبود: هيه يوم اريد اعرس انا بشاورج عاد
عوشه: ما بتعرس قبلي بتشوف
عبود: واذا عنستي ما لقيتي حد ياخذج بسبة لسانج الطويل هذا
عوشه: مشكلتك صراحه لانك بتعنس وياي ... فلازم تدور لي ريل من الحين ((ضحكوا عليها هي وعبود))
بو منصور: هيه هذي العاش كلهم يبونها ... وين بيحصلون شراتها
عوشه: فديت عمي انا
مبارك: ابوي لا تقص عليها بعدين اتصدق عمرها ... اقول انتي لين ما تقصرين شوي لسانج ما بتعرسين
عوشه: اقول لي ما عرست ما بصيح عليك تعال خذني زين
مبارك: ولا انا اللي بصيح اريد اخذج (( ضحكوا الشواب على سوالف عوشه ومبارك))
أم خالد: عوشه استحي على ويهج شو هالرمسة
عوشه: وهو ما يغلط حليله محشوم .. انا ادري شو مقعدني وياكم يا ربي اقول روضه تعالي نروح فوق
روضه: اوكي ياللا

راحت عوشه ويا روضه فوق ... روضه اللي من اصبح الصبح ما قالت ولا كلمة ولا علقت ولا تعليق يخطبون يعرسون هي مالها خص .. دام الموضوع يتعلق في سعيد مالها خص .. الكل اليوم قاله مبروك الا هي والكل اليوم كان مزاجه عال العال الا هي ... وطبعا عوشه لازم بتأثر بمزاج روضه خاصة ان الثنتين ما كانن يبن سعيد يخطب نورة

راحوا الرياييل وخطبوها له .. سعيد نفسه ما كان مستانس بهالخطوبة كان يضحك ويسولف بس شو يسوي اذا ما حصل اللي هو يباها وصارت بالنسبة له في حكم المستحيل ليش ايرد امه في اللي تباه ... يخطب نورة يخطب غيرها كل واحد عنده ... بس اللي كان مصر عليه انه مستحيل ياخذها وروضه في البيت او يعرس قبل لا تعرس روضه .. مهما يكون هو بشر ولقدرته على تحمل هالالم كله حدود، لازم روضه تعرس قبل وتطلع من البيت .. ما يقدر يشوفها جدامه وهو مزوج وحده ثانيه ويتم يقارن بين الثنتين .. حتى نورة بنت خالته شو ذنبها .. في النهاية اتفقوا انها ما تعرس لين ما تخلص سنتين في الجامعه على الاقل لان اهلها يبونها تدرس ... صح هو ما بيمنعها من الدراسة بس ما عارض هالشرط بالعكس رحب فيه ويمكن اكثر شي اعجبه من الكلام اللي نقال في ذيج القعده...
***

بسوم قررت تدرس طب .. هذا شي الكل يعرفه وفعلا انقبلت في كلية الطب وقدمت اوراقها للجامعه وخلصت تسجيل .. وبعدها باسبوعين يوم الخميس عوشه وروضه وبسوم قاعدات في الصالة يشوفن فلم ودخل عليهن سعيد وياه مبارك ولد عمهن .. بعد ما سلموا قعدوا يتريون بو خالد عشان مبارك يسلم عليه

مبارك: هاه سعيد شو قلت في اللي قلتلك اياه
سعيد: تم ... اكيد وياك
عوشه: شو السالفه شو عندكم
مبارك: يا هاللقافه
عوشه: انا اكلم سعيد ما اكلمك
سعيد: بسافر ويا مبارك
عوشه: نعم يا حبيبي .. ونحن
بسوم: والله وين بتروحون
مبارك: لبنان
عوشه: ونحن منو بيروح ويانا منو بيودينا مب قايل حق ابوي انه ما عندك اجازة وان الدوام ما بيرخصونك
سعيد: هيه صح


عوشه: عيل كيف بتروح
سعيد: بييب لي مبارك اجازة مرضية اسبوعين وبروح وياه
عوشه: ونحن منو بيودينا منو بيروح ويانا
مبارك: مشكلتكن روحن ويا عبود
عوشه: لا والله تدري عبود ما يقدر يسافر عشان الكلية ... جوازاتهم محجوزة
مبارك: مشكلتكن
عوشه: لا والله ما تروحون بروحكم تودونا وياكم
مبارك: لا اسمحيلنا الشيخه وين نوديج
سعيد: عندكم خالد
بسوم: برايهم محمد بيروح ويانا
عوشه: لا والله ضحكتيني ومالي نفس اضحك ... شو محمد يعني ما تدرين ان محمد روحته وعدم روحته وحده ما ينشاف بالمرة
مبارك: عيل بزيدج من الشعر بيت .. محمد بيروح ويانا
عوشه: انت السبب كل المصايب من تحت راسك ... ليش اتودي اخوي وياك عشان اتعلمه يسوي مثلك هاه
سعيد: جيه انا مب ياهل اتعلم اسوي مثله
عوشه: لا ويا حظي وين بيروحون لبنان زين والله
مبارك: اوهوووو يا هي اذيه هالبنت
سعيد: انت ليش تتكلم جدامها
عوشه: وبعد تعلمت منه تريد تدس علينا
مبارك: وليش انا متى دسيت عليج .. اخاف منج اخت عوشه
عوشه: لا ما تخاف ... بقول حق ابوي ما يرخصك
مبارك: تمي تمي في البلاد .. خيسي فيها زين
عوشه: اوهووووو اصلا انا ما ادري شو مقعدني وياك اوف

نشت عوشه وراحت فوق ولحقتها روضه اللي ما قالت ولا كلمه من قعد سعيد في الصالة ... حتى مبارك لاحظ ان روضه ما اتكلم يوم يكون سعيد قاعد الا اذا حد وجه لها الكلام ... ولاحظ ان سعيد ما يكلم روضه بس ما سئل سعيد شو السالفة وليش ما يكلمون بعض
***
قرر بوخالد انه ما يسافر لا هو ولا عياله ... ما كان له خاطر على السفر أما خالد فسافر ويا سعيد ومبارك ومحمد اسبوعين لبنان ... عبود ما قدر يسافرلان الكلية ما تسمح للطلبة انهم يسافرون لين ما يخلصون دراسة ... عوشه احتشرت في بادي الموضوع وبعدين تقبلت فكرة انها تصيف في البلاد وفي البيت بالذات

الضحى في يوم من شهر ثمانية كانت فطوم قاعده ويا امها بروحهن لان امها طرشت وراها تريدها واتريت فطوم امها اتكلم

ام خالد: فطوم يا بنتي انتي الحين كبيرة مب صغيرة وما شاء الله عليج عاقل والكل يمدح فيج
فطوم: (تبتسم) امايا شو مناسبة هالكلام الحلو
ام خالد: ام راشد كلمتني من يومين
فطوم: منوه ام راشد هاي ما اعرفها
ام خالد: ام راشد ... سلامه بنت مطر حرمة سالم المهيري هاي بنته تشتغل مدرسة وياكم في المدرسة
فطوم: هيه هيه عرفتها .. بنتها فاطمه ويانا في المدرسة
ام خالد: ام راشد كلمتني يبون يخطبونج لولدهم علي
فطوم: (بعصبية مفاجأة) لا لا لا كم مرة قلتلج ما اريد اعرس خلاص انسي هالموضوع واللي يكلمج قوليله دون ما تشاوريني ما اريد اعرس
ام خالد: بس يا بنتي
فطوم: اميه لا تكلمين في هالموضوع مرة ثانيه الله يخليج ... ما بخذ حد بعد منصور ولد عمي ... ما اريد اتزوج خلاص ... انسوا هالموضوع عندج بنات غيري يوزيهن

ونشت فطوم من عند امها وهي معصبة وراحت حجرتها وسكرت الباب عليها ... ام خالد كانت متوقعه ان هذا الشي بيصير بس ما قدرت تمنع نفسها انها تسأل فطوم عل وعسى كانت تأمل انها تيوزها وانها تكون نست منصور خاصة بعد ما تعدل مزاجها وما صارت تحبس نفسها في الحجرة مثل قبل ... نشت ام خالد واتصلت في ام راشد واعتذرت لها ... وفي النهاية استسلمت لموضوع ان فطوم ما بتعرس خلاص
**
طبعا في هالاجازة البيت صدق فضى لا خالد ولا سعيد اللهم عبود اللي ما يشبع هياته ولا يطيع يوديهن وياه مكان ... وعوشه كانت كار حياتها وكل يوم اتشكى .. اما بسوم من اسعد ما يكون خصوصا بعد ما ظهر قبولها في كلية الطب ... وكانن قاعدات ويا بعض بسوم وعوشه وروضه

