{ نهاية حبك إعدامي } ...(قصة مميزة.. الإدارة)

في بيت بوفارس ايمان وعبدالعزيز وفاطمه ومريم قاعدين مع بعض .. كانت الساعه 11 ونص الظهر ..
مريم: عزيز .. شو فيك متوتر ؟
عبدالعزيز: مادري والله مو مطمن للموضوع
فاطمه" ولا انا بعد ": عسى ان تحبوا شيئاً وهو شر لكم ..
عبدالعزيز: الله يعين .. ورن جوال عبدالعزيز وكان يوسف المتصل .. ابتسم عبدالعزيز ورد ..
يوسف: هلا والله ..
عبدالعزيز: هلا بوخليفه .. شحالك ؟
يوسف: الحمدلله طيبين
عبدالعزيز: وحلوين وبنحبكم ..
يوسف: ..
عبدالعزيز: شلون اموركم مع الملجه ؟ كل شي تمام
يوسف: الحمدلله ..
عبدالعزيز: مبروك .. يستاهلون هلك .. عقبال عندك يالشيبه ..
يوسف: .. انا الحين صرت شيبه يالفالح ..
عبدالعزيز: ها عيل .. فاكر عمرك بو 14 سنه .. وقام عبدالعزيز عن خواته وكمل مكالمته فالحوش ..
ايمان: شفتوا رفيج عزوز هاذي بوخليفه
مريم: شو فيه ؟
فاطمه: قصدج يوسف؟
ايمان: اي اي هاذي ..
فاطمه باهتمام: شو فيه ؟
ايمان: ذاك اليوم شفته طالع من الميلس مع عزيز ..
مريم: خير يعني
فاطمه: سكتي خل تكمل ..
ايمان: بصراحه يجنن الولد .. مزيون ماشاء الله عليه .. يعني انا اللي دوم اشوف فارس اخوي وخالد ولد عمي من احلى الريايل .. يوسف هاذي غطى عليهم .. مزيون .. اقولج انبهرت بوسامته .. ماشاءالله عليه ..
فاطمه انصدمت تغير ويها .. تمت ساكته وتسمع .. حست بغيره على يوسف من اختها ..
ايمان: جسمه .. نظراته .. حركاته .. ماشاءالله عليه ..
مريم: ايمانو .. اول مره تتكلمين عن شاب بهالطريقه ؟
ايمان: لان اللي يشوفه وما ينبهر بجماله و وسامته ما عنده نظر
مريم: انا شفته كم مره بس ما لفت نظري جي ..
ايمان: الله يحفظه لشبابه ..
مريم: فطوووووووم ..
فاطمه: هلا .. معاج
مريم: وين رحتي ؟
فاطمه: ولا مكان .. وقامت عنهم رايحه غرفتها .. مرت من صوب الميلس وشافت عبدالعزيز يكلم يوسف .. حسدته لانه يسمع صوته .. نزلت راسها وكملت دربها لغرفتها .. دخلت غرفتها وفتحت رسالته وتمت تقراها وهي تصيح .. استغربت من دموعها .. كانت تنزل بحراره على خدودها .. مسحت دموعها بس كانت دموعها تنزل بغزاره .. تمت على هالحال فتره لين نامت ودموعها جفت على خدودها ..

حانت ساعة الصفر بالنسبه لعبدالعزيز .. الساعه 6 بعد المغرب .. هيا وام فارس واليده كانوا يتجهزون خلاص عشان يطلعون مع بوفارس ..
اليده: يلا تأخرنا على العرب ..
هيا: زين يمه .. شو فيج تو الناس
اليده: شوف هالبنت تقول تو الناس .. عيب نروح متأخر يمكن يبون ينامون الناس ..
فارس: ه .. شدعوه ينامون هالحزه
اليده: فروس سود الله ويهك .. شو بعد تضحك علي
بوفارس: فورس لا تضحك على امي
فارس: بابا شو بعد الناس تنام الحين
اليده تخز فارس: شو بعد بابا .. سود الله ويهك
فارس: احترق ويهي من كثر ماسودتي فيه يدتي
اليده: تستاهل ..ريال شكبرك تقول بابا .. لوع الله جبدك ..
