{ نهاية حبك إعدامي } ...(قصة مميزة.. الإدارة)

فاطمه بخوف: ابيه هاي عزيز اخوي .. شو صاير ..


يوسف: ردي عليه .. ان شاءالله مافي شي ..


فاطمه: ان شاءالله ..


ردت فاطمه بخوف: هلا عزيز شو فيكم ؟


عبدالعزيز: وين يوسف ؟


فاطمه عقدت حواجبها: هني شو تبي فيه ؟


عبدالعزيز: عطيه السماعه شوي ..


فاطمه باستغراب: ان شاءالله ..


مدت يدها ليوسف: عزيز يبيك ..


يوسف: يبيني ؟


فاطمه: اي ..


يوسف خذ التلفون: هلا بوسعود ..


عبدالعزيز كان حاط يوسف على السبيكر ..


الشباب كلهم: ها وريتها القرعه ..


وماتوا من الضحك .. يوسف سكت وماحب يبين لفاطمه شي .. كان يطالعها ومبتسم ..


يوسف: لا للحين ..


علي: .. والله راحت عليك ..


يوسف: مشكورين ..


فاضل: اهم شي اللي يرد ولا كأن السالفه له ..


يوسف: زين بكلمك بعدين ..


عبدالعزيز: ابوك يالتصريفه ..


الشباب: هاااااااااي ..


عبدالعزيز: الف مبروك اخوي الغالي بوخليفه ..


الشباب بصراخ وعبط: مبروك مبروك .. واااااو ..


يوسف يصطنع الابتسامه: الله يبارك فيكم ..


عبدالعزيز: سلام يا حبيبي ..


يوسف: الله وياك .. " لكن حسابك بعدين "


سكر يوسف وكان متوتر ..


فاطمه: شو فيكم ؟


يوسف: ولا شي .. يسلمون علي بعض الشباب اللي ماقدروا يحضرون العرس ..


فاطمه: اهاا ..


تموا ساكتين فتره وفاطمه خف توترها لما بدى يوسف يسولف لها ..


فاطمه: ليش لابس القحفيه ؟


يوسف " ها .. وصلنا عند نقطه حساسه " ..


يوسف: لا عادي .. خل اقوم اوطي على الاضاءه شوي ..


قام و وطى اضاءة الغرفه .. فاطمه استغربت .. قعد جنبها يوسف وتم يلعب باصابعها ويسولف معاها .. ماقدر يتحمل اكثر ..


يوسف: فطومتي ..


فاطمه مبتسمه: هلا ..


يوسف: انتي تحبيني ؟


فاطمه نزلت راسها: اي احبك ..


يوسف: زين يعني بتتقبلين شكلي لو ايش ما كنت ..


فاطمه رفعت راسها: اتقبل شكلك ؟ ليش شو فيك ؟ من اتصل عزيز اخوي وانت متوتر ومب على بعضك ..


يوسف حط يده على راسه ونزل القحفيه شوي شوي .. غطى وي فيها وتكلم ..


يوسف: ترا مو بيدي ..


فاطمه طالعت قرعة يوسف وانصدمت .. حطت يدها على حلجها وشهقت ..


يوسف قرب منها: والله مو بيدي .. الشباب سو فيني جي .. واولهم اخوج عزوز ..


فاطمه مسكت نفسها وبعدين ضحكت بصوت عالي ..


فاطمه: ه ..


يوسف استغرب: تضحكين .. وتم يضحك معاها ..


تموا ثنينهم يضحكون ..


يوسف: مسكي قرعتي ..


فاطمه حطت يدها على راس يوسف وتمت تتحسس قرعته ..


فاطمه: ابيه شلون خليتهم يسون فيك جي .. ه


يوسف: والله نذاله فالشباب ..


فاطمه حضنت يوسف: انا اتقبلك بكل ما فيك .. فديت قلبك ..


يوسف حضنها: بس كنت خايف ردة فعلج .. خفت تصرخين وتطلعين من الغرفه ..


فاطمه ويوسف: ..


ليلة فاطمه ويوسف كانت حلوه بتقبل فاطمه لقرعة يوسف .. ..




اليوم صباحية فاطمه ويوسف .. الغدا في بيت فاطمه والاهل متجمعين هناك .. الساعه 11 ونص فارس كان راجع من المسيد .. دخل البيت ولبس ثوبه و ضبط غتره .. تدخن وتعطر وخذ قطوته معاه وطلع متجه لبيتهم .. لما قرب من بيتهم حس كأن صدره ضاق وماقدر يتنفس .. وقف على جنب وتم يتعوذ من الشيطان ..


فارس " كرة درب هالبيت والله " ..


فتح درايش السياره كلها وحرك صوب البيت .. وصل البيت وما دخل السياره فالحوش .. نزل ونزل قطوته معاه .. دخل البيت وتم يطالع الحوش ويفكر في حياته .. طلع جواله واتصل بجاسم اخوه ..


فارس: الجسمي حبيبي ..


جاسم مبتسم: هلا والله


فارس: شلونك فديتك ؟


جاسم: الحمدلله .. انت شو اخبارك ؟


فارس: طيب .. انت فالبيت ولا ؟


جاسم: انا مع ايماني وسلطون ..


فارس: من عندنا ؟


جاسم: كلهم الا محمد وخالد ومريم ..


فارس: ومن فالميلس ؟


جاسم: الشباب ..


فارس: ابوي وعمي هناك ؟


جاسم: عمي فالصاله مع خواتي .. بس ابوي فالميلس مع الشباب ..


فارس: زين تعال انت وسلطون وايماني بسرعه انا فالحوش عندي لك مفاجأه ..


جاسم بوناسه: والله ..


فارس مبتسم: اي تعالوا يلا ..


جاسم: زين زين ..


سكر من فارس وقال لايمان وسلطان عن كلام فارس .. طبعا الربع ما كذبوا خبر .. نزلوا بسرعه تحت .. شافتهم الريم ..


الريم: على وين ؟


ايمان: فارس برا عنده شي ..


الريم " اروح ولا ما روح معاهم ؟ " ..


تمت واقفه مكانها محتاره .. مشت صوب الدريشه وطلت عليهم .. جاسم كان يركض وفارس حضنه وباسه ..


فارس: شو اخبارك ..؟


جاسم: الحمدلله ..


ايمان وسلطان سلموا على فارس .. وقفوا ينتظرون مفاجأة فارس .. فارس كان حاط يده وراه .. جابها جدام و وراهم القطوه السوده اللي ريشها مغطيها ..


فارس: شو رايكم ..


ايمان: وااااااو .. تهبل .. عطني اياها ..


جاسم: حلوه والله


سلطان: ابيهاااااا


فارس:


تموا الثلاثه يلاعبون القطوه و فارس يطالعهم بوناسه .. شوي الا يدخل خالد الحوش و وراه محمد .. شافوا لمة سلطان وايمان وجاسم واستغربوا ..


محمد: جبتها فروس ؟


فارس التفت مبتسم: اي ..


محمد: نيوف تعال شوف القطوه ..


ساره: اي قطوه ؟


محمد: ولد عمي عنده قطوه ريشيه تجنن .. جيبي نصور وتعالي ..


ساره: زين ..


نزلوا من السياره وتجمعوا كلهم حول القطوه اللي استخفوا على حجمها وشكلها .. خالد كان يشوف فرحة مريم فيها ..


خالد التفت عليها مبتسم: تبين وحده ؟


مريم مبتسمه: لا مابي ..


خالد يتحرش بفارس: لو في خاطرج هالسوده ترا ما تغلى ..


فارس طالعه ورفع حاجب: عيد كلامك ؟؟


خالد: سمعتني ..


فارس: في احلامك واحلام مرتك ..


مريم بدلع: شدعوه فارس .. تغلى علي ..


فارس طالعها بحنان وابتسم: والله .. همممممم .. ممكن تغلى عليج يا اختي الغاليه ..


فجأه نقزت ايمان: اي لو فطوم ما تغلى عليها .. وعطاها ايها بدون ما تتكلم بعد ..


محمد من سمع اسم فاطمه ابتسم وهو منزل راسه يلاعب عياله ويوريهم القطوه ..


فارس: شو اللي قاهرج .. فطيم دلوعتي وبس ..


ايمان: لنا الله ..


الكل: ..


ساره وايمان ومريم دخلوا الصله عند الحريم وسلموا على بعض .. اما الشباب راحوا الميلس وخذوا معاهم القطوه الصغيرونه .. الريم كانت تراقب من بعيد وقلبها يحترق .. بوفارس كان يطالع فارس بفخر ..


بوفارس " ماشاءالله عليك يا فارس .. والله انك قدها .. الله يقويك وان شاءالله ما تضعف لو صار وما خذت مناف .. الله يكتبكم من نصيب بعض " .. سلموا الشباب على بعض وحطوا الغدا وتغدوا .. بعد الغدا مريم اتصلت بفارس


مريم: هلا فارس ..


فارس: هلا وغلا .. آمريني فديتج ..


مريم: ما يآمر عليك العدو .. تعال الصاله اقعد معانا شوي ..


فارس محتار: هممممم .. زين سوي لي درب ..


مريم بوناسه: ان شاءالله ..


سكر فارس وراح عند المغاسل غسل يده وتم يطالع نفسه بالمرايه .. مريم بلغت ساره والريم ان فارس بيجي الصاله .. ساره راحت فوق .. اما الريم لبست شيلتها وقعدت .. طلع فارس من الميلس متجه للصاله .. دخل الصاله وشاف ام محمد وام فارس وهيا و يدته قاعدين جنب بعض ومندمجين فالسوالف .. تنحنح ودخل ..


فارس: احم ..


التفت عليه ام فارس وطالعته بنص عين .. هيا هللت فيه ..


هيا: هلا وغلا .. فديتهم الريايل والله ..


فارس ابتسم لعمته .. قرب منها وباس راسها .. سلم باليد على ام محمد .. قرب من ام فارس وباس راسها بدون نفس .. قعد عند يدته وباسها بقوه على خدها ..


الجده: حبتك العافيه ..


فارس باسها مره ثانيه: وهاي بوسه على الخد الثاني .. موووح .. فديت خدودج يا ام خدود ..


الجده: يعلك العافيه .. كلت خدي ..


فارس: واااي فديت خدها انا ..


هيا: يه ليش تتغزل بامي يا فارس ..


فارس: هاذي حبيبة قلبي ..


الجده ضربته على ظهره: حبتك العافيه يالعيار ..


فارس: آآآآي .. ابتسم لجدته .. قطيتي عافيتي مب يد عليج .. حشى ..


اليده: ويه ويه ليحسدني هالولد .. كفاك الله ..


الكل: .. الا ام فارس اللي كانت صاده صوب التلفزيون ..


فارس التفت على البنات وكان يدور على فاطمه من بينهم .. طالعها ورفع حاجب وابتسم .. قام من مكانه وقعد جنبها .. حط يده على كتفها وباسها على خدها ..


فارس: مبرك يا احلى عروسه ..


فاطمه حضنته: الله يبارك فيك يا فارس .. والفال لك ..


فارس مبتسم: الفال حق اللي ما عرسوا ..


مريم: آمين ..


فارس: اخباركم خواتي ؟


ايمان: مشتاقين ..


فارس: ما صدق ان ايمان تشتاق لي ..


ايمان: ما يعجبك شي ..


فارس: ه ..







يتبع ..
__________________

ايمان زعلت وكشرت .. فارس طالعها وابتسم ..


فارس: فديت الزعلانه ..


ايمان: اي الغلا والمعزه حق ناس وناس ..


فارس: بدت الغيره ..


ايمان طالعت فارس بنظره .. قامت من مكانها وطلعت من الصاله ..


فاطمه: تعالي ..


مريم: وي من صجها زعلت ..


فارس: بروح لها ..


الجده: من صجك ذي تزعل .. اقعد خلها عنك ..


فارس: لا يبه خواتي على راسي .. اغلى الناس هم ..


الجده: بس هم غاليات .. مافي حد مني مناك ..


فارس: ه .. لا مافي .. غير هلي ماحب ..


الجده: اكيد تحب حد مني مناك ..


فارس: وحياتج اني احب ..


الكل طالع فارس .. والريم كانت شوي وتقوم تصفقه على كلامه ..


الجده: ومن تكون اللي خذت قلبك ؟


فارس: انتي فديت قلبج ..


الكل: اااااي ..


طبعا هالكلام ما مشى على الكل .. واولهم ام فارس والريم .. اللي كانوا بينفجرون من تصرفات فارس .. استأذن فارس وراح غرفة ايمان عشان يراضيها وكان مستغرب سبب زعلها .. طق الباب ودخل .. لقى ايمان واقفه عند الدريشه واطالع برا ..


