{ نهاية حبك إعدامي } ...(قصة مميزة.. الإدارة)

فارس: السلام عليكم ..
فيصل: عليكم السلام .. هلا فارس ..
فارس: شلونك يبه ؟
فيصل: طيب والحمدلله .. اخبارك انت يا فارس ؟
فارس: تمام .. عبود شو اخباره ؟
فيصل: طيب .. قاعد يجهز للمسابقه ..
فارس: والله ..
فيصل: اي كل يوم امي تحفظه ..
فارس: ما شاءالله عليه .. متى المسابقه ؟
فيصل: بعد 3 شهور ..
فارس: عيني عليه بارده .. الله يوفقه ان شاءالله ..
فيصل: ان شاءالله ..
فارس: بقولك امك موجوده فالبيت ؟
فيصل: اي موجوده ..
فارس: انا قربت بيتكم فديتك .. بس اذا ما عليها امر قولها ابي اكلمها عند الباب ..
فيصل: ان شاءالله ..
فارس: يلا يبه انا عند البيت ..
فيصل: زين ..
سكر فيصل وراح بلغ امه ان فارس يبي يكلمها عند الباب .. ام مناف استغربت لبست عبايتها وراحت عند الباب .. فارس اول ما شافها نزل من السياره ..
فارس: السلام عليكم يمه ..
ام مناف: عليكم السلام يبه ..
فارس: شو اخباركم ؟
ام مناف: الحمدلله طيبين .. اعلومك يالاجودي .؟
فارس مبتسم: طيب الله يسلمج .. شو اخبار بنتج؟ عساها احسن الحين ؟
ام مناف: اي الحمدلله .. الفضل لرب العالمين ثم لك يا ولد الحلال ..
فارس: ما سوينا الا الواجب ..
ام مناف: جزاك الله خير ..
فجأه عبدالله دز امه وطلع يركض صوب فارس ونط عليه وحضنه .. فارس استقبله فالاحضان وابتسامته ما فارقت شفا ..
فارس: هلا والله ..
عبدالله: هااااااي .. شلونك ؟
فارس: ه .. طيب اخبارك انت ؟
عبدالله: طيب ..
فارس تم شايل عبدالله يوم طلع له فيصل يسلم عليه .. ام مناف كانت تشوف فارس وتتفكر في ملامحه لانه وايد يشبه ابوه .. طبعا هي عرفت من يكون ابوه .. وشافت حب فارس وعطفه على عيالها .. فارس التفت على ام ناف مبتسم ..
فارس: يمه حبيت ابلغج ان الاهل بيزورونكم يوم الاربعاء ان شاءالله ..
ام مناف حست بفرحه كبيره من سمعت كلام فارس ..
ام مناف: حياهم الله ..
فارس: الله يحيج يمه .. بس حبيت ابلغج .. والله يوفقنا ان شاءالله ..
ام مناف فهمت قصد فارس .. ابتسمت ونزلت راسها ..
ام مناف: الله يقدم اللي فيه الخير ..
استأذنت ام مناف ودخلت داخل .. فيصل كان مستانس لانه فهم كلام فارس .. عرف انهم بيتقدمون لاخته .. اما عبدالله ما يدري بالدنيا .. اما فارس تم مع فيصل و عبدالله يسولف عند الباب .. فجأه شاف مناف تمشي من بعيد .. شاف ساعته وكانت الساعه 5 ونص ..
فارس " فديتني توقيتي خطير " ..
عبدالله اول ما شاف مناف ركض صوبها وهو فرحان .. وفيصل راح وراه .. اما فارس فكان يراقب مناف بوناسه .. حضنت عبدالله وسلمت على فيصل .. قربت من صوب البيت وكانت تمشي بتوتر ناحية فارس .. مرت صوب الباب وهي منزله راسها وماسكه يد عبدالله وفيصل يمشي محاذيها وشايل كتبها ..
فارس مبتسم: السلام عليكم ..
مناف منزلها راسها وبهمس ردت: عليكم السلام ..
دخلت البيت وكانت متوتره .. ومستغربه وجود فارس عندهم من غير ما يقولها شي .. فيصل حط كتب مناف ورجع عند فارس .. تم معاه لين أذن المغرب ..
فارس: ناد اخوك خل نروح المسيد ..
فيصل: ان شاءالله ..
ركض فيصل داخل نادا على اخوه وراحوا المسيد مع فارس .. مناف تمت بحيره وتبي تعرف سر وجود فارس عندهم من غير ما يقولها .. فارس والشباب طلعوا من المسيد وسلموا على بعض .. تركهم فارس ورجع البيت .. وهو فالطريق اتصل بمناف ..
فارس: حياته ..
مناف: هلا حبيبي ..
فارس: شو اخبارج ؟
مناف: الحمدلله .. اخبارك انت ؟
فارس: طيب ..
مناف: شعندك اليوم مع الشباب ؟
فارس: ولا شي .. مار اسلم واسأل ..
مناف: تسأل عن ايش ..
فارس: ه .. ابيه شفيج متوتره ؟
مناف بدلع: مو متوتره .. بس غريبه جيتك من غير ما تقولي ..
فارس: انا آسف يا اميرة الاميرات .. نسيت اقولج ..
مناف بدلع: عاااد قولي ..
فارس: فديت قلبها دلوعتي .. تغديتي ؟
مناف: لا للحين ..
فارس: شو تنتظرين يعني ؟
مناف: الحين الغدا مو موضوعنا .. قولي شعندك جاينا اليوم ؟
فارس يستعبط عليها: جاي ابكي على الاطلال ..
مناف: فااااارس ..
فارس: خلاص باموت من هالدلع .. صدقيني برجع بيتكم وباخطفج من اهلج ..
مناف سكتت .. كانت منحرجه من كلام فارس ..
فارس: ه .. بسألج حبيبتي ..
مناف: قول فديتك ..
فارس: امج ما قالت لج شي ؟
مناف باستغراب: شي !!
فارس: اي ..
مناف: لا ما قالت لي شي ..
فارس: زين تغديتي حياتي ؟
مناف: لا للحين ..
فارس: زين حبيبة قلبه قومي تغدي وكلميني بعدين ..
مناف بعفويه: فارس حيرتني ..
فارس: يا ناس هالبنت اموت فيها .. وبصراخ .. اموووووت فيها والله ..
مناف: يا مينون ..
فارس: جننتيني انتي .. زين ليش حيرتج حبيبي ؟
مناف: اول شي ما قلت لي ليش جاي ؟ و بعدين تقولي امج ما قالت لج شي وتغير الموضوع .. فارس ليش تسوي جي عاد ..
فارس: .. حبيبة قلبه انتي .. وباستعباط .. لي كبرتي بتعرفين ..
مناف بدلع: ماحبك ..
فارس: لا لا .. كل شي ولا زعللج انتي ..
مناف: خلاص بسكر ..
فارس مبتسم: حياتي ما تسكرين وانتي زعلانه ..
مناف: الا زعلانه منك وماحبك ..
فارس: لا باموت جي .. ترا بدش فالطوفه ..
مناف: لا فديتك كل شي ولا تضر نفسك ..
فارس بوناسه: عمري انتي والله ..
مناف عضت شفتها: فديتك ..
فارس: حياته .. روحي تغدي وارتاحي شوي وبعدين كلميني ..
مناف: ان شاءالله ..
فارس يلعوزها: واذا امج قالت لج شي .. قولي لي ..
مناف: عااااد ..
فارس: ..
تم يضحك معاها ويلعوزها .. سكر منها وراح المكتب عند خالد .. دخل عليه وهو مبتسم ..
خالد: يه شو هالنور ..
فارس: النور بوجهك يا بوليد ..
خالد وهو يسلم على فارس: شحالك ولد عمي ؟
فارس: الحمدلله ..
قعدوا مواجهين بعض وتموا يسولفون ..
خالد: اخبار النفسيه ؟
فارس: والله هذا احنا ..
خالد: بسيطه ان شاءالله ..
فارس: ربك بيعين ..
خالد: ان شاءالله ..
فارس: ليش للحين ما رحت البيت ؟
خالد: صليت لمغرب وجيت المكتب ..
فارس: يعطيك العافيه ..
خالد مبتسم: صج انت جارنا ..
فارس: .. اي نعم
خالد: من متى يالشيطان ؟
فارس: ه .. من زمان ..
خالد: بس خوش اثاث والله ..
فارس: بركات اخوك ..
خالد: سلامي عليه بونايف ..
فارس: ما قصر والله .. قام فارس من مكانه .. يلا عيل استأذن الحين .. بروح اكمل شغلي عشان اقفل على كل شي قبل نهاية الاسبوع ..
خالد: اعطيك شوي تكمل لي ..
فارس مبتسم: عيوني لك يالشريك ..
خالد: ما تقصر ولد عمي ..
طلع فارس من مكتب خالد وراح مكتبه يخلص شغله وشغل خالد .. كان يشتغل بنشاط وحيويه ..
في بيت مناف .. مناف كانت تتغدى وامها قاعده معاها .. عبدالله وفيصل كانوا يلعبون كوره فالحوش ..
ام مناف: مناف ..
مناف وهي تبلع لقمتها: هلا يمه ..
ام مناف: في ناس جاين يزورونا يوم الاربعاء ..
مناف رفعت راسها: ها .. من هذول ؟
ام مناف خذت نفس: اهل فارس ..
مناف بلعت ريقها بصعوبه و صار ويها احمر .. نفضت يدها فالسفره وبعدتها عنها ..
ام مناف: كملي غداج يمه ..
مناف: لا بس شبعت .. الحمدلله ..
ام مناف: كدرج الموضوع ؟
مناف: لا يمه .. بس ..
قاطعتها امها: لي متى بتمين جي يمه .. ابغي اشوفج عروس .. ابغي افرح فيج .. ابغي اشوف عيالج يلعبون حولي
مناف باحراج: يمه مو هاي قصدي .. بس وترني الموضوع .. وخصوصا ان فارس دوم يروح ويجي علينا .. ما فكرت في يوم انه بيتقدم لي او حتى يطالعني ..
ام مناف بحزن: فاهمه عليج فديتج .. انا الغلطانه ..
مناف بخوف: ليش يمه ؟
ام مناف: تذكرين يوم قلت لج لا تفكرين انه بياخذج .. كنت غلطانه وادري جرحتج ..
مناف صاحت: لا يمه ما جرحتيني .. انتي وعيتيني ..
ام مناف: يا بنتي انتي استخيري .. والله يقدم اللي فيه الخير ..
مناف: ان شاءالله ..
مناف باست امها .. راحت تغسل يدها ودخلت غرفتها .. شافت النلفون وقرت مسج من فارس .. وكان المسج كالتالي ..
(( عرفتي الموضوع حياتي ؟ ابي اعرف ردة فعلج ))
مناف قرت المسج وضحكت .. ردت عليه بمسج ..
(( عرفت الموضوع .. ومن الخرعه ما كملت غداي ))
فارس قرى المسج وضحك .. رد عليها بمسج ..
(( فديت قلبج انتي .. اول ما املج عليج كل يوم بخليج تطبخين لي غداي ))
مناف قرت المسج وماتت من الضحك .. ردت عليه بمسج ..
(( عيوني لك .. انت تآمر أمر حبيبي ))
فارس قرى المسج وطار من الفرحه .. اتصل بمناف وماردت عليه .. طرشت له مسج ..
(( ابيه استحي ارد عليك ))
فارس قرى المسج " فديت اللي تستحي والله اموت فيها " .. رد عليها بمسج ..
(( انا بانتظر اتصالج زين يا قلبه ))
مناف قرت المسج وحست بالراحه .. قررت انها تتصل له بعد ما يخف توترها .. فارس ومناف فرحتهم ما تنوصف اخيرا بيجتمعون مع بعض بالحلال .. فارس كمل شغله بالمكتب .. اما مناف انسدحت على السرير وغمضت عيونها وهي مبتسمه .. كانت تفكر في مستقبلها مع فارس ..
مرت الايام بالنسبه لفارس مثل العقود .. كان ينتظر يوم الاربعاء .. اما مناف فمرت الايام بالنسبه لها مثل البرق .. كانت متوتره من لقائها بأهل فارس من بعد اللي صار ..