بوفارس وفارس: ه
ام فارس: قعدوا عن عمتي لاتصدعونها ..
فارس: ها ماما .. شو تقولين
اليده وترفع النعال: قسم بالله اصفقك فيها على ظهرك لو ما اصطلبت ..
فارس: بابا .. شوف يدتي
بوفارس ميت من الضحك ..
اليده: محمد .. امسك ولدك رفع ضغطي .. اسكت عن الضحك لا اصفقكم انتوا الثنين بعد ..
هيا: يمه يلا .. ام فارس مشينا ..
اليده: يلا نمشي عن مجابل ولد ولدي اللي استخف ..
فارس: من تقصدين ماما ولا بابا ..
سحبته اليده من ثوبه وعضت خشمه ..
فارس: آآآآآآآآآآآآآآآي ..
الكل:
اليده: عساك يا اسود الويه .. خل اسمع ماما وبابا يالخبل ..
فارس يتألم: يدتي شو هالضروس اللي عليج .. حشى ضروس هامور مو آدمي
اليده راجعه لفارس ومسكتها هيا وهي ميته من الضحك ..
هيا: يمه خلي فروس هالخبل عنج .. فرووس يوز عن امي ..
فارس: لا تعالي اتحداج ..
ام فارس: ه .. يعلك العافيه يا صبي يوز خل نطلع
اليده: هدوني عليه خل اصفقه .. انا هامور يالمتوت .. سود الله ويهك ..
فارس: لا تعالي .. مو قدها يالهامور .. تعالي اشوف تعالي ..
هيا تمسح دموعها من الضخك: فروس خلنا نطلع بعدين تفاهموا ..
فارس ينقز مكانه: ايوه الهامور .. تعال تعال ..
جات ام فارس ومسكت فارس من يده ودخلته المطبخ .. وهيا سحبت امها وطلعت مع اخوها بوفاس ..
ام فارس: الله يقطع سوالفك يا ولد .. جننت هالعيوز .. والله مب راقده الا تصفقك ..
فارس: .. قولي لها انتظرها الليله .. الوعد عند الدوار ..
ام فارس طالعه عنه: اي دوار يا اسود الويه ..
فارس: ..
طلعوا الجماعه متجهين الى بيت نوره صديقة مريم .. وصلوا البيت وكان ترحيب اهل نوره من احسن ما يكون ..
الموجودين من اهل نوره كانت امها واختها الكبيره وخالتها ..
ام نوره: يا حيالله من جانا ..
ام فارس: الله يحيج ..
تموا يسولفون تعرفوا على بعض وبعدين دخلوا في الموضوع الاساسي ..
ام فارس: فديتج احنا اليوم عشان نوره بنتج .. ولدي شافها وقرر يكمل نص دينه معاها باذن الله
ام نوره كانت مستانسه: والله هاذي الساعه المباركه .. وما بنلقى احسن منكم .. بس لازم نشاور البنت ونشوف رايها ..
اليده: من حقكم تشاورونها .. واحنا مو مستعيلين خل البنت تاخذ راحتها .. والولد عندكم سألوا عنه ..
ام نوره: الله يسلمكم ..
هيا: المهم احنا نستأذن .. يناسبكم اسبوع عشان نتصل نشوف راي البنت وانتوا تسألون عن ولدنا ؟
ام نوره: خير ان شاء الله ..
هيا وام فارس واليده .. استأذنوا وطلعوا .. وهم في السياره كانوا يتكلمون عن اهل البنت ..
اليده: ماشاء الله عليهم .. طيبين ويعرفون السنع
ام فارس: اي في هاذي صاجه عمتي ..
