بلـــــغ حبيبك وقوله ,,, باخـذك منـــه ... قصة ولا أروع .

روبي بكشتها: عند البطون تعمى العيـــون

جـــوري وهي تلوي على روبي: ويه فديت الكتاكيت يزعلون بعـــد ه

روبي وما صدقت انه حد يلوي عليها وتمت لازقه اف جــوري

جــــوري وهي اتنش عن روبي : شكلج ما صدقتي

روبي: خخخخخخخخخخخخخخ الصراحه لا

نشت روبي تتغسل وسارت جــوري اتوعي غـــلا عسب اتصلي ... وعقب ما خلصن من الصــــلاه طلعن فالصاله اللي فوق ودقن ع البشكــاره عسب اترتب الحجره


فالصــاله الفوقانيــه

جـــوري: بسير أتطالع ماماتي اذا يت ولا لأ ... اشتقتلها

وسارت جـــوري عند أمها ويلست شوي وياها وتمت تتشكالها وعقب ردن الصاله عند غـــلا وروبي ... وتمت أم جـــوري تاخذ بخاطرهن وتتوعد اف حارب وراشد ... ه (يا ويلكم يا رشود ويا حروب!)

وعقب يا الدريول وشــل غـــلا وروبي البيت

وتمن جــــوري وأمها فالصاله اللي الفـــوق

أم جـــوري: هاا ماما ما قلتيلي شو اشتريتي اليوم؟

جـــوري بحماااس: هيه صـــح تعالي براويج (وتسحب امها من أيدها عسب اتوديها الحجره)

وتوهن بينشن عسب يدخلن حجرة جــوري جان يسمعن صــوت جــــواهر: مرحبـــــا ... أنا ييييت!

جـوري وهي اتنط صوب اختها : ياااااااااااي! ما قلتي انج بتين؟!

جـــواهر: الصراحه ماكنت مخططه ايي ... بس حميـــد اتصلوبــه من الدوام فقلت خل أييكم

ام جـــوري: هيه زين اتسوين

جــــوري وهي تسحب امها وأختها العوده: يلااااا تعالوا براويكم شو خذت اليوم

وتمت جـــوري اتراويهن الأشيـــا اللي خذتها ... وكانت ماخذه لأمها طقم فيه ساعه رجاليــه لأبوها ونسائيه لأمها ومجموعه عطور ومغلفتنهن مع بعــض بمناسبــة عيد زواجهم

جـــوري وهي تلوي على أمها: Happy Anniversarry day يا أحلى أم فالدنيـــــا

أم جـــوري: وي فدييييت روحج ...! الحين انتي سايره تتشرين لنا ولا تتشرين حق عمرج!
جـــوري: جيه انا عندي حد أغلى عنكم؟! وبعدين هذا من مصروفي ... يعني مب ماخذه هداياكم اببيزاتكم ه

أم جــــوري وجواهر يضحكــن على جـــوري وخفة دمها

(ترى جـــوري بعدها ما تشتغل وطبيعي مصروفها من أبوها ... فكان يضحّك انها ماخذتلهم هدايا بفلوسهم ه)

وعقــب طلعت جـــوري بوكـــس لونـــه ذهبي وتغليفه يجنن وعطته اختها وهي اتبوسها على خدها: سوري لأني ما بكون موجوده اف عيد ميلادج

(لأنه عيد ميلاد جــواهر بيصادف 10/6 وجــوري بتكون فالمعسكر)

جـــواهر وهي متلومه: فديتج جوجو .. والله ما يحتاي .. انتي ما بتكونين موجوده ...