عوشه: تراني صدق مليت وهذا السبال عبود ماعليه خله يريد من عندي شي براويه
بسوم: عوشه انتي صايره حنانه بطريقة فظيعه ... خلاص شو بتسوين يعني
روضه: صدقها والله الملل يذبح .. الله يهديك يا عمي شياك علينا ما بتسفرنا
عوشه: لو مب شور بروك السبال .. كنا اقنعنا سعيد يودينا أي مكان اسبوعين .. بدل ما يروح يصيعه في لبنان
روضه: ومنو قالج بروح مع هالانسان مكان
عوشه: ماعندج سالفه انتي
بسوم: لي متى يعني ... ما تشوفين انج مصختيها
روضه: والله ما ياكن اللي ياني منه ... اخوكن لازم تدافعن عنه .. بس اريد اعرف لو ضارب وحده فيكن شو بتسون
بسوم: حرام عليج الزعلة ما يصير تكون اكثر عن ثلاث ايام وانتي من متى زعلانه
روضه: اقول تكلم الشعراوي ... سكتي سكتي احسن
بسوم: عبود صراحه ذلني من كثر ما يسأل
روضه: اوهوووو بتغيرين السالفه ولا اطلع من هنيه
عوشه: اااااه يا القهر .. اموت واعرف هم وين الحين
بسوم: انتي هاللقافه اللي في جبدج بتجتلج قاصرة عمر .. شباب اشتبيبهم
عوشه: اقول خالد يكلم حمده كل يوم .. يقولها وين ايروحون
روضه: والله ما سئلتها ... روحي سئليها
عوشه: اكيد بسألها
روضه: بلاج اتحرقصين .. جنه ريلج اللي مسافر .. شتبيبهم لقعة ابليس الا خالد طبعا ريل اختي
بسوم: الحسد اللي في جبدها لازم
روضه: الا اقول شو سالفة محمد هذا
بسوم: شو فيه
روضه: انا من ييت بيت عمي ما شفته خير شر يمكن بس اليوم الشؤوم اللي خطب فيه سعيد .. ومرة في العيد من بعيد
عوشه: هذا واحد ما يفارج المؤسسه ... لو يحطوله فيها شبريه بيرقد هناك
بسوم: والله ما حيده كان جيه يوم كنت صغيره .. قبل لا يروح يدرس جنيف
روضه: هو اكبر منج عوشه.. صح
بسوم: هيه هو اصغر من سعيد بسنه
عوشه: الله يسلمج هذا انا بقولج سالفته
روضه: قولي
بسوم: عافانا الله بدت شغل الحش والنميمة
عوشه: ما تبين تسمعين روحي... اقولج هذا الله يسلمج كان واحد كله سوالف وضحك ... ايام ما كان في الثانوية ووناسة ... وصراحه واحد حنون غير عن الفك المفترس مبارك
روضه: هاهاهاها .. زين وبعدين
عوشه: الله يسلمج خلص الولد ثاني ثانوي في مدرسة خاصه ... وطرشوه يدرس سويسرا زين ...
روضه: قولي عاد
عوشه: وهناك طال عمرج ولد العم عشق له بحرينيه .. وتم متيم فيها صدق من الخاطر ... والبنت ما بقولج مب حلوة انا شفتها كم مرة يوم كنا نروح جنيف في الصيف الا كانت قطعه وبنت عايلة في البحرين .. بس عاد يا وخيتيه في الاخير بحرينيه ...
بسوم: بسج عوذ بالله
روضه: اوهوو خليها تكمل
عوشه: بسوم عن اللقافه ... المهم يا الطيبه ... تييج السالفه الولد قال اريد اتزوجها يحب من خاطره ... بس وين عمج وحرمته يطيعون ... لا والف لا مني مناك .. يقولهم ما برد .. يقولوه بترد غصب عليك
روضه: وبعدين
عوشه: اللي تشوفينه يابوا الولد غصب عليه ... وهذي حالته من رد ... ماله خص في حد ولا يدخل في حد ولا يكلم حد .. اصلا اشك انه يكلم غير هالخمسه ابوه وامه .. مبارك وخالد وسعيد...
روضه: حليلك يا ولد عمي
عوشه: ويوم نروح وياه سويسرا .. والله اعلم يعني بقولج الاحساس اللي يراودني هو يحجز في فندق بروحه يمكن نفس الفندق اللي تنزل فيه البحرينيه واهلها لانه بعده يحبها ... وهي تحبه
بسوم: شدراج انتي تحطين في ذمتج
عوشه: انتي اللي شدراج خليج في دراستج ... انا عندي اتصالاتي وعلاقاتي
بسوم: حشا ... رويتر هب بنيه
روضه: هاهاها وانتي ليش محتشرة بسوم .. لا يكون تحبينه بس
بسوم: ولد عمي لازم احبه واحن عليه
روضه: انا اقصد حب ثاني
بسوم: لا سلامة راسج ... هب متفيجة حق هالخرابيط

سالفة محمد تمت شاغلة روضه .. حليله ولد عمها طلع يحب وحده ومن خاطره بعد بس ليش جيه عمها وحرمته يسوون الوحيد اللي في عايلتهم يحب يكسرون بخاطره ... والله لو كانت غير هالبنت البحرينيه وحده فرنسية ولا سويسرية جان خذته وما عليها من اهله ...

كانت روضه في المطبخ في الليل تسويلها سندويجة جبن وبنات عمها فوق في حجرة فطوم يطالعن الفيديو عندها وما انتبهت الا بعبود داخل عليها المطبخ بشوي شوي لين ما وقف وراها وصرخ في اذنها صرخه .. طبعا هي تروعت وبغت تفره بغرشة الجبن .. وتم هو يضحك عليها

روضه: والله انك سخيف وسبال ... شو هالحركات ... قطعتلي الخلفه على قولة المصريين
عبود: ويييييييييييييييو خوافه
روضه: هيه يوم بيي من وراك في الليل وانت بروحك ما بتخاف هاه
عبود: حليلج .. عيل وين عوشه وبسوم
روضه: فوق عند فطوم
عبود: تعالي ...
روضه: شو
عبود: قوم سعيد وخالد متى بيوون
روضه: والله مب مديرة اعمالهم عشان ايخبروني بجدولهم ما ادريبهم متى ما بغوا بيردون
عبود: هيه وانتي وسعيد بلاكم ما ترمسون ويا بعض
روضه: منو قال عادي ما بلانا شي
عبود: روضه علي انا هالحركات
روضه: بس واحد سخيف وتافه وانا ما احب اكلمه
عبود: الحين سعيد سخيف وتافه
روضه: هيه
عبود: عن الجذب .. قولي شو صاير امبينكم
روضه: اوووف يا عبود قلتلك ماشي
عبود: روضه انا عبود مب علي هالحركات
روضه: شو تريد تعرف
عبود: الصدق
روضه: متواجعين انا وياه
عبود: ليش
روضه: مرة رحت بوظبي انا وعوشه وبسوم وفطوم ورحنا السوق دون ما نقوله ...وشافنا في السوق وقالنا انرد الشقة ... واحتشر علينا واحتشرت عليه وواجعني
عبود: تدرين انج سخيفه
روضه: ليش
عبود: الحين ما تكلمين الريال عشان سالفه تاف مثل هاي
روضه: والله انا مب اصغر عياله يصارخ علي .. ولا الخدامه اللي يايبتنها له حرمته الشينه اللي بياخذها هاي
عبود: لا بس انتي بنت عمه وحسبة اخته
روضه: عاد انا كيفي
عبود: صدق انج ياهل
روضه: يكفي انك انت كبرت ...((ويت بتطلع عنه من المطبخ))
عبود: أي لا يكون زعلتي
روضه: لا ... بروح اكمل الفلم ويا قوم فطوم ... هب فايقتلك الحين

طلعت روضه وراحت فوق حجرة فطوم ... تدري انها ما قالت الصدق حق عبود بس كرامتها ما تسمحلها تقوله انها انضربت ... وان اخوه هو اللي ضربها المهم عطته عذر وان شاء الله هالعذر ما يخليه يسأل مرة ثانية أي حد
***

في الليل الساعة 12 ونص ... بسوم وعوشه وروضه قاعدات في الصالة عوشه تجلب في التلفزيون اما بسوم وروضه فيلعبن ورقة هاند روسي من الملل اللي هن فيه شوي وفج سعيد الباب ودخل هو وعيال عمه مبارك ومحمد

