{ نهاية حبك إعدامي } ...(قصة مميزة.. الإدارة)

وهم يمشون فالفريج كانت ماسكه يد عبدالله اخوها اللي ما زال متأثر بموت نايف .. اللي مر عليه شهر تقريبا ..
فيصل بوناسه: مناف .. فارس اليوم بيودينا المجمع .. الله واخيرا بدخل مجمع ..
مناف التفت على فيصل والدموع ماليه عيونها: فديتك يا فيصل .. بس كلمني فارس وقالي بيمر عليكم الساعه 6
فيصل: اي قالي امس .. والله مستانس .. حتى يوم جاب لي الجوال خدته معاي المدرسه وريتهم ان عندي جوال مو بس هم اللي عندهم .. حتى جايب لي جوال جديد نفس اللي عند الصبيان فالمدرسه .. فيه كيمرا وبلوتوث والله عجيب الجوال ..
مناف: عليك بالعافيه حبيبي .. التفت على عبدالله .. عبود حبيبي شفيك ؟
عبدالله منزل راسه: مافيني شي .. ترك يدك مناف وراح يركض عند الشارع ..
مناف: عبود تعال ..
عبدالله: الباص وصل .. واول ما قرب الباص ركب عبدالله و حط يده على الدريشه وتم يطالع مناف وفيصل بحزن
مناف تمت اطالع عبدالله بحزن .. اما فيصل فكان في عالم ثاني .. ينتظر الساعه 5 بفارغ الصبر عشان يروح المجمع مع فارس .. وصل باص فيصل ومناف وكل واحد منهم ركب باصه وخذهم الباص لوجهاتهم ..
الساعه 8 الا خمس دقايق .. مناف تشوف ساعتها والدكتور يتكلم وشكله ما راح يخلص المحاضره قبل الساعه 8 .. وهالوقت لازم تقعد فارس .. كانت تشوف ساعتها بتوتر ..
مناف " يلا يا دكتور خلصنا .. لازم اقعد فارس الساعه 8 .. افففف .. شكله ما راح يخلص .. باستأذن " ...
قامت من كرسيها عشان تستأذن من الدكتور ..
مناف: لو سمحت دكتور ممكن استاذن ؟
الدكتور يشوف مناف بانبهار: تفضلي .. و نزل راسه ..
مناف انحرجت واستغربت نظرة الدكتور .. شكرته وطلعت وعلى طول اتصلت بفارس .. تم تلفونه يرن فتره بعدين رد بتعب ..
فارس: هلا ..
مناف: حبيبي يلا قوم صارت الساعه 8 ..
فارس يتمدد: آآه .. الحين الساعه 8 ؟
مناف: اي حبيبي يلا قوم ..
فارس يشوف الساعه: خلاص بقوم الحين .. انتي وين ؟
مناف: انا فالجامعه .. و الدكتور طول واضظريت استأذن ..
فارس: فديت قلبج ..
مناف: زين حياتي قوم والبس وكلمني وانت طالع ..
فارس: ان شاء الله يا قلبه ..
سكت مناف من فارس وهي مبتسمه و كانت تشوف الجوال وغمضت عيونها .. اول ما فتحت عيونها الا انتبهت ان في شخص كان يراقبها .. كان الدكتور .. نزلت راسها ومشت بسرعه .. تم الدكتور يراقبها لين اختفت آخر الممر .. راحت الكفتريا وخذت ل قهوه وكرواسون وتمت تاكل بهدوء .. كانت مستانسه اول مره تاكل كرواسون كامل من اول ما دخلت الجامعه .. لان فارس عطاها فلوس .. كل مره كانت تاكل نص الكرواسون وتودي الباقي لاخوانها .. هالمره كلته كامل وخذت لاخوانها كل واحد كرواسون وشوكلاته .. تمت تلعب بجوالها وهي مبتسمه وحاطه يدها تحت خدها .. رفعت راسها تشوف البنات .. طاحت عينها على وحده ناعمه كانت قاعده مع بنتين تمت تشوفها و حست كأنها تعرفها .. البنت كانت فاطمه اخت فارس .. كانت فاطمه قاعده مع مريم اختها ولطيفه صديقتها .. تمت مناف اطالع فاطمه وعلى ويها ابتسامه بريئه .. انتبهت فاطمه ان مناف اطالعها .. تمت تناظرها وابتسمت لها ومناف نزلت راسها من الاحراج .. اما فاطمه حست باحساس غريب تجاه مناف .. قامت مناف عشان تلحق على محاضرتها الجايه .. والبنات تموا في الكفتريا سوالف و ضحك ..
