{ نهاية حبك إعدامي } ...(قصة مميزة.. الإدارة)

التكمله




بوفارس: هي يلا عن الهذره الزايده ركبوا السياره ..
سلطان: اننا قادمون يا عمي .. هلموا نركب السياره يا اصدقائي ..
جاسم: نحن ورائك يا اخى العرب ..
سلطان: ما بالك يا احمد ساكت .. أأكل القط لسانك ؟
احمد: كلا .. ولكني اتحقق من بعض الرسائل التي وصلتني على هاتفي النقال ..
ركبوا السياره وهم يتكلمون بالعربيه الفصحى .. وبوفارس يسمعهم وكان وده يشوتهم برا السياره على غلاستهم
جاسم: ممن هذه الرسائل ؟
احمد: انا اسف ايها المحترم .. لا استطيع اخبارك بذلك ..
سلطان: ويحك يا حماده .. اتخبئ عنا اسرارك ..؟
جاسم: لقد اهنتني بردك يا حماده .. منذ متى ونحن نخش على بعض شيء ..
سلطان: حلوه ذي نخش ..
جاسم: لم اجد المفرد المناسب يا اخ العرب ..
احمد: ما بالكم اكلتوني بقشوري .. انتظروا سأخبركم من ارسل لي هذه الرسائل ..
سلطان: انت تعرف كم نحبك يا احمد .. فعيب عليك ان تخش عنا شيء ..
احمد: لا تهتم يا اخ العرب .. انا فالشوفه ..
جاسم: ه .. لقد عجبني هذا المفرد ( فالشوفه ) ..
احمد: انا اعجبك ايها المحترم .. استطيع ان اتكلم اكثر من لغه ..
سلطان: ماشاءالله عليك .. لقد اثرت اهتمامي بك يا حماده ..
احمد: اجل اجل .. فلقد سافرت لبلدان عديده في ريعان شبابي ..
جاسم: هل لي ان اسألك سؤال يا حماده؟
احمد: تفضل ايها المحترم ..
جاسم: كم تبلغ من العمر ؟
احمد: ما بالك وهذا السؤال ايها المحترم ؟
سلطان: لما الغضب يا رجل .. اهدء اهدء ..
احمد: انا لا احب ان يسألني احد عن عمري ..
جاسم: ولما ؟
احمد: لاني اخاف من الحسد ..
سلطان: انا لا اخاف من الحسد ..
جاسم: انك فعلا شجاع يا اخ العرب ..
احمد: ياللهول .. ولما لاتخاف من الحسد يا اخ العرب ؟
سلطان: بكل بساطه .. لاني ضد الحسد ..
جاسم: ما اروعك ..
احمد: ليت عندي نصف شجاعتك يا اخ العرب ..
جاسم: وانا اتمنى نفس الشيء ..
بوفارس: خلصتوا هذرتكم البايخه ..
الشباب: .. اي
بوفارس: وصلنا البيت يلا فكوني خل اروح ..
جاسم: الى اللقاء يا ابتاه ..
سلطان: نراك عن قريب يا عمي ..
احمد: الى لقاء قادم ..
الشباب بصوت عالي: اااااااااي ..
بوفارس: الحمدلله والشكر .. زين تبون شي ؟
جاسم: لأ يبه ..
بوفارس: يلا يبه .. انا بروح لو بغيتوا شي اتصلوا ..
جاسم: زين ..
دخلوا البيت وهم ميتين من الضحك ..
جاسم: اما احنا بالفصخى والله شغل عدل ..
احمد: من قلب ..
سلطان: على قولة عمي .. بسكم من الهذره الزايده .. شو رايكم نطلب اكل ..
جاسم: اي والله انا جوعان ..
احمد: يلا قدام .. بس شو رايكم نروح الكفتريا اللي عند الجمعيه ؟
جاسم: ماعندي مشكله .. خل اشوف الدريول موجود ولا لأ ..
الشباب: اوكي ..
مريم وفاطمه وايمان كانوا قاعدين فالصاله ويسولفون ..
مريم وهي تصب شاي: عيل بدى العد التنازلي حق لطيفه وحليلها ..
فاطمه: اي فديتها .. الحمدلله الله عوضها ..
ايمان: ليش ؟
فاطمه: لان ولد خالتها كان يقول عاد مادري .. يقول انه يحبها وقالها انه بيتزوجها .. بس من بعد الحادث غير رايه ..
ايمان: ليش ؟
فاطمه: لان عدسة عينها تحركت شوي ..
ايمان: مالت عليه .. ماشوف اي تغير في شكلها .. يمكن اللي بيركز ..
فاطمه: عاد هو صدمها .. وخطب وحده ثانيه من اهلها .. بس الحمدلله احمد بن راشد كان من نصيبها ..
مريم: الله يوفقهم ان شاءالله ..
ايمان بخبث: وانتي بعد مريم .. بدى العد التنازلي لج .. اااااي
فاطمه: ه ..
مريم: ايمانو بتصفقين زين ..
فاطمه: ما قالت شي غلط يا عروسه ..
مريم: عااااد
ايمان و فاطمه: ه
مريم صدت عنهم وتمت تقلب قنوات التلفزيون .. ايمان قربت من فاطمه ..
ايمان: يقولج .. ذاك اليوم كنت اطل من الدريشه وشفت عزيز طالع ومعاه صديقه ..
فاطمه باهتمام: شو ؟
ايمان: رفيج عزوز المزيون .. شفته من قريب .. ماشاءالله عليه يجنن ..
فاطمه حست بالغيره: زين ليش تتكلمين عنه بهالطريقه ؟
ايمان: شو قلت ؟
فاطمه: شو بعد تقولين يجنن ..
مريم التفتت عليهم: بصراحه اللي يشوفه غصبن عنه يقول انه يجنن ..
ايمان: فديت مرايم .. مشاركتني .. انتي ما قط شفتيه فطوم ؟
فاطمه: لا ولامره ..
مريم: بصراحه .. مزيون .. ياحظها اللي يتاخذه .. بتم طول اليوم بس تتفكر بجماله ..
ايمان: اذا هو جي مزيون .. لو عنده خوات هل بيكونون بجماله ؟
مريم: اكيد .. بس في بعض الحالات الشباب يكونون احلى من البنات ..
ايمان: اها .. بس هو ماشاءالله عليه .. جسم وطول و ويه حلو .. بصراحه انا اشوفه احلى من خالد ولد عمي ..