اليده: بس قلبي قابضني مادري ليش ؟
بوفارس: ليش يمه ؟
اليده: والله مادري يبه
بوفارس توتر وتم يفكر في ولده " الله يستر بس .. الكل كاش من الموضوع .. الله يستر "
اليده: وين مودينا محمد ؟
بوفارس: البيت يمه ؟
اليده التفت عليه" لا يسمح امرك .. نروح بيتكم
الكل مستغرب ..
بوفارس: بيتنا ..
اليده اي خل اروح اصفق ولدك فروس هالمتوت .. عيل يقول عني هامور سود الله وي ..
الكل: ه
ام فارس: عمتي للحين في قلبج
اليده: باكسره .. يصبر علي هالمتوت ..
بوفارس: اذكري ربج يمه .. وانا باتولاه ولا يهمج
اليده: .. صدقتك يالشيخ .. اعرفك ضناك ماتضربه ..
بوفارس: اي والله .. عيل تبيني اخليح تكسرينه ..
اليده: اقول روح بيتك احسن لك ولا بنزل من السياره ..
بوفارس يضحك: .. ان شاء الله ..
وصلوا بيت بوفارس .. نزلت اليده على طول ادور فارس .. في الصاله والميلس وماللقته ..
اليده: مريوم ..
مريم: هلا يدتي ..
اليده: روحي طلعي لي فارس من تحت الارض ..
مريم باستغراب: ليش ؟
اليده وتحذف عبايتها على الكرسي وتشمر اليد: ناديه اشوف لا تتسألين لي ..
مريم: ان شاء الله .. راحت فوق ولقت فارس يتكلم بالتلفون ..
مريم: فارس: يدتس محتشره تحت تبيك ..
فارس: ه .. الهامور تحت .. قولي لها الحين نازل ..
مريم باستغراب: الهامور .. زين .. طلعت وهي مستغربه ..
فارس كان يكلم مناف وقالها شلون جنن يدته ..
مناف: حرام تسوي فيها جي المسكينه ..
فارس: عضتني في خشمي ..
مناف تضحك: .. تستاهل .. محد قالك تلعوزها ..
فارس: افاا .. وانا قلت بدافعين عني .. تضحكين علي ..
مناف: لا يبه احنا البنات ندافع عن بعض ضد كل الريايل ..
فارس: تدرين مناف ..
مناف: هلا ..
فارس: فديت البنات اللي انتي منهم ..
مناف انحرجت: زين روح لهم تحت .. وبعدين قولي شبيسون فيك ..
فارس: فديت قلبج يا مناف ..
مناف: فارس يلا روح ..
فارس: آآه .. بعد فديت قلبج ..
مناف: خلاااص
فارس: من عيوني يا عيوني انتي ..
مناف: مع السلامه .. وانتظر اتصالك
فارس: عيوني لج يا كل الغلاا نتي ..
سكر منها ونزل الا يدته محتشره عليه تحت ..
اليده: وينه هالمتوت .. اوريكم فيه .. يقولي انا هامور ..
فارس: احم .. انا جيت .. وين الهامور وينه ؟
اليده وتروح صوب فارس: تعال يا اسود الويه .. ومسكتها هيا .. يا يمه قعدي
فارس واقف متخصر: لا تعالي يالهامور .. اشوف يودوج ..
اليده: بعد قال هامور .. يعل الهامور ياكلك ان شاء الله ..
فارس يضحك عشان ينرفزها: هم هم هم .. بالعافيه على الهامر اللي بياكلني ..
بوفارس ميت من الضحك: قعدوا انتوا الثنين يالمينن .. خلاص ..
دخل عليهم محمد ولد حمد ..
محمد: السلام عليكم ..
بوفارس: وعليكم السلام .. تعال شوف خويك شو مسوي بيدتك ؟
محمد مبتسم: شو مسوي بعد ؟
ام فارس: مجننها .. كل شوي قالها الهامور .. وهي محتره عليه الا تصفقه ..
محمد: حيالله ام فارس ..
اليده: هلا والله بمحمد .. حيالله هالشوف ..
فارس: حمود .. وخر عنها لا تعضك .. من شوي كانت بتاكل خشمي هالهامور ..