سعيد: السلام عليكم
عوشه: (وهي مستانسة) سعيد اخوي حبيبي... اشتقت لك
بسوم: حمدلله على السلامه ... شحالكم شو سفرتكم
روضه: الحمدلله على السلامه
عوشه: وين خالد ...
سعيد: راح يسلم على حرمته ... بسوم روحي سوي عصير حق عيال عمج
محمد: لا ما يحتاي بنروح (بس بسوم راحت تسوي العصير)
مبارك: شو هالافلام الرعب اللي يبتنا نشوفها بعد الدلع والحلاه ... الله يسامحك يا سعيد
روضه: (تبتسم لعيال عمها سلطان) هاه شو سفرتكم
مبارك: بتعقد ... شي بيجنن ... الجمال والخضرة والوجه الحسن
عوشه: مالت عليك ... مستواك زين
مبارك: لازم تغارون من كل هالحلاه ... يا ربي ليش ما خليتوني اقعد
عوشه: روح حد ماسكنك
مبارك: خوانج ما يخلون حد يستانس ((محمد وسعيد يدروبه يالس يغايضها لانه كان متحلف لها في السيارة))
عوشه: (تتجاهل مبارك)) سعيد .. خالد بيي هنيه يسلم علينا
سعيد: لا ما اظني يدري امي وابوي رقود
محمد: ((يكلم روضه)) شو كنتوا تلعبون ورقه
روضه: هيه من الملل ... شو تلعب ويانا
محمد: مرة ثانيه ... الحين بنروح
مبارك: محمد شو رايك انرد المطار انرد لبنان ... ياخي ما اقدر اصبر عن هالبلاد بتعئد ... شو حبيتا والله
عوشه: اقول مبارك .. اطلع برا بيتنا ... شو نزلك انت اصلا هنيه انا كار حتى طاريك
سعيد: خيبه خيبه ... ((ومحمد كان يبتسم ورافع حياته))
مبارك: اقول انتي يوم بتسوين بيت ولا حتى بيي جداه .. هذا بيت عمي فهمتي ... غصبن عنج بيي
عوشه: ليش ان شاء الله .. شو تبابنا وحوش .. روح عند اللبنانيات الدلع ياللا روح
مبارك: في هاي صدقتي ... اللي يروح بيروت لازم يردلها مرة ثانيه
محمد: عوشه ما عليج منه .. اصلا هو ياي وناوي ينرفزج لا تردين عليه
مبارك: وانت كيف تقولها ماعليج منه وانا اخوك العود هاه
عوشه: اوكي محمد صدق ليش ارد عليه ... كلامه وعدم كلامه واحد
مبارك: لا والله .. ما ادري من شوي منو كان بيموت علينا من القهر

يابت بسوم العصير وطول ما عيال عمها قاعدين كانت روضه تفكر في السالفة اللي قالتلها اياها عوشه عن محمد ... وهي حانه عليه حليله ولد عمها اللي ما خلوه يتهنى بحياته وشو يعني بحرينيه لازم تكون من هل الدار ...

سعيد: فطوم ... كم كثر كنتي تحبين منصور
فطوم: (منصدمه من سؤال سعيد) كنت ... سعيد انا احب منصور لين اليوم وباجر وطول عمري ... منصور معاي عمره ماخلاني لحظه
سعيد: (وهو يعيد اللي كاتبتنه) آآه ليتني بذاك الكفن ... وليتني اقدر ادفن احساسي معاك
فطوم: كلام ... مستحيل اندم على احساسي تجاه منصور ... اصلا قلبي وياه وين ما كان ... في كفن او في غيره
سعيد : (في لحظة ضعف) شو يعني حب
فطوم : (مستغربه من سؤال سعيد) ااااااااااااااه الحب منصور ... ابتسامته عيونه قلبه .. طيبته حنيته .. الحب منصور ... كفوفه ... نظرته يا سعيد اللي ما اقدر انساها ابد... صوت ضحكته اللي كانت تنقلني لغير العالم اللي نقعد فيه ... اسلوبه .. الحب منصور يا سعيد ... كيف اعيش انا بعده... اموت يا سعيد ولا حد يدريبي انا دونه.. الشوق اللي احس به يذبحني .. ودي يا سعيد بلحظة اخيره معه ... ودي اسمعها بصوته .. ودي افصخ الحيا في هاللحظه واقوله اني احبه ... كيف يخليني ويبعد... ااااااااه كيف بوصفلك جروحي من هالزمن ... كيف اقولك .. كيف بتفهم اذا ما انت ما جربت شعوري ... صعب صدقني صعب

بينه وبين نفسه يقول ... آه يا فطوم ... تبيني اوصفلج انا بعد ... وشل عمره وطلع من عندها قبل لا يضعف ويقول كلام يندم عليه بعدين ... اما فطوم فما عرفت كيف يتها الجرأة تكلم اخوها بهالطريقة .. بس هو سئل وهي جاوبت بكل صراحه
***

في اليوم الثاني راح سعيد بوظبي بعد سلم على اهله ... لان اجازته خلصت ... ومرت الايام على نفس الروتين في الويك اند ايرد سعيد العين ينشغل في بيت عمه وروضه ما تقعد معاه ولا تكلمه ... وخلصت الاجازة وبدت الدوامات .. فطوم مداومه قبلهم طبعا لانها مدرسة ... عبود رد الكلية ... وبسوم وروضه وعوشه في الجامعه والاكيد نورة خطيبة سعيد
**
كانت هذي اول سنة لبسوم في الجامعة مثل ما قلنا وكانت وياها نورة خطيبة سعيد ... بس نورة ما كانت بالوصف البشع اللي وصفنها به روضه وعوشه .. كانت بنية حلوة ومرحة ومن داخلها طيبة .. وطبعا بسوم كانت تشوف نورة يوميا بحكم دراستهن في التعليم الاساسي .. صح بسوم انقبلت في كلية الطب بس كان لازم تخلص العليم الاساسي وتاخذ متطلبات الجامعة شهادة التوفل بعد ... بسوم كانت تاخذ في مباني التعليم كمبيوتر مستوى ثاني فيجول بيسك ... وعربي مستوى ثاني اما الباقي فعدته كله وكانت تاخذ انجليزي مال الكلية وهذا متطلب جامعه وفكراسلامي ويا عوشه وروضه ... اللي كل يوم كانن يسئلنها عن نورة بس ما ترد عليهن .. بعد ما كانن مخلصات محاظرة الفكر الاسلامي وبيردن البيت

روضه: هاه بسوم شحالها بنت خالتج
بسوم: بخير تسلم عليكن
عوشه: الله يسلمها ... وشو مسويه في الجامعه
بسوم: شو بتسوي يعني تدرس ...
روضه: وما تسألج عن عريس الغفلة اخوج
بسوم: تسأل ... ولد خالتها لازم بتسأل عن الكل بعد
روضه: هيه
بسوم: (وهي تهز راسها) استغفر الله يا ربي
روضه: شو اخت بسوم الظاهر ان ما قمنا انعجبج ... جان تبين روحيلها مب لازم تمشين ويانا
بسوم: روضه انا قلت شي
روضه: لا اشوفج ما عايبنج كلامنا
عوشه: أي هدن هدن ... نحن في الجامعه
بسوم: روضه الحين انتي ليش منقهره اريد افهم .. ليش ما تتقبلن الامر الواقع خلاص اللي صار صار
عوشه: والله يا بسوم انها ما تناسب سعيد
بسوم: ليش زين اشدراج انتي باللي يناسبه
عوشه: انا اخته ادرى باللي يناسبه ..
بسوم: والله انكن لو تميتن جيه ما بتلقله حرمه .. كل وحده بتشوفينها بتقولين ما تناسبه ولا تسواه .. انتن حاولن تتقبلنها خلاص هاي بتستوي حرمة اخونا وبتي تعيش في البيت ويانا .. على الاقل حاولن ما بتخسرن شي
روضه: .. والله ما عرس قبلي ولا كان ... ياخذ نوروه ويسكنها في بيت انا فيه ... انتي وايد تحلمين ... اصلا ما بخلي عمي يوزه لين ما اعرس انا قبله
عوشه: وانا بعد ان شاء الله اعرس قبله
بسوم: زين حتى ان عرستن ما بتن البيت عندنا ما بتنجبرن تتعاملن وياها
روضه: يصير خير لين ذاك اليوم

وهنيه وصلن عند بوابة الخروج مال الجامعه وطلعن بيردن البيت وسكتن عن هالموضوع اللي كل يوم يتناقرن عليه جنه ما عندهن موضوع غيره من بدا دوام الجامعه
***