مريم: نعم نعم .. لا يبه مافي احلى من خالد ..
ايمان: اااااي .. طلع الحجي .. كل هاي حق خالد .. مايدري عنج ولد العم ..
مريم باحرج: لو نطقتي جدام حد يا ويلج ايمانو ..
فاطمه كانت هاديه .. وهم يتكلمون .. التفت ايمان على فاطمه ..
ايمان: فطوم .. وين رحتي ؟
فاطمه قامت من مكانها: ما رحت مكان .. و طلعت عنهم ..
ايمان: شو فيها فطيم ..؟
مريم: مادري .. احنا قلنا شي يزعل ؟
ايمان: لأ .. كنا نتكلم عادي .. عن رفيج عزوز وعن خالد .. شو الغلط في هالكلام ..؟
مريم: مادري .. خل اروح اشوفها ..
مسكتها ايمان: لأ .. لا تروحين الحين .. خلها تهدى شوي .. الحين هي شكلها معصبه مادري زعلانه .. لو رحتي لها يمكن تسمعج كلام ما يعجبج .. لو ايش ما كان السبب ..
مريم: صح كلامج ايمان .. ماشاءالله عليج .. حسبتيها صح ..
ايمان: حبيبتي انا ايمان ..
مريم: وما قالت ..
ايمان تحذف المخده على مريم: مالت عليج ..
مريم: يا ام كشه عورتيني ..
ايمان: الله عليج يالناعمه .. الا مخده ..
مريم: ضربتيني على خشمي ..
ايمان: مادريت ان خشمج ناعم مثلج ..
مريم: يالكري ..
ايمان: جرحتي احساسي تصدقين ..
مريم: اف منج تحرين ..
ايمان: عادي ما يأثر في نفسيتي .. ااااااااي ..
دخلت ام فارس: يالله على العقل .. شو هالينون انتوا الثنتين ؟
مريم: ماما .. هاي ايمانوا متسببه
ايمان: ماما .. لاتصدقينها هاذي الدلوعه ..
ام فارس: يا علكم العافيه ..
ايمان ومريم: آمين ..
ام فارس: ه ..
ايمان: شفتي خفة دم .. مثل خفة دمي ..
مريم: بنتج هاذي مب صاحيه ..
ايمان: فديتني انا .. العقل كله .. صح ماما ..
ام فارس: ثنتينكم خبال ..
ايمان: انا معاج يا ماما ان مريوم خبله .. لكن بالنسبه عن نفسي اقولج غلطانه ..
ام فارس: احمدك واشكرك يا رب على نعمة العقل .. وين اختكم ؟
مريم: فوق ..
ام فارس: وليش ماتنزل معاكم ؟
ايمان: توها من شوي راحت فوق ..
ام فارس: اي ي ي .. زين ايمانو قولي لي شو مسويه اليوم فالمدرسه ؟
ايمان" بل صادوه ": ما سويت شي ..
مريم تهمس في اذن ايمان: عساج ..
ام فارس: قولي لي شو مسويه ؟
ايمان: ما سويت شي يه ..
ام فارس: المديره اليوم متصله ..
ايمان: شو عندها ؟
ام فارس: تقول انج اليوم رافعه صوتج على المدرسه ..
ايمان " باعترف وامري لله ": شوفي ماما .. خليني اقول كل شي وبعدين اتخذي قرارج ..
ام فارس تنهدت: زين .. سمعينا يلا ..
ايمان: شوفي ماما .. دخلنا الكلاس متأخرين شوي .. وهزأتنا المدرسه .. بس ماما هي قالت كلمه خلتني غصبن عني ارد ..
ام فارس: شو قالت ؟
ايمان: هي زفتنا عشان التأخير .. ما اختلفنا احنا غلطنا .. بس مره وحده قالت انتوا اهلكم ما ربوكم عدل .. لو انكم متربيات كان ما جيتوا متأخرات .. شدعوه ماما ما يسوى علينا تأخرنا .. احنا ما ذبحنا لها حد ولا سبيناها عشان تقول هالكلام .. انا عصبت وقلت لها يا ابله تربية اهلنا مالهم خص في تأخيرنا .. عصبت وقالت لي لا انتي اللي اهلج ما ربوج عدل يا قليلة الادب .. انا ماسكت لها ماما .. قلت لها والله انا متربيه .. لو اني مو متربيه كان سكت على كلامج .. تسبين اهلنا وتقولين عنهم هالكلام .. عاد هي عصبت وقالت طردتني من الكلاس ..
مريم: صج انها ماتستحي ..
ام فارس رافعه حاجب: منو هالمدرسه ؟
ايمان: مدرسة اللغه العربيه ..
ام فارس: ماعندها سالفه تقول هالكلام ..
ايمان: ماما يوم طردتني من الكلاس .. قالت لي ماتدخلين هالكلاس لو جبتي الوزير بكره يا للي ما تربيتي .. والله العظيم هاي كلامها بالضبط .. كانت تستفزني بكلامها .. بس انا سكت عنها ..
ام فارس: مو مشكله انا بوريها الادب .. سمعي بكره روحي المدرسه عادي .. ولا تقولين لاي وحده من البنات شي ..
ايمان: اصلا صديقاتي طلعوا معاي .. لانهم ما رضوا على انفسهم بعد .. وكل وحده امها بتجي بكره ..
ام فارس: انتي بكره داومي عادي ..
ايمان: بس هي بتعطينا كلاس الساعه 7 ونص بكره ..
ام فارس: دخلي الصف ولو طردتج طلعي وانتي ساكته ..
ايمان: ان شاءالله ماما ..
مريم: على ايامنا ما كانوا المدرسات يتجرأون على اهلنا ..
ام فارس: الظاهر انها هي اللي ماتربت .. انا بقول لابوج السالفه ..
ايمان بخوف: لأ ماما اخاف يزفني ..
ام فارس: انتي ما غلطتي .. ويوم انج رديتي عليها دافعتي عن اهلج ..
ايمان بتوتر: زين .. بس لاتقولين له اول ما يرجع .. بعد ما نام قولي له ..
ام فارس مبتسمه: زين يا ماما ..




