الحلقـــــــــة الأخيرة
الفصل الأول
" صراع مع الموووت !! "
**********
" ساره ياروح مازن "
"لا تظنين إني بيـوم التفت لغيرك "
" فراقك دمار "
" فراقك عذاب "
" أنا عايش بهالدنيا عشان أحبك "
" عايش عشان أهواك "
" عايش عشان أضوي السعادة بقلبك "
" ســاره يا أعـذب الأسمـاء .. ساره يافتنة الكـون والفضاء .. كيف أحيا أنا بدونك بحق السمـاء "
" فاتنتي ياملكة قلبي .. يابلسم روحي وكيــاني "
" إليك قلبا لم يعشق غيـرك على مر الأزمــاني "
" في قلبي وحدها ساكنة "
" في قلبي وحدها قابعة "
" روحي وهواي وأنفاسي ودمي وعروقي عشقــوها "
" أشعر أن حبك يزداد بقلبي أكثر وأكثر وأعود لكي أعلنه لكي عبـر سطوري "
" لأني أحبك "
" لأني أعشقك "
" ولأني لا أرى غير رسمك في عيوني "
" اذكريني وأحبيني "
" فأنا لا دنيا لي غير ديناك فاعشقيني "
" فراقك مووووووووووووت ياحبي وجنوني "
كلمات مبعثرة .. بصعوبة قدرت تقرا منها الي قرت لانها ممزقة واهي تلمها لبعض وتحاول تركب الاوراق وتقرا .. ولأن دموعها تمنعها من القرايه .. وكل مامسحتها وقرت عبارة سالت دموعها أكثر .. لين حست بالنار تسعر بصدرها .. وكان كثير وصعب عليها تقرا هالكلام وتتوصل لهالحقيقة بعد كل هالوقت .. وبعد مافات الأوان .. بعد ما ربطها الزمن بإنسان ماقدر يحرك بداخلها أي شعور .. وخسرها لانسان هو روحها وحياتها ودنيتها .. وخــلاص اتدمرت .. !
وغطت وجا بصدمة وهي تهمس بصوت مذبوح : مو معقول !! لالا مستحيل الي قاعد يصير فيني مستحيل !!
تقطع قلب سمر على حالتها وبالقوة قامت من مكانها وقعدت جمبها بالارض وهي تقول من بين دموعها : أدري انها صدمة ياساره .. بس حتى لو كان هالشي مو وقته الا انه بيريح خاطرك تجاه مازن وانتي الي كنتي تحسبينه متعمد يتركك ويبعد عنك ومايبيك .. الحين بترتاحين يوم عرفتي حقيقة حب مازن لك..
ساره وهي تبكي : لا ياسمر لاااا ! ياليتني قعدت على عماي وماعرفت عنه شي .. كنت ماراح أحس بالذنب .. اما الحين بعد ماعرفت كل شي بظل طول عمري ندمانة وطول عمري بحس اني انا السبب !! (( وناهجت واهي تقول : أنا السبب بضياع كل شي ياسمر .. انا الي ماصدقت مازن وابتعدت عنه وتركته بعز حاجته لي وتعبه وتعاسته .. كان كل شي ممكن يتصلح لكن جروحي حطمتني وماقدرت استحملها ياسمر ... (( وخبطت الأرض بإيدها واهي تبكي وتقول : ماقدرت أستحملها .. ماقدرت .. ماقدرت ..
ضمتها سمر لصدرها واهي تبكي وتحس بالالم على حالة ساره وقالت : بس حياتي هوني على نفسك ماتدرين يمكن الي صار خيرة من ربي .. يمكن الله كاتب لك السعادة مع وليد مو مع مازن !!
ساره وهي تبكي : لا سمر انا مو مبسوطة مع وليد .. اكذب على نفسي واوهمها بهالشي لكني مو قادرة احبه ولاني قادرة انبسط معاه .. سمر انا ظلمت الكل معاي .. حرقت قلوب الكل بسببي خلاص مابي اعيش بهالدنيا خلااااااص !
سمر : بس ياساره بس والله قطعتي قلبي لا تقولين هالكلام .. !