فارس: فديت الزعلانه ايمان بنت محمد ..


ايمان ماردت عليه .. فارس انسدح على سريرها ..


فارس: كح كح كح .. نحن هنا ..


ايمان: ادري ..


فارس: شديده البنت ..


ايمان: اي لازم استوي شديده ..


فارس: اول مره اشوف ايمان اختي بهالحاله ..


ايمان: ليش يا عيوني .. شو شايفيني .. عديمة احساس ولا هبله ..


فارس يفكر: هممممم .. والله محتار لو كنتي عديمة احساس او هبله .. ممممم .. بس اتوقع واغلب الظن انج هبله


ايمان: بايخ .. لا تستخف دمك ..


فارس: ه .. ما يسوى علينا .. زين خلاص انتي عديمة احساس ..


ايمان بعصبيه: اف .. كلش ما تضحك ..


فارس قام من السرير وراح صوبها: ليش هالزعل ايماني .؟


ايمان صدت: مب زعلانه ..


فارس سحب شعرها: الا زعلانه ..


ايمان بصراخ: وخر عني زين ..


فارس عقد حواجبه: ايمان شو فيج ؟


ايمان بتوتر: مافيني شي ..


مشت عنه وراحت صوب الحمام .. فارس استغرب منها .. طلع من الغرفه وهو يفكر في تصرفها .. راح غرفته دخل وشغل المكيف وانسدح على السرير .. غمض عيونه وتم يفكر ويفكر .. تحت فالصاله البنات والحريم الكبار قعدوا يسولفون ويضحكون انضمت لهم ايمان لما تأكدت ان فارس مو موجود بالصاله .. سمعوا جوال يرن وكانت الرنه (عالي مستواه) .. كان الجوال جنب اليده ..


الجده: من تلفونه ذي ؟


ايمان: جوال فارس ..


ايمان قرت الاسم فالتلفون ..


ايمان عقدت حواجبها: الدلوعه .. من هاي ؟


ام فارس: هاتي التلفون ..


فاطمه ومريم طالعوا بعض .. ام فارس خذت التلفون وردت بعصبيه ..


ام فارس: انتي ما تستحين على ويهج تغازلين ريايل .. والله انج ما تربيتي عدل يا قليلة الادب ..


مناف توها بترد الا سمعت هالكلام من ام فارس .. تمت ساكته ولا تكلمت .. قلبها كان يدق بسرعه وماتت من الخوف .. اما كل اللي كانوا قاعدين بالصاله نظراتهم توجهت لام فارس اللي انفجرت مثل البركان .. بدون اي مقدمات سكرت التلفون وساد الصمت المكان بكامله .. الجده عصبت على الحركه ..


الجده: ليش تردين ؟


ام فارس باستغراب: وليش مارد .. اشوف ولدي يغرق ومانقذه ..


الجده بصراخ: اي يغرق واي كلام .. مالج حق ..


ام فارس: هاذي قاصه عليه ..


الجده: لا مب قاصه عليه .. ولدج ريال و على شو بتقص عليه ؟


ام فارس: عشان فلوسه ..


الجده: اي فلوس .. ليكون كل يوم يركب سياره ولا بيوته منثره من هني لين بيروت .. اي فلوس تتكلمين عنها


ام فارس: ولدي واعرفه .. ومابيه ياخذ بنت الفقر ..


الجده: لا انتي بنت العز واللي شايفه النعمه .. انتي لو شايفه خير و تعرفين النعمه ما ترفعتي على الناس .. الله ما قال لنا تكبروا ..


هيا: استهدوا بالله يا جماعه ما صار الا كل خير ..


الجده: اي خير .. مرت اخوج هاذي مغروره .. وعلى شنو بعد ..


ام فارس: الله يهداج انتي بس ..


الجده: الحمدلله على كل حال .. ادعي حق نفسج .. وفارس بياخذ اللي يبيها .. ومحد بيجبره على شي ..


ام فارس: ان خذها تبريت منه ..


الجده: قلعتج ..


ام فارس انصدمت برد الجده .. ام محمد كانت تحاول انها تلطف الجو شوي ..


ام محمد: لا اله الا الله ..


الكل: محمد رسول الله ..


ام محمد: هالموضوع ما يبيله هالكلام .. تقعد ام فارس مع ولدها وتشوف شو اللي بخاطره .. ويتفاهمون ..


الجده: بتتعبين من الكلام ..


دخل فارس عليهم الصاله لانه تذكر ان جواله مب معاه .. وطبعا سمع حشرة الحريم بس ما كان منتبه للكلام اللي دار .. ام فارس قامت من مكانها وهي ماسكه تلفون فارس ..


ام فارس: تفضل .. اتصلت لك ست الحسن والدلال ..


فارس طالع امه باستغراب ..


ايمان بحقاره: من هاذي الدلوعه اللي مسجلها بتلفونك ؟


فارس التفت عليها وطالعها بغضب ..


الجده: انتي سكتي ولا كلمه يالسوسه .. اللي صار كله من تحت راسج انتي ..


ايمان بوقاحه: والله انا ما قلت شي .. ليش تتبلون علي ..


فارس: بس ولا كلمه .. وعطاها كف طيحها على الارض ..


ام فارس بصراخ: مالك حق على بنتي .. كل هاي عشان هالواطيه اللي تعرفها ..


فارس صرخ باعلى صوته: خلاااااااااااااااااص ..


خذ التلفون من امه وطلع من البيت بسرعه .. ركب سيارته وطار فيها .. فاطمه تمت اطالع امها بحزن .. ام فارس قربت عند ايمان ..
ام فارس: قومي غرفتج يمه ..
ايمان وسط دموعها: مالت عليه وعليها ..
الجده بعصبيه: قومي طلعي من هني يلا ..
ايمان ركضت وراحت غرفتها .. طبعا كل هالحوارات اللي صارت .. صارت بوجود ام محمد وساره والريم .. ام محمد انصدمت من ام فارس .. الريم انصعقت بالحقيقه .. ساره كانت ضايعه بينهم .. هيا شافت الخوف والحزن بعيون فاطمه ومريم ..
هيا " فديتج يا فطيم .. توج عروس وصار هاي كله جدامج .. كسروا فرحتج يالغاليه " ..
فارس طلع من البيت وكان مب مستوعب اللي صار .. تم يطالع تلفونه ومب عارف شو يسوي .. هل يتصل بمناف ولا ينتظر .. قرر انه يتصل لها .. اتصل وما ردت مناف .. اتصل على اكثر من مره ومناف المنهار كانت ما تشوف التلفون وميته من الخوف .. قررت انها تبند التلفون .. فارس اتصل ولقى التلفون مبند .. حس ان مناف خايفه .. عصب وساق بسرعه جنونيه في الشوراع .. توجه صوب البحر وقف السياره .. حط راسه على السكان وغمض عيونه .. الوضع في بيت بوفارس توتر زود لما عرف بوفارس بالموضوع .. لان عبدالعزيز حس بحزن توأمه .. كان قاعد فالميلس وفجأه حط يده على قلبه .. تم يتنفس بسرعه وتوتر .. طلع من الميلس رايح الصاله .. شاف ايمان وهي تركض رايحه الغرفه .. وام فارس وراها ..
عبدالعزيز: شصاير ؟
ام فارس ماردت عليه وكملت دربها ورا بنتها .. عبدالعزيز استغرب وراح الصاله بسرعه .. وقف عند الباب وصوت على فاطمه ..
عبدالعزيز: فطيم .. فطيم ..
فاطمه قامت من مكانها وراحت عند اخوها .. اول ما شافته حضنته وصاحت .. عبدالعزيز حضنها وخذها للمطعم سكر الباب وقعد جنبها ..
عبدالعزيز: شو فيج حبيبتي ؟
فاطمه وسط دموعها: امي وفارس تهاوشوا ..
عبدالعزيز مستغرب: تهاوشوا ؟ شو السالفه ؟
فاطمه عدت السالفه لاخوها بكل التفاصيل .. عبدالعزيز استغرب من امه ..
فاطمه: يعني امي ليش تسوي جي .. ليش ؟
عبدالعزيز: الله يهديها ..
فاطمه اتصل بفارس شوف وينه .. والله خايفه عليه ..
عبدالعزيز: ما عليج من فارس .. اخوج يفكر بعقله و مب متهور ..
فاطمه: انا بروح البيت مابي اقعد هني ..
عبدالعزيز: خلج هني بعد ما يطلعون الريايل بنقعد كلنا مع بعض نشوف شو الموضوع .. بس لا تقولين حق عميمه
فاطمه: كل شي صار جدامهم .. حتى ساره مرت محمد كانت موجوده ..
عبدالعزيز: يالله .. ليش امي جي ..
فاطمه: قول حق يوسف اني ابي اروح البيت ..
عبدالعزيز: استهدي بالله فديتج ..
فاطمه: مابي مابي .. متضايقه من البيت .. وتمت تصيح ..
عبدالعزيز: لا حول ولا قوة الا بالله .. زين خلاص هدي انتي .. قومي غسلي ويهج ولبسي وانا ببلغ ريلج ..
فاطمه: زين ..
طلعوا من المطعم وراح عبدالعزيز الميلس وفاطمه راحت تغسل ويها .. شافتها يدتها ونادتها ..
الجده: فاطمه يا خلف ابوي انتي .. تعالي
فاطمه: هلا يدتي ..
الجده: ليش تصيحين ؟ اخوج ما عليه شر .. وهالمشاكل مب وقتها انا ادري .. بس ربج كريم ..
فاطمه: الحمدلله على كل حال يدتي ..
الجده: ابيج جي .. قدها يا بنت محمد ..
فاطمه حضنت يدتها وراحت تلبس عبايتها .. عبدالعزيز بلغ يوسف ان فاطمه تبي تروح البيت .. يوسف استغرب بس ما سأل .. سلم على الشباب فالميلس واستأذن منهم .. طلع وركب السياره ينتظر فاطمه .. فاطمه طلعت وكانت مغطيه ويها .. واستغرب زود من حركتها .. لان فاطمه مو من عادتها تتغطى .. ركبت السياره بكل هدوء ولا نطقت بكلمه .. يوسف مد يده لها .. فاطمه مسكت يده وضغطت عليها بقوه .. صاحت بصوت مسموع .. يوسف خاف عليها ..
يوسف: شفيج حبيبتي ؟
فاطمه: اطلع من بيتنا بسرعه الله يخليك ..
يوسف بخوف: ان شاءالله ..
طلع من بيت بوفارس وتم ساكت .. فاطمه كانت تصيح بصمت .. وصلوا البيت ونزلت فاطمه وراحت الغرفه بسرعه لحقها يوسف ودخل وراها الغرفه .. شافها منهاره وتصيح بهستيريا .. قرب منها ومسك يدها ..