يتبع ..

التكلمه



فاطمه المسكينه اول ما دخلت غرفتها .. حذفت نفسها على السرير وتمت تصيح بحزن .. كانت دموعها تنزل بغزاره .. وقفت عند المرايه تشوف انعكاس صورتها .. استغربت حزنها والدموع .. حطت يدها على خدها ..
فاطمه " ليش هالدموع .. كل هاي غيره على يوسف .. معقوله اكون حبيت يوسف هالكثر .. بس انا شو اللي يأكد لي حبه لي؟ رسايله مو كفايه .. خايفه من اللي جاي .. ليش هالحزن والخوف اللي فيني .. ليش احس اني وحيده ؟ " .. حطت يدها على قلبها وتمت تصيح .. لاول مره في حياتها تحس انها وحيده في هالعالم .. حست نفسها محتاجه حنان .. محتاجه شخص يضمها ويسمع لها .. غمضت عيونها بتعب .. ونامت بهدوء ..
عبدالعزيز اتصل البيت لانه حس بحزن اخته ..
ايمان: السلام عليكم ..
عبدالعزيز: هلا اختي .. عليكم السلام ..
ايمان: شو فيك عزيز ؟
عبدالعزيز: وين فطيم؟
ايمان: فطوم فوق في غرفتها .. اناديها لك
عبدالعزيز: لا خلاص باتصل لها على الجوال ..
ايمان: اوكي ..
سكر وهو حاس بخوف وحزن .. يوسف كان مع عبدالعزيز فالسياره واستغرب من كلام عبدالعزيز .. تم يحاتي فاطمه وخاف عليها .. اما عبدالعزيز اتصل بتوأمه ..
عبدالعزيز بخوف: فطيم حبيبتي شو فيج ؟
فاطمه غصبن عنها صاحت وماقدرت ترد ..
عبدالعزيز: فطوم شو فيج ؟ منو مزعلج .. ردي علي الله يخليج ..
فاطمه وسط دموعها: عزيز .. تعال ابيك ارجوك تعال ..
عبدالعزيز بخوف: الحين جاي ..
يوسف بخوف: بوسعود انزل انا بسوق ..
عبدالعزيز نزل على طول ويوسف خذ مكان السايق وراح بيت بوفارس .. عبدالعزيز كان متوتر وخايف .. حس انه مو قادر يتنفس .. فتح الدريشه وغمض عيونه .. استنشق الهوا بهدوء .. وصلوا البيت .. وعبدالعزيز على طول نزل البيت ..
عبدالعزيز: بوخليفه .. الله لا يهينك .. انتظرني فالميلس ..
يوسف: لا بروح .. ولي فضيت دق لي بمرك ..
عبدالعزيز: يا ريال انتظرني ..
يوسف: اللي تشوفه .. راح عبدالعزيز داخل .. ويوسف دخل الميلس .. عبدالعزيز دخل من باب المطبخ وبسرعه ركض غرفة فاطمه ..
عبدالعزيز طق الباب: فطيم فتحي الباب ..
فاطمه فتحت الباب واول ما شافت عبدالعزيز ارتمت في احضانه وصاحت بحزن ..
عبدالعزيز حضن اخته ودخل الغرفه: فديتج فطيم .. ليش هالدموع ؟ منو زعلج ؟
فاطمه ما كانت تقدر تتكلم من الصياح .. عبدالعزيز وجاب لها ماي وسقاها ..
عبدالعزيز: شربي الماي فديتج .. طالعيني فطيم ..
فاطمه رفعت راسها: عزيز .. وحضنته بقوه ..
عبدالعزيز: فديتج كلميني يا فطيم ..
فاطمه تمسح دموعها بيدها: عزيز قلبي يعورني ..
عبدالعزيز: سمالله عليج .. اوديج المستشفى ..
فاطمه: لأ .. مادري شو فيني .. حسيت بحزن .. حزن ماله سبب .. حسيت اني وحيده .. عزيز لاتخلوني .. انا احبكم .. انتوا هلي ..
عبدالعزيز خاف على اخته .. واستغرب من الكلام اللي تقوله ..
عبدالعزيز: فطيم انتي حاسه بشي فديتج .. انادي لج امي ولا ابوي ..
فاطمه: ابي بابا .. وصاحت بصوت عالي ..
عبدالعزيز: زين فديتج باتصل فيه الحين ..
فاطمه ماسكه يد اخوها: بس لاتقول لاي حد فالبيت ..
عبدالعزيز: ان شاءالله .. اتصل في ابوه اللي كان مع عمه ..
بوفارس: هلا يبه ..
عبدالعزيز: يبه انت وين ؟
بوفارس: مع عمك ..
عبدالعزيز: يبه تعال البيت ضروري ..
بوفارس عقد حواجبه: ليش شو صاير ؟
عبدالعزيز: مافي شي .. بس تعال ولا تقول لاحد شي لما تجي البيت ..
بوفارس بخوف: شو صاير عندكم يبه ؟
عبدالعزيز: يبه فطيم ..
بوفارس قام من مكانه: شو فيها ؟
عبدالعزيز: يبه تعال .. ماقدر اتكلم تعال الله يخليك ..
بوفارس: خلاص الحين جاي ..
بومحمد: عسى ماشر محمد ؟
بوفارس: لا ولاشي .. بس يبوني فالبيت شوي .. خل اشوف شو فيهم وبكلمك ..
بومحمد: زين .. طمني ..
بوفارس وهو طالع: ان شاءالله ..
طلع بوفارس وهو يفكر في فاطمه .. ماعرف كيف وصل البيت .. اول ما دخل الحوش نزل من السياره وبسرعه راح فوق .. دخل عليهم وشاف منظر فاطمه في احضان اخوها .. قلبه عوره عليها .. لان فاطمه المفضله عنده بوفارس قرب من عبدالعزيز وفاطمه اللي ما سكتت من الصياح ..
بوفارس: شو فيها قلب ابوها ؟
فاطمه ارتمت في احضان ابوها .. ودفنت راسها في صدره الحنون .. وتمت تشهق من الصياح ..
بوفارس: فديت هالصوت انا .. ليش هالدموع يبه .. أشر لعبدالعزيز بعيونه .. عبدالعزيز طلع وهو يشوف اخته بحزن .. بوفارس مسك يد فاطمه وباسها ..
بوفارس: دلوعة ابوها .. ردي عليه .. ليش هالدموع والضيقه يبه .. حد مزعلج .. حد قايل لج شي ..؟
فاطمه: بابا ..
بوفارس: يالبيه ابوي انتي ..
فاطمه: انا .. انا .. انا احبك .. لا تخليني ..
بوفارس زادت دقات قلبه من كلام بنته: انا هني موجود ما خليج فديت قلبج ..
فاطمه: انا احبكم كلكم ..
بوفارس مسك فاطمه من كتوفها: ليش هالكلام يبه ؟ شو فيج حبيبتي ؟
فاطمه والدموع تسبح على خدودها: بابا .. احس اني وحيده .. قلبي يعورني ابيكم كلكم .. لاتخلوني .. اخاف تخلوني بروحي .. لاتخلوني الله يخليكم ..
بوفارس: ليش هالكلام ؟
فاطمه تمسح دموعها: مادري .. فجأه حسيت بالخوف .. وحسيت اني بروحي فهالعالم .. خايفه بابا خايفه ..
بوفارس تنفس بعمق .. حضنها بقوه ومسح على شعرها ..
بوفارس: احنا حولج يبه .. لاتخافين .. وانتي مو بروحج .. انا موجود .. وامج واخوانج وخواتج .. كلنا هني ..
فاطمه: لا تخليني بروحي .. خايفه ..
بوفارس رافع حاجب: يبه فطيم .. انتي شايفه شي وخايفه منه ؟
فاطمه: لأ بابا ..
بوفارس: عيل ليش كل هالحزن في صوتج ودموعج بابا ..
فاطمه: مادري بابا ..
بوفارس قعد مع بنته وتم حاضنها .. يهديها ويكلمها ويطمنها .. غفت عيون فاطمه في احضان ابوها .. حست بشوية طمأنينه .. بس ما عرفت ليش حست بهالحزن والوحده .. اما بوفارس تضايف من كلام بنته وخاف عليها
بوفارس" سمالله على فطيم .. شو اللي في بالها .. ليش هالخوف اللي شفته فعيونها .. ليش الحزن ؟ " ..
يوسف فالميلس كان وده يطلع من الميلس ويروح عند فاطمه من كثر خوفه عليها ..
يوسف " شفيها حبيبة قلبي ؟ فديتها والله .. آخ بس لو اقدر اشوفها ولا اعرف شي .. ايه عليها " ..
دخل عبدالعزيز الميلس والحزن باين على وي ..
يوسف: عسى ماشر بوسعود ؟ ان شاءالله الاهل كلهم بخير ..
عبدالعزيز قعد على الكرسي بتعب: ان شاءالله ما عليهم شر ..
يوسف: اقدر اساعد بشي ..؟
عبدالعزيز رفع راسه مبتسم: ماتقصر .. زين قوم نطلع شو رايك ؟
يوسف تم يطالع عبدالعزيز كأنه يشوف فاطمه ..
يوسف " ايه عليج يا فطيم ": ولايهمك .. قوم ولاتضايق نفسك ..
عبدالعزيز: عندي لك شور ..
يوسف: تفضل الغالي ..
عبدالعزيز: شو رايك نتصل بفضول وعلوه .. ونروح ساحة الاستعراض ..
يوسف: وين نروح الحين .. الشمس غابت .. خلها بعد ما نخلص من شغل خالي ..
عبدالعزيز: حلو .. ولا شو رايك نستعرض هناك ..
يوسف: لا يبه المنطقه جديده وما نعرفها عدل .. ومافيها حد اصلا .. نسيبي يقول انها مسكونه ..
عبدالعزيز: ليش لأ .. مغامره ..
يوسف: انت مب صاحي ..
عبدالعزيز: ه .. نشوف الشباب ..
يوسف: زين لين ذاك اليوم يصير خير .. زين انا بقولك شرايك نروح السينما ..
عبدالعزيز: اي والله فكره .. زين انا باتصل حق الشباب وانت اتصل شوف الافلام المعروضه ..
يوسف: صار .. اتصل يوسف السينما وحجز لهم تذاكر .. اما عبدالعزيز اتصل فالشباب ..
رتبوا الشباب وتلاقوا الساعه 8 ونص .. دخلوا الفلم .. والشباب اللي راحوا علي وفاضل وعبدالعزيز ويوسف ..





