نواف: الله يسلمك يا بوعبدالله .. حاضرين لك
بوعبدالله: يعطيك العافيه يا نواف .. عاد هالله هالله بالاخبار السنعه يا ولدي ..
نواف: انشالله قريب
بوعبدالله: بخصوص قطع الغيار عادي خذ وقتك لان عبدالله ولدي مسافر عنده دوره وبيرجع بعد 3 شهور
نواف: افا عليك يا عمي .. بس توصل القطع باتصل في الدريول عشان يجيب السياره ونركب القطع والله يوفق عبدالله انشالله
بوعبدالله: احسنت يا ولدي .. طالع على المرحوم
نواف: الله يرحمه.. من طيب اصلك يا عمي
سكر نواف من بوعبدالله وطلع من المكتب رايح يقابل صاحبه في الكوفي شوب .. وصل الكوفي شوب وسلم على صاحبه بوفهد
نواف: السلام عليكم ... كيف الحال ؟
بوفهد: عليكم السلام .. يسرك الحال يالغالي ... انت وش اخبارك؟ واخبار الاهل ؟
نواف: طيب الحمدلله .. الاهل الحمدلله طيبين
بوفهد: الا نواف متى بنفرح فيك ؟
نواف مبتسم: خير انشالله ..
بوفهد: من عرفتك وانت هاي ردك ماتغير .. يلا عاد غديت ريال وكونت نفسك الحمدلله بس وش تنتظر ؟
نواف: كل شي في وقته حلو .. وابتسم لبوفهد وتموا يسولفون مع بعض ... وبعد لحظات في الكوفي شوب دخلوا 4 اشخاض بنتين وشابين .. وقعدوا على الطاوله اللي بجنب نواف وبوفهد وصادف ان وحده من البنتين كانت مقابله نواف .. رفعت غشوتها وطاحت عينها بعين نواف بعفويه وصدت وتمت تسولف مع اللي معاها ولا انتبهت لنواف اللي من نظرتها سرح بعالم ثاني
هنادي مبتسمه: خالي .. شو هاي " كوفي لاتيه " اللي طلبته ؟
سلمان: حليب مع نسكافيه عجيب ... طلبيه وبتدمنين عليه
هنادي متردده: هاا .. لا مابي اجازف
يوسف: خالي هنادي ماتحب تجرب اي شي
سلمان يضحك: سمعي كلام خالج فديتج
هنادي: اوكي اللي تشوفه خالي
سلمان طلب لها كوفي لاتيه مع فادج كيك .. وكلن طلب له شي .. وهنادي على اعصابها .. وصل الطلب وسلمان يطالع هنادي ومبتسم ..
هنادي: خالي .. شو هالكيكه السوده بعد ؟؟
الجوهره: هندوووه ... يالوسواسيه اكلي وانتي ساكته
سلمان: ليكون على بالج مسوي فيج مقلب؟
هنادي منحرجه: لا خالي بس....
سلمان: لا بس ولا غيره .. انتي جربي ومثل ماقلت لج بتدمنين ..
هنادي بتردد: اوكي .. كلت شوي من الكيكه وذاقت القهوه والكل يطالعها ينتظر النتيجه ..
الجوهره مبتسمه وتكلم يوسف: خلاص يوسف هانت .. قريب وتتخرج
يوسف مبتسم: اي الحمدلله .. اي والله هانت .. هالدراسه احسها هم على صدري وقريب بينزاح هالهم
سلمان: الله يوفقك يا يوسف طالع على ابوك .. طموح ..