أما سعيد فبالرغم من كل الحنية اللي فيه .. وبالرغم من تربيته واخلاقه .. اتناسى موضوع هالخطبة نهائيا ولا حتى يسأل عن خطيبته .. او حتى يحاول يزور بيت خالته عشان يشوف نورة ولو من بعيد .. مع ان خالته وعيال خالته ما يمانعون هالشي .. وحتى لو بغى يكلمها لانه هذا عرس يعني رابط ابدي وبتم وياه طول عمره .. ولازم يتفاهمون احسن من ايي يوم بعد العرس وترد بيت ابوها لانهم ما قدروا يتفاهمون ... بس هو ابدا ولا حتى اهتم ..كان تفكيره دوم يرده لروضه .. لدرجة انه مليون مرة سئل نفسه شو يحب فيها ... الشخصية اللي حبها لروضه ما كانت جيه ابدا ... بس معقوله يوم ظربها تحولت لهالانسانه لوحده مغرورة وحقوده ... معقولة هو السبب في التغير اللي ياها ... كان وده يرضيها بس مب عارف كيف ... روضه مب سهل ارضاءها ابدا

بعد المغرب في بوظبي .... تيلفون سعيد يمكن رن فوق الخمس مرات وهو راقد فنش بيرد عليه وهو يقول في خاطره من هذا اللي ذابحنه الوله يريد يكلمني الحين ... وشاف رقم عوشه في التيلفون اول ما رد عليها وقبل لا تعطيه فرصة يتكلم

عوشه: سعيد.. الحق علي
سعيد: بسم الله خير شو فيج
عوشه: سعيد ابوي وعمي سلطان تحت يبوني
سعيد: زين روحي شوفيهم .. شو يبون
عوشه: انا ادري شو يبون قالتلي فطوم
سعيد: شو يبون
عوشه: يبون ايوزوني مبارك
سعيد: شووو
عوشه: اانا ما اريد .. الله يخليك سعيد تعال الحين الحين .. انا ما بتزوج بروك ... انت تعرف والله بموت لو تزوجته او بجتله هوه
سعيد: استهدي بالله يا بنت الحلال ... شو السالفه كلها فهميني
عوشه: والله يا سعيد ما ادري شو السالفه .. انا رديت من الجامعه ومن شوي يتني فطوم وقالتلي اللي قلتلك اياه ... والحين ابوي مطرش علي انزل يعني كلامها صدق
سعيد: زين مبارك وين
عوشه: شدراني فيه ... عل العين ما تشوفه ... والله انه اهون علي ازوج محمد ولا اخذ مبارك
سعيد: هو يدري بهالسالفة
عوشه: ما ادريبه
سعيد: زين عوشه سمعيني .. انا بكلم مبارك بشوف شو السالفة وبرد اكلمج
عوشه: لازم اروح تحت الحين
سعيد: انتي روحي تحت ... واذا قالولج شي سكتي .. ورفجه يا عوشه تسكتين ... قوليلهم بفكر عن هالخبال مالج ... لا تسبين مبارك جدام عمي
عوشه: سعيد اخاف اتورط ...
سعيد: ما بتورطين ... انا بكلم مبارك الحين
عوشه: الله ياخذه وافتك منه ليش انا اللي يطيح في جبدي ..
سعيد: عيب عليج هذا ولد عمج
عوشه: زين انا بروح اشوف ابوي وعمي

بندت عوشه عن سعيد وهي قاعده اتحرطم ... ودخلن عليها روضه وبسوم وهن يضحكن
روضه: هاه العروس مبروك
عوشه: روحي لاه ... متفيجه انتي
روضه: شو تبين لقيتي خطيب
عوشه: روضه والله مالي بارض لج الحين ولا لأي حد
بسوم: الله يعينك يا مبارك على ما ابتلاك
عوشه: لا والله شفقانه عليه روحي خذيه انتي حبيبتي انا متنازله عنه لج
روضه: والله شكلج يضحك .. جنهم ساحبين الجواز عنج
عوشه: اوهوووو انا بروح الحين عند ابوي
روضه: الله يوفقج يا ربي .. ويجعلج في كل خطوة سلامه يا رب وترديلنا منتصرة يا سميع يا عليم قولي امين
بسوم: خيبه رايحه حرب هيه

وتمن روضه وبسوم يضحكن وطلعت عوشه اتشوف ابوها وعمها ... وهي تدعي الله ان يصبرها وما يخلي لسانها يتبرى منها بس اليوم وفي هالساعه وتروم تسكت لين ما يروح عمها ... أما سعيد فمن سكر عنها التيلفون اتصل في مبارك يشوف شو السالفة

سعيد: مبروووك المعرس
مبارك: الله يبارك في حياتك .. بس على شو .. وشو هاي المعرس بعد
سعيد: والله سمعت انهم قاعدين يخطبولك الحين
مبارك: هاهاها الظاهر انك وايد تحلم .. منو يخطب لي
سعيد: ونك ما تعرف
مبارك: والله انك متفيج سعيد ... شو تحت راسك قول
سعيد: عمي في بيتنا .. يخطب لك عوشه
مبارك: شوووووو ... انت صاحي ولا بعدك راقد
سعيد: هذا اللي سمعته
مبارك: مخبول انا اتزوج هاي ..
سعيد: اقول جنه هاي اختي ... ثمن رمستك
مبارك: (انحرج) لا انا ما اقصد شي ... بس انت تعرف عوشه شرات اختي
سعيد: زين ارتاح ولا هي تبغي تاخذك
مبارك: زين شو هالكلام اللي تقوله
سعيد: اللي سمعته ابوك في بيتنا يشاور عوشه جان بتاخذك
مبارك: يا حافظ .. هي يشاورونها .. وانا الا تعال وعرس .. بعد زين لو يقولولي قبل العرس بكم يوم .. اخاف ايبون البشت وايقولولي عرسك اليوم
سعيد: بلاك انت اتحرطم
مبارك: اول فطوم ما بغت الحين عوشه .. شو هالحاله حتى ما يشاوروني ابا افهم انا شو جدامهم الحين
سعيد: لا تقعد تشكيلي همك الحين ... هلك انت اتصرف وياهم
مبارك: انا ادري عوشه الحين بتقطعهم بلسانها ... بتخلي ابوي يندم انه راح يخطبها
سعيد: استريح ... عوشه ما بتقول شي ... حلفتها تسكت ولا تعق أي رمسه
مبارك: ليش ؟؟.. انت اشلك اتدخل فيها هاه .. اليوم اللي احس ان طولة السانها بتفيدني في شي تخرب علي
سعيد: عشان عوشه تطلع طويلة اللسان واللي ماتريد وانت تطلع بريء هاه
مبارك: ياخي هي جيه ..طبعها
سعيد: خلاص انت اتصرف ويا هلك عوشه بتوافق لانها تدري انك انت اللي ما بتوافق
مبارك: لا والله يا سعيد هذي المخوة ... اتورطني وانا اللي قلت ولد العم بشد به الظهر
سعيد: اسف حبيبي دبر عمرك ... وطلع نفسك من السالفة
مبارك: لا حول
سعيد: (وهويبتسم) اقول مبارك ... الله يعين عيالكم اللي بتيبونهم جان هاي حالتكم انتوا من الحين
مبارك: اشهد ان لا اله الا الله واشهد ان محمد رسول الله ... هيا الى الجهاد
سعيد: هاهاهاهاها مبارك لا يكون استخفيت ... صبر تو الناس ... مب من الحين ... ما ادري انا عندي احساس بتصمد لييين اسبوع عقب العرس
مبارك: فال الله ولا فالك .. انا ادريبها بنت العم رياله ... بطلع نفسها من السالفه
سعيد: مبارك لا تبني امال وايد على عوشه .. انا اقولك انت اللي طلع عمرك من السالفة ... ما تروم تقول حق ابوك لا
مبارك: جان قلتلهم انت لا... يوم راحوا ايخطبولك بنت خالتك .. شكلك ينبان عليك مغصوب بو الشباب
سعيد: منو قال اني مغصوب
مبارك: ما صورتك يوم الخطبه عشان اتشوف شكلك كيف كان ( سعيد في خاطره يقول والله يا مبارك ما طلعت هين ... يا ترى شو تعرف بعد غير هالشي ... ولا انا اللي كل شي ينبان علي وما اقدر ادس شي )
سعيد: انت ما عندك سالفة ... اقول روح حل مشكلتك ... ترى عوشه وافقت (( عوشه ما كانت موافقه بس قال هالكلمة عشان يقهر مبارك ... اللي عرف كيف يقهره هالمكالمه))