يتبع ..
__________________

التكمله





قعدوا في اماكنهم وقبل بداية الفلم كانوا يسولفون ..
يوسف: ما قلت لكم شباب شصار لي اليوم ؟
علي باهتمام: شو صار ؟
يوسف: تذكرون البنت اللي كانت فالمطعم ..
فاضل: اي ي ي .. شو فيها .. ها ضبطها ..
علي: اسكت خل نسمع .. كمل
يوسف: اليوم وانا رايح الشغل شفتها بالشارع والحقتني ..
عبدالعزيز مبطل عيونه: ها ..
يوسف: اي .. هي تسوق وتخيل لحقتني لي مكان الشغل .. استغربت منها ..
علي: وايد جريئه .. بس تحمل منها يا يوسف ..
يوسف باستغراب: ليش ؟
علي: لو حاولت انها توصلك باي طريقه صدها .. تحمل تطلع وحده مريضه نفسيا ولا شي ..
فاضل: يا ريال شو هالكلام .. فلم امريكي .. بوخليفه ما عليك الا انك تحولها علي ..
عبدالعزيز: والله انك مو صاحي .. كلام علوه عدل .. بكره تضر الولد ولا تسوي له شي..
يوسف: اعوذ بالله .. الله يستر بس ..
علي: زين الفلم بدا .. سكتوا ونكمل محور حديثنا بعدين ..
فاضل: احلى يا محور حديثنا ..
الشباب: ه ..
في القهوه الشباب متجمعين كعادتهم ..
فارس: ها سلمان .. جهزت كل شي ..
سلمان: اي كل شي جاهز ..
محمد وهو يحط كوب الشاي على الطاوله: عيل الساعه بنحرك ؟
سلمان: نبي نصلي الفجر ونحرك ..
فارس: مو جنه من وقت ..
سلمان: احسن لان المنطقه وايد بعيده ..
فارس: زين ولا يهمك ..
سلمان: ما تقصرون والله ..
محمد بصوت واطي: زين سلمان .. الدناميت من وين جبته ؟ واكيد تعرف تستخدمه ؟
سلمان مبتسم: اي اعرف استخدمه .. وشفت صاحبي اللي جى من امريكا من فتره ؟
محمد: اي .. سميث
سلمان: هاذي هو .. هو مهربه لي من هناك ..
فارس ومحمد طالعوا بعض و رفعوا حاجب ..
محمد: شلون هربه ؟
سلمان: ه .. مطرشه بالشحن البحري .. واستلمه اول ما وصل البلاد ..
فارس: وين حطه و شلون ؟
سلمان مبتسم: هو عنده شركه شحن .. عنده اسطول كبير .. خشه في الاسطول وهربه .. سهله ..
محمد: والله شي ..
فارس: حلو لما الواحد يكون عنده معارف جي ..
سلمان: بس الدناميت اللي جابه وايد قوي .. فلازم احسب الكميه اللي باستخدمها .. ولا بننكشف لو استخدمنا كميه كبيره ..
فارس: زين شلون تعرف الكميه المطلوبه ؟
سلمان: هو ما جاب الديناميت بروحه .. جايب معاه اداوات عشان القياس ..
محمد: ترتيب يعني ..
سلمان: لازم .. بس هالكلام بيني وبينكم .. باقي الشباب مابيهم يعرفون ..
محمد: ليش ؟
سلمان: توهم شباب .. وخايف عليهم يتكلمون لو بحسن نيه .. او انهم يحاولون يجربنه في يوم .. اذا يوسف ولد اختي يبي يعرف من وين جبت الدناميت وما قلت له ..
فارس: عدل كلامك ..
محمد: زين وكم حجم الحفره ؟
سلمان: ابي حفره عميقه .. قد ما نقدر نحفر حفره عميقه .. ما يهمني حجمها قد ما يهمني عمقها ..
محمد: ليش ؟
سلمان: عشان ما ننكشف .. كل ما كانت في عمق الارض .. كان الصوت والاضرار اخف ..
محمد: اها .. والله عشت حياه خشنه في امريكا ..
سلمان تنهد: آآه .. اي والله انها خشنه .. الحمدلله على كل حال ..
فارس رن جواله .. و كانت الرنه ( عالي مستواه ) .. ابتسم وقام من الطاوله ..
سلمان: غرقان ..
محمدابتسم: حده ..
سلمان ومحمد: ه
فارس: هلا وغلا ..
مناف: هلا حبيبي ..
فارس: فديت هالصوت انا ..
مناف: شخبارك ؟
فارس: الحمدلله .. انتي شو مسويه ؟
مناف: الحمدلله طيبه .. انت وين ؟
فارس: فالشيشه والله
مناف: فديت قلبك ..
فارس: حياتي ..
مناف: عيونها ..
فارس: فديت عيونها انا .. قولي لي .. شو اللي مضايقج اليوم الظهر ؟
مناف " ابيه شاقوله الحين ": ما فيني شي حبيبي لا تحاتي ..
فارس: لا تقولين ما فيني شي .. صوتج وصياحج ما كان يقول ان مافيج شي .. حد زعلج ؟ متهاوشه مع حد ؟؟
مناف: لا والله حبيبي .. انسى فديتك .. مافيني شي ..
فارس: من الحين بتخشين علي حياتي ..
مناف " شاقوله الحين ": حبيبي ماخش عليك .. بس
يقاطعها فارس: بس شو ؟
مناف "سامحني باكذب عليك": بس .. اليوم الدكتور عطانا النتايج ورسبت فالماده ..
فارس ببرأه: زعلتي عشان رسبتي فالماده .. فديت دموعج يا قلبي .. عوضيها .. بس لا تتكدرين ..
مناف: ان شاءالله حبيبي ..
فارس: ما كان له داعي هالصياح .. خوفتيني عليج .. انا قلت حد مسوي فيج شي ..
مناف: حبيبي .. انت تعرف اني لما اتضايق ماحب اكلم حد الا انت ..
فارس مبتسم: فديتيج يا قلبه انتي .. وانا حاضر لج يا حياتي ..
مناف: الله يخليك لي ..
فارس: آمين .. زين حبيبي تامريني على شي ..
مناف بدلع: وين بتروح ؟
فارس " اموت فالدلع انا ": حياتي بروح عند الشباب ..
مناف: لازم يعني ..
فارس رفع حاجب وهو مبتسم: لأ .. مو لازم .. بس خلج معاي عالخط دقيقيه ..
مناف ابتسمت بفرح: زين ..
راح فارس عند الشباب .. كان ماسك التلفون ويكلمهم ..
فارس: انا استأذن يا شباب ..
سلمان يطالع ساعته: وين ؟ بدري يا ريال ..
فارس: عندي شوية شغل ..
محد: لحظه لحظه .. وانا من بيوصلني البيت يالشيخ .. انا جاي معاك
فارس التفت على سلمان: بو خليفه مو مقصر ..
سلمان يهمس لمحمد: خله عايش جوه .. انا بوصلك ..
محمد: حلوه منك ..
فارس: شو قلتوا ؟
محمد: خلك مع شغلك ..
سلمان: الله يحفظك ..
فارس: ه .. مو مشكله .. يلا سلام ..
سلمان ومحمد: الله وياك ..
الشباب تموا فالشيشه .. اما فارس ركب السياره وتم يدور فالشوارع وهو يكلم مناف .. يسمع منها ويسمعها احلى كلام الحب ..