يتبع ..
__________________

اليوم الاربعاء .. الساعه 12 الظهر بتوقيت ( نهاية حبك إعدامي ) .. فاطمه فالجامعه مع مناف ولطيفه ..
فاطمه بوناسه: اليوم عندي موعد مهم ..
لطيفه: شو هالموعد ؟
فاطمه: هممممم .. سر ماقول لاحد ..
مناف: زين عاد لمحي لنا ؟؟
فاطمه: بعد سر ..
لطيفه: زين انا ومناف بعد عندنا موعد اليوم .. صح مناف ..
غمزت لطيفه لمناف ..
مناف: اي صح عندنا موعد مهم وايد ..
لطيفه: حتى اهم من موعدج ..
فاطمه بدلع: اخاف عندكم موعد مهم بس ..
الكل: ه ..
لطيفه: لا صج فطوم شو هالموعد ؟
فاطمه: يوم الاحد بقولكم عنه ..
مناف: شمعنى يوم الاحد ؟
فاطمه: لان يوم الاحد بتعرفون ..
لطيفه: عليج حركات يا فطوم ..
الكل: ..
لطيفه: مناف شو فيج ؟
مناف: انا ؟
لطيفه: اي .. منخطف لونج ..
فاطمه: باين عليج التوتر ..
لطيفه: امورج تمام فالبيت ؟
مناف مبتسمه: مافيني شي الحمدلله ..
رن جوال فاطمه ويوسف كان متصل لها .. كان ينتظرها عند الباب ..
فاطمه: هلا ..
يوسف: حبيبتي انا عند الباب ..
فاطمه: الحين نازله ..
يوسف: انتظرج حياتي ..
فاطمه: ان شاءالله ..
فاطمه سكرت وقامت من مكانها ..
لطيفه: بتروحين ؟
فاطمه: اي يوسف عند الباب .. تآمروني على شي بنات ؟
لطيفه: لا تسلمين حبيبتي ..
مناف مبتسمه: تسلمين حبيبتي ..
فاطمه لبست عبايتها وسلمت على البنات .. تموا مناف ولطيفه يسولفون انضمت لهم مريم ..
مريم: السلام عليكم يا بنات ..
مناف ولطيفه: عليكم السلام ..
مريم: شلونكم ؟
مناف: الحمدلله .. اخبارج انتي ؟
مريم: تمام ..
لطيفه: شلونج مع الحمل ؟
مريم: والله لايعه جبدي .. اف كله ارجع ..
لطيفه: .. بعدج ما شفتي شي ..
مريم: ابيه بعد في اكثر من جي .. يا ويلي ..
مناف كانت حاطه يدها تحت خدها وتسمع الكلام بذهول .. التفتت عليها لطيفه ..
لطيفه: الدور جايج يا عروسه ..
مناف: ابيه سوالفكم تخوف ..
مريم: ..
لطيفه: سهالات .. كل هالامور بتنسينها في لمح البصر ..
مناف بخوف: والله !
مريم ولطيفه شافوا نظرة البرائه فعيون مناف ..
لطيفه: ايه عليج يا مناف .. تجنين والله ..
مناف ابتسمت بخجل: فديت قلبج ..
مريم: الساعه كم محاضرتج مناف ؟
مناف طالعة ساعتها: الساعه 2 ونص ..
مريم: آخر محاضره اليوم ؟
مناف: اي ..
لطيفه: انا باقي لي محاضرتين ..
مناف: الله يعينج .. متى آخر محاضره ؟
لطيفه الساعه 4 تبدى وتخلص 5 وربع ..
مريم ومناف: الله يعينج ..
لطيفه: معليه باستحمل .. الكورس الجاي باعتذر ..
مناف: ليش ؟
لطيفه: ما تشوفين بطني ..
مناف ومريم: ..
مناف: والله ناسيه ..
لطيفه: حليلج يا منوفه .. ان شاءالله نشوفج جايه وبطنج جدامج ..
مريم مبتسمه: ان شاءالله ..
لطيفه: لو عندي اخو زوجتج اياه ..
مناف انحرجت ونزلت راسها " غير فارس ما راح ارضى اتزوج " ..
طالعت ساعتها ولمت كتبها وقامت ..
مناف: يلا بنات انا بروح محاضرتي ..
لطيفه مبتسمه: الله وياج ..
مريم: موفقه حبيبتي ..
راحت مناف المحاضره وهي متوتره .. دخلت المحاضره وشافت الدكتور حامد قاعد بروحه فالقاعه .. مناف من الاحراج والتوتر اللي حست فيهم من كلام لطيفه استأذنت منهم .. فكان دخولها لقاعة المحاضره قبل الوقت بوايد .. كانت الساعه 2 وربع والمحاضره 2 ونص ..
مريم ولطيفه ضحكوا على خجل مناف ..
مريم: لطوف احرجتي البنت ..
لطيفه: .. والله هالبنت تجنن .. بس والله لو عندي اخو كانت خطبتها له ..
مريم: حليلها والله .. تستاهل هالبنت ..
لطيفه: زين ماشاءالله اخوانج ولا واحد فيهم عرس .. شوفيها حق فارس المزيون ولا عزوز اخوج المقلوع توأم فطيم ..
مريم: بصراحه يا لطيفه .. انا وفطيم فكرنا في مناف ..
لطيفه عقدت حواجبها: شلون ؟
مريم: فكرنا نخطبها لفارس اخوي ..
لطيفه: والله .. زين شو قال اخوج المزيون ؟
مريم: يتحجج انه ما يفكر فالعرس .. وكل ما كلمناه بالموضوع يتهرب ..
لطيفه: زين يمكن ما يبي يتزوج الحين .. بس بطب واقفه اللي بتاخذ اخوج المزيون ..
مريم: .. عليج سوالف يا لطوف ..
لطيفه: صج اخوج غرشوب .. بس عشان اكون حقانيه اكثر ..
مريم حطت يدها تحت خدها: اي ..
لطيفه: ريلج اللي ما عليه زود عن اخوج المزيون ..
مريم: بس هاي اللي كنت ابي اوصل له ..
مريم ولطيفه: ..
لطيفه: اخوج اللي ميزه حيويته وخفة دمه .. اما خالد ريلج ثقيل ..
مريم: احم احم .. لازم حبيبتي ..
لطيفه: خفي علينا انتي والغرشوب ريلج ..
مريم: ..
تموا البنات يسولفون وبعدين لطيفه اتجهت لقاعة المحاضره ومريم راحت البيت .. نرجع لمناف اللي دخلت القاعه والدكتور حامد قاعد ويقرى كتاب .. كانوا في تقربا 4 بنات متوزعات فالقاعه .. دخلت بهدوء بس الدكتور حامد رفع راسه وطالعها .. مناف توترت ونزلت راسها .. قعدت على الطاوله وطلعت كتابها وتمت شاغلها نفسها بالكتاب الدكتور كان يطالعها بشوق .. بعد مرور 20 دقيقه القاعه امتلت بالطالبات .. مناف حست بالراحه لما امتلت القاعه وقف الدكتور وقام ينادي البنات وياخذ الحضور والغياب .. لما وصل عند اسم مناف رفع راسها وناداها .. مناف انحرجت وردت بصوت واطي .. تم يطالعها وبعدل كمل باقي الاسماء وبدى المحاضره .. وطول الوقت وهو عينه على مناف اللي كانت شوي وتصرخ من حركات الدكتور .. انتهى وقت المحاضره الطالبات ومن ضمنهم مناف شلوا كتبهم واتجهوا طالعين من المحاضره .. الدكتور نادا على مناف من بينهم ..
الدكتور حامد: لو سمحتي مناف ..
مناف بتوتر: نعم دكتور ..
الدكتور حامد مبتسم: الله يوفقج في حياتج يا مناف ..
مناف طالعته باستغراب وماعرفت بشو ترد عليه ..
الدكتور حامد مبتسم: شدي حيلج هالكورس ..
مناف ويها صار احمر: ان شاءالله دكتور ..
مشت من جدامه بسرعه وطلعت من القاعه وهي مستغربه من كلام الدكتور ..
مناف " شيقصد بكلامه؟ " ..
راحت الكفتريا وتمت تفكر في كلام الدكتور حامد .. تمت فالكفتريا بروحها لين الساعه 4 الا ربع .. شلت اغراضها وراحت صوب مواقف الباصات .. ركبت الباص وكل تفكيرها باللي بيصير اليوم .. بدى العد التنازلي لمناف وفارس طبعا ام فارس والباقي مايدرون عن فاطمه والجده .. فاطمه تغدت مع يوسف فالبيت وريحت شوي .. و على الساعه 4 طلعت رايحه بيت يدها .. نزلها يوسف وراح بيت بوفارس حق عبدالعزيز .. دخلت فاطمه وسلمت على يدها ويدتها وعمها بومحمد اللي كان موجود ..
فاطمه: شلونك عمي ؟
بومحمد مبتسم: الحمدلله طيب .. اخبارج يا عروستنا ..
فاطمه بخجل: الحمدلله ..
الجد: شو اخباره ريلج المزيون ؟
فاطمه: طيب والحمدلله ..
الجد: ليش مانزل ..؟
فاطمه: عنده شغل مع عزيز اخوي ..
الجد عقد حواجبه: اي شغل ؟؟
فاطمه: .. مادري ..
الجد: من وراي يا عزوز ..
الجده: خلك عنك عزوز ..
الجد "حشى تسمع كل شي هاذي ": ان شاءالله ..
بومحمد: امي من تسمع طاري عزيز وابوي تجيها اعصاب ..
الجده: ليش هم مقصرين ..
الجد: في شو مقصرين ؟
الجده: انا بروح اجيب القهوه ابرك لي من سوالفك ..
الجد: والله حاله .. تقط كلامها وتشرد ..
فاطمه وبومحمد طالعوا بعض وتموا يضحكون .. تموا قاعدين يسولفون وتقهووا لين وصل فارس على الساعه 5 دخل عليهم وهو مبتسم وابوه وراه ..