الساعه 11 قبل الظهر .. بوفارس قاعد مع ابوه واخوه بومحمد .. كانوا متجمعين في بيت بوفارس ..
بوفارس: مبروك يا حمد ..
بومحمد: الله يبارك فيك .. الله يوفقهم ان شاء الله ..
الجد: آمين ..
بومحمد: الله يبشرك بالخير يا محمد .. وعقبال ما نفرح بفارس ..
الجد يقاطعهم: الا شو صار على موضوع عزيز ؟
بوفارس بحزن: البنت ما بغته ..
الجد قام من مكانه معصب: شو ؟ وليش ما بغت ولدنا ؟ يامحمد ام تقول ان البنت موافقه ..
بوفارس: والله يا يبه .. مادري شو صار ؟ كلمتها مريم امس وقالت لها انا مابي اعرس الحين ..
بومحمد بغيض: وليش تقول من البدايه انها موافقه.. لتهت الولد .. وبعدين ترفض ؟
بوفارس: الله اعلم باللي فالقلوب ؟
الجد: حسبي الله ونعم الوكيل .. شو اخبار الغالي بوسعود الحين ؟
بوفارس: والله زعل فديته .. لانه هو اللي بغاها .. كان يبيها .. بس قعدنا معاه امس وخذنا اللي بخاطره والحمدلله اشوفه ضحك معانا وسولف عادي .. اخوانه وخواته ما قصروا كانوا حوله ..
الجد: حسبي الله ونعم الوكيل .. وينه الحين ؟
بوفارس: تقول ام فارس ما راح الجامعه اليوم ؟
الجد قام بيطلع: بروح اشوفه الحين ..
بوفارس: جزاك الله خير الغالي ..
طلع الجد من عند عياله .. رايح عند عبدالعزيز .. اما بومحمد تم يناقش مع بوفارس امور العرس ..
بومحمد: فارس متى بيعرس ؟
بوفارس: مادري به .. الولد مو مفكر فالعرس الحين ؟
بومحمد: ما يصير جي .. وايد انت مدلع عيالك ومخليهم على كيفهم وساكت عنهم ..
بوفارس منحرج: يا حمد مابي اجبرهم على شي .. لان لو صار ما صار بيلوموني انا .. خل هم يتحملون نتايج قراراتهم اللي اتخذوها ..
بومحمد: والله كلامك غريب .. يعني لو واحد قال بطب في النار بتخليه ؟!
بوفارس: لا مو هاي القصد .. انا ضابطهم .. بس في اشياء مابي اتدخل فيها و مستحيل اجبر اي واحد من عيال على الزواج من وحده هم ما يبونها .. ولا بناتي ..
بومحمد باستغراب: امرك عجيب اخوي .. زين انت ما كلمت ولدك ؟ يمكن في وحده في باله ؟
بوفارس: لا مافي .. لو في حد كان قال ابي اعرس .. فارس ولدي واعرفه .. امس انا وام فارس تكلمنا في الموضوع وقالت ام فارس بتحطه جدام الامر الواقع وبتخطب له .. ومسكت فارس وقالت له هالكلام .. فارس ولدي واعرفه .. راسه يابس .. مستعد يفشلنا عند العرب مثل ما قال لامه امس ..