ابعدت ساره نفسها عن سمر وطالعت الاوراق بالارض وهي تقول : لا انا انتهيت ياسمر .. انتهيت بعد هالشي خلاص ماظني اقدر اعيش وانا اشوف شلون مازن متعذب بسببي .. وليد متعذب ومحترق عشاني .. وانا مو قادرة اسعد نفسي ولا اسعد احد معاي .. قوليلي بالله مو الموت أريحلي من كل هذا !
سمر : لا غلطانة حياتي .. ساره اذا انتي مو قادرة تنسجمين مع وليد تقدرين تنسحبين من حياته .. توك انتي وهو مابعد صار بينكم لا زواج ولا شي ! مو تدمرين نفسك بهالطريقة وهالحالة !
ساره : أترك وليد ياسمر طيب وبعدين ؟؟؟ عاد مازن الي يبيني الحين ؟؟ مازن كرهني ياسمر .. على كثر ماحبني كرهني ! مازن لو يندق لحمه بلحمي والله لايفصل لحمه عني ولا يرجعلي !
سمر بألم : ماظنيت ياساره .. انتي ناسية الحب الجامح الي كان بينكم وناسية كيف كان يموت بهواك ؟؟
ساره : كان ياسمر كان .. انتي ماشفتي نظرة عيونه يوم تواجهنا قبل فترة !! طالعني بنظرة مقيته سمر .. وكلمني بنبرة عمري ماسمعتها منه .. نبرة تطلع من انسان حاقد ويكره الشخص الي قدامه !
سمر : لانه شافك مع وليد وماستحمل ياساره ... ولازال اهو عايش بعذاب وهلاك لكن صدقيني لو كان في فرصة ترجعون لبعض والله بيكون اسعد انسان .. مازن اخوي وانا اعرفه ..
ضاعت عيون ساره بالفراغ واهي تهمس : بس مستحيل ياسمر.. قلوب الناس مي لعبة عندي .. احب مازن واتركه .. واروح لوليد وأعلقه فيني وأتركه وأرجع لمازن .. ! وطالعت بسمر بنظرة الم وهي تقول : الله مايرضى ياسمر .. ومن وين بيكتب لي السعادة وانا معيشة غيري بعذاب !!
طالعتها سمر بحيرة وألم ! ليه كل هذا يادنيا .. ؟ بعد كل الحب والعشق الي ماصار ولا استوى مثله بهالدنيـا .. يضيع بلحظة غفلة وجرح وغيرة وألم .. ولما نصحى من جروحنا وآلامنا .. نلاقي الاحلام ضاعت وانتهت .. !! ياويل قلبي على صدمتك ياساره .. ويايل قلبي على جروحك يامازن !
***********
دخل وليد بيت أهل عمه واهو ثاير الاعصاب .. واول من صادف قباله كان فهد ..
وليد وهو يحاول يتحكم باعصابه : السلام عليكم ..
فهد : عليكم السلام !
وليد : وش السالفة يافهد !
فهد بتنهيدة : علمي علمك ياوليد .. هذه هي من يومين مسكرة على نفسها الباب .. لا ترد علينا ولا على اتصالاتنا .. وبلغتك عشان تجي تشوفها يمكن تتجاوب معاك !
وليد وهو يمشي للدرج : يومين يافهد وتوك تقولي عن حالتها ؟؟
فهد : وانت ليه تنتظرني اقولك ؟ دامك فاقد حسها ليه ماجيت تسأل عنها !
وليد : امور بيننا يافهد لكن ماتوقعت توصلها لهالحالة !
فهد : انت عارف ياوليد طبع ساره من قبل تاخذها .. أرجوك وليد راعها قد ماتقدر !
وليد وهو يطلع الدرج : والله يافهد ماسويتلها شي .. اهي الي مو راضية تحس فيني وتتقبلني بحياتها .. (( وكمل بتنهيدة : وين غرفتها ؟؟
فهد : باطلع معاك .. وطلع الدرج معاه لين غرفة ساره ودقوا عليها الباب .. وكالعادة لا استجابة !