يتبع ..
__________________

فارس وبوفارس: السلام عليكم ..
الكل: عليكم السلام ..
سلموا على بعض وقعدوا .. فاطمه قربت من ابوها ..
فاطمه بهمس: بابا ..
بوفارس مبتسم: عيونه انتي ..
فاطمه: هممممم .. ما تحس ان احنا مسوين هاي بالخش .. محد يدري ..
بوفارس مبتسم: يا بنتي انا ما يهمني من يدري .. واعتقد انا قلت ذاك اليوم ان فارس بياخذ اللي يبيها ..
فاطمه: بس انا حاسه بالذنب .. يعني نسوي هالشي من ورا امي ..
بوفارس: اتصلي لها الحين وقولي لها رايحين نخطب حق فارس ..
فاطمه بخوف: لا بابا مو هاي قصدي .. بس احس مو حلوه في حقها نسوي هالشي كأن ماما مالها حشيمه ..
بوفارس: الا امج لها حشيمه وعلى راسي بعد .. بس هي رافضه شي وانا موافق عليه .. انا اقدر اكبر الموضوع واخلي الكل يدري واعاند .. بس مابي احط امج بموقف مب حلو ..
فاطمه: بس بابا اللي نسويه الحين بيحط ماما في موقف مب حلو .. بتتفاجأ اني رايحه مع يدتي نخطب حق فارس وبعدين الكل يدري بالموضوع .. الكل يعرف ان ماما مب راضيه على زواج فارس من البنت اللي يكلمها ..
بوفارس: شوفي سواء اخوج يكلمها او لأ .. دام هو اختارها هو يتحمل نتيجة اختياره .. وهالكلام انا قايله لامج ..
فاطمه: اللي تشوفه بابا ..
بوفارس حضن فاطمه وباسها على راسها .. أذن المغرب والشباب راحوا المسيد يصلون .. اما فاطمه ويدتها صلوا فالبيت .. بعد الصلاه فارس وبومحمد كل منهم ركب سياره .. اليده وفاطمه ركبوا مع بومحمد .. ولحقوا فارس اللي طلع قبلهم عشان يدليهم البيت ..
الجده: توكلنا على الله .. شوي شوي يا حمد ..
بومحمد: ان شاءالله يمه ..
الجده: اتصل حق هالمطيور فروس قوله يخف ..
بومحمد مبتسم: ان شاءالله ..
اتصل بومحمد لفارس وطلب منه يخفف شوي .. فارس ضحك على يدته .. خفف وتم يمشي على راحته .. دخلوا منطقة بيت مناف المقطوعه .. كانت الجده مستغربه من المكان ..
الجده: ويه وين بيتهم ؟
بومحمد: الظاهر البيوت اللي هناك ..
الجده: حشى هالبيوت مافيها حياة .. خرابه
فاطمه تذكرت هالمكان .. تذكرت لما فارس جابها من سنه تقريبا على هالمنطقه المقطوعه ..
بومحمد: الظاهر بيتها واحد منهالبيوت ..
الجده: الحمدلله على كل حال ..
بومحمد: الله المستعان ..
في بيت مناف .. ام مناف جهزت الشاي والقهوه .. وفاله على قدهم .. لبست وتجهزت عشان تستقبل ضيوفها .. اما مناف فكانت في حاله لا تحسد عليها .. كانت منسدحه على السرير وتنتفض من الخوف والتوتر .. كل شوي رفت يدها وتشوف النفضه اللي فيها .. كانت ميته من الخوف والمواج ..
فارس وبومحمد دخلوا بين البيوت وسط الظلمه .. فيصل وعبدالله كانوا لابسين ثياب وكاشخين بالغتر .. كانوا فالصاله مع امهم ينتظرون الضيوف .. وصل فارس عند بيت مناف واتصل بفيصل .. عبدالله سبق فيصل .. لانه اول ما سمع تلفون فيصل يرن عرف ان فارس عند الباب .. طلع وركض صوب فارس وهو ماسك غترته فارس اول ما شاف عبدالله نزل من السياره وحضنه .. بومحمد و فاطمه استغربوا من فارس .. الجده طبعا ما تشوف عدل فالليل فما كانت منتبه لفارس ولا عبدالله .. طلع فيصل وسلم على فارس .. بومحمد وقف السياره جنب رنج فارس الاسود فاطمه فتحت الباب ونزلت .. وراحت صوب يدتها وساعدتها تنزل .. مشوا ثنتينهم صوب البيت .. الجده شافت اخوان مناف وسلمت عليهم ..
الجده: شسمك ابوي ؟
فيصل: فيصل ..
الجده: بارك الله فيك .. التفت على عبدالله وباسته على خده .. وانت شو اسمك ؟
عبدالله مبتسم: عبدالله ..
الجده: والنعم .. فديت خشمك انته .. " شكله مب غريب علي " ..
طبعا فاطمه عرفت عبدالله وفيصل تذكرت انهم اللي جابهم فارس العزبه .. سلماو عليها وكانت مبسوطه من ذرابتهم .. وسلموا على بومحمد اللي بعد عرفهم وكان مبسوط عليهم ..
فيصل: تفضلوا ..
الجده: بارك الله فيك ..
دخلت الجده وفاطمه وراها .. كانت تشوف البيت وقلبها معورها على اهله .. ام مناف طلعت من الصاله واستقبلتهم
ام مناف: يا هلا ومسهلا .. حيالله من جانا ..
الجده: هلا ومرحبا .. فجأه الجده سكتت .. فاطمه ..
ام مناف: ام محمد ..
فاطمه " ام مناف!!! " ..
الحريم الثلاثه وقفوا مكانهم وكلن في باله ملاين الاسأله .. ام مناف شافت فاطمه واستغربت ..
ام مناف: فاطمه .. هلا يمه ..
فاطمه: هلا خالتي .. شلونج ؟
ام مناف: الحمدلله طيبين .. تفضلوا ..
الجده: دام فضلج يافطيم .. طول عمرج تعرفين السنع .. بنت ناس ..
ام مناف: ما عليج زود يا ام محمد ..
فاطمه " يدتي وام مناف شعرفهم ببعض ؟ وليش احنا في بيت مناف ؟ ليكون مناف اللي يحبها فارس .. ليكون هي المسكينه اللي ردت عليها امي ذاك اليوم .. لالالا .. شو قاعد يصير حولي "
الجده: والله دنيا فرقتنا وجمعتنا ..
ام مناف: الحمدلله على كل حال ..
الجده: اي والله الحمدلله على كل حال ..
ام مناف: محمد شخباره ؟
الجده: طيب والحمدلله .. هاذي فطيم بنته ..
ام مناف: ماشاءالله ..
قامت ام مناف تفاول الحريم ..
الجده: ماشاءالله على عيالج .. ريايل الله يحفظهم ..
ام مناف: الله يسلمج ..
الجده: الصغير شو اسمه ..
ام مناف: عبدالله ..
الجده: اي عبدالله ماشاءالله وايد يشبهج ..
ام مناف: فديته عبود .. هيا شخبارها ؟
الجده: طيبه الحمدلله ..
ام مناف: حمد و مرته ؟
الجده: والله حمد ماشاءالله ولده الكبير محمد الحين عنده ولدين ..
ام مناف: ماشاءالله ..
الجده: خواتج شو اخبارهم ؟
ام مناف: الحمدلله ..
الجده: كم عندج ؟
ام مناف: عندي بنت .. و ولدين .. و واحد مات العام ..
الجده بحزن: ليكون اللي عمره 4 سنين ؟
ام مناف خنقتها العبره: اي ..
فاطمه " مساكين " ..
الجده حبت تغير الموضوع لانها شافت الحزن بعيون ام مناف ..
الجده: يا فطيم تعرفين احنا ليش جاين .. نبغي بنتج حق ولدنا .. و بصراحه نبي نشوف البنت وناخذ رايها ..
ام مناف: ان شاءالله .. والله يكتب اللي فيه الخير ..
الجده: ان شاءالله ..
ام مناف: بروح اناديها ..
الجده: خذي راحتج ..
طلعت ام مناف وراحت صوب غرفة بنتها .. فاطمه على طول طلت في ويه يدتها ..
فاطمه: يدتي من هاذي ؟ شلون تعرفينها ؟
الجده: صبري علي يا بنت .. هاذي ابوج كان مالج عليها قبل امج ..
فاطمه بطلت عليونها: ها .. بس انا اعرفها واعرف بنتها .. هذول حضروا عرسي .. ما شفتيهم ؟
الجده: لا والله ما شفتهم .. تعرفيني ماشوف عدل انا .. بس شلون تعرفين بنتها ؟
فاطمه: معاي فالجامعه ..
الجده: الدنيا تجمع وتفرق ..
دخلت ام مناف وهي مبتسمه .. الجده وفاططمه ابتسموا لها وكانوا ينتظرون دخول مناف وراها .. بس مناف تاخرت شوي بالغرفه ..
ام مناف: الحين جايه البنت ..
تموا شوي ودخلت عليهم مناف .. فاطمه اول ما شافتها على طول حضنتها ..