جــــوري: لا منو يقول؟! جيه كل يوم عيد ميلادج؟! الا مرة فالسنـــه .. بس هاااا ... خشيلي شوي من الكيك

جــواهر: ما عليج انتي ... أول ما اتردين بناخذ كيكه عوده وكليها كلها

وتمن يسولفن عن المعسكر وعن السفـــر بس بدون ذكر المكان لأنه مفاجأة وما خلن شي الا وسولفن به

وعقب ما رتبن أغراض جـــوري نزلن تحت

وفجــــأة يدق جرس البــــاب

ويدخلون بوكيــــــــــــــــــــه عوووووووود لونـــه بنفسجي فاتح مع درجات الوردي ... فعـــــلا كان البوكيـــه كبير ... طول الباب ... واف داخله علبتين .. علبه فيها طقـــم ألماس .. والعلبه الثانيه فيها قلم رجــالي فاخر مع البزم والمحفظـــه من ماركــة كارتيير

جـــــــــوري: وااااااااو Fantastic

أم جـــوري: ويه ماشالله .. محلاااااه الـــورد ... ونفس اللون اللي أحبـــــه ولفت تسأل الخدامه عن اللي يايب الورد بس ما حصلتها... وجان تاخذ البطاقه وقرتها

أمايــه الحبيبه ... أبويـــه الغالي

يوم زواج سعيـــــــد

كنت أتمنى اكون بينكـــــــم بس للأسف

لكــن قلبي وياكم

اشتقتلكم قد الجنــــــه ! << هالعباره كان دوم حامد يقولها يوم كان صغير عسب يفهم أمه ابوه انه يحبهم واااايد ... وكل حد فالعايله الحين يعرف انه هاي جملة حــامد

ابنكــم المخلص / حـــــــــــامد الـ.......

وتمت أم جـــوري تحضن البطاقه واتبوسها: ويه فديتـــــــك يا غناة أمك

حتى اف غربتك ما نسيتنا وتمت اتصيح

جـــوري وجــواهر تمن يصيحـــن ويا أمهن

وعلى هالمنظـــر دخــــل أبو جـــوري: ماشالله ورد وحاله ... (وانتبه لهن) ويه جــواهر عندنا .. يا مرحبا يا مرحبــا

وسارت جــواهر اتوايــه أبوها

أبو جـــوري: بلاه ويهج؟! (ويلتفت لهم) بلاكن؟! منووووه مصيح حرمتيه يعترف أحسنله

ومن عقب تعليقه ضحكـــوا كلهم

وخبروا بو جــوري عن هديــة حامد ... وحس بحنين لولده العـــود وسنــده فالحياة

وجان يتصلوبه ورمسوه كلهم ويوم سكــروا عنه لوى عليهم بو جـــوري وقال: فديتكـــم يا عيالي وفديتج يا أم عيالي

جـــوري: باباه شو رايــك اف ذوقي؟

بو جـــوري: ياويلي ويلاه ... أحلى ذوق فالشرق الأوســــط ... وخذ الســاعه ولبسها ... يا سلاااام صدق ازقرت

جـــوري وهي نافخه ريشها: طبعا طبعا

ويرن تيلفون جـــواهر وكان ريلها وطلعت برا عسب اترمسه وعقب ردت: يلا يا جماعه انسير الميلس اللي برا

بو جــوري وأم جــوري مستغربين ويتطالعون بعض أما جــوري المشاغبه فكانت حاسه انها مفاجأة جـــواهر وريلها لأمها وأبوها فكانت تبتسم

أم جـــوري: وين انسير يا أمييييييه؟

جـــواهر وهي تسحبهم: يوم بتوصلون بتعرفون

(كانت فلة بو حـــامد عـــوده وفخمـــه وتصميمها شوي ياي على الطراز الأسباني ... وشكله غير عن البيوت المتعارف عليهـــا ... بو جــوري طالب التصميم مخصوص من استشاري أسباني ووصى أخته اليـــازي عليه بحكــــم انها عايشــه اف أسبانيـــا وهي بعــد ذوقها لا يعلى عليـــه ... ومن وصل التصميم بدوا فالبنى ... وفعــلا كانت الفيـــلا تحفــه فنيــــه ... الاضاءات كانت موزعـــه بطريقــه جدا رائعــه على كافــة أنحـــاء البيت مما يضيف لمســه خاصه ويكون ديكور في حد ذاته ... وكان فيه مساحه واسعــــه بين الفيــلا والمدخــل الرئيسي ... واستغلوا هالمساحه أحسن استغلال وخلوها ممر مغطى بأحجار متباينة الحجم واللون مما يعطي الممر سحــر خاص وخاصه فالليل وانعكاس ضوء القمر ... أما حديقــه البيت فكانت جنـــــه وتصميمها غريب ... لأن الأرض ماكانت مستويه ... تتكون من كــــذا طابق وكل طابق كان جنــــه خضـــرا وفيه من أنواع الـــورود اللي يعجـــز الكلام عن وصفه ... وبين كل نوع ونوع ممرات مائيه واف مركــز الحديقـــــه شلال كبير وهو أساس تدفق الماي فالممرات المائيـــــه ... واتطل على هالحديقـــه صاله زجاجيــــــــه فيها حــــوض سباحـــــه وصالة أيروبيك و Body Build... طبعا الآيروبيك حق جــوري وجــواهر يوم كانت موجوده فالبيت ومازالت تستخدمها وحتى أم جـــوري ... لأنها وبالرغــم