يتبع ..
__________________

يوسف: ليش هالدموع حياتي ؟
فاطمه كانت مب قادره تتكلم وهي تصيح .. تمت تشهق وهي تحاول انها تتكلم .. يوسف حضنها وتم يهديها وقلبه معوره عليها .. بعد فتره هدت فاطمه ومسحت دموعها ..
فاطمه: فارس اخوي ..
يوسف: عسى ماشر .. شفيه فارس ؟
فاطمه: امي مسويه له سالفه عشان الزواج ..
يوسف: الله يهديها الوالده ..
فاطمه: مسكين فارس اخوي .. تدري ان صار له فتره ما ينام فالبيت ..
يوسف باستغرب: وين ينام عيل ؟
فاطمه: محد يدري الا محمد ولد عمي ..
يوسف: عندي احساس ان اموره بتتيسر ..
فاطمه: آآه .. ان شاءالله ..
يوسف مبتسم: ان شاءالله .. بس لاتزعلين نفسج حياتي ..
فاطمه: كل شي شفته جدامي ..
يوسف: ازمه وتعدي ..
تمت فاطمه في احضان زوجها وكلها حزن على حال اخوها فارس .. نرجع لبيت فارس والاجواء المشحونه .. بعد ما طلع يوسف .. عبدالعزيز راح صوب ابوه وقاله ان في مشكله صارت بين فارس وامه ..
بوفارس: اخوك وينه؟
عبدالعزيز: طلع من البيت مثل المينون .. ومحد يدري وينه ؟
بوفارس: ناد محمد ولد عمك .. بس لا تبين لاحد شي ..
عبدالعزيز: ان شاءالله ..
عبدالعزيز راح صوب محمد وسلمان وعلي اللي كانوا يسولفون .. اندمج معاهم بالسوالف شوي وبعدين أشر بعيونه لمحمد وطالع ابوه .. محمد فالبدايه ما فهم .. طالعه عبدالعزيز وأشر على ابوه وكح عشان محد يفهم .. محمد ابتسم وفهم السالفه .. راح عند عمه اللي كان قاعد بروحه ويفكر ..
محمد: هلا عمي ..
بوفارس: اخوك ..
محمد عقد حواجبه: شو فيه ؟
بوفارس: توه متهاوش مع امه ..
محمد: وينه ؟
بوفارس: محد يدري .. طلع من البيت مثل المينون ..
محمد: اتصلتوا له ؟
بوفارس: اتصلت له الحين ومارد علي .. قوم شوفه الله يرضى عليك .. والله اني خايف عليه ..
محمد: ان شاءالله .. ما عليه شر فروس .. قلبه قوي ..
بوفارس: اخاف يضعف قلبه ..
محمد: اخوي وانا اعرفه .. قلبه صخر ..
بوفارس: الله يقويه ..
محمد: انا بروح اشوفه ..
بوفارس: بارك الله فيك ..
طلع محمد من الميلس واتصل بفارس اللي رد عليه من اول رنه ..
محمد: وينك ؟
فارس: تعالي عالبحر ..
محمد: ان شاءالله ..
راح محمد صوب الصاله وشاف زوجته ..
محمد: انا باروح عندي شغل .. رجعي مع امي وابوي ..
ساره: على وين ؟
محمد: قلت عندي شغل ..
ساره طالعته: رايح حق ولد عمك ..
محمد ماسك اعصابه: قلت لج رجعي مع امي وابوي ..
مشى عنها وهو متنرفز من تصرفها ..
ساره: على قولت امه ياخذ وحده تغاززله بالتلفون ..
محمد سمع كلمة ساره غمض عينه وقف مكانه .. التفت عليها وطالعها بغضب ..
محمد: انتي طالق ..
ساره بطلت عيونها وطالعت محمد بخوف ..
محمد: لبسي عباتج خل اذلفج بيت هلج ..
ساره تمت واقفه مكانها مو مستوعبه اللي صار لها .. قرب منها وسحبها من ثايبها ..
محمد: يلا قومي لبسي عباتج خلصيني ..
ساره مشت بكل هدوء ومحمد طلع ينتظرها فالسياره .. لبست عبايتها وراحت السياره وكانوا عيالها والخدامه معاها .. شافها محمد ونزل من السياره ..
محمد: رجعي اليهال والخدامه .. وتعالي بنفسج .. وان سمعت لج كلمه وحده بسوي لج حفله هني وجدام الكل
ساره كانت تتمنى لو يرجع الزمن شوي ورا .. وتغير اللي صار .. محمد طلب من الخدامه انها ترجع وتاخذ اليهال معاها داخل .. ساره ركبت السياره ومحمد طلع من بيت عمه و وصلها بيت اهلها .. طلع من صوب بيت اهل زوجته وراح عند فارس .. وصل ولقى فارس فالسياره وفاتح الباب .. نزل من السياره وركب الصوب الثاني .. التفت عليه فارس مبتسم ..
فارس: شلون الوضع في البيت ؟
محمد: للحين محد يدري ..
فارس: .. ..
محمد استغرب ضحك فارس .. وفارس تم يضحك بشكل هستيري ..
محمد: شو فيك فروس .. استخفيت ؟
فارس: تقولي محد يدري .. امك و زوجتك واختك كانوا موجودين يوم تعافست مع امي ..
محمد " وانا اقول الاخت مستقويه علي ليش ؟ كانت موجوده يوم صارت المشكله" . .
محمد: الله يهديهم ان شاءالله ..
فارس: تعبت يا حمود .. اتصل لها وماترد ..
محمد: شو صار بالضبط ؟
فارس: والله مادري .. بس دخلت الا مرت ابوي تعطـ ...
يقاطعه محمد: من مرت ابوك ؟
فارس مبتسم: اللي مسمينها باسمي .. المهم .. عطتني التلفون وهي فاتنه .. الا تقولي اتصلت ست الحسن والدلال انا استغربت .. واللي فهمته ان تلفوني رن وهي كانت متصله ومرت ابوي ردت عليها .. بس ماعرف شو قالت لها والله .. واتصل لها ماترد علي .. وبعدين بندت جوالها .. والله احترت يا حمودي ..
محمد: زين اتصل باخوها ..
فارس: اتصل اقوله شو اخبار اختك ؟؟؟
محمد: ما باليد حيله .. زين طرشت لها مسج ؟
فارس: لا والله ..
محمد: طرش لها مسج وقولها تتصل لك ..
فارس خذ جواله وطرش لها مسج ..
( مناف يا قلبه انا فارس اتصلي لي .. انا آسف على اللي صار ) ..
فارس: خل اتصل يمكن فتحت جوالها ..
اتصل وجوالها كان مبند ..
فارس بعصبيه: هاذي ليش ترد على التلفون ؟ آآه يالقهر ..
محمد: اذكر ربك فروس ..
فارس: تدري حمود ..
محمد: شو ؟
فاس: تعرف من تكون مناف بالنسبه لابوي ..
محمد عقد حواجبه: ابوك .. ؟! شو السالفه ..
فارس: ام مناف ابوي كان مالج عليها قبل ما ياخذ امي ..
محمد بطل عيونه: هاااااا .. انت شو تقول ؟
فارس: هاي الكلام اللي قاله لي ابوي .. تموا مع بعض 3 شهور وبعدين امها طلبت انها تنفصل عن ابوي ..
محمد: ليش ؟
فارس: يقولي انها طلبت انهم ينفصلون بدون اسباب ..
محمد: يعني ابوك تزوجها ؟ عاشوا مع بعض ؟
فارس: لا .. بس ملج بها وانفصلوا وكلن راح في حاله .. بعد ما انفصلت عن ابوي بـ 6 سنين تزوجت ابو مناف .. عاشت معها حياه حلوه وكانوا في خير .. يعني على قدهم بس عايشين مو مثل الحين .. مات ابوها بعد ما امها جابت نايف الصغير بسنه .. توفى وما كان له ورث ولا شي .. بس راتب .. وكان يشتغل في شركه خاصه .. فبعد ما مات ما مشى لهم شي من راتبه انقطع عنهم .. طلعوهم من بيتهم لانهم كانوا مأجرينه .. وعاشوا في هالخرابه اللي تشوفها ..
محمد: وابوك شلون عرف كل هاي ؟
فارس: والله ماعندي فكره يا حمود ..
محمد: فروس .. تتوقع ابوك يحب امها ؟
فارس: سألته نفس السؤال ..
محمد: بشو رد عليك ؟
فارس: قالي شي طبيعي اني بحب بنت انا قررت ارتبط فيها .. بس بعد ما انفصلوا تم يفكر فيها وبعدين بدى ينسى لهى بالدنيا وانشغل .. واصلا ابوي خذ مرته بعد ما انفصل بسنه تقريبا او اقل .. ما طول يعني ..
محمد: انت صدقته ؟
فارس: اي صدقته .. كلامه كان مقنع بالنسبه لي .. ولا انت عندك غير هالرأي ؟
محمد: والله يمكن ليش لأ ..
فارس: انا يوم قالي هالموضوع حسيت الدنيا ادور فيني ..
محمد: زين ما سألته شلون عرف انك تكلمها ؟
فارس: تذكر يوم اتصلت لي و وديتها المستشفى عشان اخوها الصغير اللي مات ..
محمد: اي ..
فارس: ابوي شافني ..
محمد: اي اتذكر ..
فارس: طبعا بعد ذيك الليله ابوي سوا اتصالاته وعرف كل شي .. بس ماعتقد انه سمعني اكلمها ..
محمد: اكيد قرى حبها بعيونك يا فروس ..
فارس: آآآه لاتعور قلبي يا حمودي .. والله محتار ماعرف شو اسوي الحين ..
محمد: انا باتصل اطمن ابوك .. وانت حاول تتصل لها مره ثانيه ..
فارس: زين ..
نزل محمد من السياره واتصل في بوفارس وطمنه على فارس .. اما فارس فكل محاولاته فشلت لان مناف مسكره جوالها ..
طبعا مناف في حاله لا تحسد عليها .. من سمعت هالكلام زعلت على حالها وعرفت سبب تأخر فارس في موضوع الزواج ..
مناف " من هاذي اللي ردت علي بهالطريقه .. وليش تقولي هالكلام .. اكره نفسي اكره نفسي " ..
حضنت مخدتها وتمت تصيح بحزن .. فيصل طق عليها الباب ..
فيصل: مناف .. مناف ..
مناف: نعم يا فيصل ..
فيصل: يلا تعالي حلقي لي انا وعبود ..
مناف: زين اصبر شوي فديتك ..
فيصل: زين ..

قامت ومسحت دموعها .. بدلت ثيابها وطلعت لاخوانها اللي كانوا ينتظرونها فالحوش .. طالعها عبدالله مبتسم وركض لها وحضنها ..