يتبع ..
__________________

فاطمه: مناف ..
مناف رفعت راسها وشافت فاطمه .. حست بالاحراج ..
مناف " فارس اخو فاطمه؟ " مناف تلخبطت الامور عليها .. سلمت على فاطمه ويدتها .. قعدت جنب امها وبعدين طلعت عنهم ..
الجده: تبارك الرحمن يا فاطمه .. بنتج مب احلى منج .. عيني عليها بارده ..
ام مناف: حلاة دنياج ..
الجده: زين احنا نترخص الحين .. و خلي البنت تفكر وتاخذ راحتها .. وردي علي انا .. هذا رقمي فالورقه وانا انتظر اتصالج يبه .. ولاتجبرينها يا فطيم .. لو ما بغت لا تستحين تتصلين ..
ام مناف: ان شاءالله يا ام محمد ..
الجده وفاطمه قاموا وسلموا على ام مناف .. استأذنوا و وصلتهم ام مناف لين باب الحوش ورجعت داخل .. فيصل وعبدالله اللي كانوا ماخذين راحتهم مع بومحمد وفارس اول ما شافوا الحريم سكتوا ..
فارس طالعهم مبتسم: يلا مشينا ؟
فاطمه اطالع اخوها: اي مشينا ..
فارس حس ان ورا كلامها سالفه طويله .. التفت على عمه ..
فارس: عمي ..
بومحمد: هلا يبه ..
فارس: انت توكل مع يدتي .. انا بوصل فطيم ..
بومحمد: اللي تشوفه ..
فاطمه بهمس: شيطان .. تقرى افكاري ..
الجده: فطيم مب جايه ؟
فاطمه: برجع مع فارس اخوي ..
الجده: زين يمه .. تحمل على اختك يالمينون ..
عبدالله: هاااااي ..
الكل التفت على عبدالله .. كلهم ضحكوا عليه ..
بومحمد: حليله هالصغير .. ونيس الله يحفظه ..
الجده و ولدها ركبوا مع بعض وراحوا البيت .. فارس ودع عبدالله وفيصل وراح مع فاطمه اخته .. ركبوا الرنج الاسود وطلعوا من صوب بيت مناف متجهين للشارع الرئيسي ..
فارس: يلا اختي هاتي ما عندج ..
فاطمه: اول قولي تعرف البنت ؟
فارس ضحك: .. لا ماعرفها ..
فاطمه: فارس فديتك انا من زمان شاكه فيك ..
فارس: ولين ..
فاطمه وفارس: ه
فاطمه: بقولك شي زين ..
فارس: قولي اختي ..
فاطمه: تذكر لما فاتحناك بموضوع الزواج انا مرايم .؟
فارس عقد حواجيه: اي اتذكر ..
فاطمه بدلع: عاد انت كنت تتهرب ولا عطتنا فرصه حتى ..
فارس: ه .. زين ..
فاطمه: تدري اني انا ومريم كنا نبي نخطب لك هالبنت ..
فارس بطل عيونه والتفت على فاطمه: احلفي ..
فاطمه: والله ..
فارس بذهول: انتوا شو عرفكم فيها ؟
فاطمه: معانا فالجامعه .. واصلا من اولم اتعرفنا عليها حبيناها وايد .. وقررنا نخطبها لك .. بس انت الله يهديك ما عطتنا فرصه ..
فارس: اكيد انتوا مغلطين .. شو اسمها البنت ؟
فاطمه: لا مو مغلطين .. اسمها مناف .. اسمها وايد مميز ..
فارس: اي والله .. فديتها
فاطمه مبتسمه: ها .. الا فديتها ..
فارس وفاطمه:
فاطمه: حتى انا استغربت انك ما قلت اسها يوم كلمت امي عنها اول مره .. قلت لها بنت فلان الفلاني بس ..
فارس: خبرج مابي ابين حق الوالده اني اعرفها ..
فاطمه: .. حركات اخوي ..
فارس: لازم تمويه شوي ..
فاطمه: شيطان اخوي عليك حركات ..
فارس مشتط: زين شو رايج فيها ؟
فاطمه: هالملاك ما تنعاف .. وانااقولك تمسك فيها تراها تستاهل كل اللي تسويه عشانها ..
فارس حط يده على قلبه: آيه عليها ..
فاطمه طالعة اخوها وكانت فرحانه له وايد ..
فاطمه: الله ينولك اللي في بالك ياخوي ..
فارس: ان شاءالله ..
فاطمه: زين ممكن سؤال فارس ؟
فارس "اعرف السؤال .. شلون تعرفت عليها؟ "
فارس: سألي ..
فاطمه: شلون تعرفت عليها ؟
فارس: تعرفت عليها ..
فاطمه: اهااا .. يعني يا فاطمه مابي اقولج ..
فارس: ه .. ماشاءالله عليج اختي .. تفهمينها وهي طايره ..
رن جوال فارس وكان محمد المتصل ..
فارس: عيوني وقلبي وحياتي وروحي انته ..
فاطمه طالعت اخوها وهي ميته من الضحك .. عرفت ان محمد المتصل ..
محمد: فديت روحك يا روحي وحياتي وكلي انته ..
فارس: شلونك حمودي ..
محمد: طيب .. اخبارك فروسي ؟
فارس: نشكر الله ..
محمد: ها شلون النفسيه .؟
فارس: عال العال ..
محمد: ان شاءالله دوم .. انت وين طال عمرك ؟
فارس: انا مع الاهل ..
محمد: حدد اي اهل فيهم ؟ زوجتك ولا امك ولا اختك ولا من ؟
فارس: الله يسمع منك ان شاءالله ؟
محمد: .. ان شاءالله ..
فارس: بوصل فطيم بيت ريلها وبمرك ..
محمد: لا تتأخر يا قلبي .. ترا بديت اشتاق لك ..
فارس: انا من الحين ذبحني الشوق ..
محمد: يا قلبي عليك ..
فارس: جايك طيران .. يلا سلام ..
محمد: الله وياك ..
سكر محمد وكان مستانس لفرحة فارس .. فارس التفت على فاطمه مبتسم ..
فارس: الحين يوم عرفتي ان مناف كلمتني .. شو رايج فيها ؟ طاحت من عينج ؟
فاطمه: شوف يا فارس .. اناماقول انها طاحت من عيني .. بس انصدمت وفي نفس الوقت فرحت .. لاني تمنيتها لك من اول ما شفتها .. بس الله يعينا على امي .. ومناف تكسر الخاطر وايد طيبه .. وكفايه اللي مرت فيه ..
فارس عقد حواجيه: شو قصدج ؟
فاطمه: يعني وضعهم .. و موت اخوها الصغير من سنه تقريبا ..
فارس: اقولج شي فطيم بس يتم بيني وبينج ..
فاطمه باهتمام: قول فديتك ..
فارس وقف السياره على طرف الطريق .. التفت على فاطمه والحزن بعيونه .. فاطمه طالعت اخوها وخافت عليه ..
فاطمه: شو فيك فارس ؟
فارس: اخو مناف مات بين ايديني ..
فاطمه شهقت بخوف وحطت يدها على حلجها من الصدمه ..
فاطمه:ابيه شلون ؟
فارس غطى وي بيدينه وتكلم بحزن ..
فارس: طرت فيه على الطواري نص الليل .. واول ما وصلت المستشفى شقه وطلعت روحه قبل ما اعطيه الممرضه .. تخيلي انه كان يعاني من جفاف من سوء التغذيه .. تدرين انهم كانوا عايشين على الماي .. يسدون جوعهم بالماي .. آآآآه ..
فاطمه كانت تحاول تحبس دموعها بس ماقدرت .. وايد تأثرت بكلام اخوها ..
فارس: هم كانوا عايشين على قدهم قبل ما يتوفى ابوهم .. بس من 4 سنين تقريبا تغير الحال .. تخيلي انها كانت تاكل نص الكرواسون والباقي تجيبه لاخوانها ..
فاطمه وسط دموعها: يالله .. مساكين ..
فارس: انا كنت افكر انها تبالغ .. بس يوم شفت بيتهم والوضع اللي هم فيه انصدمت .. لو تشوفين الفرحه بعيون اخوانها لما وديتهم المجمع اخذ لهم ملابس .. يالله يا فطيم .. كنت شوي واصيح على حالهم .. تخيلي موديهم المجمع وكانوا لابسين ثياب قصيره .. ونعلهم صغرت عليهم ..
فاطمه تترجى اخوها: الله يخليك خلاص يا فارس ..
فارس مسك يد فاطمه: فديت قلبج اسمحي لي كدرتج .. انا آسف ..
فاطمه: فديت قلبك يا فارس .. الله يجزيك خير على اللي تسويه لهم ..
فارس: مسحي دموعج يالغاليه ..
فاطمه وهي تمسح دموعها: تدري يا فارس .. مناف فالجامعه مبين عليها البساطه .. تعرف شلون تعرفت عليها ؟
فارس: شلون ؟
فاطمه: كنت دوم اشوفها تقعد بروحها واتفكر فيها .. دوم تقعد فالحديقه تحت الشجره .. وصرت احاول اني اتصل بعيونها لين مره انتبهت لي .. تمينا نشوف بعض ونبتسم لبعض .. وبعدين تجرأت ورحت قعدت معاها .. تعرفت عليها وحبيتها من اول مره قعدت فيها معاها .. ارتحت لها وايد .. حتى عرفتها على مريم اختي ومريم كان احساسها ناحية مناف نفس احساسي .. حبيناها وايد وقررنا نخطبها لك .. بس انت راسك يابس وعنيد ..
فارس وفاطمه: ه ..
فاطمه: زين ممكن تحرك طال عمرك ..
فارس مبتسم: عيوني لج يا ام خليفه ..
فاطمه ابتسمت بخجل ..
فارس: بس راكب عليج ..
فاطمه: بس انا قايله بسمي ولدي فارس ..
فارس التفت عليها مبتسهم وهو طالع على الشارع العام ..
فارس: فديت قلبج انتي .. وريلج ماعترض ؟
فاطمه: ماعنده مشكله ..
فارس: زوجتج خوش ريال .. كفايه بيسمي بكره علي ..
فاطمه: لو سمحت ريلي انسان متفهم ..
فارس: فديت المتفهم والله ..
فاطمه وفارس:
كملوا دربهم لبيت يوسف .. وصلوا ودخلوا الحوش ..
فارس: ريلج وينه ؟
فاطمه: قالي بيطلع مع عزيز اخوي ..
فارس: اها .. زين الغاليه تآمريني على شي ؟
فاطمه: الله وياك فديتك ..
فارس: سلام الغاليه ..
فاطمه مبتسمه: عليكم السلام ..
طلع فارس من بيت يوسف وراح حق محمد .. فاطمه دخلت البيت .. راحت الصاله اللي تحت وما نتبهت لوجود سلمان اللي كان متمدد على الكرسي ويتابع المباره كان ليت الصاله مبند والتلفزيون بس شغال .. وفاطمه افتكرت ان محد موجود .. اول ما سجلوا هدف سلمان صرخ مستانس على الهدف ..




يتبع ..