من سنها الا انها محافظــه على نظارتها ... اما صالة كمال الاجسام فكان من حق الشباب وخاصه حــــارب المهووس بجسمــــه ... وكل هالشرح عسب نوصل للميلس الخارجي الفخـــــم واللي صمم بطريقـــه جدا ارستقراطيـــه نظرا ان بو جــوري رجـــل أعمــال معروف ... وله الكثير من المعارف والزوار من كبار الشخصيــات اللي كان يستقبلهم اف هالميلس وهو نفس الميلس اللي يحمل مفاجأة جــواهر وزوجهــا حميـــــد)

المهــــم سحبت جـــواهر أمها وأبوها للميلس الخارجي

ويوم دخلوا اتفاجئوا بالمكــــان وكان حميـــد هناك يترياهم

حميـــــد وهو يتقرب منهم: كل سنه وكل حـــول انشالله (ويبوسهم على روسهم)

بو جـــوري: ما تقصــر يا ولدي فيـــك الخير

أم جــــوري: وي يعلني ماخلا منكم

(المكـــان اتحـــول لحفله حقيقيه ... وكان المتكفل بالتنظيم جــواهر وريلها بمساعدة حارب ... اللي كان يهرب العمال عسب يشتغلون ... بدون ما يكشفهم بو جـــوري أو جـــوري (وكالة الرويتر) ... وحتى يوم شغّــل جــوري وغـــلا وروبي وخلاهن ينظفن الصاله ... لأنه بغى يضمن انهن يتمن فالفيـــلا عسب لا يمرن صوب الميلس ويكشفن المفاجأة خاصه انه العمال كانوا خلاص يشطبون ع الشغــل ... يعني لا يادبهن ولا شي! وراشد مشترك فالجريمه بعــــد ... والحمدلله ما استوت أي عزيمه اف هالفتره ولا خططهم كانت بتفشل ... و كل شي عدا على خير)

وطبعـــــا كاميرا جــوري شغاله ... لا تنسون انها طالبة الاعلام ... وكاميرتها معاها 24 ساعه

وما خلت شي ما صورته ... وخلت كل حد فيهم يقول كلمته بهالمناسبـــه السعيده

أم جــوري لجواهر: عيل اتقولينلي ريلي زاقرينه الدوام هاااا؟!

جــــواهر وهي اتحب راس امها: شسوي بعد ... ما بغيت المفاجأة تخترب

حميــــــــــد: ه .. أفا بس أفا ... حرمتي أنا تجذب! ما يطيـــع زينــج

واتي جــواهر وتضرب ريلها ضربه خفيفه على ظهره: والله ما بغيتنا ننكشف ويخترب علينا كل شي

جــــوري وهي اتسوي عمرها اتصيح: حروب السبال! الحين خليتنا انظف الصاله واتعبنا بس عسب ما تنكشف ... مجرررررم

حـــارب: ه اتعيشين وتاكلين غيرها

وساروا كلهم صوب البوفيه عسب يتعشون والسوالف تاخذهم ...

جـــوري اف خاطرها: ياويييلي ! الخميس الياي ما بكون وياهم 

صدق اني خبله

بوجــوري وجنه انتبه على بنته: ها بابا ... بلاهم الحلوين ما ياكلون؟

جـــوري بدلع: أفكــر انه الخميس الياي ما بكون وياكم

بو جــوري: ه خلاص مب مشكله ... بنكنسل المعسكر وتمي ويانا .. كم جــوري عندنا؟!