بومحمد: من صجك قال هالكلام ؟
بوفارس: اي قاله ..
بومحمد: وما قلت له شي انت ؟
بوفارس: وليش اقوله .. ولدي وهاي رايه .. لاتنسى يا بومحمد ان محمد ولدك اختار زوجته بنفسه ..
بومحمد: صح محمد اختار ساره .. بس بدون اي ضغوط منا .. محمد من متى معرس ؟
بوفارس: هذا هو .. الود يختار اللي يشوفها مناسبه له .. عمري ما اجبرت اي من عيالي او بناتي على شي .. بس يا حمد انت وايد شديد مع عيالك .. انا الحمدلله خاف عليهم شوي ..
بومحمد: يا محمد .. الله يهديك .. شد عليهم شوي ..
بوفارس: راس مالي هالثلاثه .. مابي اتدخل في مستقبلهم ..
بومحمد: اللي تشوفه اخوي الكبير .. بس انا مو مقتع بكلامك ..
بوفارس: والله احترم رايك الغالي ..
بومحمد ابتسم لاخوه وقام باسه على راسه ..
بوفارس: لاهنت الغالي .. الله يخلينا لبعض .. قوم نشوف الوالد شو خربط على عزوز ..
بومحمد: يلا قوم .. كفايه هالثنين لي تجمعوا عفسوا لنا الدنيا فوق تحت ..
بوفارس: تقولي ..
بوفارس وبومحمد: ه ..
راحوا الاخوان يتطمنون على الجد وعبدالعزيز ..
الجد: بو سعود .. قوم عن الرقاد اللي ماله معنى ..
عبدالعزيز: ها .. لا تكفى يدي خلني انام ..
الجد: قم قام صلبك .. وسحب اللحاف ..
عبدالعزيز: انت مزعج ياخي ..
الجد يضحك: وجع .. انا مزعج .. لكن اوريك يالدب .. تعرف من اتصلي اليوم ؟
عبدالعزيز بطل عيونه: من ؟
الجد: المزيونه اللي عطناها الرقم عند القهره ..
عبدالعزيز اعتدل في قعدته: احلف ..
الجد: افا عليك ضبطتها بعد ..
عبدالعزيز: كفو عليك .. والله طلعت اسد ينخاف منك ..
الجد: افا عليك اعجبك ..
بومحمد: في شو تعجبه ؟
الجد بهمس: لو تكلمت بتصفق ..
بوفارس: ها .. سمعنا ..
الجد: اقول حق بوسعود اعجبه شولن خليته يسولف ويضحك .. الولد وعلى باله ..
بومحمد: اخاف ولا على باله بس ..
قام عبدالعزيز من السرير وسلم على عمه ..
عبدالعزيز: شحالك عمي ؟
بومحمد: الحمدلله .. انت شو مسوي ؟
عبدالعزيز: الحمدلله ..
بومحمد: تعيش وتاكل غيرها يا حمش ..
عبدالعزيز ضحك: ه .. بعد باكل غيرها .. لا تخوفني جي ..
الكل: ه
بوفارس: يبه .. شو خربطت على ولدي ؟
الجد: ما خربطت عليه شي .. ولد اصلا مينون ومو صاحي ..
عبدالعزيز: انا ! ..
الجد: انت تجنن بلد ..
بوفارس: عزيز لاتخرب ابوي ..
بومحمد: اي لاتخرب ابوي .. بعده صغير وماله في هالسوالف ..
عبدالعزيز: الحين انا اخرب يدي سلطان ؟ الله يالدنيا ..
الجد: اي توني صغي .. وانت بصراحه صايع ولك سوالف وخرابيط وايد ..
بومحمد: ه .. تستاهل يا ولد اخوي .. هاي اخرة من يماشي سلطان بومحمد ..
عبدالعزيز: مقبوله منك يا يدي ..
بوفارس: زين تغدوا عندنا اليوم ..