سلمان: يا سلاااااااام ..
فاطمه صرخت من الخوف: آآه ..
سلمان قام من مكانه وخاف عليها ..
سلمان باحراج: السموحه ..
فاطمه كانت منحرجه .. طلعت من الصاله وراحت غرفتها بسرعه .. سلمان وقف مكانه وكان منحرج من الموقف اللي صار .. تضايق وطلع من البيت بسرعه .. فاطمه دخلت الغرفه وكانت مستحيه من اللي صار ..
فاطمه " مسكين انحرج " ..
تمت تفكر فيه وهي حاسه بالذنب .. خذت لها شور وبعدين استلقت على الكرسي وخذت التلفون واتصلت بهنادي ..
فاطمه: السلام عليكم ..
هنادي مبتسمه: هلا وغلا .. عليكم السلام ..
فاطمه: شحالج هنوده ؟
هنادي: تمام مرت اخوي .. اعلومج انتي ؟
فاطمه: .. طيبه الحمدلله .. انتي طالعه ؟
هنادي: لا فالبيت ..
فاطمه: شورايج تمريني ..
هنادي: همممم ..
فاطمه: مرتبطه بتروحين مكان ؟
هنادي: لا والله .. خلاص بكلم ريلي اول وبرجع أأكد لج ..
فاطمه: زين حبيبتي ..
سكرت من هنادي واتصلت بمريم اختها تبشرها بالخبر الحلو ..
مريم: هلا اختي ..
فاطمه باندفاع: مريوم لا يفوتج ..
مريم: شو ؟؟
فاطمه: خطبنا حق فارس ..
مريم: ها ؟؟
فاطمه: رحت مع ديتي اليوم ..
مريم: والله ..
فاطمه: اي وقولي من طلعت البنت ..
مريم رفعت حاجب: هممممم .. من تكون ؟
فاطمه: وحده ماتخطر على البال ..
مريم: فطوم قولي لي عاااااد ..
فاطمه: .. طلعت مناف ..
مريم: هاا ..
فاطمه: اي والله مناف .. لو مشب عليها بقول يمكن .. بس شفت امها واخوانها ..
مريم: قولي والله .. ياااااي .. وناااسه
فاطمه: .. والله انا استانست اكثر منج يا مريوم ..
مريم: لحظه لحظه .. يعني مناف تكلم فارس اخوي على التفون ؟
فاطمه: همممم .. اي
مريم: ليش ؟
فاطمه: القدر جمعهم ببعض يا مريم .. بس بسألج ..
مريم: هلا ..
فاطمه: بس جاوبيني بصراحه
مريم: ان شاءالله ..
فاطمه: همممم .. يعني الحين عرفتي ان مناف على علاقه بفارس اخوي .. هل تغيرت نظرتج لها ؟ مثلا طاحت من عينج .. ولا تحسين ان مالج خاطر تشوفينها ؟ قولي لي اللي بخاطرج وبأمانه ..
مريم: والله انا منصدمه .. بس ماقول ان مناف طاحت من عيني .. بس احس مابقدر اجابللها مثل قبل .. ولا ابي اتغير عليها .. يمكن فالبدايه احس ان ما راح يكون في direct communication معاها .. هاي فالبدايه بس احس عقب بكون عادي معاها نفس قبل ويمكن اكثر .. لان هالبنت احبها .. من الله اموت فيها بعد ..
فاطمه: فديتج يا مريوم .. بس تتوقعين امي وايمان وعميمه هيا والريم بيرحبون فيها ؟ تدرين هم شافوها في عرسي ..
مريم: والله خوفتيني .. ايمان الحين ماكله تبن على فارس ومب بالعته ..
فاطمه بعصبيه: على شو .. مالها حق ..
رن تلفون البيت وفاطمه استأذنت من اختها عشان ترد ..
فاطمه: لحظه اختي بارد على التلفون ..
مريم: زين ..
فاطمه: هلا هنوده ..
هنادي: هلا حبيبتي .. يلا برزي فالتج انا جايه ..
فاطمه بوناسه: زين انتظرج ..
سكرت هنادي ورجعت فاطمه لاختها ..
فاطمه: رجعت لج ..
مريم: .. هلا
فاطمه: نكمل .. انتي شعليج من ايمانو .. هاذي لاتهش ولاتنش .. لسانها يلعلع على الفاضي ..
مريم: تدرين شو قالت لابوي ذاك اليوم ..؟
فاطمه: شو ؟
مريم: قالت له لو فارس خذ هالنت بتكر ولا بتكلمه طول عمرها ..
فاطمه: المنه عليها .. يبه ايمانو بتزعل وبترضى بعدين .. وكلهم مردهم بيرضون حبيبتي .. وغير ان ايمان قابلت مناف وماتت عليها ..
مريم: بس الحين الوضع مختلف .. بتقول ان مناف سبب المشاكل بين امي وفارس .. تعرفين ايمان شكثر تحب ابوي وامي .. وبالذات امي ..
فاطمه: الله يستر من الطوفان اللي جاينا ..
مريم: فطيم ليش احس من نبرة صوتج الخوف ؟
فاطمه: الدنيا كلها على فارس .. امي وعميمه هيا .. ايمانو هالسوسه .. بس تعرفين من اللي خايفه منها صح ؟
مريم باستغراب: من ؟
فاطمه: الريم بنت عمي ..
مريم: ها ؟؟ ليش ؟
فاطمه: الريم تحب فارس ..
مريم بصدمه: شوووووو .. يعني اريام قريبه مني وايد .. وعمرها ما قالت لي ولا بينت لي حتى ..
فاطمه: ولا قالت لي انا بعد .. تعرفين من قالي ..
مريم: من ؟
فاطمه: فارس ..
مريم: لا انا اليوم بانجن ..
فاطمه: هو لاحظ عليها وايد .. وبعد ما قالي تميت اراقب حركات الريم .. وطلع كلام فارس اخوي صح ..
مريم: تدرين اني ما لاحظت عليها شي ..
فاطمه: ولا انا .. بس فارس اللي نبهني .. استأذنت فاطمه من مريم .. لحظه شوي اريامي ..
مريم: زين ..
فاطمه راحت صوب المطبخ تشيك على القهوه والشاي .. كانت تكلم اختها وهي تجهز الفاله لان هنادي جايتها .. رجعت على الخط مع اختها ..
فاطمه: رجعت لج ..
مريم: ه .. عبيطه فطوم ..
فاطمه: ه ..
مريم: يعني طلعت اريام تحب فارس ؟
فاطمه: اغلب الظن انها عشمت نفسها بحب فارس .. والله ماعرف شو اللي تفكر فيه ..
مريم: غبيه لو عشمت نفسها ..
فاطمه: تذكرين يوم عرسي .. لما رحنا مع فارس الفندق ..
مريم: اي اتذكر ..
فاطمه: ما لاحظتي على اريام شي ؟
مريم: همممم .. لا والله
فاطمه: فارس ما كان معطها اي اهتمام .. سلم عليها عادي .. بس تعرفين من يوم درى انها تحبه وهو يكون رسمي جدامها .. حتى ما كان يضحك معانا وايد صح ..
مريم: بلا ..
فاطمه: واللي ذبحها زود يوم رن جواله ومارد .. تذكرين لما انتي وايمان علقتوا عليه ؟
مريم: اي ..
فاطمه: ما شفتي شكلها .. كانت شوي وتنفجر .. وانا كل شوي حاولت اني الطف الجو واغير الموضوع ..
مريم: اليوم يوم الصدمات ..
فاطمه: .. هاي الدنيا ..
مريم: اي والله دنيا ..
فاطمه: بس لو تشوفين فرحة فارس اخوي اليوم .. فديت قلبه ..
مريم ابتسمت: فديته والله ..
فاطمه: احس من زمان ما شفت ابتسامته الحلوه ..
مريم: الله يسعده ان شاءالله .. بس تتوقعين فارس ومناف بيستمرون ؟
فاطمه: شو هالفال اختي .. تفائلي ..
مريم: والله متفائله بس خطر على بالي هالسؤال ..
فاطمه: ادعي الله ايسر امورهم .. وان شاءالله امي ترضى عليهم وتنسى كل شي ..
مريم: ان شاءالله ..
فاطمه: زين اختي بخليج الحين .. ابي ارتب القعده بتجيني هنوده ..
مريم: زين فديتج ..
سكرت فاطمه من مريم وكملت شغلها فالمطبخ .. خلال اقل من 10 دقايق دخلت هنادي على فاطمه .. سلموا على بعض وقعدوا فالصاله اللي فوق عشان فاطمه تاخذ راحتها .. يوسف وصل البيت على الساعه 9 ونص .. شاف هنادي والجوهره يسولفون ويضحكون .. وكان وايد مبسوط على قعدتهم .. دخل وسلم عليهم .. قامت هنادي وباست اخوها ..
هنادي: شلونك فديتك ؟
يوسف: الحمدلله .. اخبارج انتي ؟
هنادي: طيبه ..
يوسف التفت على فاطمه: يعني مب قايمه تبوسيني ..
فاطمه طالعته و انحرجت .. ويها صار احمر وابتسمت ..
هنادي: .. بايخ يوسف ..
يوسف قرب من فاطمه: يلا قومي سلمي علي ..
فاطمه بهمس: يالسخيف ..
يوسف: ..
هنادي: يوسف عن العبط ..
يوسف مبتسم: زين ممكن تصبين لي شاي من ايدينج الحلوات يا زوجتي العزيزه ..
فاطمه طالعته بدلع: ان شاءالله ..
يوسف طالعها وعض شفته ..
يوسف: وين ريمو السنداره ؟
فاطمه: مادري والله .. انا رجعت وكان خالك فالبيت وبعدين طلع ..
هنادي: يمكن عند جوجو ..
يوسف: ماعتقد .. خل اتصل حق خالي اشوف وين ريمو .. وحشتني
فاطمه: فديت قلبها ..
يوسف اتصل بخاله: هلا خالي ..
سلمان: هلا يبه ..
يوسف: وين ريمو ؟
سلمان مبتسم: ريما معاي ..
يوسف: وين كانت هايته ؟
سلمان: كانت في بيت صديقتها ..
يوسف: خف على الريس .. شنو بعد بيت صديقتها ..
سلمان: .. البنت معاها فالمدرسه .. واعرف ابوها ..
يوسف: ما عندنا بنات يروحون عند ربعهم .. لا تتعودها ريمو ام كشه ..
سلمان: ه .. حاضرين طال عمرك ..
يوسف: جاي البيت ؟
سلمان: اي ..
يوسف: زين ننتظرك ؟
سلمان: من عندنا ؟
يوسف: بس هنوده
سلمان: خير ان شاءالله .. انا قريب البيت ..
سكر يوسف من سلمان وقعد جنب فاطمه وشرب الشاي ..
يوسف: لبسي شيلتج خالي جاي ..
فاطمه: ان شاءالله ..
فاطمه لبست شيلتهاوقعدت جنب زوجها .. تموا يسولفون لين دخلت عليهم ريما بحشرتها ..
ريما: بابا بكره بعد ابي اروح ..
سلمان: لا .. مب كل يوم عاد ..
ريما: مالي خص .. ابي اروح بكره ..
سلمان: انا قلت لأ ..
ريما: وانا قلت ابي اروح ..
سلمان سحبها من ثيابها: دخلي فكيني ..
ريما: ماحبك زين ..
ركضت صوب هنادي وحضنتها .. استقبلتها بالاحضان وبابتسامه حلوه على ويها ..
هنادي: شلونج ريما ؟
ريما مبتسمه: طيبه ..
هنادي: وحشتيني حبيبتي .. حضنتها وباستها ..
ريما راحت تسلم على فاطمه وقعدت عندها ..
يوسف: احم احم ..
ريما تتجاهل يوسف: اليوم استانست في بيت صديقتي .. وديت الباربي مالتي ولعبنا مع بعض ..
يوسف: كح كح كح ..
ريما تكمل: حتى انا وصديقتي تبادلنا ملابس الباربي .. وناااسه والله .. I really enjoy it ..
سلمان طالع ريما بنظره .. ريما انتبهت وحست بالخوف .. دفنت راسها باحضان فاطمه من الاحراج ..
يوسف بهمس: ليش ؟
سلمان: انا قايلها ما تتكلم الا عربي ..
هنادي تلطف الجو: ريما .. عميمه جوجو تقولج بكره بنطلع كلنا مع بعض ..
ريما ببرأه: يااااااي ..
يوسف سحب ريما من حضن فاطمه وقعدها بحضنه ..
يوسف بصراخ: ريماااا .. ريماااا ..
ريما طالعته باستغراب: انا هني ..
يوسف: ريما وينج ريما ..
ريما عقدت حواجبها: انا هني شفيك ..
مسكت وي وقربت ويها من وي: انا هني شوفني ..
يوسف بعبط: اوه انتي هني ريما .. تصدقين ما كنت اقدر اشوفج من كشتج ..
هنادي وسلمان: ..
فاطمه ضحكت بهدوء وانخشت ورا يوسف وتمت تضحك .. سلمان عجبته حركة فاطمه .. تم يطالعها وصد ..




