(( كذا تجي شــاعر ))

هاذاحالنا بالهزمن ..........



كانك تبـي تنعـدّ ضمـن المشاهيـر
اهـل السلـوك الناعمـه والدقـاقـه
جمّـع بنـي عمّـك ونـاد الجماهيـر
ولكل صاحـب شـان ارسـل بطاقـه
وسو أمسيه وحده ولوكانـت عصيـر
وحـاول تكـوّن فالصحافـه صداقـه
واصهل مثل جسّاس وكليـب والزيـر
واشهر على الشعّار مـوس الحلاقـه
وامدح وسـب وغـن لجـل الغناديـر
سب الوفي وامدح من النـاس عاقـه
وخذلك لقا وسـط النيـاق المغاتيـر
جنـب الرحـول وماسـكٍ راس ناقـه
واجلس على المركى وقدّامـك الطيـر
وبيت الشعر خلفـك يهبهـب رواقـه
وصوّر مع اهواة القنـص والصقاقيـر
وجمّـع حوالينـك شـويّـة رفـاقـه
هـذا يقـنّـد فـالـدلال المباهـيـر
وهـذا يتبسّملـك ويرخـي شقـاقـه
وهذا حلب لك من حليـب المصاغيـر
وهـذا علـى مدحـك يـزوّد نفاقـه
واجلس على الروض الخضر والنواوير
وزوّد برستجيـك وهـرجـك لبـاقـه
وصوّر على الشاطي وصوّر على البير
واطلـع بكامـل رونقـك والأنـاقـه
كذا تجـي شاعـر وسيّـد شواعيـر
لو كان ماتقطـف مـن الشعـر باقـه
الوقت غير وطابعـه يالشلـي غيـر
راحـت تقاليـد العـرب والعـراقـه
وين القصيـد اللـي يهـز الطوابيـر
مثل البحـر موجـه يزيـد اصطفاقـه
اللـي ليـا عـدّوه عنـد المناعـيـر
ثم سمعـه السامـع يزيـد اشتياقـه
تبدّلـت كـل الـصـور والتفاكـيـر
وصرنـا نتشفّـق للفرايـد شفـاقـه
في ساحة الشعّـار للوضـع تفسيـر
كم شاعرٍ كلّت مـن الركـض ساقـه
ما اعـم أنـا لاشـك فيهـم هواميـر
تفتح علـى المعنـى ثمانيـن طاقـه
اهـل المعـان الوافيـه والتعابـيـر
جلّـه خـذوه ولا شقْـوا فـي دقاقـه
هـذا وحبْـك الشعـر مـازاد توقيـر
الرجـل مـن فعلـه يبيـن انطلاقـه
الله يوفّقـنـا لحـسـن التـدابـيـر
ويصدّنـا عـن مهتويـن الحمـاقـه
هذا هو الموجـز وباقـي التقاريـر:
الشعـر شعـر المصلحـه والعلاقـه
راكان بن محمد بن بدن


(( السموحه ))

الموضوع الاصلي  من روعة الكون