وليد وهو يدق الباب بقوة أكثر : ســـــــــاره .. ســـــــــــاره فكي الباب انا وليد فكي الباب حياتي ..
ووقف واهو يرهف سمعه ياعسى يسمعها تمشي ولا ترد .. وخاب أمله وماسمع منها شي ودق مره ثانية وقال : ساره لو مافتحتي باكسر الباب !! سامعه ؟؟ باكسر الباب !!
وانتظر لحظات الا وسمع خطوات تقترب من الباب .. وثواني وانفتح الباب لتظهر من خلفه ساره بمنظر يقطع القلب والروح .. عيونها متوقدة كالجمر ووجا شاحب ومنخطف لونه !
فهد ماتحمل منظرها وقال : شفيك ياساره .. ليه مسوية بعمرك كذا ؟؟
ساره ماردت وكانت عيونها معلقة بوليد .. نظرات كلها ألم وأسف وحزن ! ووليد اتقدم منها وهو يطالعها منظرها وقلبه يخفق بكل حبه وحنانه .. ومسكها من ذرعها بخفة وقال : شفيك ياساره ؟ شالي صاير ؟
تجمعت الدموع بعيون ساره وانتفض دقنها بمحاولة لكتم البكي .. وبلا شعور منها رمت راسها على صدر وليد وصارت تنتحب بصوتها ! ضمها وليد وهو مخترع من حالتها .. وفهد قرب منه وهمس عند راسه : حاول تهون عليها ياوليد وانا باترككم الحين .. (( وطلع من الغرفة وسكر الباب ..
وليد واهو ضام ساره : ساره شفيك حياتي .. ليه هذا كله .. ليه هالبكي وليه مسوية بنفسك كذا فهميني ؟ ومشاها لين قعدها على السرير وقعد جمبها وضمها بحنان وهو يقول : بس حياتي والله قطعتي قلبي بدموعك وانا مدري وش سببها !
ساره وهي تناهج : سامحني وليد ارجوك ..
وليد باستغراب : اسامحك على ايش حياتي انتي ماسويتي شي !
ساره : انا ظلمتك معاي وليد .. (( ورفعت راسها واهي تكمل : ارتبطت فيك عشان اهرب من الجحيم الي كنت عايشة فيه .. ظنيت اني ممكن أنسى بسرعه معاناتي وأعيش معاك انسانة ثانية بقلب ثاني .. لكني مو قادرة أسعدك وليد ومو قادر أتجاوب معاك بشي .. أنا بعذبك معاي لان هذه وظيفتي بهالدنيا .. أعذب الكل معاي وأتعبهم وأعيشهم بتعاسة ودمار !
وليد : ساره شهالخرابيط انتي من قالب لك مخك ؟؟
ساره : هذه الحقيقة وليد .. انا ما أقدر أسعدك ولا أسعد احد غيرك .. انت تحبني بس انا مو قادرة احبك ومابي اعذبك معاي اكثر !
وليد : ياساره أنا راضي ومو لازم تحبيني يكفيني اني انا احبك واموت فيك .. وقدامك العمر كله لتحاولين تحبيني بأي فرصة تجيك .. بس انتي شالي صار وخلاك تفكرين بهالطريقة الي وصلتك لهالحالة !
ساره وهي وتبكي : إحساسي بالذنب وليد خلاص مو قادرة استحمل ..
وليد : لا تحسين بالذنب عشاني حياتي .. وصدقيني انا راضي وبظل صابر ومتحمل لين يحكم قلبك بكيفه ومزاجه متى تتقبليني وتحبيني .. بس لاتسوين بنفسك كذا تكفين !
غمضت ساره عيونها وهي رافعة راسها وتبكي بصمت .. مستحيل تفهمني وليد .. انا أبكي حالي وابكي حالك وابكي حال مازن .. انا بدوامة وصراع لو تدري عنه ياوليد بتنخبل .. ارتباطي فيك كان غلط بغلط وتوني أحس بهالغلط بعد ماخسرت روحي وحياتي .. ياربي ان كان حياتي انكتبت مع وليد فيالله انك تنقذني من هالعذاب و تشرح صدري لحياتي معاه لاني احس الدنيا بكبرها ضايقة فييييييييييييييني ..
