المسافر

الله يـردّ المسافـر طـوّل الغيبـه=لو هي اسابيع عندي عدّة اعوامـي

له وحشـةٍ زادت بقلبـي لواهيبـه= من حرها اوجس النيران بعظامـي

البدر لا غاب ماللكون مـن هيبـه= مهما النجوم كثرن باعداد وارقامـي

يطـول ليلـي تناوشنـي مخاليبـه= خوفٍ وهوجاسٍ والكابوس باحلامي

لا سافر اللي تحبّه اكبـر مصيبـه=يبحر بك الهم في وسواس واوهامي

ما تامن الوقت فالأقدار تجري بـه= ولا تدري اللي تخبي سود الايامـي

واللي مسافر ترى يسلى عن صحيبه= المشكل اللي على جمر الغضى نامي

ولو كل منهم يعيش الوقت تغريبـه= احدٍ بكيفه واحد في الغربه الزامـي

لا كلمّه من يحبه ما وضـح عيبـه= يقول مبسوط يخفي جرحه الدامـي

فالقلب عند السفر تكشف عذاريبـه= ولو هو قويٍّ تحوّل كومة حطامـي

وأنا بغربه وحالي صارت صعيبـه= يمضي بي الوقت مثلي مثل الايتامي

والاّ كسير يجرّ الصـوت ويجيبـه= محدٍ سأل عنه من صدقان واقوامي

ينطر حبيبه لعلّ بيـوم يـدري بـه= يفهم مشاعره ما يحتـاج لافهامـي

مسيت بالحب نبع الحـب والطيبـه= صبحك بالخير مصدر كل الالهامي

اتعبني القيـد ليـت القيـد تركيبـه=ان كان افكّه ولا حسّيـت بالآمـي

ارجع إليَّ تـرى طوّلـت بالغيبـه=ارجع إليَّ قبل مـا تكسـب آثامـي

يالله ترد المسافـر بالـف ترحيبـه= افرح بلقياه ينعـش قلبـي الظامـي

الموضوع الاصلي  من روعة الكون