بومحمد: ما عندي مشكله .. ها يبه بتتغدا معانا ؟
الجد: والله مادري .. حمد يبه ..
بومحمد: لبيه ..
الجد: اتصل البيت قول لاختك اني باتغدا هني .. لا ينتظروني ..
بومحمد: ان شاء الله ..
عبدالعزيز: حلاه على بومحمد بيتغدى عندنا ..
الجد: بس انت ما تقعد معانا على السفره ..
عبدالعزيز: بل .. ليش ؟
الجد: لانك مو شي .. واخاف على عيالي تخربهم ..
الكل:
بوفارس: تستاهل يا عزيز ..
الجد: زين قم اتصل بخوك فروس الصايع وقوله لا يتأخر عن الغدا ..
عبدالعزيز: ان شاء الله ..
طلع الجد من عند عبدالعزيز بعد ما جننه .. وطلعوا وراه عياله حمد (بومحمد) و محمد (بوفارس) ..
خالد وفارس كانوا في المكتب .. يناقشون بعض امور المكتب ..
خالد: شوف ولد عمي .. مشروع سلمان حلو .. بس لقيتوا المحل ولا للحين ؟
فارس يعدل غترته: للحين .. بس انا معتمد على اسامه يدور لي ..
خالد كشر: ما بغيت الا اسامه هالبارد ..
فارس مبتسم: ليش ؟
خالد: يومه عن سنه .. شو وليد .. وليد ماشاء الله عليه شاطر ..
فارس: انا بانتظر اسامه يرد علي بكره .. وبعدين بكلم وليد ..
خالد: حلو .. فارس ..
فارس: هلا ..
خالد: باين عليك التعب .. ما نمت عدل ؟
فارس: لا مانمت عدل .. ما نمت الا الساعه 6 تقريبا ..
خالد: ليش ؟
فارس: كنت مشغول شوي ..
خالد بخبث: مشغول ؟ احم احم .. وشو اللي شاغلك ؟
فارس يضحك: .. مشغول وبس ..
خالد: والله مب هين يا فارس ..
فارس: ..
خالد: زين انا استأذن .. لو بغيت شي انا فالمكتب ..
فارس: بارك الله فيك ..
طلع خالد من مكتب فارس .. وعلى طول فارس طلع جواله اتصل بمناف .. مناف كانت بالمحاضره وماقدرت ترد على فارس .. كانت تشوف التلفون لانه رن اكثر من مره .. اخر مره ردت وفارس سمع صوت الدكتور يتكلم ..
سكر وطرش لها مسج ..
( حياتي اول ما تخلصين اتصلي لي .. وحشتيني ) .. مناف قرت المسج وابتسمت ..
مناف" فديته" .. اول ما خلصت المحاضره اتصلت بفارس على طول .. فارس كان يكلم موظف عنده فالمكتب وماقدر يرد على مناف .. اول ما طلع الموظف من عنده اتصل فيها ..
فارس: يا قلبه انتي ..
مناف مبتسمه: هلا وغلا ..
فارس: شحالج حياتي ؟
مناف: الحمدلله .. انت وش اخبارك ؟
فارس: الحمدلله طيب يوم سمعت صوتك ..
مناف كانت مبتسمه: فديت قلبك يا فارس ..
فارس: تغديتي ؟
مناف: لا كلت كرواسون الساعه 8 بعد المحاضره الاولى ..
فارس: بالعافيه يا قلبه .. زين ليش ما تتغدين ؟
مناف: بس كلت الكرواسون الحمدلله .. بعدين امي اكيد مسويه غدا ..
فارس: فديت القنوعه انا ..
مناف بدلع: فارس ..
فارس: آآه يا قلب وحياة وكل شي في فارس ..
مناف انحرجت: زين فديتك .. تغديت انت ؟
فارس: لا بعد شوي بروح البيت ..





يتبع ..
__________________