يتبع ..
__________________

مناف: حبيبي انته ..
عبدالله: اليوم ابي تحلقين لي مثل فارس ..
مناف: ها .. من سمعت اسمه حست انها شوي وتصيح ..
مناف: شلون ؟
عبدالله: مخفف وايد .. بس مسوي زلوفه مسمار ..
مناف: شلون مسمار ؟
فيصل: انا صورته بجوالي بوريج اياه .. انا بعد ابي مثله ..
فيصل فتح جواله وحط على صورة فارس .. مناف تمت اطالع الصوره .. طبعا فيصل كان مصور ويه فارس على جنب ..
فيصل: شوفي شلون الزلف يكون مثلث ..
مناف: بس ماعرف اسوي جي عاد ..
عبدالله: خلاص انتي حلقي .. و بعدين بنروح الحلاق مع فارس ..
فيصل: اي ..
مناف: زين كيفكم ..
عبدالله: فارس شرا لنا مكينه جديده ..
مناف مبتسمه لاخوانها: تستاهلون .. يلا من بيقعد اول ؟
عبدالله: انا انا ..
مناف: يلا حبيبي ..
قعد عبدالله ومناف حلقت له .. وبعدين قعد فيصل .. خلصت من اخوانها ورجعت الغرفه وهي منهاره بس تماسكت جدام اخوانها .. قفلت على نفسها الباب وحذفت نفسها على السرير .. خذت جوالها وشغلته .. شافت المسج اللي من فارس .. صاحت اكثر لما قرته .. فارس وصله تقرير ان المسج وصل لمناف .. على طول اتصلها .. تم الجوال يرون ومناف اطالع التفون بحزن .. ردت بدون ما تتكلم ..
فارس: يا قلبه انتي ..
مناف: آآآه .. ليش ليش ؟ ..
فارس: فديت قلبج انتي .. هدي الله يخليج .. والله اللي صار مو بيدي .. انا مادري عن شي .. قولي لي شو صار .؟
مناف: ليش ما تسأل اللي ردت علي ..
وتمت تصيح بإنكسار ..
فارس كان ميت من القهر ومنحرج من مناف على اللي صار لها من امه ..
فارس: والله اني نسيت تلفوني عندهم .. ويوم رجعت الا اشوف الدنيا معفوسه تحت .. أنا آسف .. امسحيها فيني ..
مناف: الحين عرفت ليش طال الموضوع ..
فارس تم ساكت ومارد على مناف ..
مناف: تراني مب رخيصه يا فارس .. وانا بنت ناس مثلي مثل خواتك .. ودام هلك مب عاجبهم لاتجبرهم على شي هم مب مقتنعين فيه .. وانا اللي مابيك يا فارس ..
فارس: ليش هالكلام يا قلبه انتي .. انا اللي اقرر من ابي ..
مناف تكابر: بس انا قلت لك مابيك خلاص ..
فارس: اهون عليج تقولين لي هالكلام ؟
مناف صاحت: آآآه .. ماقدر خلاص .. عرفت قدري
يقاطعها فارس: انتي قدرج فوق عالي .. انتي دنيتي انا .. انا وانتي نكمل بعض .. لا تقولين ما بيك ..
مناف بغضب: مابيك مابيك .. اطلع من حياتي .. انا اكرهك اكرهك ..
سكرت التلفون وتمت تصيح بندم .. فارس تم يطالع التلفون بكل هدوء .. محمد كان يراقبه من سيارته .. فارس نزل من السياره وراح عند سيارة محمد ..
فارس: خلاص توكل حمودي .. انا بقعد شوي بروحي وبعدين برجع بيتي ..
محمد: زين .. بس طمني عليك ..
فارس: ان شاءالله ..
محمد حرك وهو يفكر في فارس ..
محمد " الله يعينك يا فارس " ..
فارس تمشى على السيف وهو يفكر في مناف وكلامها ..
فارس " من قلبها تقولي مابيك .. لا اكيد لانها معصبه قالت هالكلام .. مناف تحبني وانا احبها وايد .. ماتخيل حياتي بدونها .. هي ام عيالي وهي حبيبة قلبي .. هي حب حياتي وعمري كله " ..
تم فارس يقلب الافكار في باله وهو محتار .. محمد رجع البيت وكان بومحمد ينتظره فالحوش .. محمد اول ما شاف ابوه عرف شو الموضوع .. نزل من السياره وراح صوبه ..
بومحمد: شو صاير ؟
محمد: ولا شي .. وديتها بيت اهلها ..
بومحمد: الله يهديك يا يبه .. كل يوم والثاني مطرشها بيت اهلها ..
محمد: لانها ما تعرف السنع ..
بومحمد: طول بالك عليها ..
محمد: انا طلقتها ..
بومحمد بطل عيونه: ها .. طلقتها ..
محمد: اي ..
بومحمد بعصبيه: انت ما تستحي على ويهك .. انت ماتحس .. جرحت البنت وبهدلتها ..
محمد: انا مب ياهل عشان تقولي هالكلام .. خفت على مشاعرها ولا فكرت في مشاعري .. ؟ وانا ما بهدلتها هي اللي تبي تفرض شخصيتها علي .. اذا بخليها عيل بتخرب دنياي ..
بومحمد بغضب: تردها ..
محمد: مب رادها .. وبروح المحكمه بطلقها وبطرش لها ورقتها .. تعبت وياها ..
بومحمد مشى عن محمد وهو معصب .. محمد ما افتكر في ابوه ولا في كلامه .. اول مره يحس انه يسوي شي صح كان دوم مسوي حساب لابوه على حساب مشاعره .. بس هالمره وقف له وصد زوجته .. راح غرفته دخل وتم يطالعها ويفكر ..
محمد: الغرفه يبيلها تبديل .. بغير الاثاث كله .. بتخلص من هاللي اشوفه كل يوم ..
خذ له شور دافي .. صلى ركعتين وانسدح على الكرسي ونام شوي ..
الحين نروح بيت بوفارس اللي اشتعل بالصراخ .. بعد ما خلا البيت من الناس دخل بوفارس الصاله رايح عند زوجته .. لقى امه وهيا ومريم فالصاله ..
بوفارس: وين مزنه ؟
الجده: فوق ..
بوفارس: مريم روحي نادي امج ..
مريم: ان شاءالله ..
دخل الجد و وراه عبدالعزيز ..
الجد: شو صاير ؟
الجده: مرت ولدك استخفت ..
الجد: شوله ؟
الجده عدت عليه السالفه وبوفارس كان يسمع ومغتاظ على اللي صار .. تم ياكل في نفسه من القهر .. مريم نادت امها ونزلوا الصاله .. ام فارس كانت متنرفزه دخلت الصاله وهي مب على بعضها ..
بوفارس: هيا .. مريم .. بوسعود .. طلعوا خلونا بروحنا ..
عبدالعزيز: ان شاءالله ..
مريم وعبدالعزيز طلعوا وراحوا المطعم يناقشون اللي صار .. اما هيا راحت عند ايمان الغرفه ..
عبدالعزيز: امي شلون قالت هالكلام ؟
مريم: ايمانو سوسه ترا ..
عبدالعزيز: ليش ؟
مريم: لان لما رن جوال فارس .. تليقفت وخذته من يد ايديده .. وقرت الاسم بصوت عالي .. امي احترت وردت على طول وهزأت البنت المسكينه .. لا ويوم دخل علينا فارس الشيخه ترادد ايديه اللي ما تستحي على ويها ..
عبدالعزيز بغضب: انا هاذي بروح اصفقها ..
مريم: اقعد الله يخليك .. كفاها الكف اللي جاها من فارس .. عطاها كف محترم قطها على الارض ..
عبدالعزيز: بعد هالكف ما يبرد الخاطر .. ودي اروح انتف كشتها ..
مريم: لا تزيد الطين بله .. خلها على ربك .. بس امي ليش تصرفت بهاللطريقه .. ليش جرحت بنت الناس .. وتفكيرها غريب .. متحججه ان البنت تلعب على فارس عشان فلوسه .. ابي اعرف اي فلوس تتكلم عنها .. فارس اخوي بعده بأول المشوار ..
عبدالعزيز: الظاهر انعمت عين امي لما شافته تشارك مع خالد ريلج في شركتهم الصغيره ..
مريم: الظاهر .. بس الله يستر من الجاي ..
عبدالعزيز: مسكينه فطوم ..
مريم: آآآه .. والله معوره قلبي المسكينه .. ما فرحت فديت قلبها ..
عبدالعزيز: الله بيعوضها ان شاءالله ..
مريم: الله معوضها .. يوسف يحبها ويموت فيها .. وفطيم فديتها تفرح بوجوده حولها ..
عبدالعزيز: الله يخليهم لبعض ..
مريم: آمين ..
تموا الاخوان مع بعض فالمطعم على اعصابهم .. الحين خل نروح للصاله ونعرف شو ردة فعل بوفارس من الموضوع ..
ام فارس: انا قلت هالبنت ما ياخذها ..
الجد: شوله ما ياخذها .. بنت ناس حالها حال بنات خلق الله ..
ام فارس: الله يهديك يا عمي .. البنت عينها قويه تغازل الولد على التلفون ..
الجده: شو فيها زين ..
ام فارس: انتي تقولين هالكلام يا ام محمد ..
بوفارس كان متكتف ويستمع لهم بصمت ..
الجده: اي خليه يحب .. دام ما غلطوا خل يحبون ويتزوجون ..
ام فارس: يا ناس البنت مب من ثوبنا ..
الجده صفقت ايدينها ببعض: يا عل ثوبج الشق .. شو بعد مو من ثوبنا .. يوم بغاج محمد ولدي ما كنتي من ثوبنا .. خافي الله في بنات الناس .. ترا عندج ايمان ما تزوجت .. بطيح في جبدج حسبي الله ونعم الوكيل ..
ام فارس اغتاظت من كلام ام زوجها .. سكتت وماحبت انها ترد عليها ..
الجد: يا جماعه دام الولد يبيها خلوه ياخذها ..
الجده: وبعدين يتحمل كل اللي يجيه من اختياره ..
ام فارس: لا .. ماشوف ولدي يغرق واخليه ..بعد ما يطيح الفاس بالراس تبونه يطلقها ..
الجده: الله لا يقول يطلقها ..
الجد: هو خذها ؟
الجده: ان شاءالله بياخذها ..
ام فارس: ولدي ومحد يحكنمي فيه .. ما ياخذها يعني ما ياخذها ..
الجده بعناد: بياخذها غصبن عن اللي ما يرضى ..
ام فارس: لا ما ياخذها .. وانا حالفه ما قعد في هالبيت لو خذها ..
الجده: لا حول ولا قوة الا بالله .. التفتت على ولدها .. محمد الله يعين ولدك على امه ..
بوفارس قام من مكانه وراح صوب الدريشه ..
بوفارس: خلصتوا كلامكم ؟؟
الجده: قول ريح قلبي ..
بوفارس بكل برود: فارس ياخذ اللي يبيها ..
مشى صوب الباب وطلع بكل هدوء .. ام فارس صرخت من القهر ..
ام فارس: يا انا يا بنت الفقر الله ياخذ روحها ..
الجده: قوم خل نروح البيت .. حسبي الله ونعم الوكيل ..
الجد: لا حول ولا قوة الا بالله ..
طلع الجد و الجده وراه .. اما بوفارس ركب سيارته واختفى اثره من البيت .. مريم وعبدالعزيز طلعوا من المطعم .. شافوا امهم قاعده فالصاله حاطه يدها على راسها وتفكر .. قربت منها مريم وحضنتها .. ام فارس حضنت بنتها وكانت شوي وتصيح ..