بند سعيد التيلفون قبل لا يرد عليه مبارك ... ومبارك رد يتصل فيه ... بس هو ما رد عليه ونش دخل الحمام يتسبح وهو يبتسم ... فعلا الله يعين على الايام اليايه شو بيصير

اما مبارك ما كان مستوعب انه ابوه بيسوي به جيه ... يدرون انه هو وعوشه ما يتواطنون ... كيف يخطبون عوشه له ... وقعد يلعن نفسه في داخله الف مرة هو اللي رد يروح بيت عمه .. لو كان قاطعنهم شرات قبل يمكن ما كانوا بيخطبون له ام لسان ... بس بعد موت منصورهو من داخل اهتز ... افتقد منصور صدق ... وحس انه بيت عمه اللي هم اقرب الناس لمنصور يمكن يعوضونه غيابه ... سعيد كان اكثر واحد فيهم قريب لمنصور مع انه اصغر منه .. بس كان وايد يحبه كان يريد يتقرب من كل شي حبه منصور ... وعرف ليش كان يحبهم جو بيتهم فيه ربشه فيه بنات الخوات اللي منصور ومبارك ومحمد مفتقدينهن ... صح محمد ما جد رمس لانه سوا لنفسه عالم وابتعد ... ومبارك فشل في انه يطلعه من عالمه فما قدر الا انه يدخل عالم منصور اللي هو بيت عمه ... فطوم وعوشه وبسوم وحتى روضه وعبود وخالد وحمده وسعيد ... بيت فيه ناس عايشه .. فيه ربشه ... مب شرات بيتهم اللي ما فيه غير محمد وامه وابوه .. بيت عمه عوضوه غياب منصور وعيشوه جو ثاني وياهم عشان جيه ما قدر يودرهم بعد ما رد لهم ... كان منصور دومه عندهم وكان يضايج من هالشي ...يغار منهم بس الحين حس باحساس منصور يوم يكون وياهم ... بس بعد بالرغم من كل هذا مب يوزونه عوشه في الاخير ...


في البيت بعد ما ردت عوشه فوق كانن بسوم وروضه وحتى فطوم في حجرتها يترينها .. وهي شكلها حمرا على صفرا على خضرا وصايرة اشارة مرور ... حليلها انضغطت عمها وابوها .. حتى لو كان لسانها طويل ما تقدر اطوله على الاثنين وهم مجتمعين عليها ... لا وامها بعد محد

فطوم: هاه بشري .. رغتي عمي بالمخمه
عوشه: تصدقين انج سخيفه
روضه: هاهاهاها
عوشه: (اتكلم روضه) وانتي اسخف ... ياخي اخذيه انتي ليش انا اللي ابتليبه
روضه: حليله تلقينه يعشقج ويبات الليل يحلم بج
عوشه: عشقته ام الصروم يا ربي
روضه: هاهاها شو هاي
عوشه: اقول كلكن ذلفن برع مب متفيجتلكن
روضه: زين والله والله بنروح وبنخليج ... بس نريد نعرف شو سويتي بعمومتي
عوشه: ما سويتبهم شي .. هكم تحت يسولفون روحن سولفن عندهم وفكوني
فطوم: زين شو قالتي
عوشه: ماشي قلت بفكر
فطوم: اها... يعني بتفكرين ... يا توافقين يا ترفضين
عوشه: يخسي والله اوافق ... بس قلت جيه عشان يخلوني في حالي

وطلعن من عند عوشه اللي كانت كار حياتها ... وراحن تحت يسولفن ويا عمهن قعدت روضه بين عمينها تدلع على بوخالد .... وفعدن بسوم وفطوم مجابل ابوهن وعمهن

روضه: هاه عمومتي مبروك
بوخالد: (وهو يقربها ويلوي عليها) هيه بس انتي عاد لا تفرحين ما بيوزج .. ما بخليج تروحين عني
روضه: يا سلااااام
بوخالد: ما اروم اصبر عنج
فطوم: يا حافظ ونحن تصبر عنا هاه
بو منصور: لا بنتي انتي انا ما اصبر عنج تعالي عدالي ((وراحت فطوم عدال عمها سلطان))
بسوم: يا سلام يعني انا اللي تميت جيه بروحي ... قومي روضه من عدال ابوي بقعد عداله
روضه: ودج اقوم من عدال عمي ... اسفه
يسوم: ماعليه يا بوي هذيلا كلهن بيعرسن عنك حتى روضه الا انا بتم لك
بو خالد: لا انتي بيوزج خلاص السنه الياي
بسوم: لا اسمحلي انا ورايه دراسه وطب ... بستوي دكتوره
بومنصور: شو تبيبها الدراسه يا بنتي ... بيشيب شعرج وبتعيزين
بسوم: بعد غير يوم بيقولولي دكتوره بسمه ..هيه بيونك الناس يقولولك شو تصيرلك الدكتوره بسمه وانت تقولهم هيه بنت اخوي هاي بغيتوا شي منها .. وهم يقولولك اتوسطلنا عندها تعالجنا ((كلهم كانوا يبتسمون ويضحكون على كلام بسوم))
بوخالد: انتي الخوف منج ... باجر تودرين هالدراسه واتعرسين قبل خواتج كلهن
بسوم: لا لا تخاف ما بودر .. هذا مستقبلي
روضه: انتي خليج في مستقبلج .. وانا بفضي نفسي حق عمي حبيبي فديت روحه وما بعرس عنه
بسوم: هيه بنشوف حزتها شو بتقولين
روضه: بتشوفين

وبعدها قعدوا يسولفون شوي لين ما استأذن عمهن سلطان وراح ... قعدن عند ابوهن بعد شوي لين ما ضوت امهن من بيت اختها وبعدها دخل بو خالد ويا ام خالد الحجرة وهن راحن فوق يكملن على عوشه اللي كا نصايبنها اكتئاب حاد ... وحتى سعيد يوم اتصل فيها ما ردت عليه
***

في الويك اند يوم رد عبود ودرى بموضوع الخطوبه تم يضحك على عوشه ... اللي كانت تسبه وهم كلهم يضحكون عليها ... لين ما تخليلهم المكان وتروح .. ومبارك طفر سعيد من ذاك اليوم لين ما رد من بوظبي هاه عوشه شو قالت ... عوشه رفضت .. ما بتقول ما تريد ... لدرجة خلت سعيد يفكر يأدبه شوي وهم قاعدين على العشا ومن المرات النادرة اللي تنزل فيها روضه اتعشا وياهم وسعيد موجود وعمها في بيت بو منصور وعمتها محد رايحه بيت مريم اخت بوخالد

عبود: وييييو العروس شو استعداداتج النفسية لقبول مبارك شريك لحياتج المستقبليه
عوشه: عبود اسكت عني .. تراك طفرتبي والله اخبر ابوي
عبود: هاهاهاها حليلج... اقول سعيد اتخيل مبارك وعوشه قاعدين على الكوشه ... ياويلي على السجع تذكرين روضه في المدرسة عوشه وكوشه
بسوم: هذا مب سجع .. كيف نجحت انه ... هذا جناس ناقص
روضه: اووووووووووهوووو اتكلمت الدحيحه
عبود: هب من شوي 98 حشا ....
بسوم: عوذ بالله ...قل اعوذ برب الفلق
عبود: زين يا ام الجناس خليني اكمل رمستي ...
عوشه: رمستك خايسه لا تكملها
عبود: زين عوشه ... قاعده عدال مبارك على الكوشه ... وشوي الا تفر الورد اللي تشله العروس هذا في وي
هاهاهاهاها صدق الناس بتنقع من الضحك
عوشه: انت سخيف تدري ((كانوا كلهم يضحكون عليها))
سعيد: ليش تفره في وي
عبود: ونه يبغي يتغزل فيها يقولها يا ام اللسان الطويل .. لسانج احلى لسان شفته في حياتي((كلهم يضحكون))
عوشه: تاااافه والله تافه
روضه: لا عبود الله يخليك ... انا اتخيل عوشه اتبيت مبارك في الرسبشن مال الفندق (ويضحكون على عوشه)
عوشه: ماعليه يا روضه ما عليه .. دامج انتي ويا هالزفت انا شو بقول وني انا اللي بنت عمج وربيعتج جيه اتسويبي
روضه: (وهي تبتسم) لا والله خلاص فديتج فديتج .. أي عبود اسكت عن عوشه