دمتم بخير ..
__________________

[size=1][size=4]

حوووووووور ليش هالنذاله كمليها بسرعه
يلا عاد لا تعطليني
ابي اخلص منها هالاسبوع
لان عندنا زواج ومارح ادخل الا بعد سبوع
تكفي حوراء لاترديني طلبتك
خلصيها الليله اذا تقدري
بليييييييييز
مشكوره عنوني
وتسلمي بعد قلبي

التكمله
ـــــــــــــــــــــــــــ
اليوم هو يوم الخميس .. خالد ومريم جدام رب العالمين وجدام الناس بيعلنونهم زوج زوجه ان شاءالله ..
خالد واقف يناظر نفسه فالمرايه ..
خالد مبتسم " فديت هالويه يا خلود .. والله وصرت معرس .. واخيرا بتنفس من انفاسج يا مريم .. فديت قلبج يا حب حياتي .. الله يقدرني واسعدج يا بنت العم " .. عدل الغتره وتطيب من دهن العود .. شاف نفسه اخر مره فالمرايه وابتسم ابتسامته العذبه .. نزل وسلم على امه وابوه اللي كانوا قاعدين تحت ..
خالد: السلام عليكم يا اغلى ام وابو ..
بومحمد مبتسم: هلا وغلا .. وعليكم السلام ..
ام محمد: عليكم السلام .. يسعد لي صباحك يا قلب امك انته ..
خالد قعد مواجهم: الغاليه شاي من ايدينج الحلوات ..
ام محمد: ان شاءالله الغالي ..
بومحمد: خالد ..
خالد مبتسم: سم الغالي ..
بومحمد: سم الله عدوينك .. مستعد للحدث الكبير ؟ ما بقى وقت .. خلال ساعتين بتكون مريم في ذمتك .. حلالك
خالد " والله ودي يمرون بسرعه": اي خلاص بدى العد التنازلي ..
بومحمد مبتسم: اخوانك وين ؟
خالد: نازلين ..
دخلت ام محمد وحطت كوب الشاي جدام ولدها ..
ام محمد: تفضل يبه ..
خالد: دام فضلج الغاليه ..
دخل عليهم علي: السلام عليكم ..
الكل: عليكم السلام ..
باس راس امه وابوه وقعد جنب اخوه ..
علي: يبه ..
بومحمد: يا لبيه ..
علي: صج اللي سمعته ؟
بومحمد مستغرب: شو اللي سمعته ؟
علي: ان خالد متخرع وما نام من امس ..
بومحمد وام محمد طالعوا بعض: ه
خالد التفت على اخوه: علوه .. والله اني محضر لك بلاوي لي جيت تعرس .. عشان جي انا باسكت عنك ..
بومحمد: شو محضر له .. ه
خالد عصب: معليه يا علوه ..
ام محمد تمت تكح من كثر الضحك ..
ام محمد: كح كح كح .. آآه يا علي .. عليك سوالف .. كح كح كح
بومحمد: قم جيب ماي لامك بسرعه .. ه
علي: ان شاءالله ..
خالد يطالعهم وهو معصب " اوريك يا علوه .. ان ما مسخرت فيك .. اصبر علي .. مستقوي علي الحين وتقطعني وانا ساكت لك .. لكن مردك بتنحط بالموقف اللي انا فيه " ..
رجع علي ومعاه كوب الماي: شربي يمه ..
شربت ام محمد: واي يا قلبي .. يا علك العافيه يا علوه جي تسوي فينا ..
بومحمد: والله انك هيس ومو هين يا علوه ..
دخل عليهم محمد: شو فيك ؟
بومحمد: تعال ليفوتك ..
خالد يقاطعه: قطعوني يا حمود ..
محمد مبتسم: ليش ؟
خالد: ما تعرف الرزيل علوه ..
محمد: عندك اياه علوه .. زين سويت فيه ..
خالد مبطل عيونه: حتى انت يا حمود ..
محمد: نسيت ولا اذكرك ؟
خالد رفع حاجب وبعدين ضحك: آآه .. صج الدنيا دواره .. الله سلط علي علوه هالخبل ..
بومحمد: شو ؟
محمد: خلود سوا فيني نفس الشي يوم بملج بساره .. قطعني عند عيال عمي ..
بومحمد: عساك يا خالد ..
خالد: بسكم سوالف .. يلا قوموا نروح ..
بومحمد التفت على علي: وايد مستعيل الولد ..
علي: شوف عيونه حمر من السهر ..
ام محمد ماتت من الضحك: خلاص يا علي ذبحتني ..
محمد يطالع خالد: .. انا لو منك يا خلود ادفن راسي بالارض مثل النعامه ..
خالد واقف عند الباب: معليه .. مستانسين قطعتوني ..
علي: تعيش وتاكل غيرها ..
خالد ضحك: .. زين زين يا علوه ..
بومحمد: احم .. يلا يا جماعه جاهزين .. نمشي ؟
محمد: لا وين نمشي .. ما شربت شاي ..
ام محمد قامت من مكانها: الحين باحطه لك في كوب الشغل اخذه معاك ..
محمد: جزاج الله خير الغاليه ..
علي: وانا بعد يمه ابي .
ام محمد وهي رايحه المطبخ: ان شاءالله ..
بومحمد: خالد يبه تعال اقعد ليش واقف عند الباب ..؟ المحكمه مب طايره ..
الكل: ه ..
خالد: حتى انت معاهم يبه ..
محمد: .. ما درا عنك فروس ..
خالد: لا والله ..
علي كان يصور خالد بالجوال وهو معصب ..
دخلت ام محمد ومعاها كوبين واحد لمحمد و واحد لعلي .. سلم خالد على امه ..