يتبع ..
__________________

ريما: ترا انا ما ضحكت ..
يوسف بصراخ: اموت فالعبيطه ريما ..
ريما: الحين انت تقول انا ام كشه .. وبعدين تقول عبيطه .. انا اي وحده فيهم ؟
سلمان: هاااااي .. مات من الضحك على رد بنته .. عرفتك يبه ..
هنادي: راحت عليك ..
الكل: ..
ريما قامت من حضن يوسف وقعدت جنب ابوها وحضنته ..
ريما: احبك بابا ..
سلمان مسح على راسها: فديت قلبج انتي ..
هنادي: زين يا جماعه استأذنكم ..
يوسف: وين اختي ؟
هنادي: نواف تحت ..
فاطمه: بدري ..
هنادي: لازم اجهز شنطته بيسافر بكره ..
سلمان عقد حواجبه: وين بيروح ؟
هنادي: قريب .. بيروح الصبح وبيرجع فالليل ..
يوسف: اهاا ..
سلمان: يلا بنزل معاج وبسلم عليه ..
ريما بدلع: بابا شلني ..
سلمان مبتسم: تعالي امي وابوي انتي ..
هنادي: يلا خالي ..
سلمان: يلا ..
سلمت هنادي على فاطمه ويوسف ونزلت مع خالها وريما ..
تم يوسف مع فاطمه .. انسدح يوسف على الكرسي وحط راسه بحضن فاطمه اللي تمت تلعب بشعره وتسولف معاه
فاطمه: شو سويت اليوم حبيبي ؟
يوسف: رحنا انا وعلي وبوسعود معرض سيارات ..
فاطمه: من يبي يشتري سياره ؟
يوسف: علي ولد عمج .. انتي شسويتي ؟
فاطمه: رحنا وشفنا البنت ..
يوسف مبتسم: والله .. من راح معاج ؟
فاطمه وهي تلعب بشعر يوسف: انا ويدتي .. وعمي وفارس ..
يوسف: اها .. شسويتوا ؟
فاطمه: رحنا بيتهم وطلعت امها تعرف يدتي وابوي .. وانا اعرف البنت ..
يوسف عقد حواجبه: شلون ؟
فاطمه: الله يسلمك طلعت ام البنت كان ابوي مالج عليها قبل ما ياخذ امي .. تم معاها كم شهر وبعدين انفصلوا .. ويدتي تعرفها لانها خطبتها حق ابوي .. والبنت طلعت معاي فالجامعه .. وتخيل اني كنت افكر اخطبها حق فارس اخوي ..
يوسف مبتسم: سبحان الله .. شوفي شلون الدنيا تقرب البعيد ..
فاطمه: اي والله .. بس البنت كاسره خاطري ..
يوسف: ليش ؟
فاطمه: احسها منحرجه مني ..
يوسف: عشان انج عرفتي ان اخوج يبيها ..
فاطمه: يعني .. تعرف انا اول ما شفت ناديتها باسمها وكنت فرحانه .. بس تعرف شعورها .. احسها خايفه انها طاحت من عيني .. والله بالعكس فرحت وايد يوم عرفت ان هالبنت اخوي يحبها .. لاني يوم تعرفت عليها فالجامعه حبيتها وحبيت كل شي فيها ما شاءالله عليها ..
يوسف: الله يوفق فارس ان شاءالله ..
فاطمه: ان شاءالله ..
يوسف: حبيبتي ..
فاطمه مبتسمه: عيونها ..
يوسف: فديت عيونها والله .. فديتج اخذي غترتي والزرار والقلم واذا ما عليج امر جهزي لي ملابسي فديت قلبج .. انا بانزل عند خالي شوي ..
فاطمه: ان شاءالله ..
يوسف قام من حضن فاطمه قرص خدودها وابتسم لها .. نزل عند خاله وفاطمه راحت تجهز ملابس ريلها ..
فارس ومحمد كانوا قاعدين فالشقه وفارس يقول لمحمد عن الاحداث اللي صارت ..
فارس بوناسه: حمودي .. طلعت صديقة خواتي ..
محمد: والله .. سبحان الله ..
فارس: وعجبني موقف فاطمه اختي .. كانت وايد فرحانه .. تدري شو قالت لي ..
محمد: شو ..
فارس: قالت لي انها كانت تبي تخطب لي مناف .. بس خبرك انا كنت اتهرب من موضوع الزواج ..
محمد: .. صدف جمعت خواتك بحبيبتك ..
فارس: اي والله ..
محمد: امك درت ؟
فارس: لا للحين .. ابوي قال بيقولها لي رجع البيت ..
محمد: شو تتوقع ردة فعلها ؟
فارس: بصراحه ماتهمني ردة فعلها .. هي تبي تحرمني من بنت ابيها بالحلال .. بغض النظر عن بعض المخالفات اللي تجرأة وسويتها .. بس هذاني داخل من الباب .. وانت تدري يا حمودي اني لو ماخذت مناف ما راح اخذ غيرها ..
محمد مبتسم: ادري يا بونايف .. الله يوفقك وياها ..
فارس: آمين ..
محمد: يلا قوم عشينا طال عمرك ..
فارس: اي والله يبيله عشى ..
محمد: وانت ما تفكر الا في بطنك ..
فارس: كان اقتراحك فالبدايه .. وتعرف اني احب اساندك في كل ما يتعلق بالبطن ..
محمد وفارس: ..
تموا محمد وفارس في شقة فارس .. في نفس الوقت بوفارس دخل الغرفه على ام فارس ..
بوفارس: رحنا خطبنا البنت حق فارس ..
ام فارس بصدمه: شو ؟؟
بوفارس وهو يفصخ ثوبه: سمعتيني ..
ام فارس بعصبيه: ليش تقولي .. عشان تقهرني ؟
بوفارس: لا بس عشان يكون عندج خبر ..
ام فارس عصبت وكان ودها تصرخ .. بس تمالك اعصابها لانها تعرف ان بوفارس ما يحب الصراخ ..
ام فارس: بارك حق ولدك .. وانا اقولك من الحين .. ما عندي ولد اسمه فارس .. عيالي عبدالعزيز وجاسم ..
خنقتها العبره ودخلت الغرفه تصيح .. بوفارس لبس جلابيته و وقف يطالع الغرفه .. خذ نفس عميق ودخل الغرفه على زوجته ..
بوفارس بحنيه: ليش مكبرين الموضوع ؟ وين حنيتج على فارس .. حبج له .. فارس بكرج .. فارس الغالي
ام فارس تمسح دموعها: خل فارس في احضان بنت الفقر ..
بوفارس بهدوء: ليش هالتعالي على الناس يا مزنه ..
ام فارس: انا ما تعاليت .. بس احنا وين وهم وين ..
بوفارس: بس الله ما يرضيه هالكلام اللي تقولينه ..
ام فارس: ربك كريم يا محمد .. انا مب رجعه في كلامي .. ما عاد لي ولد اسمه فارس .. خلاص ما عاد لي قدر عند حد ..
بوفارس حضنها: والله قدرج عالي يالغاليه .. بس انتي هدي شوي ..
ام فارس: شو اهدي يا بوفارس .. رحتوا خطبتوا وكسرتوا كلمتي ..
بوفارس: بس الولد يبيها ..
ام فارس: البنت تكلمه فالتلفون .. وين قاعدين احنا .. يبه احنا ناس متربين ..
بوفارس: تراها بنت ناس بعد .. واصابع ايدج مو سوا .. الحمدلله احنا ناس متربين .. ولو مب متربين جان فارس ما حافظ عليها ..
ام فارس: مالي كلام في هالموضوع .. انتوا سويتوا اللي تبونه .. شو تبون مني انا ..
بوفارس: مالنا غنى عنج يالحنونه انتي .. تحرمين فارس من حبج وعطفج ..
ام فارس: ليش يطلع عن شوري ..
بوفارس: ما طلع من شور حد .. بس انتي عاندتيه .. وانتي ربيتيه ..
ام فارس: ربك كريم ..
بوفارس: ليش تحرمين عياله من حنان يدتهم ؟ فارس الغالي ..
ام فارس تسمح دموعها: خل يدتهم تربيهم مالي خص فيه لا هو ولا عياله ..
بوفارس بحزن: الله يهدج يا مزنه ..
تركها وسط دموعها وطلع من الغرفه بكل هدوء .. ام فارس تمت تفكر في كلام بوفارس .. عاشت صراع كبير .. بين حبها لولدها .. وبين كبريائها ومبادئها ..
في بيت مناف الوضع كان غير .. ام مناف مستانسه ومناف نفسيتها تغيرت .. ام مناف قالت لبنتها قصة بوفارس ..
مناف: ليش انفصلتوا ؟
ام مناف نزلت راسها: ما توافقنا ..
مناف: شلون ؟
ام مناف: ما توافقنا ..
مناف حست ان امها ما بغت تقول شي .. احترمت رغبة امها ..
مناف: زين بس يدته شكلها طيبه ؟
ام مناف: ام محمد ذهب ..
مناف: بس ليش يدته وفاطمه اللي زارونا ؟
ام مناف: مادري والله ..
مناف "الله يستر من الجاي " ..
ام مناف: الله يوفقج مع فارس يا مناف .. والله تمنيته لج .. ريال وينشرى .. فكري عدل يا بنتي قبل ما تردين علينا
مناف: ان شاءالله يمه ..
ام مناف: زين قومي جهزي ملابس اخوانج عشان ينامون .. انا بقوم ارتب شناطهم ..
مناف: ان شاءالله يمه ..
ام مناف دخلت الغرفه وشافت عبدالله نايم ببرأه على الارض وكتابه جدامه .. اما فيصل فكان مندمج ويكتب فالدفتر
ام مناف: فديت عبود نام .. نادت على بنتها .. مناف .. مناف يمه تعالي
مناف: ان شاءالله يمه ..
راحت مناف الغرفه وشافت عبدالله نايم ..
ام مناف: نام فديت روحه ..
مناف مبتسمه: حبيبي عبود .. فيصل ليش ما خليته ينام على السرير ..
فيصل: ما نتبهت له .. قاعد احل الواجب ..
مناف: زين قوم البس يلا ..
فيصل يسكر الدفتر: زين زين ..
فيصل خذ ملابسه وطلع من الغرفه عشان يلبس .. مناف صادها فضول وفتحت دفتر فيصل .. وانبهرت باللي شفته
مناف " فيصل رسام ماشاءالله عليه " ..
سكرت الدفتر .. شلت عبدالله وخذته الغرفه .. رجعت الغرفه عند فيصل اللي رجع فتحت الدفتر ..
مناف: فيصل شتسوي ؟
فيصل: اكتب الواجب ..
مناف: جيب خل اراجع لك شوي ..
فيصل سكر الدفتر وحطه فالشنطه: بكره باعطي الاستاذ يشيك لي عليه ..
مناف: زين .. " ليش خاش عني هالشي يعني يا فصول؟ "
فيصل: انا بروح انام .. وين امي ؟
مناف: امي في غرفتها ..
فيصل: قولي لها بنام ..
مناف: ان شاءالله يا ولد ماما ..
فيصل: مناف ..
مناف: ه .. زين زين على قولة عبود ..
فيصل طلع وراح الغرفه .. مناف دخلت عند امها الغرفه .. ام مناف رفت راسها وطالعت مناف و ابتسامة خير وتفائل انرسمت على ويها .. مناف حضنت امها وتمت قاعده في حضنها .. تمت امها تلعب في شعرها وتهمس لها.. فجأه سمعوا فيصل ينادي ..




يتبع ..
__________________

مناف: ابيه نسيت اقولج ان فيصل بينام ..
ام مناف قامت بسرعه وطلعت من الغرفه .. مناف قعدت مكانها وضحكت ..
فيصل: يمه ليش تأخرتي ؟
ام مناف: انشغلت فديتك .. تعال حبيبي ..
فيصل حضن امه وباسها .. ام مناف تمت قاعده عنده شوي لين نام .. غطته وباسته وطلعت ..
مناف: ه .. نسيت اقولج انه بينام ..
ام مناف: ه فديت قلبه ..
مناف: نام ؟
ام مناف: اي فديته .. وعبود يجنن وهو نايم ..
مناف: فديته عبود احبه وايد ..
ام مناف: الله يحفظهم ..
مناف: يمه بتنامين ؟
ام مناف: اي .. بس ما وصيج يمه .. استخيري فديت روحد .. واخذي راحتج ..
مناف مبتسمه: ان شاءالله يمه ..
باست راس امها وراحت غرفتها .. ام مناف دخلت الغرفه و حطت راسها ونامت براحه .. راحه من سنين ما حست فيها .. اما مناف شيكت على تلفونها ولقت مس كول ورساله من فارس .. وكان محتوى الرساله كالتالي ..
(( زوجتي العزيزه اتصلي في ريلج لانه مشتاق لج موت ))
قرت المسج وضحكت .. كانت حاسه بالخوف والاحراج وهي تتصل بفارس .. رن جواله ومارد .. تطمنت انه مارد عليها .. حطت التلفون وقامت من السرير تمت تشوف انعكاس جمالها فالمرايه .. رن الجوال والتفتت تشوفه .. مسكت الجوال وردت بهمس ..
مناف: هلا ..
فارس: قلبه ..
مناف باحراج: اهلين ..
فارس: عمره ..
مناف " ابيه شيقول هاذي": احم ..
فارس: حياته ..
مناف همست بدلع: عاااد ..
فارس بهمس: اموت فيها يا ناس .. فديت زوجتي وحبيبة قلبي ..
مناف ماتت من الخجل .. تمت ساكته ..
فارس: شلونج يا قلبه ؟
مناف: طيبه .. شخبارك ؟
فارس: مشتاق لعيونج ..
مناف: احم ..
فارس: فديت همسج .. بس احلى صدفه صارت في حياتي ..
مناف: اي صدفه ؟
فارس: الدنيا جمعتنا ..
مناف مبتسمه: والله دنيا غريبه ..
فارس: فاطمه اختي تموت فيج ..
مناف: فديتها فطيم ..
فارس: اقولج شي حبيبي ؟
مناف: قول فديتك ..
فارس: اول شي .. احب كلامج العسل فديتج انتي يا عسل ..
مناف ضحكت: ه ..
فارس: فديت هالضحكه .. وثاني شي .. تدرين انا خواتي كانوا يبون يخطبونج لي ..
مناف بطلت عيونها: شلون ؟
فارس: بعد ما املج عليج بقولج ..
مناف مدت بوزها: ليش ؟؟
فارس: عشان اكون قاعد جنبج وماسك ايدج وعيوني بعيونج وانا اقولج السالفه ..
مناف استحت من كلام فارس وماردت عليه ..
مناف: زين انا بروح انام ..
فارس يقلدها: زين انا بروح انام ..
مناف بدلع: لا تقلدني ..
فارس مبتسم: فديت قلبج انتي .. ما قلدج ..
مناف: ه ..
فارس: زين حياتي روحي ارتاحي الحين .. وقعديني حق صلاة الفجر ..
مناف: ان شاءالله ..
فارس: مناف ..
مناف: هلا حبيبي ..
فارس: تحبيني ؟
مناف استغربت من كلام فارس: ليش تسأل حبيبي ؟
فارس: لاني احبج با مناف .. وما راح يفرق بينا الا الموت ..
مناف: فديتك فارس انت تدري اني احبك انت وبس .. وربي اني اعشقك واموت فيك ..
فارس: مناف لا تجرحيني .. وانا اوعدج اني ما راح اجرحج .. انتي في قلبي .. انتي روحي وحياتي انتي صرتي كل شي بالنسبه لي .. صدقيني بدونج انا ما بعيش .. يا مناف ( نهاية حبك إعدامي )
مناف بخوف: سمالله عليك يا فارس .. لاتقول هالكلام فديت قلبك .. ان شاءالله بنكون لبعض .. وبنتم مع بعض طول العمر ..
فارس مبتسم: حبيبة قلبي انتي .. زين حياتي روحي نامي وارتاحي .. ولاتنسين تقعديني للصلاة ..
مناف: ان شاءالله حبيبي ..
فارس: نوم العوافي ..
مناف: الله يعافيك حبيبي ..
سكرت مناف وهي تفكر في كلام فارس وكانت محتاره منه .. حطت راسها على مخدتها ونامت وهي قلقه ..
مر اسبوع على الاحداث اللي عشناها مع ابطالنا .. اليوم الجمعه الساعه 2 ونص .. مناف وامها واخوانها كانوا يتغدون ..
عبدالله: يمه اليوم بنطلع مع فارس ..
ام مناف التفتت على فيصل: كلمك الريال ؟
فيصل ينفض يده فالسفره: اي كلمني .. بنروح نشتري اغراض ..
مناف: وش اغراضه ؟
فيصل: اغراض ريايل ..
عبدالله: يقول فارس هالاغراض ما يعرفون لها الحريم ..
مناف وامها طالعوا بعض: ه ..
مناف "فديت روحه والله " ..
ام مناف: على راحتكم يالريايل .. زين الساعه كم بيمر عليكم ؟
فيصل: الساعه 3 ونص ..
ام مناف: وايد من وقت يبه ؟
فيصل: قلنا لكم شغل ريايل ..
ام مناف: زين ما قلنا شي ..
عبدالله: يمه ابي ماي ..
ام مناف مبتسمه: ان شاءالله ابوي ..
صبت ماي لعبدالله وعطته يشرب .. كانت تراقبه وهي فرحانه .. قاموا الاخوان مع بعض من السفره .. غسلوا ايديينهم وراحوا بدلوا ملابسهم .. مناف وامها كانوا يتغدون بهدوء ..
ام مناف: مناف يمه ..
مناف: هلا يمه ..
ام مناف: ابي اعرف قرارج بخصوص موضوع فارس ؟
مناف ابتسمت لامها: يمه انا موافقه ..
ام مناف من سمعت هالكلمه كانت شوي وتصيح من الوناسه ..
ام مناف: الف مبروك يا بنتي .. فرحتي قلبي الله يفرح قلبج .. الله يوفقج معاه يا مناف ..
مناف منزله راسها بخجل: الله يبارك فيج يمه ..
ام مناف: يعني اتصل بام محمد وابلغها قرارج ؟
مناف وهي قايمه من السفره: اي ..
ام مناف: تعالي كملي غداج فديتج ..
مناف: شبعت يمه ..
ام مناف ضحكت و استانست على خجل بنتها .. تمت تدعي لها بالتوفيق في حياتها مع فارس .. الساعه 3 فارس متصل لفيصل ..
فارس: هلا ..
فيصل: اهلين ..
فارس: جاهزين شباب ؟
فيصل: اي .. انت وين ؟
فارس: قريب من الفريج ..
فيصل: يعني نطلع ؟
فارس: لا مب الحين .. اول ما سوي لك رنه طلعوا ..
فيصل: ان شاءالله ..
فارس: بس وانت جاي جيب لي معاك معاي .. عطشان ..
فيصل مبتسم: ان شاءالله ..
فارس: يلا سلام ..
فيصل: سلام ..
سكر وراح صوب المطبخ ..
مناف: شتبي ؟
فيصل: الريال يبي ماي ..
مناف " فديت عمره والله " ..
مناف: زين حط ثلج مع الماي ..
فيصل: ليش ؟
مناف: الدنيا حر ..
فيصل: زين زين ..
مناف: شفينا فالبيت كلنا نقول زين زين ..
مناف وفيصل: ..
فيصل: مناف ..
مناف مبتسمه: هلا حبيبي ..
فيصل: انتي تبين فارس ؟
مناف ويها صار احمر: احم .. ليش تسأل هالسؤال ؟
فيصل: لاني ابيج تاخذين فارس ..
مناف: ليش فارس؟
فيصل: لان احنا نحب فارس ..
مناف: تذكر الدكتور اللي تقدم لي من قبل ؟
فيصل: اي .. شفيه ؟
مناف: ليش ما قلت لي تبيني آخذه ؟
فيصل: هو طيب وكان يضحك معاي انا وعبود .. بس فارس مثل اخونا الكبير .. نحبه احنا وايد .. وهو بعد يحبنا ..
مناف سكتت وكملت غسيل الصحون ..
فيصل: مناف ..
مناف: هلا حبيبي ..
فيصل: يعني انتي موافقه ؟
مناف ويها صار احمر: ان شاءالله ..
فيصل ابتسم: زين ..
رن جواله وكان فارس المتصل ..
فيصل: مناف عطيني ثلج ..
مناف: ان شاءالله ..
حطت له ثلج وصبت عليه ماي .. فيصل خذ الكوب وطلع من المطبخ .. نادا على عبدالله وطلعوا ثنين عند فارس .. ركبوا السياره وعبدالله ضحك ضحكته الحلوه ..
عبدالله: هاااااي .. امي ومناف يبون يعرفون وين بنروح ..
فارس: ه .. قلت لهم ؟
عبدالله: لا ..
فيصل مد يده بكوب الماي لفارس ..
فيصل: تفضل ..
فارس: جزاك الله خير .. شرب الماي وعطى فيصل يرجعه .. رجع فيصل السياره وحركوا متجهين لسوق الغنم .. اول ما وصلوا عبدالله نزل من السياره وركض صوب الغنم .. فارس وفيصل تموا يضحكون عليه .. راحوا يتمشون ويتفرجون على الخرفان والابل ..
فارس: يلا نروح صوب الطيور ..
عبدالله: اااااي .. وناااسه ..
راحوا صوب الطيور وكان عبدالله مستانس وهو يتفرج على الطيور ..
فارس: عبود اختار اللي تبيه ..
عبدالله: بس ماعندي قفص ؟
فارس: باخذ لك ..
عبدالله بوناسه: والله .. ونااااااسه ..
فيصل مبتسم: عبود مينون ..
فارس: توه صغير .. خله يستانس ..
عبدالله: ابي البيضه ..
فارس: زين انا بروح اشوف لك قفص وبرجع .. فيصل حط بالك على اخوك ..
فيصل مبتسم: ان شاءالله ..
راح فارس وشاف قفص متوسط الحجم حق طيور عبدالله .. راح صوبهم واتصل بديول البيت عشان يجيه عند السوق يحمل الاغراض ..
فيصل: مب حاطين الاغراض فالرنج ؟
فارس رفع حاجب: احلف انت بس ..
فيصل: .. ليش زين ؟
فارس: عشان تفوح ريحة السياره ..
فيصل وفارس: ..
فارس: وبعدين القفص كبير .. ما يتحمل الرنج ..
التفت فارس على عبدالله اللي كان مندمج مع الطيور ويداعبهم ببرأه ..
فارس: عبيد ..
عبدالله: نعم ..
فارس: خلصت ؟
عبدالله: اي ..
فارس: زين خل نروح نشرب لنا شي لين يوصل الدريول ..
عبدالله: يلا ..
راحوا صوب الكفتريا وخذوا لهم زاويه وطلبوالهم عصير وتموا يسولفون ويضحكون .. وصل الدريول وحمل اغراض عبدالله واتجهوا صوب بيت مناف .. اول ما وصلوا فارس طلب من فيصل انه يسوي درب للدريول ..
فارس: سو درب خل الدريول ينزل الاغراض فالحوش .. وشوف عبود وين يبي يحط القفض ..
فيصل: ان شاءالله ..
عبدالله كان مع الدريول يتابعه وهوينزل القفص ويشيك على طيوره .. فارس كان يراقب عبدالله و وايد يتفكر في برأته .. طلع فيصل من البيت بعد ما سوا درب حق الدريول عشان يدخل قفص عبدالله .. ام مناف لبست عبايتها وكانت تنتظر فالحوش .. دخل الدريول وشايل القفص .. اما فارس فكان واقف عند الباب ينتظر .. ام مناف تعجبت من القفص والطيور ..




