{ نهاية حبك إعدامي } ...(قصة مميزة.. الإدارة)

التكمله



دخل سلمان ولقى نواف ينتظره ..
سلمان: السلام عليكم ..
نواف وقف وسلم على سلمان: وعليكم السلام ..
قعدوا وطلبوا لهم .. اول ما وصل الطلب تكلم نواف في موضوعه ..
نواف: انا قررت اكمل نص ديني ..
سلمان مبتسم: موفق يا نواف ..
نواف: بس بصراحه يا سلمان .. انا قلت اني ما راح القى احسن منكم ..
سلمان ابتسم باحراج: ما عليك زود الغالي ..
نواف: انا كلمت الاهل .. وقلت لهم بكلمك اول .. وانت كلم هلك .. انتظر ردكم عشان يزورونكم الاهل ..
سلمان: ولا يهمك الغالي .. بكلم الاهل وبشوف اخوهم وبرد عليك ان شاءالله .. بصراحه يشرفنا اناسيبكم ..
نواف: الشرف لنا والله .. ما بلقى احسن منكم ..
تموا يسولفون في امور ثانيه .. وبعدها استأذن سلمان عشان يروح العزبه عند الشباب .. طلع من الكوفي شوب وهو فرحان ..
سلمان " الله يكبر حظج يا هنوده .. وان شاءالله تكونون من نصيب بعض " .. اتجه للعزبه وفي جعبته هالخبر بيقوله ليوسف .. وصل العزبه واستقبلوه الشباب ..
سلمان: عيل وين الباقي ؟
فارس: مع البانشيات ..
سلمان: ما يشبعون هالشباب الله يحفظهم ..
بوفارس: امس تعافسوا ..
سلمان عقد حواجبه: متي امس ؟
بوفارس: بعد ما وصلوك ..
سلمان: والله .. زين عسى محد تعور فيهم ؟
يومحمد: ولدكم ما عليه شر .. بس خالد ولدي تعور كتفه وعبدالعزيز راسه ..
سلمان: لاحول ولا قوة الا بالله .. والله انهم مقاليع .. انا كنت حاس ان وراهم شي .. من شفت استعراضهم ..
محمد: قلت لهم بس زين ربك ستر و وصل فارس فالوقت المناسب ..
سلمان: الله يهديهم ..
تموا يسولفون وبعدين سلمان استأذن عشان يدخن برا .. وهو طالع طلع علبة الزقاير و ولع له وحده .. خذ له نفس والتفت صوب المسبح .. شاف البنات وهم يركضون ورا بعض ويلعبون ببرأه .. طبعا من بين هالبنات لفتت انتبا فاطمه .. تم يطالعها وهو مبتسم .. مشى صوب العيال اللي كانوا يلعبون صوب الطيور .. كان يشوفهم وهم يتفاهمون مع فهد بالاشاره .. شاف عبدالله مع علي وباقي الشباب فالبانشيات داخلين العزبه .. استغرب ان عبدالله مندمج مع الشباب اكثر من الاولاد اللي بسنه .. قربوا الشباب من سلمان ..
عبدالعزيز: يلا ..
سلمان ينفخ الدخان: وين ؟
علي: لفه عالسريع ..
سلمان: لا لا ..
عبدالله: ااااااي .. والله فله غبرنا ..
سلمان: .. يا زين هالضحكه ..
يوسف: ضحكته خطيره ..
سلمان مبتسم: اي والله خطيره ..
يوسف: لفه عالسريع خالي ..
سلمان: يلا ..
نزل عبدالعزيز من البانشي مالته عشان يسوقها سلمان ..
سلمان: لا عادي يبه . انا بركب ورا ولد اختي ..
عبدالعزيز: على راحتك ..
ركب سلمان ورا يوسف .. وطلعوا من العزبه وهم طايرين .. تموا يستعرضون شوي .. استعرض يوسف وبعده فاضل .. وقف يوسف على جنب عشان يشوفون استعراض فاضل .. سلمان قاله الموضوع ..
سلمان: في واحد متقدم حق اختك ؟
يوسف: يلا الفضلي .. من يكون هالشخص ؟
سلمان: تعرف نواف ..
يوسف: اي اللي نشوفه فالكوفي شوب ؟ احلى الفضلي .. والله انك فنان
سلمان: اي هذي هو ..
يوسف: متى كلمك ؟ دورك بوسعود بس شوي شوي ..
سلمان: اليوم .. ها شرايك انت ؟
يوسف: عاش بوسعود حبيبي .. مستحيل اوقف نصيب اختي .. انت كلمتها ؟ .. روح يا بوسعود ..