خالد يبوس راس امه: رضاج وبركاتج الغاليه ..
ام محمد تمسح دموعها: الله يبارك لكم .. و مريم احسن البنات .. الله يوفقكم ان شاءالله ..
خالد مسح دموع امه: الله يخليج لنا يا ام محمد .. والفال حق الباقي ..
ام محمد: آمين .. الله ايسر امورك يا رب ..
الكل: آمين ..
طلعوا وام محمد تمت تراقبهم وهي تصيح .. كانت دموعها دموع الفرح .. وقفت نفس الوقفه ونفس المكان من 4 سنين .. لما محمد كان رايح المحكمه يملج بساره .. تذكرت ذيك الايام ومسحت دموعها بفرح تمت تدعي لهم وكانت تنتظر رجعتهم ..
في بيت بوفارس مريم فتحت عيونها بفرح .. وبشيء من التوتر .. قامت من السرير وخذت لها شور دافي يهدي الاعصاب .. صلت ركعتين تمت تدعي فهم بالتوفيق والحياه السعيده مع خالد .. لبست ونزلت عند امها ..
مريم بابتسامة دلع: ماما حبيبتي .. وباستها على خدها .. وحضنتها بقوه ..
ام فارس: هلا وغلا .. فديت مرايم انا .. وحضنت مريم بحنان ..
مريم: شحالج ماما ؟
ام فارس بتسمه: تسأليني انا .. انتي اللي شو اخبارج ؟
مريم نزلت راسها: ماما عااد ..
ام فارس: ه .. الله يكملج بعقلج و يوفقج يالغاليه ..
مريم: آمين ..
دخل عليهم بوفارس وهو مبتسم: فديت عروستنا .. شحالج بابا ..
مريم قامت تسلم على ابوها: هلا بابا .. شو اخبارك ؟
بوفارس رفع راسها: فديت الخجل انا .. انا طيب فديت قلبج ..
مريم قعدت جنب ابوها ..
بوفارس: الغاليه .. شحالج اليوم ..
ام فارس: مستانسه والله ..
بوفارس الله يتمم على خير .. مريم روحي شوفي اخوانج قعدوا ولا للحين ؟
مريم: ان شاءالله بابا ..
بوفارس: فديت قلبها .. الله يوفقها مع خالد ..
ام فارس: خالد ريال وينشد فيه الظهر .. تربية حمد ..
بوفارس: صدقتي .. تربية حمد ..
ام فارس مبتسمه: وانت عيالك ريايل وما عليهم زود ..
بوفارس: الله يحفظهم كلهم ..
دخل فارس و راه عبدالعزيز ماسك يد مريم ..
فارس يبوس راس امه: شحالج الغاليه ..
ام فارس صاده عنه: الحمدلله ..
سلم على ابوه: شحالك يبه ؟
بوفارس: حيالله فارس .. بوفارس يعوض فارس نقص المشاعر والحنان من ام فارس ..
عبدالعزيز يبوس راس امه: فديت ام فارس انا ..
ام فارس مبتسمه: هلا وغلا بعزيز .. هلا فديت قلبك .. شحالك يبه ؟
عبدالعزيز: طيب الله يسلمج ..
ام فارس: فديت قلبك .. خل اقوم اجيب لكم السفره عشان تاكلون لكم لقمه قبل ما تروحون ..
مريم قاعده جنب عبدالعزيز: حيالله عروستنا ..
مريم مبتسمه بخجل: فديت قلبك عزيز ..
فارس مبتسم: مرايم .. فديت الخجل انا ..
مريم: عاد فارس ..
فارس: واااي على الدلع .. بتذبحين خلود بدلعج انتي ..
مريم " اصلا هو ميت": ..................
عبدالعزيز: فديت الخجل ..
بوفارس: بسكم .. احرجتوا البنيه .. يبه روحي شوفي اختج خلصت ولا للحين ؟..
مريم ان شاءالله ..
دخلت ام فارس وحطت الصينيه على الارض .. نزلوا كلهم يتريقون .. تموا يسولفون ويضحكون الا فارس ..
فارس قايم من السفره: الحمدلله ..
بوفارس: وين يبه .. ما كلت شي ؟
فارس: الحمدلله شبعت ..
بوفارس " الله يهديج يا مزنه .. الولد صار ما يشتهي يقعد معانا " ..
فارس راح غرفته لبس وتكشخ ونزل لهم ..
بوفارس يطالع فارس باعجاب: اخاف انت المعرس وانا مادري ؟
فارس ابتسم لابوه: فديت قلبك الغالي ..
عبدالعزيز: حلاه عليك يا بومحمد .. معرس ..
فارس: لو سمحت انا بونايف ..
ام فارس التفت عليه: وليش بونايف يعني ..
فارس ابتسم: يعز علي هالاسم ..
بوفارس: ولا يهمك يا بونايف .. حاضرين لك .. دخلت فاطمه وهي مبتسمه لابوها ..
فاطمه: السلام عليكم ..
الكل: عليكم السلام ..
بوفارس: هلا وغلا بحياة وقلب ابوها .. تعالي اشم ريحتج يالغاليه ..
فاطمه قربت من ابوها: شحالك الغالي ..
بوفارس: بشوفتج صرت بخير ..
فاطمه: فديت قلبك بابا .. راحت عند امها وباست راسها ..
بوفارس: يلا مشينا يا شباب ..
عبدالعزيز: قدام ..
فارس: .. ليكون انت اللي بتعرس .. طالع اول واحد فينا ..
عبدالعزي يتمسخر: كنت بعرس ..
بوفارس: يلا عن الهذره الزايده ..
طلعوا و راحوا المحكمه .. كلهم ركبوا سيارة فارس ( الرنج الاسود )