يتبع ..
__________________

ام مناف: من له هالقفص ؟
عبدالله وبناسه: لي .. يمه فارس شرى لي طيور بعد ..
ام مناف: لا حول ولا قوة الا بالله .. وين فارس ؟
عبدالله: عند الباب ..
ام مناف راحت صوب الباب عند فارس ..
ام مناف: فارس ..
فارس منزل راسه: هلا يمه .
ام مناف: شوله مكلف على عمرك ؟
فارس: عبود يحب الطيور .. حرام اخلي في خاطره ..
ام مناف: عبود مينون .. ومع هالقفص يننته زود ..
فارس وفيصل: ه ..
فارس: يستاهل عبود ..
ام مناف: ما قصرت يبه ..
ام مناف شكرت فارس ورجعت داخل .. الدريول حط القفص حق عبدالله ودخل له الطيور ورتب له كل شي .. طلع الدريول بعد ما خلص .. فارس سلم على فيصل وطلع هو والدريول .. أذن المغرب ونزل فارس اقرب مسيد يصلي .. بعد صلاة المغرب ام مناف خذت تلفون فيصل واتصلت بالجده تبلغها بموافقة مناف .. الجد رد عليها ..
الجد: السلام عليكم ..
ام مناف: وعليكم السلام .. ام محمد موجوده ؟
الجده: اي موجوده .. لحظه اناديها ..
الجد نادا على الجده .. الجده خذت السماع وتكلمت ..
الجده: هلا ومرحبا ..
ام مناف: السلام عليكم يا ام محمد ..
الجده: عليكم السلام هلا ..
ام مناف: شلونج ؟
الجده: الحمدلله .. من انتي يمه ؟
ام مناف: انا ام فيصل ..
الجده: والنعم .. يا هلا ومرحبا ..
ام مناف: مرحبا فيج ..
الجده: بشريني يمه ؟
ام مناف: البنت موافقه ..
الجده صاحت: مبروكين .. وبنتج بعيوني وبعيون فارس ولد ولدي ..
ام مناف تصيح بصمت: الله يبارك فيج فديتج .. ما عليكم زود .. و ولدكم بعيونا ان شاءالله ..
الجده: جزاج الله خير .. ان شاءالله باتصل لج نحدد يوم الملجه ..
ام مناف مبتسمه: ان شاءالله ..
ام مناف: بخليج فديتج ..
الجده: الله وياج ..
سكرت الجده وهي تمسح دموعها .. الجد استغرب منها ..
الجده: ها بشري ..
الجده: وافقت البنت ..
الجد مبتسم: الله يبارك حق فارس .. والفال حق عزوز هالهتلي ..
الجده: اتصل في محمد وحمد وفارس ..
الجد: ان شاءالله ..
اتصل الجد بعياله وقالهم يمرون .. بوفارس وفارس وصلوا قبل بومحمد .. تجمعوا كلهم فالصاله ..
الجده: كلمتني ام فيصل وقالت لي ان البنت موافقه ..
فارس خنقته العبره من الوناسه .. بوفارس وبومحمد كانوا مستانسين ..
بومحمد: الف مبروك يا فارس ..
فارس: الله يبارك فيك يا عمي ..
بوفارس: تستاهل يا ولد محمد ..
فارس: قلتها .. ولد محمد ..
الجد حضنت فارس وصاحت .. فارس حضنها وباس راسها ..
فارس: والله يا يدتي جميلج هاذي على راسي .. وطول عمري ما بنساه لج ..
الجده: يبه اذا ما قمت فيكم انتوا بقوم في من .؟ كلكم سوا عندي .. بس الله يهدي امك هالقشره .. جان الحين هي فرحانه ويانا ولا جان هي اللي كلمتها ام فيصل تبلغها ..
فارس بحزن: الله يهديها امي ..
بوفارس حط يده على كتف فارس: بأذن الله شده وتزول ..
بومحمد: ان شاءالله ..
الجد: وين هيا ؟
الجده: فوق ..
الجد: حمد قوم ناد اختك ..
بومحمد: ان شاءالله ..
تموا يسولفون بفرح بموضوع فارس .. دخل بومحمد ودخلت وراه هيا ..
الجده: البنت وافقت ..
هيا بدون نفس: خير يعني ..
بوفارس ما ستغرب ردة فعلها ..
الجد: باركي حق اخوج ..
هيا لاويه بوزها: الف مبروك يا محمد ..
طلعت من الصاله على طول ورجعت غرفتها ..
الجد: لا حول ولا قوة الا بالله ..
بوفارس مبتسم: فارس يبه اتصل بفطيم اختك وبلغها ..
فارس: ان شاءالله .. بس اول بتصل في محمد ولد عمي ..
بومحمد: انت تصبر عنه ولا هو يصبر عنك ..
فارس: صدقت في هاذي يا عمي ..
الكل: ه ..
انتشر خبر موافقة زواج فارس فالعيله .. والكل اتصل في فارس يبارك له من فرحتهم له .. الا الريم اللي كانت في وهم حب فارس لها .. ام محمد اتصلت تبارك لام فارس ..
ام محمد: الف مبروك يا مزنه ..
ام فارس: على شو تباركين لي ؟
ام محمد: عشان فارس .. يستاهل والله ..
ام فارس: انا ماعندي ولد اسمه فارس ..
ام محمد: كبري عقلج يا مزنه .. انتي سألتي عن البنت واهلها ومحد عابهم بكلمه ..
ام فارس: ربج كريم ..
ام محمد: لا تكسرين فرحة ولدج .. بأذن الله بتتيسر اموره ..
ام فارس: خليها على ربج ..
ام فارس صرفت ام محمد وتمت معصبه وتاكل في نفسها من القهر .. الريم انهارت من الخبر .. عذبت نفسها بالصياح اللي ما منه فايده .. مريم كانت طايره من الوناسه .. فاطمه اتصلت تبارك لفارس له .. واتصلت بمناف .. رن جوال مناف اللي كانت قاعده تقرى كتاب .. شافت التلفون وحست بالخوف قبل ما ترد .. توكلت وردت ..
مناف: مرحبا ..
فاطمه بوناسه: الف مبروك حبيبتي مناف .. والله انكم لايقين لبعض ..
مناف بخجل: الله يبارك فيج يا فطيم ..
فاطمه: والله اني طايره من الوناسه ..
مناف: فديت قلبج يا فاطمه ..
فاطمه: الله يوفقكم ان شاءالله .. وانا اعطيج كلمه و اوعدج فيها ان فارس اخوي بيحطج بعيونه ..
مناف " فديت قلبه": ان شاءالله .. ودام هالكلمه طلعت منج .. صدقيني اني واثقه في كلامج ..
فاطمه مبتسمه: الف الف مبروك حبيبتي مناف ..
مناف: الله يبارك فيج ..
فاطمه: زين حبيبتي .. حبيت ابارك لج وان شاءالله بكلمج وقت ثاني على راحتي ..
مناف " الله يستر من فطيم .. اخاف تجرني بالسوالف ": ما تقصرين حبيبتي .. وانتظر اتصالج ..
فاطمه: مع السلامه حبيبتي ..
مناف: الله وياج ..
مناف حست بفرحة فاطمه .. حست ان فاطمه اكثر وحده مستانسه لها ولفارس .. تمت تفكر في ام فارس ليش ما جات مع يدته وفاطمه ؟ وليش ما اتصلت تبارك او تكلم امها وتبارك لهم ؟
مناف " فارس قالي تقبليني بالطريقه اللي باجيج فيها .. ليكون امه مب راضيه على زواجنا ؟ ابيه امه بعد شكلها قويه ومب هينه .. مع انها كانت تحاول انها تستلطفني في عرس فاطمه بس حسيت بالخوف ناحيتها .. الله يستر من الجاي " ..
الجده اتصلت في ام مناف عشان يحددون يوم الملجه ..
الجده: السلام عليكم ..
فيصل: عليكم السلام ..
الجده: شلونك يبه ؟
فيصل: طيب ..
الجده: وين امك ؟
فيصل: لحظه بناديها ..
راح فيصل صوب الصاله وعطى امه التلفون ..
ام مناف: مرحبا ..
الجده: شلونج يا فاطمه ؟
ام مناف: الحمدلله .. اخبارج انتي ؟
الجده: والله فرحانين .. الله يهنيهم ان شاءالله ..
ام مناف مبتسمه: الله يهنيهم ..
الجده: زين يمه متى حددتوا الملجه ؟
ام مناف: والله ما شاورت البنت للحين ..
الجده: زين عيل شاوريها وشوفي متى يريحكم وعطيني خبر فديتج ..
ام مناف: ولا يهمج الغاليه ..
الجده: امنتج الله ..
ام مناف: الله وياج ..
سكرت وعطت فيصل التلفون .. راحت صوب غرفة مناف .. دخلت عندها وتموا يسولفون في موضوع الملجه ..