كان سعيد طول الوقت ساكت ما يقول شي عشان روضه ما تسكت ... من متى ما شافها تبتسم او سمعها تضحك .. ضحكتها كانت ترد له الروح ... كيف ما يحبها وكل شي فيها يشده لها .... شوي الا وهو زاقر عوشه وقالها تعالي ابغيج بقولج شي ... طلعت عوشه ورا سعيد وهي تسمعهم بعدهم يضحكون عليها

سعيد: هاه شو بتقولين حق ابوي
عوشه: ما بزوجه .. يخسي والله
سعيد: ويطلع هو البريء الطيب اللي يسمع كلام الشيبان وانتي قليلة التربية اللي ما تحترمين رغبة ابوج ولا تحشمين عمج
عوشه: هذا زواج ما فيه هالاشياء
سعيد: وانتي تدرين انه ما يباج
عوشه: خلاص على شوه هالاذيه كلها
سعيد: عوشه في خاطرج حد انتي
عوشه: (باستغراب) والله العظيم .. وغلاة ابوي وامي وغلاتك يا سعيد وغلاة روضه محد في خاطري ..شو هالسؤال
سعيد: هالكثر روضه غاليه عندج
عوشه: هيه شو ما صاربينك وبينها
سعيد: لا انا ما قول شي .. بس اسأل
عوشه: ما بتكلمني عن غلاة روضه الحين
سعيد: اوكي يوم انج ما تبين حد وتدرين ان مبارك ما يباج ويريد يورطج انتي في موضوع الرفض .. ليش تنولينه اللي في باله
عوشه: كيف
سعيد: مبارك ما يباج انتي تدرين بهالشي .. وهو تفاجأ يوم خبرته بالموضوع
عوشه: زين
سعيد: بس ما قال لابوه شي على اساس انج انتي اللي ما بطيعين .... وبتطلعين في نظرهم انتي القويه ... وانتي اللي ما تحشمين وصدق ام لسان طويل
عوشه: وهو ما بيقول شي ولا بتيه أي كلمه
سعيد: ايوه .. فهمتي الحين
عوشه: طالع النذل ... يبغيها اطيح فوق راسي انا ... زين يا بروك انا اراويك ان ما راويتك نجوم الليل في عز الظهر ما اكون عوشه ...
سعيد: (وهو يبتسم بعد ما وصل للي يباه) شو بتسوين
عوشه: (وهي رافعه حياتها) ولد عمي كيف ما ابغيه ... هو السند بعد خواني
سعيد: هاهاها عوشه لا تستعيلين
عوشه: مب استعيال .. وانا ولا انت يا بروك
سعيد: (يبتسم ) عيب عليج مب اصغر عيالج هذا خطيبج الحين
عوشه: هيه صح ...

طلعت عوشه ورا سعيد من الميلس اللي دخلوا يرمسون فيه ولقوا قوم بسوم وعبود قاعدين في الصالة وياهم روضه وفطوم وبعدهم يسولفون بس هالمرة عن سوالف عبود في الكلية وربعه

عبود: هاه العروس
عوشه: (ابتسمت ولا عصبت عليه) لبيه فديتك
عبود (منصدم مب مصدق) شو صار ... عوشه شو فيج ... سعيد شو سويتبها
سعيد: ماشي ... بس تتعلم حق بعد العرس
كلهم منصدمين : شوووو
بسوم: تمزح
فطوم: أي عرس
عبود: عوشه شو يقول سعيد
عوشه: شو بوافق على ولد عمي فيها شي ... ما اقدر ارد طلب لابوي وعمي مجتمعين
عبود: اشهد ان البنت مب صاحيه
روضه: والله تتكلمين صدق
عوشه: هيه عيل شوه
عبود: عقبالي يا رب ... خلاص انزاحت العقبة اللي في طريقي
روضه: ودك ... والله محد عرس فيكم قبلي ... الا البنات
عبود: البنات يعني عوشه وبسوم ... وبتم انا بس وسعيد خطب ... شو انتن متحلفات ما تفجن بتمن ناشبات في حلجي انتي وياها
روضه: (وهي تكلم عبود) ولا حتى سعيد ... محد بيعرس قبلي لا انت ولا هو
عبود: واذا عنستي
روضه: تعنسون
عبود: حرام الريال خاطب ...
روضه: مالي خص
عبود: يا ربي ليش ابتلي بهالخوات ليش
بسوم: عبود ... عادي حبيبي عرس قبلي انا ما عندي مانع
عبود: طالع هاي ومنو قال انا بترياج انتي ... روحي الله يخليج ان لقينا لج ريل
فطوم: أي ودك انت ... تحصل شرات بسوم الف واحد ايتمناها
عبود: القرد في عين اممم القرد اللي مثله غزال
فطوم: والله محد قرد غيرك

كان سعيد قاعد ساكت ما قال ولا كلمه ولا رد على روضه بعد مع ان نظرتها كانت كلها تحدي انه يقول شي بس كان يعرف اذا قال أي شي لهالانسانه بتقلبها حرب وهو مافيه يخرب الجو الحلو اللي كانوا قاعدين فيه .. شوي الا حد يدق الباب ... كان مبارك ياي مثل كل ويك اند اذا ما راحله سعيد لازم ايي يطلعه وياه ... راح ودخله عبود ويوم شافوه كلهم ابتسموله

فطوم: هاه المعرس ...
مبارك: معرس شو ... بعدنا نتريا موافقة العروس
عبود: هات البشارة .. عروسك وافقت (هنيه بانت الصدمه في ويه مبارك صدق وفج عيونه مع انهن وساع لاخر ما يقدر ... واختفت ابتسامته جنه حد صب عليه ماي بارد ... وانتبه حق عمره وراح قعد عدال سعيد)
مبارك: (في خاطره بشارة في عينك على هالخبر النحس) فالك طيب
كانت عوشه قاعده عدال روضه ولاحظت كل تغير صار في مبارك من قاله عبود انها وافقت .. وفي داخلها ميته من الضحك عليه ... ولانها تريد تقهره اكثر

عوشه: (بكل رقه ) مبارك تريد اييب لك عصير او شي تشربه
مبارك: (مصدوم صدق) هاه ... لا شكرا (( هنيه عبود ما قدر يمسك نفسه ولا حتى سعيد وتموا يضحكون من الخاطر وعوشه قررت تتمادى شوي ياللا طريقة يديده تقهر بها مبارك شو الشي اللي يمتعها اكثر من جيه))
عوشه: تعشيت مبارك .. احطلك عشا .. ما تريد اسويلك شي ((كانوا كلهم يبتسمون))
مبارك: لا ... ((وقام من على الكرسي ومط سعيد من ايده)) ياللا سعيد اتأخرنا على الشباب ايتريونا من الصبح
عبود: صبروا بروح وياكم
مبارك: ياللا تعال
عوشه: لا تتأخرون بترياكم (بس مبارك طلع بسرعة جنه حد يربع وراه وعند السيارة وهم يتريون عبود يطلع)
مبارك: تجذبووون والله انكم تجذبون عوشه ما بتوافق ... ولا بتسوي جيه ما اصدق
سعيد: والله انها وافقت واتخبر عبود يوم يطلع
مبارك: سعيد عن هالحركات
سعيد: اوكي باجر اتخبر عمي.. الليله بتخبر ابوي انها وافقت
مبارك: أي ارقاد هذا اللي برقده لين باجر ... شو اللعبه اللي تحت راسك
سعيد: شو اتقول انت شو تخربط
وهنيه ظهر عبود وقطع عليهم الرمسة وركبوا السيارة راحوا المقهى


في المقهى سعيد ومبارك وعبود قاعدين ويا ربع سعيد محمد وسلطان وعلي ... وطول القعده مبارك ساكت وشكله مهموم ... وعبود وسعيد كل ما يشوفونه يبتسمون ... ولاحظوا الشباب ان مبارك شي فيه

محمد: بلاك مبارك ... جنه اليلسه ويانا مب عيايبتنك
مبارك: لا يا ريال ... بس مضيج شوي
علي: خير شو فيك ... الغزاله مضيجتبك ( وهنيه عبود وسعيد ما قدروا يمسكون عمارهم وضحكوا والكل قعد يطالعهم)
عبود: الا قول وحش مب غزاله
مبارك: اوهوووووو لا غزاله ولا وحش ... متضيج وخلاص اذا قعدتوا جيه والله بروح وخصوصا انت سعيد ويا اخوك هذا
سعيد: زين خلاص لا تعصب ... بس الاهل يتريونا في البيت وين بتروح
مبارك: سعيد خلني ساكت احسن ...
سعيد: زين خلاص بخليك ساكت لا تعصب هد اعصابك
سلطان: بلاكم كلكم على الريال .. خلوه في حاله ... اقول مبارك تبانا انش نطلع عنهم نروح نتمشى
مبارك: لا وين اقعد يا ريال .. هذيلا منو بيردهم بيتهم لو رحت عنهم
عبود: عنبوها سنه ... حد يقول على عيال عمه هذيلا ... صدق ضيعت المذهب
مبارك: بتخبرك انت اليوم غادلي شرات الغراب .. وناشب في حلجي .. اسكت عني
عبود: هاهاهاها غراب مره وحده .. خلاص بسكت عنك لا تعصب
محمد: سعيد الا صدق بلاه ولد عمكم
سعيد: (يبتسم) ما ادريبه من ظهرنا من البيت وهو جيه (وهنيه كان مبارك يخز سعيد بنظرات كلها حقد )
***