يتبع ..
__________________

مريم: الله يهديكم ان شاءالله ..
ام فارس: ما عاد لي قدر في هالبيت ..
عبدالعزيز: محشومه الغاليه ..
ام فارس: وين الحشيمه وكلن تلقفني من صوب ..
مريم: الله يهديكم .. بس ليش انتي رافضه البنت ومصره ..
ام فارس: يا بنتي ليش انزل مستوانا لهلاشكال .. احنا وين وهم وين ..
مريم: ماما .. بس انتي عمرج ما علمتينا ان نشوف حالنا على الناس .. كنتي دوم تقولين لنا كلنا واحد ..
عبدالعزيز: صح يمه ..
ام فارس: انا علمتكم هالكلام واصر عليه .. بس ما ناخذ ونختلط بهالناس اللي اقل منا ..
عبدالعزيز: يمه كلامج متناقض ..
ام فارس بعصبيه: اي تناقض انت بعد .. نعطف عليهم ونشفق عليهم .. بس ما نقربهم ..
عبدالعزيز: هدي هدي يمه .. ماله داعي هالعصبيه ..
ام فارس: لانكم تحروني بكلامكم ..
عبدالعزيز: خلاص كلامج هو اللي ماشي ..
مريم: اللي تشوفينه يمه ..
ام فارس: تسايروني ولا شو ؟
مريم: لا يمه احنا طايعينج ..
ام فارس طالعتهم بغضب وطلعت من الصاله .. مريم و عبدالعزيز تموا بروحهم فالصاله محتارين وكلن يفكر بصمت .. رن جوال مريم وخالد كان متصل لها .. ردت بحزن ..
مريم: هلا خالد ..
خالد: امرج حبيبتي ؟
مريم: تعال ..
خالد: شو فيج حبيبتي ؟
مريم: مافيني شي ..
خالد: من مزعلج ؟
مريم: بعدين بقولك .. انت وين الحين ؟
خالد: قريب من بيتكم ..
مريم: زين خل اروح البس عيل ..
خالد: مع السلامه حبيبتي ..
مريم: الله وياك ..
سكرت مريم من خالد وراحت لبست عبايتها وتمت تنتظر خالد .. عبدالعزيز انتظر مريم لين مر عليها خالد .. طلع من البيت رايح القهوه مع فاضل وعلي ..
مرت 3 ايام على الاحداث اللي صارت فارس ومناف كلن شايل همه .. محمد ما تراجع عن قراره واعلنه للكل .. خالد ومريم حياتهم طبيعيه مع بعض الخوف من قبل مريم .. ايمان حابسه نفسها في غرفتها وشايله على فارس .. ام فارس كل يوم تحاول تناقش بوفارس في موضوع فارس .. بس بوفارس يرد عليها بكلمه وحده ( فارس ياخذ اللي يبيها ) .. و ام فارس تغتاظ من هالكلمه .. الجده تحاول انهاتوصل فارس بس مب قادره .. بومحمد معصب على محمد ويحاول انه ينقعه عشان يرجع عن قراره .. بس محمد رافض وسوا اللي في باله .. فاطمه ويوسف اللي بيسافرون يقضون شهر العسل في جزر المالديف .. طبعا فارس هو اللي كان موصلهم للمطار .. فاطمه كانت تشوف الحزن بعيون اخوها .. وتشوف شلون يضحك ويبتسم ويكابر .. كانت الساعه 6 المغرب فاطمه ويوسف وفارس متجهين للمطار .. فاطمه من الظهر في بيت اهلها بالوضع المتوتر .. بس امها وابوها كانوا يحاولون يلطفون الجو عشان ما يكدرون خاطر فاطمه .. بعد دموع الفراق والاحضان والقبلات فاطمه ويوسف وفارس اتجهوا للمطار .. وهم فالطريق كانوا يدردشون يضحكون بفرح .. لما وصلوا المطار نزلوا الشنط وسلموا على بعض .. فاطمه كانت تشوف فارس بحزن ..
فاطمه: فارس فديت روحك .. انت قدها ..
فارس مبتسم: قدها في شو ؟
فاطمه مبتسمه: فااااارس ..
فارس: .. زين خليني اساعد نسيبي واحمل معاه الشنط ..
راح صوب يوسف وساعده ودخل معاهم وخلص امورهم فالمطار .. فاطمه كانت تشوف فارس وحزنانه على حالة اخوها ..
فاطمه " ليت عندي قلبك يا فارس .. حزين وتكابر .. زعلان وتبتسم .. الله يعينك وينولك اللي في بالك " ..
فارس ويوسف راحوا عند فاطمه اللي كانت تناظرهم وتتفكر فيهم .. وخصوصا فارس اخوها ..
فارس: يلا يا عصافير .. تحملوا بأنفسكم .. وطمنونا عليكم اول ما توصلون ..
يوسف: بأذن الله ..
فارس ويوسف سلموا على بعض .. اما فاطمه حضنت فارس بحنان وتمت توصيه ..
فاطمه: فديتك ما وصيك على امي وخواتي .. مالهم الا انت .. ترا امي تحبك يا فارس ..
فارس: وانا بعد احبها ..
فاطمه: حاولوا تتفاهمون .. الحين كل شي وضح لنا ..
فارس: ولا يهمج انتي من اللي احنا فيه الحين .. روحي تونسي مع هالسبع .. تراه مشتاق لج ويموت فيج ..
فاطمه طالعت يوسف اللي كان يناظرهم وهو مبتسم ..
فاطمه: الله يقدرني واسعده ..
فارس: بنت محمد ما عليج زود ..
حضنها وباسها على جبهتها .. مسك يدها و وصلها عند يوسف ..
فارس: هالغاليه امانه عندك .. وهالغالي امانه عندج .. الله يوفقكم مع بعض .. وترجعون لنا بالسلامه ..
فاطمه ويوسف: تسلم ..
مشوا ماسكين ايدين بعض بحنان .. فارس كان واقف يراقبهم ومبتسم .. طلع فارس من المطار وحامل همه ورا ابتسامته .. ركب الرنج الاسود وتنفس بعمق .. طلع جواله من جيبه وتم يطالعه بحزن ..
فارس: ولا حتى مسج منج يا مناف .. آآآآه يا مناف ..
شغل السياره وحرك من صوب المطار متجه صوب بيت مناف .. وقف عند بداية فريجهم يطالع بيت مناف بحزن .. تم فتره على هالحال .. رن جواله وكان محمد ولد عمه المتصل .. فارس ما كان له مزاج يكلم حد .. بس رد على محمد ..
فارس: هلا ..
محمد: فروس ..
فارس: قولي ..
محمد: طلقتها ..
فارس بطل عيونه متفاجأ بالكلمه اللي سمعها من محمد ..
فارس: شو ؟
محمد: طلقتها ..
فارس: ليش ؟؟
محمد: ما عاد فيني اتحمل اكثر ..
فارس حرك من صوب بيت منافو راح يتمشى فالشوارع وهو يكلم محمد ..
فارس: حمود ليش سويت جي ؟
محمد: والله ما تعيشون اللي اعيشه انا ..
فارس: زين طول بالك معاها شوي ..
محمد: الله يخليك عاد .. لا تقولي اطول بالي معاها .. طولت بالي لابعد الحدود ..
فارس: زين فكر عدل .. وعطها وقت تفكر ..
محمد: توني طالع من المحكمه .. وبيطرشون لها ورقتها ..
فارس: حمود يعني خلاص ما تحل لها انت ؟
محمد: اي نعم .. توصلها ورقتها وتقعد في عدتها ..
فارس: الله يهديك يا حمود ..
محمد: فروس تدري ..
فارس: شو ؟
محمد: الحين احس ان نفسيتي مرتاحه .. هم وانزاح ..
فارس: الحين تقول هالكلام .. بعدين بتتحسف لي ذكرتها ..
محمد: ماعتقد ..
فارس: شو اللي مخليك تتأكد .. ترا الحمامه طارت .. ( كان يقصد فاطمه اخته )
محمد: الله يسهل درب الحمامه ..
فارس تم ساكت ويفكر في محمد وكلامه ..
محمد: فروس ما يستوي اعيش عندك ؟
فارس: ه .. ضحكتني يا حمودي ..
محمد: .. اليوم بجي اغلس عليك ..
فارس: اول شي بأجر لك السرير اللي بتنام عليه .. و باخذ منك تأمين .. والاكل والشرب عليك ..
محمد: صج والله .. بعدين عن اي سرير تتكلم .. كلها الا الكرسي اللي بالصاله بنام فيه .. انت شقتك فيها سرير اصلا ..
فارس: قريب ان شاءالله ..
محمد: ان شاءالله ..
فارس: انت وين ؟
محمد: احوط فالشوارع .. وانت وين ؟
فاس: انا سيم سيم انته ..
محمد وفارس ضحكوا بصوت عالي: ااااااااي ..
فارس: تعالي الشقه وجيب معاك شي ينأكل .. باموت من الجوع ..
محمد: حاضرين طال عمرك ..
فارس: تسلم حبيبي ..
محمد: انا قريب من بيتك .. بمر اخذ لنا اكل وبمرك .. لا تتأخر ..
فارس: انا بعيد شوي عن البيت .. تعرف وين مكان المفتاح صح ..
محمد: زين عيل خذ راحتك وانا باسبقك على البيت ..
فارس: ما تقصر بن عمي ..
محمد: حاضرين ..
فارس: سلام ..
محمد: سلام ..
سكروا من بعض .. محمد راح خذ لهم غدا .. وراح الشقه .. فارس كان يتمشى بهدوء فالشوارع لين وصل الشقه اول مادخل لقى محمد فالمطبخ يجهز الغدا .. تم يطالعه وهو مبتسم ..
فارس " فديتك حمودي .. والله ماعرف شو بسوي بدونك " ..
فارس: يسلمو يسلمو ..
محمد التفت مبتسم: الله يسلمني .. بس انا مسوي كل هاي لي انا .. لاتصدق نفسك وتفكر اني مجهز ومرتب عشانك ..
فارس: صج والله ..
محمد: اي صج .. تعال بقولك ..
فارس: قول ..
محمد: قرب شوي هني ..
فارس مشى كم خطوه صوب محمد ..
فارس: هلا ..
محمد: خذ يلا جهز الطاوله واغرف لنا الغدا فالصحون ..
فارس: لا والله ..
محمد: اي .. انا اكبر منك وانت لازم تخدمني ..
فارس: احلف انت بس ..
محمد: اصغر القوم خادمهم .. وانا وانت نشكل قوم لان عددنا تعدى 1 .. ولخيبة حظك طلعت الاصغر .. يعني لازم تخدمني .. زين خلصنا بلا هذره زايده ورتب لنا السفره .. جوعان وابي اتغدى .. عالعموم انا بروح اتابع لي فلم عالماشي لين تخلص انت .. ولا تنسى تناديني اول ما تخلص ..
فارس رفع حاجب: هممممم .. زين طال عمرك .. تفضل تابع لك فالم عالماشي .. ولما اخلص بناديك ..
محمد: احم .. عدل الكلام الحين ..
فارس " اصبر علي يا حمود " ..
طلع محمد من المطبخ وراح الصاله .. شغل التلفزيون .. فارس جهز غداه وتم ياكل بروحه .. محمد فالصاله حس ان فارس طول .. قام من مكانه وراح المطبخ ولقى فارس ياكل بكل هدوء ..
محمد: احلف انت بس ..
فارس مات من الضحك على محمد ..
فارس: هاااااااي .. هاي اخرة اللي يتأمر وايد .. تستاهل ما جاك ..
محمد: صج والله ..
سحب الكرسي وقعد .. غرف له وهو معصب على فارس ..
محمد: قوم جيب لي ماي ..
فارس وهو ياكل: والله الثلاجه وراك .. قم جيب لك ..
محمد: فروس .. خل النفس طيبه عليك ..
فارس: زين زين .. كسرت خاطري ..
فتح الثلاجه وطلع الماي ..
فارس: حمودي في لبن تبي ؟
محمد: اوووه .. احلى واحلى .. هات خل نشرب ..
فارس: حاضرين طال عمرك ..
محمد: غصبن عنك ..
فارس: ..
محمد وفارس تغدوا وقيلوا لهم ساعه لين أذن العصر .. قعدوا مع الاذان و نزلوا المسيد يصلون ..
فاطمه ويوسف وصلوا وجهتهم سالمين .. فاطمه كانت منبهره بروعة المكان .. كانوا يتمشون عند البحر وشابكين ايدينهم ببعض ..
فاطمه: بصراحه المكان روعه يا يوسف .. ما توقعته جي ..
يوسف: وجودج في المكان خلاه بهالروعه ..
فاطمه مستحيه: وليش مو وجودك انت ..؟
يوسف: لا انتي غير وانا غير ..
فاطمه بدلع: شلون يعني ؟
يوسف: انتي وين ما تروحين تحلين المكان .. بس انا لما اكون معاج اكون احلى واحلى ..
فاطمه: فديت قلبك يا يوسف ..
يوسف ضغط على ايدينها: الله لا يحرمني منج .. ودي اشيلج واركض بج على طول السيف واصرخ بأعلى صوتي واقول للناس اني احب زوجتي حبيبة قلبي فطومتي ..
فاطمه: فديت روحك ..
يوسف: حبيبتي ..
فاطمه: عمري انته ..
يوسف مبتسم: رتبي الاغراض بكره بنروح جزيره ثانيه ..
فاطمه مبتسمه: ان شاءالله فديتك .. يعني في احلى من هاذي ؟
يوسف: بعدج ما شفتي شي ..
فاطمه: ماشاءالله ..
تموا يتمشون لين وصلوا مكان على السيف فيه صخور كبيره ..




يتبع ..
__________________

فاطمه: خل نقعد شوي ..
يوسف: ان شاءالله ولا يهمج ..
فاطمه قعدت جنب يوسف مسكت يده والتفت عليه مبتسمه ..
فاطمه مبتسمه: يوسف ..
يوسف: عيونه ..
فاطمه: أحــبــك ..
يوسف ضغط على يدها: وانا اموت فيج ..
فاطمه حطت راسها على كتف يوسف ومسكت يده .. تموا يتأملون روعة الغيوم وجمال البحر .. بعد هالقعده الرومنسيه رجعوا للفندق وقضوا لليلتهم هناك .. اليوم اللي بعده ركبوا يخت كبير وفخم .. خذهم للجزيره الثانيه ..
يوسف وفاطمه كانوا قاعدين صوب المسبح ويسولفون ..
فاطمه: بصراحه روعه هاليخت ..
يوسف: بصراحه حلو ومريح .. بس تدرين لما كنا فالمكسيك ركبنا يخت عجيب .. طبعا كان اصغر لانه شخصي تقريبا .. بس كل اللي يخطر وما يخطر في بالج موجود فيه ..
فاطمه: وااااو ..
يوسف: رحلتة المكسيك ما انساها .. صج تونست فيها مع الشباب ..
فاطمه طالعة يوسف: تفكر تكررها ؟
يوسف: والله اذا عزموا الشباب ليش لأ ..
فاطمه: فديت روحك .. ان شاءالله دوم اشوفك مستانس حبيبي ..
يوسف: قربج يسوى عندي كل هالدنيا وما فيها ..
فاطمه انحرجت: فديت روحك يا يوسف ..
طالعها يوسف مبتسم: حبيبتي قومي نتمشى شوي ..
فاطمه: يلا حبيبي ..
قاموا من مكانهم وراحوا يتمشون حول اليخت .. فاطمه ويوسف قضوا احلى ايامهم يتنقلون من جزيره لجزيره .. فاطمه كانت وايد فرحانه بالمكان وبقرب يوسف .. ويوسف كان وايد فرحان لان فاطمه حلاله وهو حلالها .. انقضت ايامهم بوناسه وفرح ورومنسيه ..