اتأملها وليد واهي بهالحالة وقال : ساره كوني صريحة معاي أرجوك .. شالي تفكرين فيه بالضبط ؟؟؟
طالعت ساره فيه وشافت العذاب بعيونه .. وحست بعجز عن الكلام ! شتبين أقولك وليد .. أقولك اني كنت ظالمة مازن ؟؟ تبيني أقولك اني اكتشفت بعد كل هالوقت شكثر قسيت عليه ودمرته وضيعت من إيدي كتلة من الحب والوفا والتضحية .. وعرفت اخيرا ان كل شكوكي كانت أوهام !! وانه صان حبي بقلبه طوال السنوات ... واني بوقت ماحسيته أضعف من انه يتحدا أحد عشاني .. اكتشفت انه حارب كل القلوب عشان حبي ! أقولك ياوليد هالكلام عشان أقضي عليك مره وحده ؟؟؟ عشان ينزل علي سخط ربي وأعيش مدمرة طول عمري ! ياويلي منك وياولي من مازن وياويلي حالي أنااااا .. !!
تأمل وليد عيونها وحس فيها الضياع واللوعة وقال : تكلمي ياساره .. قولي كل الي بخاطرك تكفين !!
ساره وهي تبعد خصل شعرها بضيق : وليد أنا تعبانة ومابي اتعبك معاي .. يكفي عذبت الكل لين دمرتهم والحين خلاص مابي أفكر بشي ولا أقرر شي .. انا حياتي معاك وانكتبت لك انت وشكـّـلها انت مثل ماودك !! حبني مثل ماتبي وعاملني مثل ماتبي وسو فيني الي تبي .. لاني تعبت ومابي افكر ولا بشي ياوليد .. ولا بشي !!
ضاعت عيون وليد بوجا واحتار من كلامها !! شهالكلام الغريب ياساره ؟؟ انتي شالي صاير فيك وخلاك تفكرين بهالطريقة !! شالي خلاك تسلميني حياتك وأسوي فيك الي أبي وانتي ماعادك معترضة !! وحس بشبح مازن يداهم باله ونغزه قلبه يوم حس انه له علاقة بحالة ساره .. وطرا على باله فكرة انه ياخذها ويبعدها عن هالعالم والناس وقال وهو يراقب عيونها : يعني ياساره لو أنا قررت الحين شي يتعلق بحياتنا .. إنتي مو معترضة ؟؟؟
ساره بألم : مو معترضة ..
وليد بعين لامعة : أجل خلينا نتمم زواجنا بهالصيفية !!!!
يمكن خفق قلب ساره بكل عنف .. يمكن حست روحها تمزقت بداخلها بكل ألم ودمار .. لكن وليد ماشاف منها الا نظرة ضياع وهمسة من بين شفاتها تقول : .......... مثل ماودك !!
__________________
وشعت مشاعر الفرح من عيون وليد !
********
الكـل عرف بخبر زواجهم القريب .. البعض انصـدم !! والبعض فرح .. والبعض ظل آسف على حال مازن وساره .. وسمـر حست ان هالشي مو طبيعي ! ساره كانت مدمرة بسبب الظرف الي وصل !! وبعدها نسمع انها اتفقت مع وليد على الزواج ! انتي شلون فكرتي ياساره ؟؟؟ وماقدر تصبر وراحت لها البيت بوقت دومات الشباب .. ودخلت بيتهم وطلبت من الخدامة تناديها من غرفتها .. وظلت تنتظرها بالصالة لين نزلت لها وشافت سمر الحزن بعيونها واهي تسلم عليها وقعدت جمبها واهي تقول مصطنعة المرح : شهالخبـر الحلو ياساره !
ساره بابتسامة خفيفة : زين انك تقولين حلوو !
سمر : ياساره محد يقدر يعترض على قدر ربي .. وان كان حياتك انكتبت مع وليد فلازم نفرحلك ونعتربها خيرة من الله ..
ساره بتنهيدة : الحمدلله على كل حال !