يوسف: الحمدلله على كل حال .. هندووه وين وصلتي ؟؟
هنادي والابتسامه شاقه فمها: وااااااو .. بصراحه خالي .. ذوقك ولا احلى
سلمان: بالعافيه حبيبتي .. بس قلت لج جربي وانا خالج
هنادي: والله ذوقك يا خالي شي شي شي
الكل ضحك على هنادي .. وفي نفس الوقت على الطاوله الثانيه نواف يطالع هنادي ويتفكر فيها .. شافها امووره وبيبي فيس حيويه وتدخل القلب .. طلعوا بوفهد ونواف من الكوفي شوب ونواف من طلعوا ونسى هنادي ولا جات على باله من بعدها .. اما هنادي واهلها تموا في الكوفي شوب سوالف وضحك ورجعوا البيت حزة الغدا .. كانت الجوهره في غرفتها تصلي وتلبس عشان تنزل تتغدى ويرن تلفونها ..
ابراهيم: هلا والله يالقاطعه
الجوهره مستحيه: اهلين
ابراهيم: شدعوه يالغلا وينج ؟
الجوهره: تدري مشغولين مع خالي .. امس راجع من السفر .. وريح شوي واليوم طلعنا نتمشى وياه
ابراهيم: عسى استانستوا ..
الجوهره: اي وايد .. خالي يونس وحليله
ابراهيم: الحمدلله .. وبعد اخبار حياتي ؟
الجوهره مبتسمه: حياتك بخير .. وتسأل عن حياتها
ابراهيم: انا بخير يا قلبي .. وعندي لج مفاجأه ؟
الجوهره بتحمس: ها وش هي المفاجأه ؟
ابراهيم: باركي لي ... استلمت مفاتيح البيت اليوم ..
الجوهره: مبروووووك .. جعله بيت عامر يا ابراهيم
ابراهيم: الله يبارك فيج يا قلبي .. بس ناقصه وجودج يا قلبي
الجوهره بصدمه: هااا
ابراهيم: شوفي يا جوهرتي .. انا وعدتج ببقى لج للابد لين اخر نفس فيني .. ومحد بيدخل هالبيت الا انتي لانج انشالله بتكونين راعيته .. ومحد بيأثث البيت غيرج .. اعتقد مالج عذر الحين خالج ورجع من السفر وبطلبج منه
الجوهره انصدمت من كلام ابراهيم: ابراهيم .. انت وش تخربط ؟
ابراهيم بعصبيه: يا جوهره .. مالج عذر قلت لج مالج عذر .. خلاص كل شي بيتحدد انشالله قريب ابيج بالحلال .. خافي ربج فيني يالجوهره .. يالغاليه انا اسوي هاي كله عشانج انتي وبس والله ماتزوج غيرج انتي الغلا والله انتي وبس
الجوهره سكتت وبينها وبين نفسها قالت " معاك حق يا ابراهيم مالي عذر الحين "
الجوهره: زين ابراهيم حياتي .. اصبر علي شوي عشان خالي يشوف اموره اوكي
ابراهيم بيطير من الفرحه: قلت لج انتظرج العمر كله .. حاضرين لج يا جوهرتي
الجوهره تدلع عليه: زين يلا بسك سوالف .. باروح اتغدى ..
ابراهيم: فديت اللي يتدلعون .. بالعافيه حياتي ولاتنسين تقعديني للصلاه
الجوهره: انشالله فديتك .. الله يرعاك
ابراهيم: مع السلامه
سكرت الجوهره من ابراهيم وحضنت مخدتها .. آآه يا خالي سلمان انت مبروك من رجعت وسطنا وامورنا تحسنت ونفسيتنا تغيرت .. الحمدلله الحظ ابتسم لنا الله يطرح فيك البركه ويوفقك يا خالي ونزلت تتغدى معاهم وكعادتها مبتسمه وفرحانه بس هالمره هنادي ويوسف حسوا بفرحة الجوهره غير .. طبعا رجعت خالهم وسطهم فرحتهم كلهم بس الجوهره اللي فرحها الخطوه اللي بيقوم بها ابراهيم و اللي قريب بتحقق كل امالها واحلامها ..
يوسف: خالي سلمان ..