هلي لا تحرموني منه ..
هلي لا تبعدوني عنه ..
مثل ما هو قطعه مني .. انا تراني قطعه منه ..
احبه .. اموت انا اذوب انا ادوخ انا والله وميت فيه ..
احبه .. وعقلي وقلبي وروحي يا علني ما بكيه ..
هلي لا تحرموني منه ..
هلي الله يسامحكم .. اذا ما كان عاجبكم
هلي تكفون طالبكم .. احس بشوفه الجنه ..
هلي لا تحرموني منه ..
هلي تكفون خلوني .. معاه ولا تلوموني ..
هلي ماريد انا غيره .. ولا يغني احد عنه ..
فارس ومناف حبايب انجرحوا من بعض .. فارس جرح مناف من غير ما يقصد ومناف جرحته من غير ما تقصد .. فارس قاعد في الشقه بروحه ويطالع التلفون .. مناف قاعده بروحها في غرفتها واطلع التلفون .. مسحت دموعها وقامت من سريرها وقفت جدام المرايه وتمت تتأمل ويها اللي بدت عليه علامات التعب ..
مناف " وحشتني يا فارس .. خاطري اسمع صوتك .. خاطري اشوفك " ..
طالعت دموعها اللي ملت عيونها ونزلت على خدودها .. غطت ويها بيدينها الناعمات وصاحت بقهر ..
فارس وقف عند المرايه وشاف شكله .. شعره مبعثر ولحيته مو مرتبه .. السواد تحت عيونه بدى واضح ..
فارس " وحشتيني يا مناف .. خاطري اسمع صوتج .. خاطري اشوفج "
طالع نفسه بكل حزن .. غطى وي بيدينه وخذ نفس عميق .. رجع مكانه فالصاله وتم يطالع التلفون .. تكى براسه على وراه وغمض عيونه .. رن جواله وكان محمد ولد عمه المتصل ..
فارس: هلا ..
محمد: فروسي ..
فارس ابتسم: حمودي ..
محمد: وينك ؟
فارس: وين بكون يعني .. في بيتي ..
محمد: تجينا القهوه .؟
فارس: لا ماعتقد ..
محمد: ليش ؟
فارس: مالي خاطر اطلع ..
محمد: تعال غير جو .. بسك كآبه ياخي ..
فارس: حمود الحين بنكمل شهر وماتصلت لي .. واتصل لها وتلفونها مبند ..
محمد " الله يعينك يا فارس ": زين تعال القهوه فرفش شوي ..
فارس: لا مب جاي ..
محمد: على راحتك .. يلا سلام ..
فارس: سلام ..
سكر من ولد عمه وهو يفكر في مناف .. رن جواله وشاف الشاشه وكان فيصل المتصل .. استغرب من اتصال فيصل .. حس بالتوتر ورد ..
فارس: هلا فيصل ..
فيصل بخوف: فارس الحقني ..
فارس قام من مكانه: شو فيكم ؟
فيصل: اختي طايحه على الارض وماتتحرك ..
فارس"مناف!!": ها .. شو فيها ؟
فيصل: مادري .. اخاف تكون ماتت ..
فارس: الحين جايكم ..
فيصل: بسرعه الله يخليك ..
فارس: زين زين ..
فارس حس انه حلمان .. قام من مكانه وبسرعه ركب السياره وطار صوب بيت مناف .. كان يسوق بسرعه جنونيه من خوفه على مناف .. وصل بيتهم و شاف عبدالله واقف عند الباب ويصيح بخوف .. فارس كان ميت من الخوف على مناف .. وعبدالله شكله يكسر الخاطر وهو يصيح ويمسح دموعه .. اول ما شاف سيارة فارس ركض صوبها فارس نزل من السياره وحض عبدالله اللي ارتمى في احضانه يرجف ويصيح ..
عبدالله: مناف ما تتحرك ..
فارس: ان شاءالله ما عليها شر فديتك ..
عبدالله حضن فارس ولا تركه .. فارس اتصل بفيصل اللي ركض برا عند فارس ..
فيصل: اختي في غرفتها وامي عندها .. طايحه على الارض ولا تتحرك ..
فارس: سو لي درب بدخل ..
فيصل ركض بسرعه عند امه اللي كانت منهاره جنب بنتها ..
فيصل: يمه فارس بيدخل ..
ام مناف: باغطي اختك خله يدخل ..
طلع فيصل عند الباب ونادا فارس ..
فيصل: تعال بسرعه فارس ..
فارس دخل بيت مناف ولحق فيصل لين غرفة مناف .. كان شايل عبدالله ويمشي بسرعه .. وصل غرفة مناف وشاف مناف ممده على الارض و مغطيه بالعبايه .. نزل عبدالله وقرب من ام مناف ..
فارس: شفيها يمه ؟
ام مناف: مادري شفيها صار لها كم اسبوع لا تاكل ولا تشرب شي .. كله بروحها وزعلانه ..
فارس: زين شليها انتي وفيصل خل نوديها السياره ..
ام مناف: ان شاءالله ..
فارس: فيصل .. ساعد امك يلا بقرب السياره اكثر عند الباب ..
فيصل: ان شاءالله ..
فارس مسك يد عبدالله وراح صوب السياره قربها عند الباب وانتظر فيصل و ام مناف .. اول ما قربوا ساعدهم يحطونها على الكرسي .. فارس كان قلبه يتقطع على مناف ..
فارس: غطوها عدل ..
ام مناف وسط دموعها: ان شاءالله ..




يتبع ..
__________________

فارس كان حاط عبدالله في حضه .. وفيصل قاعد جنبه .. وام مناف تعابل بنتها فالسيت اللي ورا .. فارس طار على المستشفى .. اول ما وصل ركض هو وفيصل عند الاستقبال .. الممرضات ركضوا صوب السياره بالسرير .. نزلوا مناف اللي كان مغمى عليها .. حطوها على السرير وركضوا فيها لين غرفة الكشف .. ام مناف راحت مع الممرضات وفارس وعبدالله وفيصل كانوا ينتظرون .. فيصل كان ميت من الخوف .. ويفكر في اخته خايف ن مصيرها يكون مصير نايف .. لانه عاش موت نايف بتفاصيله .. فارس كان يشوف الخوف الواضح على فيصل .. اما عبدالله كان يرجف مثل الطير .. يصيح شوي ويسكت شوي ..
عبدالله: فارس ..
فارس: نعم ..
عبدالله: مناف بتروح عند الله مثل نايف ؟
فارس تسارعت دقات قلبه: ان شاءالله ما عليها شر .. الحين الدكتوره بتطمنا عليها ..
فيصل واقف يطالع الدريشه ويفكر بصمت .. فارس كان يراقبه بحزن ..
في غرفة الكشف تبين ان مناف هبوط وجسمها فقد نشاطه لانها ما تاكل ولا تشرب .. ام مناف كانت تصيح بحزن على بنتها والحاله اللي وصلت لها .. طمنتها الدكتوره على مناف وطلعت معاها عند الشباب تطمنهم هم بعد .. الدكتوره مشت مع منافعند الشباب وكلمت فارس ..
الدكتوره: زوجتك ما عليها شر ..
ام مناف وفارس تموا يطالعون بعض ..
فارس: شلون حالتها الحين ؟
الدكتوره: عطنها ابره تهديها .. وحطين لها المغذي .. بس لازم تلزم زوجتك انا تاكل .. جسمها فقد نشاطه من قلة الاكل ..
الدكتوره: انت مزعل المدام ؟
فارس ارتبك: ها ..
ام مناف انقذت الموقف: بنتي دلوعه شوي .. وخايفه على رشاقتها ..
الدكتوره: بس طريقتها غلط ..
ام مناف: راسها يابس ولا تسمع الكلام ..
الدكتوره: زوجها ان شاءالله بيقنعها .. لازم تراقبها وتراقب اكلها ..
فارس: ان شاءالله ..
فيصل كان يطالع فارس ولاحظ ارتباكه .. عبدالله كان يتخل لو فارس صج زوج اخته مناف .. ام مناف كانت تشوف بوفارس في فارس ..
ام مناف " وايد يشبه محمد " ..
الدكتوره كتبت لفارس وصفة ادويه لمناف .. فارس خذها وراح الصديدليه وكان عبدالله معاه .. بعد ماخذ الادويه رجع الاستراحه عند ام مناف وفيصل ..
فارس: يمه هاي الادويه حقها .. خليها تاخذها بانتظام ..
ام مناف: ان شاءالله .. جزاك الله خير يا فارس .. والله بدونك كنا بنضيع ..
فارس: انا ولدج يا يمه .. واللي تامرين فيه انا حاضر لج ..
ام مناف: ما قصرت يا ولد الاجاويد ..
فارس: انا بطالع شوي برا وبرجع .. مب متأخر عليكم ..
ام مناف: الله يحفظك ..
فارس: سلام ..
فارس راح صوب غرفة الدكتوره .. طق الباب ودخل عليها .. الدكتوره استقلبت فارس بابتسامه حلوه ..
الدكتوره: تفضل حياك ..
فارس: جزاج الله خير ..
الدكتوره: شلون خليتها تسوي بنفسها جي ؟
فارس باحراج: قالت لج امها ان راس يابس وعنيده وايد هي ..
الدكتوره: تراها اموره وحرام اللي تسويه بنفسها .. لو ستمرت بهالشي تراها بتضر نفسها اكثر .. لازم تكلمها
فارس: ان شاءالله ولا يهمج .. زين ممكن اشوفها ؟
الدكتوره: اي اكيد .. الحين بتصل بالممرضه توديك غرفتها ..
فارس: هي قاعده ؟
الدكتوره: من التعب تقعد شوي وترجع تنام ..
فارس " فديتها ": زين انتوا بتخلونها عندكم فالمستشفى ؟
الدكتوره: اليوم لازم اتم عندنا عشان نراقب حالتها .. وبأذن الله بكره بنطلعها الظهر ..
فارس: ان شاءالله ..
دخلت الممرضه تنتظر فارس .. فارس سلم على الدكتوره وشكرها وراح ورا الممرضه غرفة مناف .. كان يمشي بسرعه ويسابق الممرضه لين غرفة مناف .. الممرضه كانت تشوف فارس وتضحك عليها .. وصلوا الغرفه وفارس طاير وهو يمشي وراح سيده .. الممرضه نادته ..
الممرضه: لو سمحت الغرفه هني ..
فارس رجع صوبها وكان منحرج من نفسه ..
فارس: مشكوره اختي ..
الممرضه: تستاهل سلامتها ..
فارس: الله يسلمج ..
دخل الغرفه وشاف مناف والابره في يدها .. سكر الباب وقرب منها .. تم يتأمل ملامحها البريئه .. قعد على الكرسي ومسك يد مناف .. قربها من شفته وباسها برقه .. قرب منها وهمس في اذنها ..
فارس: يا قلبه ..
مناف سمعت صوت فارس في اعماقها وكانت تفكر انها تحلم .. كانت تتأوه من الالم والتعب ..
مناف: همممم ..
فارس بهمس: حياته وروحه انتي ..
مناف فتحت عيونها بتعب وشافت ويه فارس بس ما كانت قادره تميزه من التعب .. بطلت عيونها عدل وشافت فارس يطالعها ومبتسم .. مناف حاولت انها تتكلم .. فارس حط يده على شفايفها ..
فارس: لا تقولين شي حياتي ..
مناف: همممم ..
فارس: عمري انتي .. ليش سويتي بنفسج جي حبيبتي ؟ امج واخوانج خايفين عليج .. وانا ميت من الخوف عليج ذبحتيني يا مناف ذبحتيني ..
مناف تمت اطالع فارس ودموعها نزلت على المخده .. فارس مسح دموعها بيده ..
فارس: لا تسوين فيني جي .. انتي مني .. انتي مني .. اللي سويتيه جرحني وذبحني .. انا انتهيت يا مناف .. لا تحرميني حبج .. لا تحرميني صوتج .. لاتحرميني شوفتج ..
مناف: احبك ..
فارس عض شفته: فديت حبج انتي .. ابتسم لها وضغط على يدها بقوه ..
مناف: وين امي واخواني ؟
فارس: برا .. الحين انا بطلع وبخليهم يجون عندج ..
مناف ابتسمت لفارس بحنان .. فارس ابتسم لها بعذوبه .. طلع من الغرفه وراح صوب الاستراحه .. نادا على فيصل ..
فارس: فيصل ..
فيصل: نعم ..
فارس: انا رحت عند الدكتوره وقلت لها انكم تبونتشوفون اختكم .. وقالت تقدرون تشوفونها ..
فيصل مبتسم: والله ..
فارس ابتسم له: اي فديتك .. روح بلغ امك عشان تروحون لها .. انا بروح الحلاق وبرجع لكم ..
فيصل: انا بعد ابي اروح الحلاق .. انتظرنا شوي ..
فارس مبتسم: ان شاءالله ..
فيصل راح عند امه وقالها كلام فارس .. ام مناف استانست وراحوا كلهم غرفة مناف .. دخلوا عليها وكانوا مبسوطين .. مناف اول ما شافتهم استانست .. ام مناف حضنتها وتموا يصيحون ..
ام مناف: ليش تسوين بنفسج جي يمه ؟
مناف صدت عن امها وكانت منحرجه منها ..
ام مناف: وش في خاطرج يمه قولي لي ..
مناف: مافي خاطري شي ..
ام مناف: فديت قلبج يا بنتي .. ترا مالنا غيرج .. خوفتينا عليج ..
مناف: انا آسفه يمه .. والله ما كررها ..
عبدالله: الحمدلله ان الله ما خلاج تروحين مع نايف ..
مناف طالعت عبدالله بحنان وحضنته ..
فيصل قرب منها وباسها: الحمدلله على السلامه مناف ..
مناف: الله يسلمكم .. والله احبكم وايد ..
حضنت عبدالله وفيصل وباستهم .. ام مناف كانت قاعده على السرير وتشوف حب عيالها لبعض .. كانت مبسوطه عليم وايد ..
فيصل: الحين انتي احسن ؟
مناف مبتسمه: يوم شفتكم صرت احسن .. فديتكم والله ..
عبدالله بوناسه: مناف صج فارس بيستوي ريلج ؟
الكل طالع عبدالله باستغراب ..
مناف: ها ؟ من ؟
ام مناف: عبود بسك لا تسولف مع اختك وايد .. خلها ترتاح ..
مناف وفيصل طالعوا بعض ..
مناف: يمه متى باطلع من هني؟
ام مناف: اذا تحسنت حالتج ان شاءالله بكره .. بس لا عاد تسوين في نفسج جي مره ثانيه يمه ..
مناف: ان شاءالله ..
فيصل: يمه انتي قعدي مع مناف انا وعبود بنروح الحلاق مع فارس ..
ام مناف: شوله تروحون معاه ؟
فيصل: ابي احلق ..
عبدالله بوناسه: وانا بعد ..
ام مناف: زين لا تلعوزون الريال ..
عبدالله طب من السرير: ان شاءالله ..
فيصل باس مناف: بنرجع زين ..
مناف حضنته: انتظركم فديتكم .. وين عبود ؟
فيصل: .. عبود المينون طلع عند الريال ..
الكل ضحك على برأة عبدالله .. فيصل طلع ولقى عبدالله متعلق برقبة فارس ويضحك ..
فارس: تطمنتوا على اختكم ؟
فيصل مبتسم: اي الحمدلله ..
عبدالله: كانت تضحك معانا .. حتى قلت لها الحمدلله ان الله ماخذج مع نايف اخوي ..
فارس وفيصل طالعوا بعض بتوتر ..
فيصل: ان شاءالله تقوم بالسلامه وترجع معاكم البيت بكره ..
عبدالله رفع ايدينه فوق: ان شاءالله يارب ..
فارس حضنه بقوه وباسه على جبهته ..
فارس: يلا نروح الحلاق ..
فيصل وعبدالله: يلا ..
طلعوا الثلاثه من المستشفى متجهين للحلاق مع فارس .. فارس حس ان روحه ردت له بعد ما تطمن على مناف وشافها .. دخلوا الحلاق ثلاثتهم وحلقوا نفس الشي .. طلعوا يتمشون فالسياره شوي ..
عبدالله قرب من فارس: فارس ..
فارس مبتسم: هلا ..
عبدالله: انت بتصير ريل مناف اختي ؟
فارس التفت على عبدالله .. فيصل هز راسه وكلم عبدالله ..
فيصل: عبود اسكت ..
عبدالله: مابي اسكت .. وابي فارس يرد علي ..
فيصل: عبود عيب والله بعلم امي عليك ..
فارس: ان شاءالله بكون ريل اختك ..
فيصل وعبدالله طالعوا بعض وابتسموا بوناسه ..
فارس " ان شاءالله بكون ريل مناف .. وقريب ان شاءالله " ..
عبدالله بوناسه: يااااي ..
فارس ضحك على عبدالله .. مروا خذوا اكل لمناف وراحوا المستشفى .. دخلوا وكان عبدالله مستانس وراح يركض لين الغرفه ..
عبدالله: هااااااي .. انا هني ..
مناف مبتسمه: فديت قلبك والله ..
ام مناف: فديت نورك و الله ..
عبدالله ركض وحضن امه بقوه .. باسها على راسها وتم قاعد في حضنها ..
مناف مبتسمه: شهالزين عبود ..
ام مناف مسحت على راس ولدها: اي والله شهالزين ..
عبدالله مبتسم: بس مناف تحلق احلى بعد ..
ام مناف ومناف ضحكوا على برأة عبدالله .. دخل فيصل وفي يده الاكل .. حط الاكل على الطاوله وراح باس امه ..
ام مناف: نعيما ..
فيصل مبتسم: الله ينعم عليج ..
مناف: شهالزين فصول ..
فيصل: .. والله انتي تحلقين احلى بعد ..
ام مناف: مب متعودين على يد الحلاق ..
مناف: ..
فيصل: زين يلا اكلي مناف ..
مناف " فديتك يا فارس " ..
عبدالله: جبنا لج شوربه حلوه .. وجبنا لج دياي مشوي حلو .. انا بعد ابي اكل ..
ام مناف: عيوني لك انته .. فيصل يبه تعال ساعدني ..
فيصل: ان شاءالله ..
ام مناف وفيصل رتبوا الاكل وقربوا الطاوله عند مناف .. تجمعوا كلهم وكلوا بهدوء .. مناف كانت تاكل وتحس بألم لان لها فتره ما كانت تاكل عدل .. فكانت تاكل شوي شوي .. عبدالله كان ياكل وهو مبسوط ..
فارس كان في الاستراحه ويفكر في مناف .. طلع جواله من جيبه واتصل بمحمد ولد عمه ..
محمد: اكيد غيرت رايك وبتجي القهوه ..
فارس: ه .. لا ما غيرت رايي ..
محمد: افااا ..
فارس:
محمد لاحظ ان نفسية فارس متغيره .. والوناسه باينه عليه ..
فارس: حمود بقولك ..
محمد: قول يا قلبي انته ..
فارس: بعد عمري وقلبي وطوايفي انته ..
محمد: فروس هات من الآخر ..
محمد وفارس: ..
فارس: انا فالمستشفى معاها ..
محمد عقد حواجبه: فالمستشفى .. و معاها ؟؟ عسى ماشر ؟
فارس: اتصلي اخوها وقالي انها طايحه فالبيت ولا تتحرك .. انا على طول حركت صوبهم وجبناها هني .. تدري من بعد ذيك السالفه نفسيتها وايد تعبت .. وتقولي امها انها ما كانت تاكل ودوم قاعده بروحها .. عورت قلبي يا حمود




