يم شعر البحر(العراقيه)

يسموني الاسد صدگي يبت الناس
يعني بكل بساطه چنت صايود
ومن شفتچ تغير طبعي كله اندار
وبعيونچ يا روحي صرت انا مصيود
احبچ صرت مغرم ميت آنا إعليچ
وحگ رب العباد الواحد المعبود
خليني الچ بس حارس وناطور
تره الايام تجري والوكت معدود
لخلي هالمحنه تصير الچ شاجور
وشهگاتي رصاص ونبضي بارود
بظلوعي لسيج دربچ التمشيه
ورموش العيون تصير كل جنود
ما غمض جفن والله وحگ عيناج
ابقه مساهر اباب الگلب معكود
لو معجب يمر يسأل عليچ اليوم
اگله هالگلب بابه تره مسدود
لا تفكر تحب روح يبن الناس
ما تكدر تلوح تضوگ هالعنگود
روح انت بطريقك شوفلك دلال
يضحك يبتسم ويقابلك بورود
اوضح الك اكثر بعد يفلان
تره هذا حبيبي وحبه ماله حدود
وهذا الباب يبقه بس الي مفتوح
الله والنبي هم العليه شهود
حتى من افارك شهگه الانفاس
ولحمي والعظم ينترس بيه الدود
ابقه بس اله هم حارس وناطور
وليوم الحشر روحي عليه تذود
صح جسمي يروح ويندفن ينزال
بس روحي تجي تركض عليه تعود
احبچ يا بعد روحي ينور العين
وانأ بحبچ تراني ميت ومولود
يا حوريه ونزلتي بساحل گليبي
يم شعر البحر يم العيون السود

الموضوع الاصلي  من روعة الكون