في البيت روضه وبسوم وفطوم استلمن عوشه يبغن يعرفن شو اللي خلاها تغير رايها بهالسرعه ... وشو الكلام اللي قالها اياه سعيد خلها تجلب 180 درجه مرة وحده

روضه: شو قالج ان مبارك يحبج ومغرم فيج وانتي وافقتي
عوشه: لا لا لا شو مغرم ويحب
فطوم: عيل ليش غيرتي رايج
عوشه: اقنعني وخلاص
بسوم: خلاص انتن لا تدخلن في البنت الله هداها وافقت .. شو تبونها تغير رايها
فطوم: لا بس سبحان مغير الاحوال .. من الرفض الشديد .. للقبول والخنوع
روضه: لا وغدت ذربة وياه ...
عوشه: اوووف تراني والله اروح عنكن فوق اذا تميتن جيه
فطوم: زين متى بتردين على ابوي بخبر الموافقة
عوشه:الليلة بترياه ايي وبقوله اني وافقت على مبارك
بسوم: والله مبارك طيب ... بس انتي شوي شوي عليه وبتشوفين ((ما ردت عوشه عليها وبينها وبين نفسها تقول هو اللي بيشوف شو بسويبه يريدني انا اتورط في الرفض وهو يطلع الطيب ))

يوم رد ابوها من برع دخلت عليه وقالت له انها فكرت في موضوع ولد عمها زين ووافقت عليه ومثل ما قالها انه ولد عمها ستر وغطاعليها ومحد بيتحملها شراته .. ابوها استانس من كلامها وحست انه صدق فرح من خاطره .. لدرجة انه كسر خاطرها يوم بيفصخ مبارك ولد عمها الخطوبة وكيف بيكون حاله .. وبعد ما طلعت عنه ما ياه رقاد الا بعد ما اتصل باخوه وبشره ... وقرر بو منصور يتريا مبارك عشان ايقوله عن الموضوع بس للاسف مبارك رد متاخر ذيج الليلة واجل ابوه الموضوع لين اليوم الثاني
***

يوم الجمعه طبعا بو خالد خبر خالد عن موضوع خطوبة عوشه الضحا قبل لا يروحون يصلون وخالد خبر حرمته اللي انصدموا من موافقة عوشه الغريبة وموقفها الاغرب ... وهم يتغدون كلهم كانت هالخطوبة هي الشي الوحيد اللي يرمسون عنه

خالد: صراحه للحين مب مصدق كيف انتي عوشه تتزوجين مبارك
عوشه: بعد ربك .. شو نسوي النصيب
حمده: يقولون ان ما محبة الا من بعد عداوه
عوشه: (في خاطرها حبته القراده ) لا مب عشان جيه ... في النهاية هو ولد عمي ... يعني انتي يوم اتزوجتي خالد كنتي تحبينه ولا لانه ولد عمج
سكتت حمده وويها احمر وخالد قعد يطالعها يترياها اتجاوب والكل لاحظ هالشي حتى عوشه اللي حست انها احرجت بنت عمها بس شو تسوي لسانها متبري منها ... بس روضه يوم حست بحالة ختها جاوبت عنها
روضه: يمكن حمده ما كانت تعرف خالد زين قبل العرس .. بس اكيد حبته بعد العرس ولد عمي ينحب
فطوم: هيه والله فديته اخوي ينحب
ام خالد: انتن ما عندكن غير هالرمسة ... هذا كله من التلفزيون والخياس اللي تشوفونه فيه
عبود: هاهاهاها حليلهن واجعوهن ... ها العروس ... سمعينا اياها هل تقبلين الزواج من مبارك بن سلطان بن منصور الرميثي .. قولي قبلت ياللا بنصورج
عوشه: انت سخيف عبود ...ابوي ما بتقول حق ولد ك ايوز عني ..... ولا والله بغير رايي
ابو خالد: عبود يوز عن اختك ... شتبابها
عبود: ابوي ابغي اعرف انتوا كيف تفكرون اتخطبون بكيفكم دون ما تشاورون الريال ... حليله لو هو ما يريد
روضه: وده يحصل مثل عوشه ... اصلا هو يحصله
عبود: اشتغلت المحامي الاول ...
ابو خالد: مالك خص هذي شغلات كبار ... يوم بتبغي تعرس عرس دون ما تشاور
حمده: عوشه مب قاصر عليها شي والف من يتمناها ...
سعيد: ترى حتى مبارك الف من تتمناه .. ريال والنعم فيه
خالد: الله يعينك يا ولد عمي
عوشه: يا سلام الله يعينه هو .. لكن انا لا ... مب جنه هو بعد ما يتعاشر((ضحكوا كلهم على عوشه))
خالد: انا اقول مستحيل اتغيرين مرة وحده ... ما ترتاحين لين ما تحطين عليه

وكملوا سوالف وضحك والكل كان مستانس عشان خطوبة عوشه من مبارك ... الخطوبة اللي محد كان متوقع انها تكون او تحصل في يوم من الايام
***

اما في بيت سلطان بو منصور ... بعد ما ردوا من الصلاة في المسيد وقعد هو وعياله محمد ومبارك وامهم في الصالة

بو منصور: مبارك ترانا خطبنالك بنت عمك مبارك ووافقت مبروك
محمد: مبروك وتستاهل
مبارك: ( في خاطره يقول زين يوم قلتلولي الحين وانا اسأل متى بتخبرني) بس يا ابوي انت تدري ان انا ما اريدها ... كيف تخطبونا دون حتى ما تقولي ولا تشاورني
ام منصور: شو بعد هاي ما تريدها ... اذا ما خذت بنت عمك منو بتاخذ
مبارك: مكثرهن البنات ما لقيتوا الا عوشه
بو منصور: وبنت عمك شوفيها قاصر عن البنات عشان ما تباها
مبارك: بنت عمي شيخة البنات .. بس انا ما اباها ما احس انها تناسبني
بومنصور: شو كلام الحريمات هذا تناسبني وما تناسبني
مبارك: خلاص اذا هالكثر تباها بنت اخوك يوزها محمد
محمد: لا انا خلني بعديد شو يوزها محمد هاي بعدين هم خطبوها لك انت شو البنت لعبه انت ما بغيتها يخطبونها لي
مبارك: (في خاطره أخ طلعت نفسك منها) زين انا ما اريدها
ابو منصور: (وهو معصب) وتطلعني صغير جدام اخوي .. وعيالي ما يسمعولي كلمة ولا شور .. هكوه خالد في لندن من قاله ابوه بيوزك حمده ما قال لا ولا قال ما تناسبني وهو دارس برع ... وانت مرة شورك في راسك ولا تحشم كبير
مبارك: ماعاش اللي ما يحشمك ويطلعك صغير يا بوي
بو منصور: خلاص ما اريد اسمع كلمة في موضوع عوشه ..انت فاهم
مبارك: اللي تشوفه طال عمرك ... بس لا تعصب وتضيج بعمرك
ام منصور: قوموا تغدوا الحين
بومنصور: ما اريد غدا .. ولدج هذا سد نفسي
مبارك: افااااا عليك يا بو منصور ... خلاص قلنالك فالك طيب .. قوم اتغدا الحين بنتغدا معاك ... اذا انا سديت نفسك ام منصور ما بتفتحها لك
بو منصور: يا ولدي انا ابوك واحبك .. انا من لي غيرك وغير محمد في هالدنيا ... انت اسمع شوري وما بتخيب
محمد: هيه ترى رضا الوالدين يمدحونه
مبارك: (وهو مغيض على محمد) اسكت الله يخليك ... وعلني اموت يا بوي ولا ارد البيت اذا في حياتي بغيت اعصيك او اردلك كلمه
بو منصور( بعد ما سمع طاري الموت) : لا يا ولدي عسى عمرك طويل واشوف عيالك وافرحبهم ... وين بقدر اعيش بعدك وبعد اخوك
ام منصور: بسكم ياللا قوموا انتغدى الحين ( كانت تحاول تبعد شبح الموت .. وذكرى منصور اللي ردها مبارك دون ما يقصد .. منصور اللي الكل كان يحبه واللي عمره في حياته لا زعل امه ولا ابوه ... )
***
مر اسبوعين على موضوع خطوبة عوشه ومبارك .. وكل واحد فيهم يحترق من داخل يتريا الثاني يفصخ الخطوبة ... مبارك زاد عيار المغايض ... وما يسكت لها ... وهي تسكت وتعامله برود وتتقبل اللي يقوله عشان تقهره اكثر ... كانت هالافلام اللي بينها وبين مبارك تصير والكل يضحك عليهم .. بعدها بفترة مبارك حس انه يقدر يتقبل عوشه اذا تمت جيه ... وتم يفكر فيها اول شي بنت عمه .. ثاني شي حلوة ومزيونه وكانت طولة لسانها مخربه عليها بس .. والحين هو اللي يبدا بس هي ما ترد عليه .. ليش يعور قلبه لازم يتقبل الامر الواقع
***