اليده قامت بسرعه ومسكت فارس: يا اسود الويه صدتك يالمتوت .. تعيب علي الا انت يا ولد اليوم ..
فارس: آآآي .. حمودي . الحقني بياكلني الهامور ..
اليده وضربته على راسه: بعد قال الهامور هالمتوت ..
تم فارس يجنن يدته واليده تضربه كل ما صادته .. اعتدل فارس في قعدته وسأل عن فاطمه ..
فارس: يمه وين فطيم ؟
ام فارس: والله ماشفتها فديتها .. من الظهر وهي في غرفتها ..
فارس: ايمان .. روحي شوفيها يمكن تعبانه محد يدري عنها ..
ايمان: ان شاء الله .. راحت ايمان تطمن على اختها .. اما محمد من سمع طاري فاطمه حس ان قلبه تزايدت دقاته .. كانت ينتظر ييشوفها بسرعه ..
فارس تم يسولف مع محمد على ما نزلت ايمان و فاطمه كانت وراها .. اول ما دخلت الصاله اول من رحب فيها فارس ..
فارس: هلا والله بفطيم .. فديت هالنور اللي جانا من صوبج يالغلا ..
فاطمه كانت تبتسم مغصوبه: هلا فارس فديتك .. وباسته ..
محمد اول ما شافها داخله ارتاح وابتسم ونزل راسه عشان محد يلاحظ .. سلمت فاطمه على ابوها وامها وعمتها ويدتها .. واخر واحد كان محمد ..
فاطمه: شحالك بونايف ؟
محمد مبتسم ابتسامته اللي تذبح: الحمدلله طيب .. انتي شحالج بنت عمي ؟
فاطمه ذبحتها ابتسامة محمد: الحمدلله بخير ..
فارس: تعالي عندي اختي .. راحت فاطمه قعدت يمين فارس ومحمد كان قاعد على يساره .. محمد استانس لان فارس كان يفصل بينه وبين فاطمه .. تموا يسولفون واليده استأذنت وطلعت مع هيا .. بوفارس طلع يوصل امه واخته وام فارس راحت معاه لان بعدها بيطلعون مشوار .. ايمان راحت غرفتها وتم محمد وفارس وفاطمه فالصاله .. تموا يسولفون .. ورن جوال فارس والرنه كانت ( عالي مستواه ) والمتصله مناف .. قام فارس يتكلم برا وترك فاطمه ومحمد .. فاطمه كانت في عالم يوسف .. اما محمد فكان منزل راسه وطالع فاطمه بطرف عينه وفاطمه مو منتب .. قرر انه يفتح معاها اي موضوع بس عشان تتكلم معاه ..
محمد: شو اخبارج مع الجامعه ؟
فاطمه: الحمدلله مشين فيها ..
محمد: حلو .. شدي حيلج عاد ..
فاطمه: ان شاء الله ..
تموا ساكتين فتره .. توه محمد بيتكلم فاطمه استأذنت وقامت من مكانها ..
فاطمه: عن اذنك ولد عمي ..
محمد تم يناظرها: اذنج معاج بنت عمي .. " ليش قامت .. كنت مستانس وهي حولي " .. دخل فارس ولقى محمد قاعد بروحه ..
فارس: وين الكل راح ؟
محمد: مادري ..
فارس زين قوم خل نروح الشيشه شوي ..
محمد: قدام ..
ركبوا السياره .. ومحمد كان يفكر في فاطمه ..
محمد" فاطمه كان بالها مشغول بشي .. ما كانت على بعضها .. العاده تسولف وتكون مفرفشه .. اليوم مادري شو فيها .. "
فارس: كلم الشباب شوفهم وين ؟
محمد: من ؟
فارس: خلود وعلوه اخوانك .. شوف سلمان ويوسف وعزوز اخوي ..
محمد: ان شاء الله .. اتصل محمد و انفق مع الشباب انهم يتلاقون في الشيشه ..

الموضوع الاصلي  من روعة الكون