يتبع ..
_____________

محمد: سلامات والله ما تشوف شر ..
فارس: دارت فيني الدنيا يوم وصلت بيتهم وشفتها ممده على الارض ..
محمد: دخلت بيتهم ؟
فارس: اي والله .. امها واخوها شلوها لين السياره مساكين .. تدري ما قدرت اقربها اكثر .. وطرت فيها لين المستشفى هني .. بس الحمدلله ربك ستر .. لو تشوف حالة امها واخوانها والله يقطعون القلب ..
محمد: لا حول ولا قوة الا بالله .. الحين هي شلونها ؟
فاس: والله طايحه على الفراش وحاطين لها المغذي .. امها واخوانها عندها الحين ..
محمد: الحمدلله .. من متى هالكلام ؟
فارس: شفت لما اتصلت لي عشان نروح القهوه ؟
محمد: اي ..
فارس: بعدك اتصالك على طول جاني اتصال فيصل ..
محمد: تستاهل سلامتها فروس ..
فارس مبتسم: الله يسلمك حمودي ..
محمد: متى بتطلع من المستشفى ؟
فارس: تقول الدكتوره بكره ان شاءالله ..
محمد: ان شاءالله ..
فارس: بقولك حمود ..
محمد: هلا فديتك ..
فارس: تخيل لما دخلوها غرفة الكشف وشيكوا عليها .. طلعت لنا الدكتوره مع امها يطمنونا .. قول شو تقولي الدكتوره عنها ..
محمد: شو ؟
فارس: كل شوي قالت لي زوجتك و زوجتك ..
محمد: احلف ..
فارس: والله العظيم .. وامها واخوانها يطالعوني .. وانا منحرج ..
محمد: تدري اني تفائلت يا فروس ..
فارس: حتى انا ..
محمد: الله يكتبكم من نصيب بعض ان شاءالله ..
فارس: آمين ..
محمد: اجيك المستشفى ؟
فارس: يا ليت حمودي ..
محمد: زين خل اخلص عشاي وبجيك ..
فارس: جزاك الله خير ..
محمد: حاضرين لك حبيب قلبي ..
فارس: احم احم .. عاد ماقدر على هالكلام والله ..
محمد: لاتصدق نفسك وايد ..
محمد وفارس: ..
في غرفة مناف بعد ما تعشوا ام مناف رتبت الغرفه وقعدت على الكرسي جنب بنتها .. عبدالله كان قاعد على السرير ويسولف مع مناف .. اما فيصل طلع عند فارس فالاستراحه .. ام مناف كانت تفكر في فارس وملامحه ..
ام مناف " انا متأكده ان فارس له علاقه بمحمد .. وايد يشب .. وربي كأني اشوف محمد .. الله يرحم ذيك الايام .. لو اني ما انفصلت عن محمد هل بتكون عندي مناف و عبود وفيصل ونايف ؟ ولا بيكونون عيالي اكثر .. هل بيعيش نفس الحين ولا احسن .. بس ابو مناف ماقصر على حياته .. الحمدلله على كل حال " .. تمت ام مناف تفكر في محمد طليقها اللي هو بوفارس الحين .. وكانت تتذكر ايام خطوبتهم .. تذكرت ابو مناف وصاحت .. لانها حبته وايد .. وكانت عايشه معاه على الحلوه والمره .. بس رب العالمين خذ امانته وتركها للزمن ..
فارس وفيصل كانوا فالاستراحه يسولفون لين وصل محمد عندهم .. فيصل سلم على محمد وقعدوا كلهم مع بعض
محمد: الحمدلله على سلامة الاهل يا فيصل ..
فيصل مبتسم: الله يسلمك .. جزاك الله خير ..
محمد: ما عليكم شر ان شاءالله ..
فيصل: انشاءالله ..
تموا الشباب يسولفون فالاستراحه .. في غرفة مناف عبدالله فجأه نزل من سرير مناف وراح قعد في حضن امه ..
عبدالله: يمه ..
ام مناف: ابوي انته ..
عبدالله: متى فارس بيتزوج مناف ؟
ام مناف استغربت: هو ما بيتزوجها يبه .. ليش تقول هالكلام ؟
عبدالله: بلا هو قالنا فالسياره انه بيتزوج مناف ..
مناف توترت وتمت تتنفس بسرعه .. طالعت امها باحراج ونزلت راسها .. ام مناف كانت مستغربه من كلام عبدالله ولدها ..
ام مناف: متى قالك هالكلام ؟ وليش قاله ؟
عبدالله: انا سألته فالسياره .. وهو قالي انه بيتزوج مناف .. وكان مستانس بعد ..
ام مناف " بس احنا وين وهالريال وين ؟ "
ام مناف تغير الموضوع: زين يبه قوم شوف فيصل اخوك خل نروح البيت ونخلي اختك ترتاح ..
عبدالله باس امه: زين يمه ..
طلع عبدالله من الغرفه وترك امه واخته في حيره من كلامه ..
ام مناف: مناف بسألج يمه ..
مناف: قولي يمه ..
ام مناف: لو تقدم لج ولد الاجاويد توافقين عليه ؟
مناف " اكيد بوافق عليه .. ليش انا قادره اعيش من دونه اصلا .. فديت قلبه والله " ..
مناف: هممممم .. مادري يمه ..
ام مناف: ليش تردينه بعد .. ريال وماعليه كلام .. قايم فينا وشايلنا بعيونه .. اخوانج يحبونه ومداريهم ..
مناف سكتت وماردت على امها ..
ام مناف: لي متى بتردين الناس يمه .. الدكتور كان خوش ريال ورديتيه .. عاد مالج حجه على هالريال ..
مناف " فديته هالريال والله .. بس الله يستر من اهله " ..
ام مناف: مناف يمه ردي انا اكلمج ..
مناف: والله ماعرف شاقولج يمه ..
ام مناف: لو الله كتب وتقدم لج فارس .. بزعل لو رديتيه ..
مناف نزلت راسها وتمت تفكر في كلام امها وخايفه من اهل فارس بعد الموقف اللي صار لها معاهم ..
دخل عبدالله و وراه فيصل ..
فيصل: نعم يمه ..
ام مناف: يبه شوف لنا تاكسي يرجعنا البيت .. تأخر الوقت وانتوا بكره عندكم مدارس .. وخلوا اختكم ترتاح وبنمر عليها بكره ان شاءالله ..
فيصل: ان شاءالله يمه .. التفت على عبدالله .. عبود تجي معاي .؟
عبدالله: اي ..
مسكوا ايدين بعض وطلعوا من الغرفه رايحين عند الباب عشان يشوفون لهم تاكسي .. مروا على الاستراحه اللي فيها محمد وفارس .. ناداهم فارس ..
فارس: عبود .. فيصل ..
فيصل التفت مبتسم: هلا ..
فارس: وين رايحين ؟
فيصل: بنشوف لنا تاكسي عشان نرجع البيت ..
فارس تنرفز من كلام فيصل .. قام من مكانه وراح صوب فيصل ..
فارس: وانا ليش موجود هني .. عشان انتوا ترجعون بتاكسي ..
فيصل باحراج: امي قالت لي ..
فارس: تعال معاي عند الغرفه وناد امك ابي اكلمها ..
فيصل: ان شاءالله ..
عبدالله: انا بروح عند محمد ..
فيصل: زين ..
محمد استقبل عبدالله بابتسامة فرح وترحيب .. قعدوا مع بعض ويتعبثون فالتلفون ومحمد كان يوري عبدالله شغلات تضحك فالتلفون .. وعبدالله ميت من الضحك ومحمد مستانس على ضحكته ..
فارس وفيصل راحوا صوب الغرفه وفيصل نادا على امه عشان يكلمها فارس .. طلعت ام مناف عند باب الغرفه تكلم فارس ..
فارس: يمه انا بوصلكم ليش تطلبون تاكسي ..
ام مناف: يبه مانبي نكلف عليك ..
فارس: زعلتيني بهالكلام والله .. بس والله ماتركبون مع اي غريب دام انا موجود ..
ام مناف انحرجت من كلام فارس وحست بالذنب ..
ام مناف: السموحه منك يا ولد الاجاويد .. ما يصير خاطرك الا طيب ..
فارس: وقت ما تبون ترجعون انا جاهز خلي فيصل ولا عبود يكلموني وانا بانتظركم عند الباب ..
ام مناف: جزاك الله خير يبه ..
فارس: انا تحت امرج يمه ..
ام مناف: زين نبي نروح الحين الله لا يهينك ..
فارس: من عيوني .. الحين اجيب السياره عند الباب وانتظركم ..
ام مناف: ان شاءالله يبه ..
ام مناف رجعت الغرفه عند بنتها .. وفيصل وفارس رجعوا عند محمد وعبدالله .. ام مناف سلمت على بنتها وتطمنت عليها ..
ام مناف: يمه لو بغيتي شي اتصلي حق فيصل .. ان شاءالله ما عليج شر ..
مناف حضنت امها وصاحت: يمه ليش تخلوني بروحي .. ناموا كلكم عندي ..
ام مناف: فديت دموعج .. بكره بيرخصونج ان شاءالله وانا بجيج من الصبح بعد ما يروحون اخوانج مدارسهم ..
مناف وسط دموعها: ان شاءالله .. عاد لا تتأخرين يمه ..
ام مناف تمسح دموع بنتها: من عيوني فديتج .. بسج صياح حبيبتي ..
مناف: ان شاءالله ..
ام ناف: شتبين اجيب لج من البيت ؟
مناف: ابي ملابس جديده .. وجيبي جوالي بعد يمه .. وابي عبايتي ..
ام مناف: ان شاءالله .. ما نسيتي شي بعد ؟
مناف: لا يمه ..
ام مناف: ارتاحي ولا تتحركين .. ولو بغيتي شي نادي على الممرضات .. ما عليج شر الغاليه ..
مناف: ان شاءالله يمه ..
مناف حضنت امها بقوه وباستها .. ام مناف مسحت على راس بنتها وباستها على جبهتها .. عدلت عبايتها وطلعت من الغرفه .. مناف كانت حاسه بالوحده وتمت تصيح .. ام مناف مرت على الاستراحه اللي فيها الشباب ونادت على عبدالله اللي كان مندمج مع محمد وميت من الضحك .. راح لها عبدالله وفيصل كان فالسياره مع فارس .. ام مناف ركبت السياره مع فارس .. ام مناف كان فيها فضول .. وسألت فارس عن اسمه ..