سلمان: لا والله .. توه من شوي مكلمني الريال ..
يوسف: زين .. نسأل عنه .. خف علينا يا بوسعود بس فنان يالغالي .. وكلمها لي رجعت الليله ..
سلمان: والله متوتر ماعرف شلون بفاتحها بالموضوع ؟
يوسف: تبيني اكلمها انا ؟ اول مارجع بفاتحها بالموضوع وانت اسأل عنه لين اكلمها ..
سلمان: حلو .. انا بسأل عنه خلال هاليومين لين ترجع انت من العزبه ..
يوسف: وااااااي اموت فالحركات الخطيره يا خطير انته .. ولا يهمك يا خالي .. دورك بوحسن اتحفنا ..
علي نزل عبدالله وبدا استعراضه ..
عبدالعزيز: اموت واسوي هالحركه شلون تسويها علوه ؟
علي وهو يشل البانشي على التواير اللي جدام: هاي السر العلوني ..
الكل: ..
عبدالله: والله انك فله .. اااااااااااااااي ..
سلمان: يسلم هالضحكه ..
فاضل: يلا نرجع شباب ..
عبدالعزيز: سباق ..
الكل: يلا ..
سلمان: شوي شوي على الولد يا علي ..
علي: ما عليك منه مقلوع هالولد ..
عبدالله: يلا بسرعه نسبقهم ..
سلمان ضحك على عبدالله: ..
رجعوا العزبه .. سلمان راح عند الشياب عشان يشيش .. فاضل ويوسف وعبدالعزيز وعلي وعبدالله طبوا المسبح ..
الجده: عزوز ما تخاف انت ؟
عبدالعزيز باستغراب: ليش ؟
الجده: جرحك ما برى وانت اطامر لي فهالماي ..
عبدالعزيز ابتسم: عادي يدتي ..
الجده: يا علك العافيه ..
عبدالعزيز: آمين ..
الجده: انا بروح احط راسي وبنام احسن لي ..
فارس من وراها: روحي نامي وقعدينا قبل الديك ..
الجده انتفضت: وجع يا اسود الويه ..
الشباب: ..
فارس: تحبين تسوين لج حركات ..
الجده: فارق ويهي يالعفريت ..
فارس: واذا ما فارقت .. شو بتسوين ؟
الجده: قم عني ويه قم ..
فارس: لا ..
الجده: و لوح على ظهرك قم اشوف ..
فارس: بل
علي: زفوووووه ..
الجده وهي رايحه: تستاهل قاموا يضحكون عليك ..
فارس: مردوه يالديايه .. اوريج ..
الجده التفت: انا ديايه يالعفريت .. بوريك شغل الديايه بكره ..
فارس: انتظر بكره انا ..
الجده طلعت من غير ماترد عليه ..
علي: الله يغربلك يا فروس .. جننتها ..
فارس: ه
استانسوا الشباب في المسبح .. مرت هالليله عليهم بوناسه .. كانوا يشون كباب والجو كان حلو .. سوالف و وناسه و ضحك .. عبدالله وفيصل كانوا طايرين من الوناسه لانهم بيباتون فالعزبه .. يوسف فرحان بالخبر اللي قاله له سلمان .. محمد عايش عالم ثاني مع ساره .. ايمان ومريم والريم وفاطمه كانوا مستانسين .. علي وفاضل وعبدالعزيز عايشين حياتهم عالاخر .. مريم وخالد راحوا كوكب الحب والرومنسيه .. العيال الصغار طلعوا طاقتهم بالعلب والوناسه .. عدت هالليله حلوه للكل .. رجع سلمان العاصه وهو محمل باحلى الاخبار .. بس كان متوتر ومو عارف كيف يفاتح هنادي بالموضوع فترك هالموضوع على يوسف .. نام مع بنات اخته .. انقضت هالليله على خير .. مرت الليله اللي بعدها باحداث احلى منها بعد ..
اما الليله الاخيره كانت اخر ليله لهم .. لانهم اليوم اللي بعده بيرجعون العاصمه ..
ايمان: يا خساره .. ليش بنرجع ؟
بوفارس: الوناسه لها وقتها .. والجد له وقته
الريم: بس الوناسه تمر علينا بسرعه ..
بوفارس: لازم لانها وناسه ..
الريم بحزن: صح ..
بوفارس: زين ليش كل هالحزن انتي وياها .. بنجي مره ثانيه ..
ايمان: بس الجو ما يتعوض ..