سلمان: هلا بوي .. آمرني
يوسف: ما يامر عليك عدو .. ما كملت لنا سالفة سميث
الجوهره: يوسف خل خالي يتغدى
سلمان: لا عادي .. بكمل السالفه ليش ماكملها
يوسف: نتغدى وبعد الغدى تكمل لنا السالفه ,, وش قولك؟
سلمان: حلو .. نخلص الغدا ونختم الغدا بحلو من يد هنوووده شو رايكم ؟
الكل: اوكي
وقعد سلمان مع عيال اخته اللي حسوا بالامان من رجعته وسطهم
سلمان: يا يوسف هاذي سميث غير عنهم .. تمنيته مسلم بس .. الله يهديه انشالله .. هناك فالسجن كان خشن والكل يهابه حتى مدير السجن نفسه كان يخاف منه ويسوي له حساب .. طبعا من بعد ماتعرفنا على بعض اكثر عبدالهادي كان يميل قلبه للدين لانه كان يقارن حياتهم بالدين وايد وحاول يسايسه باسلوب بس انا قلت لعبدالهادي اصبر عليه شوي .. لازم يثق فينا ونضبط امورنا معاه اول
عبدالهادي: شلون نضبط معاه بعد ... يالفالح ؟؟
سلمان: لازم نعرف نفسيته شلون يتقبل او لأ .. لازم يتأثر فينا دام الريال حبنا .. لازم ندخل له من هالمدخل
عبدالهادي: والله انك مخ يا سلمان .. مب هين
سلمان: ها شلون عيل .. اعجبك
عبدالهادي: لاتصدق بس
سلمان: الله يقطع سوالفك
ويكمل سلمان لعيال اخته: سألنا سميث عن سبب دخوله السجن؟ قال انه ذبح ولد احد العصابات اللي كانوا يتعاملون معاهم في تهريب الاسلحه .. وابوه يبي ينتقم مني وما راح يرتاح الا لما يذبحني .. ولو طلعت من السجن بيذيحني .. والا انا اقدر اطلع اليوم قبل بكره .. بس ابوي قالي اقعد هني بالسجن بيحاول يقنعه يتراجع عن فكرته او ينهي حياته هو الثاني .. ترا حياة العصابات في امريكا تفس اللي تشوفونه فالافلام .. لان ماعندهم وازع ديني مثلنا .. الحمدلله على نعمة الاسلام .. تخيلوا ان الذبح عندهم عادي مثل شربة الماي ...
ويرد علي سميث: يا سلمان انا عشت حياتي في الشوارع .. صج اني املك قصور مو بيوت قصور وسياير ومحلات ولو اشر بيدي على اللي ابيه اخذه بالقوه او بالطيب .. بس تعلمت من حياة الشوارع القتل والعنف وابوي له سوابق قبلي يعني من شابه اباه فما ظلم .. وراثه ..
سلمان: لاحظت ان الكل يهابك هني .. بس من متى انت مسجون ؟
سميث: انا جيت قبلكم بسنه .. يعني الحين لي 7 سنوات
عبدالهادي: بس شلون طول هالفتره وابوك وعصابتك ماقدروا ينفذون اي من الامرين اللي قلت عنهم؟
سميت: كنت متأكد من هالسؤال؟ بس انتوا ما لاحظتوا اني ماكون موجود الا فترة الغدا بس ؟
عبدالهادي + سلمان باستغراب: اي صح ..
سميث: لاني اطلع بالليل ..
عبدالهادي: هااا .. شلون .. ومع من .. و وين ؟؟!!!؟
سميث يضحك: شوي شوي ... بقولك
عبدالهادي: اوكي .. اسمعك
سميث: انا حتى مانام هني .. اروح انام في قصري .. مرتاح في سريري وعايش حياتي .. بس الصبح ارجع واقعد معاكم عشان محد محد يشك فيني من المساجين
سلمان: روووح يا واسطه .. ماقلت لك خل نضبط معاااه
عبدالهادي: اي والله .. وهني سميث ضاع من بينهم لما تكلموا عربي ..
يكمل سلمان: وعلمناه عربي .. وعبدالهادي وايد متدين ميل قلبه للدين بالتدريج .. بس احلى شي لما قال لنا ....