سمر وهي تراقب عيونها : ساره شالي صار فيك حياتي ؟؟؟
ساره بصوت أقرب للهمس : ياسمر انا تعبت خـلااااص وماعاد فيني وجع راس ..
سمر : بس احسك مجبرة على هالزواج !! ترا مانتي مجبرة ولانتي مضطرة تسوين شي ماتبينه ..
ساره بعيون ضايعة : خلاص انا ماعاد يهمني شي ولا عاد يفرق معاي أي شي !
سمر : حاسة فيك حياتي وحاسة بالمعاناة الي عشتيها .. بس حطي ببالك ياساره ان مافي شي يتم غصب عليك .. لاتحسبيني اقولك هالكلام لتتراجعين وتفكرين بـ مازن .. لا والله .. مازن اخوي صح وطول عمري اتمنيتكم لبعض .. لكن ابيك تفكرين بنفسك انتي قبل اي أحد .. فكري بحياتك .. فكري بسعادتك .. احلامك .. لك حق تعيشين مثل ما انتي تبين مو مثل ماغيرك يبي
ساره بتنهيدة : كلامك نفسه كلام فهد أمس .. قعد معاي وقالي اني لو مو راضية بهالزواج راح يفركش كل شي غصب عن الي مايرضى .. لكني ياسمر انا ماعاد افكر لا بأحلامي ولا بحياتي .. أنا استخرت ووكلت أمري لله .. والي كاتبه ربي بيصير !
اتأملتها سمر بحنان وقالت : ياعمري .. الله يكتب لك السعادة وين ماكانت ..
ساره وهي تغصب نفسها على الابتسام : آمين ويسعدك و يسعد ........ مازن !! واتنهدت بكل ألم وقالت : وش اخباره ياسمر ..
سمر : مدري ياساره والله مايكلم الا امي ويقولها انه بخير ويسكر منها حتى مكانه مانعرفه ..
ساره بهمس : الله يعوضه بالي تقدر تسعده و تعرف قيمة حبه ..
سمر بخاطرها .. ومافي غيرك ياساره لو دار مازن الدنيا كلها ولفها .. وقالت بتنهيدة : الله يسمع منك !
دق جوال سمر .. وابتسمت لساره واهي تخرج الجوال من شنطتها وكان خالد المتصل
سمر بنعومة : هلا حبيبي
خالد: سموووووووووووووور الحقيني !
سمر بخوف : اسم الله عليك خالد شفيييييك ؟؟
خالد : طقت كبدي من هالدوام والله مليت منه خلاص مابي ادااااوم
سمر الي تعودت على هالموال من خالد : بس ياخالد والله خرعتني أحسب فيك شي ..
خالد : وانا فيني مليون شي .. تكفين اولدي انتي بسرعه خليني ارتاح من هالدوام وانفس معااااااك !
سمر : اوريك انت من الحين مخطط على هالاجازة !
خالد : ومنتظرها على جمر بعد مايصير المتزوجين يداومون مثل العزاب !!
سمر وهي تطالع ساره و تضحك : بس خالد هدي نفسك حبيبي ..
خالد بتنهيدة : وحشتيني حياتي ..
دارت سمر وجا واهي تهمس : وانت اكثر
خالد باستهبال : آتيني بوثة ..
سمر : حبيبي ماودك تشوف شغلك ؟؟؟؟؟
خالد : أول تعطيني ...
سمر واهي منحرجة : أوكي أوكي بعدين ..
خالد : شعندك تصرفيين ؟؟
ضحكت ساره من شافت سمر منحرجة وحست ان بينها وبين خالد شي وقامت واهي تقول بضحك : خذي راحتك .. أنا رايحة المطبخ ..
ضحكت سمر وخالد سمع صوت ساره وقال : ساره عندك ؟؟؟؟
سمر : لا أنا الي عندها ..
خالد : ياسلااااااام !! شهالتطورات الي بينكم!
سمر بصوت واطي : لاتطورات ولا شي بس جيتها اشوف شسالفتها هي ووليد وزواجهم الي طلع لنا فاجأة
خالد بضيق : اييه ووش قالت ؟؟؟؟
سمر : بعدين اقولك خالد مابيها تجي وتسمعني اتكلم عنها
خالد : بس قوليلي تحسينها موافقة ؟؟
سمر : اممممم ..