يتبع ..
__________________

ام مناف: فارس يبه بسألك ..
فارس: آمريني ..
ام مناف: ما يآمر عليك العدو .. بس من ابوك ؟
فارس: طال عمرج انا فارس بن محمد بن سلطان ..
ام مناف " انا كنت متأكده ": والنعم يبه .. ولد اجاويد ..
فارس مبتسم: ما عليكم زود ..
ام مناف " يالله الدنيا دواره .. فارس طلع ولد محمد .. آآه " ..
تكت براسهاعلى ورا وتمت تفكر وتفكر في فارس .. وصلوا البيت بسلام .. نزلهم فارس وام مناف شكرته ..
ام مناف: جزاك الله خير يبه ..
فارس: امرج بكره الصبح اخذج المستشفى ..
ام مناف: والله مابي اكلف عليك ..
فارس: يمه والله تزعليني بكلامج ..
ام مناف: الله تشوفه يبه ..
فارس: الساعه كم امرج ؟
ام مناف: تعالي الساعه 7 ونص ..
فارس: من عيوني يمه ..
ام مناف: تحمل بنفسك فالطريق ..
فارس: ان شاءالله ..
دخلت ام مناف وعيالها البيت اللي خلا من مناف .. كانوا مفتقدين وجودها ..
فارس رجع المستشفى محمد كان ينتظره ..
محمد: جزاك الله خير يا فروس ..
فارس ابتسم: والله ودي اسوي لهم اكثر ..
محمد: كفيت و وفيت فديتك ..
فارس: الله يقدرني ان شاءالله ..
محمد: زين انت بتم عندها ؟
فارس: اي ..
محمد: ليكون بتروح عندها ..
فارس: بمر عليها اتطمن وبتم هني فالاستراحه ..
محمد: اي جي انت تمام ..
فارس رفع حاجب: صج والله .. شو شايفني يعني ..
محمد: صايع ضايع ..
فارس: لا والله ..
محمد وفارس: ه ...
فارس: ما قصرت حمودي جزاك الله خير ..
محمد: ولو .. انا حاضر لك يا فروس اي وقت .. تعرف غلاك عندي ..
فارس: والله بدونك ما كنت بصرف نفسي يا حمودي .. لولاك كان انا ضايع الحين ..
محمد حط يده على كتف فارس: الله لا يغير علينا ..
فارس: آمين ..
محمد: يلا عيل استأذن انا ..
فارس: الله وياك الغالي ..
محمد: زين بقولك ..
فارس: هلا ..
محمد: عاد لا تمصخها وتبلط عندها .. تطمن واطلع عنها ..
فارس: ه ..
محمد: لا تضحك .. ترا بشيك عليك انا ..
محمد وفارس ضحكوا وسلموا على بعض .. محمد اتجه لبيتهم .. وفارس راح صوب غرفة مناف .. طق الباب ودخل عليها .. مناف عدلت شيلتها واعتدلت في قعدتها .. فارس مشى صوب السرير وعيونه عليها .. مناف كانت ميته من الخجل ومنزله راسها ..
فارس: الحمدلله على السلامه يالغلا ..
مناف: الله يسلمك ..
فارس سحب الكرسي وقربه من السرير .. قعد جنبها وتم يتأمل جمالها بصمت .. مناف وايد توتر من قرب فارس ونظراته لها ..
فارس: لا تعيدينا ..
مناف: شنو اللي ما عيدها ؟
فارس: انت ادرى ..
مناف بدلع: بشنو ادرى ؟
فارس: منافووو لا تستعبطين ..
مناف: شنو منافوو ..
فارس: كيفي ..
مناف: لا مب كيفك ..
فارس يطالعها: اموت في دلعج ..
مناف بلعت ريقها بصعوبه ونزلت راسها من الاحراج والخجل .. فارس ابتسم وتم يطالعها مبسوط على شكلها وهي منحرجه ..
فارس: كلتي ؟
مناف: اي الحمدلله ..
فارس: بالعافيه حبيبتي ..
مناف: الله يعافيك .. ماقصرت ..
فارس: تحت امرج احنا ..
مناف: الساعه كم الحين ؟
فارس طالع ساعته: الحين الساعه 12 ونص ..
مناف: زين ابي انام ..
فارس: يعني تطرديني ؟
مناف بعفويه: لا والله فديتك ما قصد ..
فارس قرب منها: اموت فيج مناف ..
مناف تمت تتنفس بسرعه من التوتر ..
فارس مسك يدها: ارتاحي يا قلبه .. انا بكون موجود في الاستراحه .. لو بغيتي شي اتصلي لي ..
مناف سحبت يدها: بس جوالي مب معاي ..
فارس: قولي حق الممرضه تناديني .. بوصيها وانا طالع ..
مناف: انشاءالله ..
فارس مسك يدها مره ثانيه وبجرأه قربها من شفايفه وباسها بهدوء .. مناف كانت تتنفس بخوف وهي تشوف فارس يبوس يدها .. مسك يدها وضغط عليها بقوه وهو يطالع عيونها ..
فارس: تصبحين على خير يا قلبه ..
مناف: وانت بخير ..
ترك يدها في حضنها وابتسم لها .. مناف ابتسمت له ونزلت راسها .. طلع فارس من الغرفه وراح الاستراحه وهو يفكر في مناف .. اما مناف فكانت تفكر في جرأة فارس وحركاته .. تم فارس في الاستراحه يحرس مناف .. ومناف نامت بهدوء وكانت حاسه بالامان لان فارس قريب منها .. تطمنت ونامت بهدوء وراحه ..
الساعه 6 ونص دخلت الممرضه على مناف وقعدتها من النوم لان الدكتوره بتجيها تشيك عليها وتشوف حالتها ..
اول ما فتحت عيونها شافت باقة ورد على الطاوله .. شافتها وابتسمت .. هالباقه كانت من فارس ..
الممرضه: حليله زوجج كان وايد قلق عليج .. ما نام كلش .. كل شوي جى عند غرفتج يشيك .. ولا يسألنا عنج .. ما حسيتي فيني وانا ادخل عليج امس ؟
مناف: لا والله ما حسيت بشي من التعب .. " فديت قلبه والله "
الممرضه: حليله ريلج والله ..
مناف اكتفت بابتسامه ..
الممرضه الحين بخليج تتريقين على راحتج .. لان الدكتوره بتمر عليج الساعه 7 ونص تقريبا ..
مناف: جزاج الله خير ..
مناف كانت وايد فرحانه باهتمام فارس لها .. كلام الممرضه عن فارس زاد تعلقها فيه وحبها له .. الساعه 7 فارس طلع من المستشفى رايح بيت مناف .. ام مناف كانت تنتظر فارس على احر من الجمر .. اولم ا وصل فارس شاف ام مناف واقفه عند الباب تنتظر .. قرب من باب البيت .. نزل وفتح لها باب السياره اللي ورا خذ الاغراض من يدها وحطها بصندوق السياره.. ركبت ام مناف وفارس سكر الباب .. صبح عليها واتجهوا للمستشفى .. وصلوا الساعه 8 بالضبط .. كانت الدكتوره عند مناف فالغرفه تشيك عليها .. سلمت عليها ام مناف وسألتها عن حالة بنتها
الدكتوره: ما شاءالله عليها احسن اليوم .. وان شاءالله بكتب لها ورقه عشان ترجع البيت الظهر ..
ام مناف: الحمدلله .. جزاج الله الف خير ..
الدكتوره: الله يسلمج يمه .. بكتب لج اجازه يا مناف حق نهاية الاسبوع .. الثلاثاء والاربعاء والخميس بكتبتهم لج اجازه ..
مناف: مشكوره يا دكتوره ..
الدكتوره: بس لا تذبحين نفسج عشان رجيم وغيره .. وانا موصيه زوجج عليج ..
مناف " فديته زوجي والله " ..
ام مناف: يعني اليوم بترجع البيت ؟
الدكتوره: ان شاءالله ..
ام مناف: الحمدلله على كل حال ..
الدكتوره سكرت ملف مناف: ما عليكم شر ان شاءالله .. ولا نبي نشوفج هني مره ثانيه يا مناف ..
مناف مبتسمه: ان شاءالله ..
الدكتوره طلعت من الغرفه .. مناف حضنت امها بوناسه ..
ام مناف: سمعتي الدكتوره شقالت ..
مناف: ان شاءالله ما عيدها ..
ام مناف كانت جايبه ريوق وشاي وقهوه .. حطت حق بنتها وجهزت لها الاكل على الطاوله ..
ام مناف: خل احط حق الريال ما قصر معانا ..
مناف: جزاج الله خير يمه ..
ام مناف غرفت له من الريوق وصبت له شاي .. طلعت عند باب الغرفه ونادت عليه .. فارس كان واقف عند باب الغرفه ويكلم الدكتوره يسألها عن حالة مناف .. بعد ما راحت الدكتوره عن فارس وطمنته على مناف .. راح صوب ام مناف ..




يتبع ..
__________________