بوفارس: آآآآه .. صدقتي في هاذي ..
بومحمد: يه انتوا قاعدين هني .. يلا جهزنا كل شي بنحرك .. توزعوا على السيارات ..
بوفارس: توكلنا على الله .. يلا يا بناتي ..
ايمان والريم: يلا ..
بوفارس: ما نسيتوا شي ؟
البنات: لا ..
طلعوا وتوزعوا على السياير .. ايمان ركبت مع ابوها وامها وجاسم .. الريم مع ابوها واخوانها الصغار .. هيا ركبت مع ابوها وامها .. مريم مع خالد وكانوا بروحهم .. فارس معاه فاطمه .. عبدالعزيز بسيارته ومعاه يوسف وفاضل .. علي بروحه .. محمد مع زوجته وعياله .. توجهوا للعاصمه و ودعوا العزبه بحزن .. كلن وصل بيته
ايمان: فديت غرفتي وحشتني ..
بوفارس مبتسم: .. شو بعد تتفديت غرفتج ؟
ايمان: ه
ام فارس: يلا جاسم دش تسبح وباجهز لك ملابسك ..
جاسم: ان شاءالله ..
بوفارس: انا بعد جهزي لي ملابسي .. وابي تمسديني شوي .. ريولي تعورني ..
ام فارس: ان شاءالله ..
دخلت مريم وهي مستانسه ..
ام فارس: فديت بنتي .. توج واصله يمه ؟
مريم: اي ..
ام فارس: ريلج وينه ؟
مريم: مع اخواني فالحوش ..
ام فارس: زين شوفيه يبي شي ؟
مريم: لا ما يبي شي .. الحين بيروح البيت ..
ام فارس: يعطيكم العافيه ..
مريم وهي رايحه: الله يعافيج ..
دخلت غرفتها وهي مستانسه .. خذت لها شور دافي و اتصلت بزوجها .. تمت تتكلم معاه بوناسه وفرح ..
ايمان خذت لها شور ونامت على طول من التعب .. فاطمه خذت لها شور وبعدين راحت تقعد عند امها وابوها .. عبدالعزيز خذ له شور و طلع مواعد الشباب .. فارس كان في عالم مناف .. يكلمها وتكلمه باحلى كلام الحب ..
في بيت بومحمد الوضع كان مشابه لوضع بيت بوفارس .. ام فارس سبحت فهد واسماء ورقدتهم على طول .. سلطان خذ له شور ونام بعد .. الريم كانت تساعد ساره .. سبحوا اليهال وبدلوا لهم ورقدوهم .. فاضل تسبح وبدل وطلع لانه مواعد يوسف وعبدالعزيز .. وعلي طلع معاهم .. الريم خذت لها شور وبدلت ملابسها .. وتمت في غرفتها .. محمد كان مع ساره فالغرفه كان يتغزل فيها ومعيشها جو ولا احلى .. خالد رجع البيت وكان يكلم مريم ..
مريم: وصلت البيت ؟
خالد: اي توني ..
مريم: زين خلاص فديتك .. روح ارتاح وكلمني اول ماتقعد من النوم ..
خالد مبتسم: مريم ..
مريم: هلا
خالد: تحبيني ؟
مريم انحرجت: اي
خالد: شو اللي اي ؟
مريم: انت سألت وجوابي على سؤالك اي ..
خالد: نسيت السؤال ؟
مريم بدلع: خالد ..
خالد: اموت فالدلع ..
مريم: زين روح ارتاح فديتك يلا ..
خالد: ان شاءالله .. بس اول قولي لي تحبيني .؟
مريم: خالد ..
خالد: اول جاوبيني ؟
مريم: مممم .. اي احبك ..
خالد: آآآآه .. فديت شفاهج لي نطقتها .. اموت انا ..
مريم: سمالله عليك حبيبي ..
خالد: الله يرضى عليج يا اغلى مريم فالدنيا ..
مريم: ويرضى عليك فديتك .. خلاص روح ارتاح ..
خالد: ان شاءالله .. بقولج حبيبتي ..
مريم: قول ..
خالد: قعديني الساعه 9
مريم: ان شاءالله من عيوني ..
خالد: فديت عيونج والله ..
مريم: مع السلامه ..
خالد: الله يحفظج ..
سكر منها وهو يتألم .. الالم اللي بكتفه يزيد ..
خالد: آآآآآآي كتفي ..
خذ له شور سريع وطلع راح المستشفى ..





يتبع ..
__________________

الموضوع الاصلي  من روعة الكون