خالد : عجيبة هالبنت !!
سمر : الله يكتبلها الي فيه خير ..
خالد بتنهيدة : آآمين .. اجل خليك انتي عندها لين أطلع من الدوام ونتغدا سوى مع اخواني
سمر : أوووكي على راحتك حبيبي
خالد : أوكي يلا هاتيها قبل تجي ساره
سمر بضحك : ياربي خالد مو وقتك ..
خالد : بكيفك أجل مو مسكر !!
سمر : لا أمانة فكني منك انت عليك اوقات مدري شتبي !
خالد : كيفي والله وحلالي أكلمك متى مابغيت ..
سمر وهي تبي تخلص منه وعطته بوسه استخف منها وقال باستهبال : وحده ثانية سمر
سمر: شكلي عطيتك وجه بزيادة انا .. يلا بس لأعلم عليك فهد ؟؟
خالد : هاااااااااي وش بتقولين له أمانة .. خالد يدق يبي مني بوسة ؟؟؟
سمر : اي أقوله الي أكثر منها بعد ..
خالد : ه اتخيل شكلك وانتي تعلمينه عني الللللللللللله ليته يطردني من الشركة وقتها
سمر : بس انت هذا الي هامك؟؟ تبي تخلص من الدوام وبس ؟؟
خالد : إي سمر كررررررررررريه هالدوام
سمر : ردينا ؟؟؟ خلاص خالد رووووح عيب والله تاركة البنت زهقانة بحالها مايصير !
خالد : وأنا سمر أهوون ؟؟
سمر : إنت حياتي كلها بس تكفى مو الحين ..
خالد : إي العبي على غيري ياعمري.. بس يالله بفكك هالمرة وشوفي بعدين مين بفكك مني !
سمر : بس انت مره مصدق نفسك تراني خالصة حدي رووووووح !
خالد : بعـــــــد .. ؟؟؟ إي زيدي معاي بالكلام عشان تشوفين شلون أجننك اذا رجعت
اتصاعد الدم لوجه سمر بحيا واهي تطالع ساره راجعة الصالة : خالد والله مابقيت فيني شي صاحي تكفى ارحمني والي يسلمك
خالد : يلا يلا .. أحبك يابطة ..
سمر بزعل : بس خالد ذبحتني بهالبطة
خالد وهو يضحك : والله صايرة كنك بطة بهالبطن ..
سمر : خـــــــــــــــالد انت مو معديها على خير خلاااااص رووووح
خالد : بااااااااااااااي ..
سمر : باي
وسكرت من خالد واهي تبتسم لساره الي قعدت واهي تقول : الله يديم المحبة بينكم
سمر بابتسامة : آمين .. بس والله مجنني هالخالد مدري متى يركد ويعقل .. كل يوم أموت موت وانا اصحيه ويلعني ويلعن ابو الدوام عشان يصحى ..
ساره : ه ترا هذا خالد من ايام الدراسة أكره ماعليه يصحى الصبح عشان دراسة ودوام ..
سمر : ياويلي بكرا بجيب ولدي ويشوف ابوه قدوته بهالحالة .. وااااا فشلة !!
ساره : ه ياحلوك ياسمر والله ضحكتيني من زمان ماضحكت
سمر : وانا صادقة .. تخيلي شلون حالي والله يمكن يطلع الي ببطني أعقل من أبوه ..
ساره : والله ياسمر لو يرج مخك رج .. اسم انه يحبك وحصل عليك ..
ضيقت سمر عيونها وهي تطالع بساره بألم وقالت : الله يسعد قلبك ياساره قولي آمين ..
ومر الوقت بسرعه لين جو الشباب من دواماتهم .. وسليمان كان ناوي يتغدا عند غـادة بس يوم درى ان خالد وسمر بيتغدون عندهم مر على غاده وأخذها معاه البيت .. وحسوا كلهم بالفرح يوم شافوا الابتسام بوجه ساره والي سببه وجود سمر عندها ..