يتبع ..
__________________

ام مناف: يمه مناف ام محمد اتصلت لي تسأل عن يوم الملجه ؟ متى تبين نروح المحكمه ؟
مناف بخجل: مادري يمه ..
ام مناف: متى يناسبج ؟
مناف: انتوا حددوا انا ما تفرق عندي ..
ام مناف: زين اقولها يوم الخميس ؟
مناف: اللي تشوفينه يمه ..
ام مناف ابتسمت: زين باكلمها بكره وببلغها ..
ام مناف طلعت من الغرفه وتركت بنتها .. مناف كانت طايره من الوناسه ..
اليوم الثاني ام مناف اتصلت بالجده وبلغتها عن يوم الخميس انه اليوم المناسب حق الملجه .. عمت الفرحه بيت بوفارس وبومحمد .. بس مو عند الكل ..
يوم السبت الساعه 12 ونص الظهر فارس ومحمد راحوا بيت يدتهم .. فارس قاعد مع يدته ويكلمها في موضوع الملجه ..
فارس: يدتي ..
الجده مبتسمه: ابوي انته ..
فارس: شو رايج نسوي عشى الملجه في بيتكم .. انتي شفتي بيتهم ..
الجده: اي وعليه بيتهم مافيه حيل .. خلاص باشاور يدك اول .. واذا وافق باتصل بام فيصل ..
فارس مبتسم: تسلمي يدتي ..
محمد: والله يدتي محد وقف مع فارس مثلج انتي ..
الجده قرصت خدود فارس: هاذي حبيبي فروس المتوت ..
فارس ومحمد ماتوا من الضحك على حركات يديتهم ..
الجده: فروس من الحين اقولك يا ويلك لو زعلت بنت الناس .. تراها يتيمه ومالها حد فهالدنيا .. والله بغضب عليك طول عمري لو زعلتها ولا طلقتها .. هذاني اوصيك واخوك محمد شاهد على كلامي ..
فارس: شدعوه يدتي مناف بعيوني ..
محمد: يدتي ماعرفتي فارس عدل .. يعز المره ويحطها بعيونه ..
الجده: ولد محمد عليه زود .. بس الدنيا تغير القلوب ..
محمد: عدل كلامج يدتي .. الله يوفقهم ان شاءالله ..
الجده: ان شاءالله ..
فارس اتفق مع فاطمه انها تاخذ مناف لسوق ويروحون يتشرون لها فستان للملجه .. ويوم الملجه تروح معاها الصالون عشان تضبط نفسها حق عشى الملجه ..
مر يوم السبت و وراه الاحد والاثنين والثلاثاء والاربعاء كانوا شقى بالنسبه لفارس .. اما يوم الخميس فارس ما نام من بعد ما رجع من المسيد لما راح يصلي الفجر .. تم قاعد وكان يفكر ويحاتي وكل شوي طالع الساعه وكان يحس ان الوقت بطيء .. الساعه 7 ونص فارس اتصل بأبوه .. بوفارس شاف الرقم وتم يضحك ..
فارس: صبحك الله بالخير ..
بوفارس: هلا وغلا .. حيالله معرسنا ..
فارس مبتسم: الله يحيك .. زين يبه الساعه 7 ونص الحين ..
بوفارس: والله .. معلومه جديده ..
فارس: يبه ..
بوفارس: ه
فارس: يلا متى بنروح المحكمه؟
بوفارس: تو الناس .. مطيور الولد ..
فارس: اي يلا خل نروح .. المحكمه فاتحه الحين
بوفارس: الحمدلله على نعمة العقل .. الساعه 9 بنطلع ..
فارس: يبه وايد متأخر الوقت ..
بوفارس: .. قلت لك الساعه 9 بنطلع ..
فارس: زين يبه بسألك ..
بوفارس: اسأل يبه ..
فارس: من بيكون شهود البنت ؟ ابوها متوفي وما نعرف احد من اهل ابوها ؟ من بيكون ولي امرها ؟
بوفارس: القاضي ..
فارس: ليش ؟
بوفارس: اخوانها قصر .. وخوالها مالهم حس ؟ وينهم ؟ ولا لها عمام .. عشان جي القاضي بيكون ولي امرها ..
فارس: ايوه .. خلاص انا ولي امرها ..
بوفارس: انت تزوجها اول .. بعدين انفخ صدرك وقول ولي امرها ..
بوفارس وفارس: ه ..
بوفارس: روح شوف لك شغل لين تجي الساعه 9 ..
فارس: آآآخ .. زين بروح اشوف حمودي ..
بوفارس: اي زين شوف حمودي على قولتك ..
فارس: ه .. سلام الغالي ..
بوفارس مبتسم: الله وياك ..
سكر فارس وتم يحوس فالشقه ومب عارف شو يسوي .. اتصل بمناف اللي كانت تتغلى عليه وماترد الا بمسج ..
فارس: بانتحر .. تتغلى هاذي بعد .. وحمود راقد وابوي يقول تو الناس .. آآآه شاسوي في عمري ..
تم فارس يطالع الساعه لين صارت 8 ونص .. قام خذ له شور ولبس ثوبه وغترته وطلع صوب المحكمه .. مناف وامها طلعوا من البيت نفس الوقت .. تلاقوا كلهم فالمحكمه .. بوفارس اول ما شاف ام مناف طارت عيونه عليها ..
بوفارس " ما تغيرت فاطمه .. كأني اشوفها اول ما ملجت عليها .. الله يالدنيا " ..
ام مناف شافت فارس ونزلت راسها .. حاولت انها تشغل نفسها عشان ما تشغل شريط ذكرياتها .. الجده قربت من ام مناف ومناف ..
الجده: شلونج يا فطيم ؟
ام مناف: الحمدلله طيبه .. اخبارج انتي ؟
الجده: والله فرحانه .. التفتت على مناف .. شلونج عروستنا ؟
مناف منزله راسها: الحمدلله ..
الجده: مستعده ؟
مناف هزت راسها وماقدرت تتكلم من الخوف والتوتر ..
الجده مبتسمه: فديت قلبج والله .. زين يلا نروح عند الشيخ ..
مناف طالعت امها ومسكت يدها ..
الجده: يلا فديتج ..
ام مناف: يلا يمه ..
راحوا صوب الغرفه المخصصه للزواج .. تمت امور الزواج وطلعوا من الغرفه .. فارس كان مو مصدق ان مناف حلاله .. وصارت زوجته .. راح صوبها وسلم عليها .. مناف كانت ترجف من الخوف .. بوفارس كان يطالع الفرحه بعيون فارس ..
فارس: مبروك مناف ..
مناف منزله راسها: الله يبارك فيك ..
فارس مسك يدها وهمس: واخيرا صرتي زوجتي ..
مناف سحبت يدها بهدوء وكانت خايفه .. فارس ابتسم وتركها .. سلم على ام مناف وراح صوب ابوه .. الشباب سلموا على فارس وباركوا له .. طبعا كل شباب العيله كانوا فالمحكمه .. من صوب الحريم بس الجده اللي حضرت ومناف كانت وايد تفكر في ام فارس .. رجعوا البيت وبدت التجهيزات للحفله اللي قرروا انهم يسونها في بيت الجد مناف وفاطمه ومريم راحوا الصالون يتعدلون .. مناف كانت وايد مرتاحه وسط مريم وفاطمه .. ما تخيلت انهم يرحبون فيها وخصوصا فاطمه .. في نفس الوقت كانت تحاتي الباقي اللي ما قابلتهم .. فارس انشغل بترتيبات العشى .. خالد ومحمد وباقي الشباب ما قصروا معاه .. في بيت الجد .. هيا وامها كانوا يتكلمون بموضوع فارس ومناف ..
هيا بعصبيه: ليش مسوين ملجتها هني ..
الجده: انا قلت لفارس ..
هيا: انا وحده مب نازله ولاابي اجابلها .. ولا اجابل ولد ولدج ..
الجده: بتلبسين بتنزلين غصبن عنج ..
هيا: لا ماني نازله ..
الجده بحده: انا قلت بتنزلين يعني بتنزلين .. ولكن من الحين اقولج .. لو سويتي شي يزعل البنت ولا اهلها ترا مب احسن لج يا هيا ..
هيا طالعت امها: ان شاءالله .. بنشوف آخرتها بنت الفقر .. ماعندهم بيت مثل الناس يسون فيه الملجه ..
الجده: الله لا تبلينا بعقول السفهاء ..
طلعت الجده عن هيا وهي معصبه .. وكانت خايفه ان هيا تسوي لها حركات .. طبعا ام فارس حلفت انها ماتحضر .. ايمان ركبت راسها وما كانت تبي تحضر مثل امها بس بوفارس الزمها .. ولانها تسوي حساب لابوها راحت مجبوره .. ام محمد كانت وايد فرحانه لفارس .. وكانت في بيت الجده من الظهر تساعدهم وتعاونهم على الترتيبات
الريم كانت مو مستوعبه اللي يستوي حولها .. كانت تشوف نفسها فالمرايه وتمسح دموعها ..
الريم " ليش يا فارس ليش ؟ يعني فضلت الغريبه علي .. انا بنت عمك ومحد بيحبك مثلي .. ليتني مكان هالبنت والله .. ليتك تفكر فيني وتحبني مثلها " .. كانت الساعه 7 .. الريم طلبت لها وحده تجيها البيت عشان تسوي شعرها وتمكيجها .. بعد ما جهزت نزلت عند ابوها فالصاله ..




يتبع ..
__________________