فلسفة عقّال

على رتم العقول اللي تعالج وضعها بهْبال = سرى ليل القلوب اللي تهاوت في مساحاتي
وانا ماعاد لي قلب ٍ ايلا من قال , قال وطال = ولا لي غير زفرات القصيد وطيب هقواتي
أتابع فيك مفرود القصايد وافتخر واخْتال = وأحس احيان بحْروق الحروف وحر جمراتي
أنا لو جيت لك مجنون قولي فلسفة عقال = واجـِبْري كسر تنويني معاك ابـْرفع ضمـّاتي
اباغيـّر مفاهيم النحو والصرف والاهمال = وقانون البلاغه والعروض بـْكل كلماتي
أبا اخلق نون للنـّسوه , وبافتح باب للإحلال = وابدّل جمعكم مفرد وبَارفع كل كسراتي
أبا انصب مبتداك بْكاف وامسح منْه حرف الدال = واحط اللام في وسطه يبيـّن سر مأساتي
ابا الْعن خامس الفاعل , وأغيـّر صيغة الافعال = واحطه في خبر كانَ , واجدّد شكل صفحاتي
ابا الغي سـيبويه ابْحرفْ , واصْنع بالنقاط اجيال = وبَاشْطب طرْح أبو الأسود مع خالص تحياتي
أبيك انتي اجابة منْ , وعطف الواو , واسم الحال = وابيك الفعل والفاعل , وكل أهداف نظراتي
أبيك انتي قواعد صرف , وحزم الجد واستهبال = وابيك عْقول تفكيري, وصوت الكذب بسكاتي
أبا اعقد مؤتمر قمه , وبافْرض حظر للتجوال = وبَامـْنع رجة امعمـّر , من الغاء اجتماعاتي
ابادعي قلبي وعقلي , وكل احساس صال وجال = واباجْمع كل احزابي , نقرّر ماهـو آتـي :
بما أنّ الظروف الآن , لاتسمح بأيـّة حال = بأي اجراء روتيني , على سائر دويلاتي
عليه الآن , فلْيـعلـنْ , طوارىء والحمول اثـْقال = ومنـْـك انتي , يصير اول ظهوري وانتصاراتي
أبي كفْ , وهدبْ عينْ , ونقاوةْ قلب واستبسال = وابيك القائد الاعلى , لكل جْيوش قواتي
ابي وقفه من عْيونك تكفـّي عن مية رجـّال = أبي فزعه , وابي نزعه وأغيـّر كل نزعاتي
وانا اخترتك لأن اسمك , يسرّي بي شجون ٍ طال = يشجعني على العليا , واحقّق كل طموحاتي
لانـّك رحمة الكافل , بعين ايتام وام اعـْيال = ولانـّك سطوة القاسي , بعين دْموع وجناتي
ولانّي كل ماشفتك , عطيت الحمْل والحمّال = أهابك هيبة العالم , لحزني وانفعالاتي
أناظر عينك اليمنى , واشوف الليل والموال = وأناظر عينك اليسرى , أشوف ابشع نهاياتي
واضيع هناك مابين الرموش وبين حبّة خال = واحب الموت لعيونك , وكنـْه اجمل محطاتي
أنا جيتك ولع عاشق , يدوّر فيك راحة بال = ولا فكرت لو لحظه , بجرحك لو بأبياتي
أنا الدمعه وهي دمعه , اذا طاحت وهي اذلال = أمد الـْها هدب عيني , والحّـفها عباياتي
واخلّي رمش يحظنها , ورمش الْـْها يصير ظلال = حرام تموت في عيني , وهي رمز لمعاناتي
وبعـد هذا تجين انتي , تسوقين الجروح أشكال ؟ = وأنا اللي كنـْت احِـسـْب انـّك , حلاة الروح في ذاتي
أما تخـْشين أن يهلك , بفعْلك شاعرُ قد آل = بجرحِك للهلاك أمسى , طريح الالتفاتاتي
ألا ويح القلوب اللي , تهد ابصد صم اجبال = والا ويحي اذا بارضى , هواني أو مذلاتي
تراني ساكت بـْكيفي , واذا شفت المعدّل مال = ابا اغـْسل كل مافيني , من احساسي بزفراتي
وابا حرّم على نفسي , لو اسْتسلمت لبس عقال = ولو ما الغيت طاريـِّـك , نهائي من سجلاتي
وترى اللي فات ذا كلـّه , مجرد فلسفة عقال = وانا عاقل واموت ابـْرك , ولاترخص قناعاتي