وعلى الغدا .. ماحاول أحد منهم يجيب أي طاري للزواج وكانت سوالفهم عاديه ويحاولون يدخلون جو المرح بالحكي ..
خلصت غاده ويوم جت تقوم قال سليمان : على وين !
غاده : الحمدلله شبعت ؟؟
سليمان : بس أنا ماشبعت !
غاده : وأنا شعلي منك اذا شبعت قوووم !
سليمان : لا حبيبتي عيب الحرمة تقوم من على السفرة قبل زوجها .. اصبري لين اخلص ونقوم سوى
نقلت غاده عيونها بينهم وهي تضحك باستغراب وتقول : بابا ويييييييييين عايشين احنا .. (( وطالعت سمر واهي تقول بضحك : سمر انتي خالد يسوي معاك كذا ؟؟
سمر وهي تضحك : لللاء !
غاده وهي تطالع بساره : وانتي ياساره يسوي معاك وليد كذا ؟؟؟
ساره بابتسامة خفيفة : إي وأكثر من كذا ..
غاده بضحك : بعــــــــــــــد ؟؟
ساره وهي مبتسمة وتقول بصوت اقرب للهمس : مره كنا نشرب كفي ويوم خلصت كاسي هاوشني لييييه أخلصه قبله .. مو عادي إني أقوم !!
ضحكوا كلهم الا خالد الي مايطيق شي عن وليد ويعتبره السبب بدمار العلاقة بين وبين صديق عمره مازن .. اما سليمان فلأنه يدري عن سوالف وليد والتقارب بينهم فنسى كل شي وضحك من قلبه وهو يقول : الله يغربل شيطانك ياوليد ..
قامت سمر وإهي تمسك ظهرها وتقول : آآآآه يابطني
خالد : يارب ولادة !
سمر : بس خالد والله حرام عليك توني بالسابع !
خالد : وأولدي بالسابع تعرفين انا ودي اختصرلك المدة عشان ترتاحين بس ..
ضحكوا عليه وسمر قالت لفهد : تر مو حب فيني إلا عشان ناوي يرتبله اجازة من الدوام اذا ولدت !
فهد : مْعـَـصي حبيبي .. لا تحلم بهالاجازة .. (( معصي تعني امر مستحييييييييييل .. هذا عند أهل الوسطى بالسعودية )
خالد بحمق : شالي معصي يافهد .. زوجتي والدة وتعباااااانة ومو قادرة تتحرك وتبيني اداوم واتركها ؟؟
فهد : انا فاهمك وفاهم سوالفك ..
خالد : وانت شعليك من سوالفي .. عاملني مثل أي موظف طالب اجازة لظروف خاصة وبس
سمر : خالد وانت ليش تفاول علي اتعب وما اتحرك .. اي صح انا أبيك جمبي بس مو تكسحني عاد !
فهد : شفت حتى سمر أدرى بحالها وانها مو تعبانة ولا هي بحاجتك !
سمر بابتسامة عذبة : الا فهد والله أحتاج خالد أنا مايصير يداوم ويجيني مرهق وانا بروحي تعبانة ومو قادرة على لعوزته ..
ساره وهي تطلع من المطبخ : والله الي يسمع نجرتكم يقول سمر ولدت خلاص وجابت توأم بعد !
خالد : ياسلاااااااااااام لو توأم تتضاعفلي الإجازة دبل !
ضحكوا عليه وقاموا كلهم وقعدوا بالصالة ومن بين الحكي والسوالف اقترح عليهم فهد يطلعون كلهم سوى تمشية حلوة قبل زواج ساره ووليد ..
دام استقرت الاوضاع على الحال الي اهم فيه .. فماعاد يمديهم يغيرون شي من حياتهم ولازم يستسلمون لها .. حزنوا لين تقطعت قلبوهم .. وبكوا لين تورمت جفونهم .. وانتهوا إن .... ساره مع وليد .. وفهد بلا ندى .. ويالله منك العوض .. !
**********
|
آخر 10 مشاركات
08-12-2007, 08:58
العرض العادي