سميث: شو رايكم تجون معاي الليله ؟
عبدالهادي + سلمان مبطلين عيونهم: هااااا
سلمان: اكيد تمزح
سميث: لا ما امزح ... تعالوا اليوم بعد الساعه 5 عند البوابه الخلفيه .. انتظركم اوكي
سلمان مو مصدق: اوكي
كان سميث بيروح عنا بس رجع وسألنا
سميث: بالمناسبه .. شو سبب سجنكم ؟
سلمان نزل راسه ومارد ..
عبدالهادي: بدون سبب ..لفقوا لنا تهمة تهريب مخدرات في بلادكم
سميث: اها ... دونت وووري ... وابتسم وراح عنهم ..
سلمان: وش قصده بأبتسامته وكلامه ؟؟
عبدالهادي: مادري والله !!!
جات الساعه 5 وانا وعبدالهادي وقفنا ننتظر سميث عند البوابه .. وشفنا الشرطي يمشي صوبنا
الشرطي: تعالوا معاي لو سمحتوا
عبدالهادي: على وين؟
الشرطي: انتوا ضيوف ماستر سميث صح ؟
عبدالهادي: اهااا
سلمان: يس احنا
الشرطي: تعالوا .. فتح لنا الشرطي الباب وانا وعبدالهادي حسينا بشعور الحريه .. يالله شلون كنت شوي وبصيح .. المهم كانت في سياره سوده كلها مخفي تنتظرنا .. فتح لنا الشرطي الباب وركبنا الفندق او منتجع .. ما كانت سياره ماعرف كيف اوصفها شي عجيب ..
ركبنا وجانا الشرطي مره ثانيه وجاب لنا كيس فيه ملابس لكل واحد فينا وطلب منا نبدل ملابس السجن ونتركها في السياره .. مشينا درب ماعرفناه اول مره نشوفه .. 30 دقيقه واحنا في السياره بدا علينا التوتر والخوف لما وقفت هالسياره وطلب منا السايق ننزل .. وركبنا سياره ثانيه بس كانت بدون مخفي وشفنا سميث بنتظرنا فيها هني الفرحه ملت قلوبنا وتطمنا .. تمشينا وتعشينا وعشنا حياتنا ذيك الليله .. شفنا قصر من القصور اللي يعيش فيها سميث .. الله واكبر شو بيته تقول عالم مختلف .. مسبح وملاعب تنس ونوافير وحديقه كبيره تقول جنه جنه .. يعني بيت محترم بمعنى الكلمه .. وهاي بس احد قصوره .. المهم في ذيك الليله نمنا في اسره مريحه وتغطينا بالفرو والحرير ونمنا نوم عميق .. طلعت الشمس وقعدنا على الساعه 9 تريقنا وبعدين رجعنا للشقى مره ثانيه ... والليله اللي قبلها كانت مثل الحلم .. وتكررت طلعاتنا مع سميث والحمدلله قدر عبدالهادي يميل قلبه اكثر واكثر للدين عن قبل .. وبدى يفهم عربي ويتكلم معانا بالعربي .. لين ما اتقنها ماشالله عليه .. تمينا على هالحال يمكن سنه كامله .. النفسيه تغيرت والكل لاحظ بعدها قال لنا سميث .. وقطع كلام سلمان الاذان .. سكت سلمان.. ولما خلص الاذان قام ومعاه يوسف للمسيد والبنات راحوا يصلون فوق ... قالهم خالهم المره الجايه بيكمل لهم شو صار ..
الجوهره اتصلت تقعد ابراهيم لصلاة العصر
الجوهره: صح النوم ..
ابراهيم: يا حي الله هالصوت
الجوهره: يلا فديتك .. قوم اذن العصر
ابراهيم: انشالله . .. لما اطلع من المسيد باتصل فيج
الجوهره: اوكي .. مع السلامه
ابراهيم: مع السلامه
__________________
|
آخر 10 مشاركات
24-06-2007, 06:50
العرض العادي