يتبع ..
__________________

التكمله




فارس اتصل بمحمد ولد عمه وحطه على السبيكر ..
محمد: فروس حبيبي ..
بومحمد التفت على فارس ..
فارس: هلا بونايف .. شحالك ؟
محمد: يه يه يه .. شعنده المؤدب ..
فارس يصطنع الابتسامه: انتوا وين الحين ؟
محمد: وحشتني يا قلبي ..
بوفارس: محمد .. شو هالكلام ؟
محمد: اوبس .. عمي ..
بوفارس: وجع .. شوهالمياعه ..
محمد: شحالك عمي ..
بوفارس: اي جي اصطلب .. انتوا وين ؟
محمد: احنا قريب المحكمه ؟ انتوا وين ؟
بوفارس: تونا طالعين من البيت ..
محمد: عيل ننتظركم احنا .. يلا سلام .. وسكر على طول ..
طبعا عبدالعزيز ومريم وفاطمه كانوا ميتين من الضحك على محمد ..
بوفارس: شو فيه يتميع فالكلام ذي .. استخف على كبر .. فارس طبعا ما علق .. تحسف انه حط التلفون على السبيكر .. ماتوقع ان محمد يخربط بالرغم ان فارس لمح له انه مو قادر يتكلم ..
محمد: قطيعه .. صاددني عمي .. الله يغربلك يا فروس ..
علي: شو فيك ؟
محمد: سمعتني شلون اتكلم اول ما رن التلفون ؟
علي: اي .. كنت تستعبط ..
محمد: وبعدين ما تغير كلامي مره وحده ؟
علي: بلا
محمد: فروس حاطني على السبيكر وعمي معاه فالسياره ..
علي ضحك بصوت عالي: كاااااااااااااااااك .. شو هالحاله .. خلود من شوي والحين انت .. اااااااااي ..
محمد: الله يغربل فروس ..
علي: شلون بتجابل عمي الحين ؟
محمد: اسكت هاي اللي احاتيه الحين .. بس مردوده يا فروس ..
علي: حالتكم صعبه ..
وصلوا المحكمه ومحمد كان متوتر .. شلون بيجابل عمه من بعد الحركه اللي صارت ..
محمد " زين انا كنت استعبط .. اكيد عمي بيفهم هالشي .. لأ يمكن على باله اتكلم جد .. الله يغربلك يا فروس "
دخلوا وقعدوا في انتظار الرجال ..
بومحمد: محمد يبه كلمت بيت عمك ؟
محمد: اي يبه .. جاين ..
بومحمد: اتصل شوفهم وين؟ تأخروا ..
محمد بصوت واطي: بعد انا اتصل ..
بومحمد: ها يبه .. شو تقول ؟
محمد: ولا شي الغالي .. ان شاءالله بتصل ..
علي يهمس في اذن خالد: فاتك اللي صار ..
خالد قرب من علي: شو صار ؟
علي قال لخالد موقف محمد مع عمهم بوفارس .. اما خالد مات من الضحك ..
خالد: .. الله يغربلك يا حمود ..
محمد انهى المكامله والتفت على خالد اللي كان ميت من الضحك ..
محمد: تضحك ها .. قالك علوه ..
خالد: روعه الحركه ..
بومحمد: ها يا محمد .. وينهم ..
محمد: وصلوا خلاص .. الحين بينزلون ..
دخلوا المحكمه ومريم زاد توترها ..
مريم: فطيم .. مسكيني ماشوف عدل ..
فاطمه مبتسمه: هاتي يدج .. مريم فديت قلبج .. تجننين وانتي متوتره ..
مريم: فديت قلبج يا فطيم .. الفال لج .. وان شاءالله اجيبج المحكمه وتكونين متوتره جي بعد ..
فاطمه: ه .. اشوف تنكتين بعد .. رفعت راسها وشافت محمد يطالعها وهو مبتسم .. نزلت راسها بخجل ودخلت مع اختها انتظار النساء ..
الشباب سلموا على بعض .. دخلت مريم عند الشيخ وخلصوا الاجراءات القانونيه .. وتم الزواج ..
خالد سلم على عمه وهو فرحان ..
بوفارس: مبروك يا خالد .. وما وصيك على مريم ..
خالد: الله يبارك فيك يا عمي .. ومريم بحطها بعيوني . والله يقدرني واسعدها ..
بوفارس: بارك الله فيك ..
بومحمد: مبروك بوفارس .. الله يهنيهم ..
بوفارس: الله يبارك فيك ويسمع منك ..
مريم كانت واقفه جنب عبدالعزيز ومنزله راسها .. قرب منها خالد ..
خالد: مبروك مريم ..
مريم ماسكه عبدالعزيز: الله يبارك فيك ..
عبدالعزيز: تستاهل بوليد ..
خالد: الفال لك ..
فارس: مبروك يارجل .. ودخلت القفص ..
خالد مبتسم: الله يبارك فيك .. عقبال ما نفرح فيك الغالي ..
محمد: وانا ما تبون تفرحون فيني بعد ..
خالد: عن الانانيه ..
محمد حضن اخوه: مبروك يا خالد .. الله يهنيكم ..
خالد: وياك فديتك ..
علي: صباحيه مباركه يا عريس .. مبروك حبيبي ..
خالد: .. ما تخلي عنك هالحركات .. عقبال ما نجيبك المحكمه ياعلوه ..
بومحمد وعلي ومحمد: ه
راحت مريم انتظار النساء وارتمت في احضان اختها .. بللت شيلة فاطمه بدموعها ..
فاطمه: واااي فديت اختي انا .. مبروك يا مرايم .. تستاهلين .. الله يوفقكم ..
مريم وسط دموعها: الله يبارك فيج حبيبتي .. وان شاءالله نفرح فيج ..
طلعوا الخوات من انتظار النساء ومحمد كان يطالع فاطمه بشوق .. فاطمه كانت تتصد .. ما تبي عيونها تتلاقى بعيون محمد .. اما محمد قرب من فاطمه ..
محمد: شحالج بنت العم ؟
فاطمه منزله راسها: الحمدلله طيبه ..
محمد: اخبار يدج ؟ ان شاءالله احسن الحين ؟
فاطمه " ما نسى يدي مع انها خفت": الحمدلله احسن .. رحت المستشفى و شلوا لي الخيط ..
محمد: الحمدلله ..
قرب منهم فارس: حيالله محمد ولد عمي ..
محمد: الله لا يحيك ..
فارس: .. ليش ؟
محمد: تضحك وتسألني ليش ؟
فارس: .. ياخي انت ما تفهم .. ناديتك بونايف .. وما فهمت ..
محمد: شدراني انا ..
فارس: انا اقول شو فيه الولد متنح .. ما يفهم شو سالفته ..
محمد: يجي لك يوم ..
فارس: تكبر وتنسى ..
محمد: مو مشكله .. زين تجي معاي ؟
فارس: لا .. بروح اوصل الاهل البيت ..
محمد: يا ويلي .. كلهم كانوا معاك بالسياره ؟
فارس: اي .. جينا بسياره وحده ..