جــوري افخاطرها يالييت: لا بابا خلاص ... كلها شهر وبردلكم

بو جــوري وهو يبوس بنته على راسها: فديتــــج (ولوى عليها)

حـــارب وهو يكوك أمــــه على أخته: امااااايه ... شوفي بنتج! كلت عليج الجــــو

اممرررة ...! حطت ريلج تحت باطها

أم جــــوري: أنا أمها وراضيــــــه .... بسك لا تتحرش ابها ... روحها بتودرنا شهر كامل

حــــارب وهــو يتذكر المعسكر وصدق مزاجه اتعكر: اففف الحينه بتنقرش فمنووووه يوم جوري مب موجوده!

وخذ حــارب كاميرا جـــوري وتم يصورها وهي اترمس أبوها ويقول اف خاطره: فديييتج يا جوجو ... محد يسواج ... ع كثر ما تأذيني ما أصبر عنج

وعقب الحفله الروعــــــه طلعوا من الميلس ... جواهر ردت بيتها ويا ريلها ... وأم جوري وأبوها ساروا قسمهم وهم صدق مستانسين

(على فكره ... اليوم الظهر .. بو جــوري كان عازم أم جـــوري على الغـــدى اف مينــاء السلام بمناسبة عيد زواجهم الـ 32 ... عسب جي ما كانوا موجودين فالبيت الظهر يوم استوت الأحداث اللي بالي بالكم ه )

وحـــارب رد ظهــر من البيت مرة ثانيـــه ... ه لازم يوم الخميس ... مايروم ييلس فالبيت ...

أما جـــوري فردت غرفتها وهي مستانسه واف نفس الوقت اتفكر فاللي يترياها فالايام اليايه

بدلت ملابسها ولبست بيجامتها وانخشت تحت اللحاف واستسلمت للنوم مثل الأطفـــال ونست تتصل اف منى ربيعتها عسب تتخبرها عن اللي اشترته ... وكل همها اتنام عسب اتسافر لأحلامها الورديــــــــه


وانتهى الخميــــس بكل أحداثـــه

وما بقى غير أيام معدوده وبتودع جوري أهلها عسب اتعيش أحلامها اللي راودتها سنين

يا ترى شو تحملج الأيام يا جــوري؟!

وشو المفاجآت اللي تترياج؟

.
.
.


ويا يوم الجمعـــــه ... وماكان فيه شي مميز ... جــوري كانت تستعد حق الكليه .. واتخلص الريبورتات المطلوبه منها ... وأم جـــوري كانت مسيره على أهلها ... وبو جـــوري كالعاده اف أشغاله اللي أبــدا ما اتخلــص لا اف ويكينــد ولا غيره ... وحــارب بعــد ما ظهر من البيت الا حق صــلاة اليمعــه ومن عقبهــا يلس يخلص أشغال البنـــك ع اللابتـــوب والبيت كان جــدا هادي ... وانتهى اليــــوم

ومن عقبهـــــا مر الاسبـــوع مثــل البرق ... مابين الدوامات والبيت والمشاوير اليوميـــه

ويــا يوم الأربعـــــــا وهو آخر يوم دراسي فالكليــه ويصادف 31/5 ... وكان فعـــلا يوم متعب لجـــوري وكل البنات فالكليــه من مختلف التخصصـــات ... كل وحــده فيهن اتشطب على الريبورتات ... اتضيف وتحــذف ومن هالســوالف اللي ما اتخلــص ...

ويــا وقت البريــك ع الســـاعه 2 الظهــــر

جــــوري كانت فعــــلا واصله حدها وشكلها يبين حجم الارهــاق اللي فيها .. الهالات الســودا حــول عينهــا من التعب ... وعيونها مافيها ولا نقطه كحــل ... وويا شاحــب وحتى انها كانت لابســه سبورت عسب اتكون عمليه أكثر ...

يؤ يؤ

بقراها لسه قاعد اقرها

يسلمووووووو اخوي

يسلموووووووووووووووووووووووووو


على التكملة


لاتطول علينا مرة ثانية


قموووووووووووووره

من إبداع إلى إبداع دائماً

تحياتي