في بيت بو خالد ... كانوا محددين انهم يروحون يلبسون خطيبة سعيد الشبكه هالخميس وبالفعل اشتروا حق العروس عقد وخاتم وساعة ... وعزموا الحرمات وجيران بيت العروس ... وبوم الخطوبة كانت روضه منحسة ومب طايعة تروح كلهن يحاولن يقنعن فيها

حمده: عيب عليج بتمين بروحج في البيت
روضه: عادي اصلا من متى البنات يروحن خطوبات ... لازم عوشه وبسوم يقعدن وياي
عوشه: لا عاد روضه زين يوم امي خلتنا انروح ... وافقي لا تغدين ماصخه
فطوم: روضه الحين الساعة خمس العصر لا تنحسين
روضه: ما اريد اروح .. يعني ما اريد اروح
حمده: اوووهووو انتي ما منج فايده ... وخلي ولد عمج يزعل لانج ما رحتي خطوبته
روضه: نفاد
حمده: (تهز راسها ) ما منج فايده ... (وطلعت عنهن راحت بيتها .. عشان اتشوف شو بتلبس في خطوبة ولد عمها ومن خاطرها هي بعد ما تريد تروح وتمنت لو كانت بنص عناد روضه او قوتها جان قالت ما اريد اروح .. ذبحني هالحريم من كثر ما يخزني ويسئلني عن ولد خالد متى بيي)

وفي حجرة روضه تمن فطوم وبسوم وعوشه يحاولن فيها
فطوم: روضه ... بيي يوم بتقولين ليتني حضرت
روضه: ما اريد ... عوشه بتخبرني كل شي
بسوم: الناس بتقول روضه ما يت لانه خاطرها من سعيد مب لانها متزاعله وياه
روضه: ايخسون كنت مخطوبة قبل لا يخطب بنت خالته
بسوم: اوووف منج انا بطلع
فطوم: اتمنى اتغيرين رايج واتيين ويانا ... هلنا كلهم موجودين
روضه: ما يهموني
فطوم: انتي دلوعه
روضه: كيفي .. (طلعت فطوم من عند روضه وهي بعد منقهرة من حركاتها وما تم عندها غير عوشه وقبل لا تقول شي قالتلها روضه) شوفي انتي تميتي لا تأذيني ما بروح
عوشه: ليش انا ما اعرفج عشان اذيج .. كيفج تمي بروحج
روضه: عمي هنيه وعبود بعد
عوشه: عبود ما بيتم لج .. وعمج يمكن يطلع
روضه: ما بيخليني روحي
عوشه: يا بنت الناس خلينا نروح ... بيقولون الناس نورة احلى من روضه ولان روضه مغرورة وما تحب حد يكون احلى منها ما يت
روضه: تخسي هي احلى مني
عوشه: اثبتي انها ما تهمج وان هالخطوبة ولا شي وخلينا نروح
روضه: اممممم
عوشه: شو
روضه: بس بشرط
عوشه: شووو
روضه: اتصلي الحين بحنان شقير من صالون كنز لبنان خليها اتيي بعد المغرب .. ووحده عشان اتسوي شعري وبروح
عوشه: لا والله ومتى بنروح على جيه
روضه: يا غبية خليهم هم يروحون قبلنا ونحن بنلحقهم انا وانتي
عوشه: وليش ما قلتي من قبل
روضه: الحين قررت اروح ما كنت مقررة مت قبل
عوشه: لا يكون انتي العروس بتحطين مكياج في الصالون
روضه: كيفي .. لا تقعدينلي جيه .. بتسوين اللي قلت لج عليه ولا ما بروح
عوشه: لا لا بسوي انا اقدر اقول لا
روضه: خليها اتيي اول ما تفضى
عوشه: حاظر عموه اوامر ثانيه
روضه: لا بس روحي ... بطلع شو بلبس
عوشه: ان شاء الله بروح اقولهم انج بتروحين
روضه: اوكي

يوم عرفن قوم فطوم وحمده اللي تباه روضه عشان اتروح الحفلة انصدمن راحن يحاولن يقنعنها تغير رايها .. بس طبعا مستحيل .. هذي روضه لازم اتسوي اللي في راسها ... وطبعا خلنها على هواها وبعد المغرب طلعن ويا عمتهن بيت خالتهن وين الحرمات من الصالون ايسون حق روضه ..وطبعا روضه ما خلت الحرمه تلعب في ويها على هواها ... خلتها تعدل كل شي ما عيبها لين ما طلع المكياج بيرفكت حتى الحرمة اللي سوته عيبها صدق ... وفي الاساس ويه روضه يجنن ما كان يحتاج يلعبن فيه وايد ... وكانت فاله شعرها وسوتله سشوار بس وعوشه حاولت تقنعها ترفعه بس ماشي فايده

عوشه: يا روضه امي بتعصب .. .بياكلون شعرج حرام عليج
روضه: ما ريد كيفي
حرمة الصالون: شعراتك كتير حلوين ... حرام عليكي انا بخاف عليهن
روضه: شعري كيفي ... لا تمون تحشروني
عوشه: انتي ناوية اتيبيلنا مصيبه الليلة
روضه: كيفي ... كيفي ... خلاص لا تحشرينا بنتأخر
عوشه: زين يوم انتبهتي انا بنتأخر
راعية الصالون: ايي بدنا حدا يوصلنا هلأ ازا ممكن
روضه: خلي محي الدين يوصلهن عوشه وانا بروح اتلبس (كانت روضه عند الباب فاجتنه بتطلع)
عوشه: ونحن منو بيودينا .. نسيتي ان الدريول الثاني وياهم بيت خالوه
روضه: اتصلي في عبود او في عريس الغفلة ايودينا اذا يبانا نروح خطوبته (كان سعيد طالع من حجرته اللي بابها مجابل باب حجرة عوشه... وسمعها شو قالت)
سعيد : خلاص اتلبسي وانا بوديكن .. اترياكن تحت ... (وحط عيونه في عيون روضه .. يمكن كانت المرة الاولى اللي يطالع في عيونها وهي بليا شيلة ولابسه بجاما ..لانه دوم اذا شافها بليا شيله ينزل راسه ويخطف.. مب لشي في خاطره .. ولكن كان الود وده يدخل من عيونا لراسها ويعرف هالبنت شو اللي تفكر فيه .. بس هي اللي مشت عنه ودخلت حجرتها تتلبس )

نزل سعيد وفكره بعده في روضه ... اليوم يخطبون له المفروض يكون فرحان ... يكون مستانس بس هوه يحس انه يحترق وانهم يجتلون في داخله الامل في بنت عمه ... ويسأل نفسه كيف جيه بنت عمي واحبها وابغيها من خاطري وما اقدر اوصلها .. وكأني احب وحده غريبه بيني وبينها الف حاجز ... بس لو اقول اني اريد بنت عمي بس لو اقدر اقول ... بس لو كانت راضيه او عندي احساس انها ممكن توافق ... ما يهمني تحبني يكفي اني انا احبها .... وهنيه انتبه سعيد لنفسه وحس بتأنيب الضمير ... شو ذنبها بنت خالته ... وكيف في اليوم اللي لازم يفكر فيها هيه يفكر في وحده غيرها ... بس ما يقدر يرد تفكيره عن روضه ... ليش روضه تكون بكل هالقوة والجبروت .. وليش هو في حبها يحس نفسه ضعيف ... ضعيف جدا

يتبع .......

الموضوع الاصلي  من روعة الكون