محمد: الله لا يبارك بالساعه اللي اتصلت فيها يا فروس .. " اكيد فاطمه سمعتني " ..
فارس: ه ..
محمد: خلاص انا بري منك لين يوم الدين .. ماعرفك ..
بوفارس: يعني لي متى بتهذرون انتوا الثنين ؟
محمد انتفض: احم .. هلا عمي ..
بوفارس يطالع محمد ورافع حاجب: هلا والله بونايف ..
محمد راح عند ابوه من الاحراج ..
بوفارس: يلا يبه نروح ..
فارس ماسك الضحكه: ان شاءالله ..
طلعوا من المحكمه وهم فرحانين .. خالد فرحان باهم حدث في حياته .. محمد فرحان بشوفة فاطمه .. اما الباقي فرحوا حق مريم وخالد .. اتصل محمد يبشر امه .. وام محمد على طول اتصلت بام فارس تبارك لها .. الفرحه عمت بيت بوفارس وبيت بومحمد ..
دخل خالد البيت وكانت ام محمد في استقباله ..
ام محمد: هلا وغلا بخالد .. مبروك فديت قلبك .. الله يوفقك ويرضى عليك يا يبه ..
خالد باس راسها: الله يبارك فيج الغاليه .. اهم شي رضاج علينا ..
ام محمد: راضه عليك دنيا واخره ..
خالد تنفس براحه .. وسلم على الباقي .. الريم وفاضل وسلطان وساره مرت محمد ..
في بيت بوفارس .. ام فارس كانت فالحوش نتنظر وعلى اعصابها .. اول مادخلوا ركضت عند السياره وخذت مريم بالاحضان ..
ام فارس: فديت بنتي والله .. تستاهلين يا قلبي ..
مريم: ماما .. وصاحت متأثره بالموقف ..
فارس مبتسم: يه .. مرايم شو هالدموع ..
ام فارس تمسح دموع مريم: هاي دموع الفرح ..
فارس باس مريم على راسها: مبروك يا اختي الغاليه .. وعقبال ما نفرح بفاطمه ..
ام فارس: وفيك ..
فارس مبتسم: وفيني ولا يهمج يا ام فارس .. وباس راسها ..
ام فارس حضنته بشوق: فديت قلبك يا فارس .. فرح قلبي يا يبه ..
فارس: عطيني وقت و اوعدج اني بنفسي بجي وبقولج يمه ابي اتزوج ..
ام فارس: ان شاءالله ..
بوفارس كان يشوف ام فارس وفارس بحنان " الله يرضى عليكم ولا يفرق بينكم " ..
طلعت ايمان تركض بكشتها فالحوش وتصرخ .. الكل التفت عليها بخوف واستغراب ..
ايمان: واااااااااااااي .. مبروك مريوم ..
فارس: وجع .. طيرتي قلوبنا يالهبله ..
الكل: ه
طبت على مريم وحضنتها: مبروك مرايم .. تستاهلين الله يوفقج مع خالد ..
مريم حضنتها: الله يبارك فيج حياتي .. الفال لج انتي وفطيم ..
فارس لما سمع اسم فاطمه التفت عليها .. قرب منها وحط يده على كتفها .. فاطمه التفتت عليه مبتسمه ..
فارس: تعالي ابيج شوي ..
فاطمه مشت مع فارس: ان شاءالله
راحوا صوب الحديقه .. قعدوا على الكرسي فارس قعد ومسك يد فاطمه .. قرب يدها من خشمه وتم يستنشقها .. فاطمه استغربت ..
فارس: شو هالريحه الحلوه ..
فاطمه سحبت يدها: اي ريحه ؟
فارس: ليش ارتبكتي ؟
فاطمه: نعم!! شفيك فارس ؟
فارس: تذكرين يوم كنا في غرفة عزيز ذيك الليله ؟
فاطمه ويها صار احمر: اي
فارس: ليش لما مريم قالت لج نفس الكلام اللي قلته ارتبكتي وغيرتي الموضوع ..؟
فاطمه: ما غيرت الموضوع رديت عليها ..
فارس: اذكر .. وقلتي لها هاي ريحة الغرفه ..
فاطمه: اي ..
فارس: بس انا يوم دخلت غرفة عزيز ما كنت في ريحه مميزه .. نفس الريحه اللي مريم شمتها في يدج ؟!!؟
فاطمه: فارس .. شو تبي انت من ورا هالكلام ؟
فارس: في شي انتي خاشته علي ؟
فاطمه: لا مافي شي ؟
فارس: فطيم .. انا اخوج ولا تخشين علي ..
فاطمه: مافي شي .. قامت من مكانها وهي تصيح ..
مسكها فارس: رجعي .. ليش هالدموع ..
فاطمه دزته وراحت تركض وهي تصيح .. فارس استغرب منها ..
فارس " شو وراها فطيم ؟ وليش تصرفت جي ؟ انا ما قلت شي يزعل .. هاي اسلوبي وهي تعرفه .. والله انها غريبه !!" ..
فاطمه راحت غرفتها وسكرت الباب عليها وتمت تصيح .. حذفت نفسها على السرير وتمت تصيح بخوف وقلق .. راسها عورها ونامت من التعب ..
فارس حس بالذنب .. هو ما كان شاك في اخته .. بس مستغرب شرودها وارتباكها .. في الفتره الاخيره .. تم يفكر في اخته .. خايف عليها ويبي يعرف شو اللي مضايقها ..
فارس" فطيم صايره وايد حساسه هالايام .. دوم شارده واحسها في عالم ثاني ؟ لازم اعرف شو فيها اختي .. فديت قلبها فطيم " ..
دخل الجد مع هيا والجده .. والجد اول ما شاف عبدالعزيز لحقه وضربه بالخيزران ..
الجد: اسود الويه ..
عبدالعزيز: آآآآي .. ليش يدي ؟
الجد: تعرف ليش ..
عبدالعزيز: اليوم الضرب ممنوع ..
الجد متعجب: ليش ؟
عبدالعزيز: عشان خالد ملج بمريم ..
الكل: ه
الجد: لا والله .. تستخف دمك ..
الجده: بسك لتهت الولد ..
عبدالعزيز: آآي يدتي ذبحني .. شوفي شلون ضهري معلم من خيزرانته ..
الجده تمسح على ظهر عبدالعزيز: سمالله عليك يبه .. بس محد قالك تروح مع يدك ..
الجد: عزوز تعال ابيك ..
عبدالعزيز: ان شاءالله .. وقام ورا يده ..
الجده: وبعدين قول ظهري علم من خيزرانته ..
هيا: ما يتوب ولد ولدج ..
دخلت ام فارس مرحبه بهيا والجده: هلا وغلا .. نور البيت ..
هيا مبتسمه: مبروكين ويستاهلون ..
ام فارس: الله يبارك فيج حبيبتي ..
الجده: تستاهلون يا مزنه .. الله يكبر حظها ..
ام فارس تبوس راس عمتها: الله يسلمج يمه ..
بوفارس: وين البنات يا مزنه ؟
ام فارس: فوق .. بروح اناديهم ..
بوفارس: بارك الله فيج ..




يتبع ..
__________________