قصتي الاولى "ليه يادنيا المحبة "

التكمله
*************************


دخلت جمانه والبنات للغرفه ومعهم ام حمزه الي فزت نوريه وهي مستغربه من الي دخلت معهم


جمانه : يمه ام حمزه

نوريه : ربيع طارق !!

جمانه بتنهيده خفيفه : اي يمه



طبعا حمزه كان جالس بالغرفه عند ابو جمانه صح مايعرفونه بس حبوه من كلام جمانه

عبدالله : ياهلا وغلا بحمزه

حمزه : هلا بك ياعمي

عبدالله كان منحرج بنفسه يسأل عن طارق بس شلون يفتح الموضوع مايدري


عبدالله : شخبار اهل الكويت << يلّمح

حمزه للحين مافهمها او انه يبي عبدالله يسأله مباشره


حمزه : كلهم بخير ونعمه

هنا توهق عبدالله بس قال : قصدي طارق طارق شخباره مع زواجه الجديد

حمزه ابتسم ابتسامة نصر : الحمد لله هو بشهر العسل الحين

بس والله لا حضرت له زواج ولا شي

عبدالله : عسى ماشر بس لا يكون متزاعلين

حمزه : لا والله بس احد يتزوج على جمانه الــ .....

اسكت بعد مارفع عبدالله حواجبه

حمزه انحرج : قصدي ام سلمان

عبدالله : اجل راح شهر العسل وين راحوا !!!

حمزه : طارق ضايع للأسف ياعم وداها لفينيسيا انا متأكد انه يبي يرد ولو بعض من ذكرياته مع ام سلمان

عبدالله : الله يخليها لنا ام الشيخ

حمزه ابتسم : انزين عمي ماتييبونه هني اشتقت له

عبدالله : ابشر بروح اجيبه واخليهم يجيبون القهوه

عن اذنك


كانت الجلسه ولا احلى عند الحريم خصوصا ان ام حمزه طيبه

يعني بالنجدي تنحط عالجرح ويبرى

نوريه : اي صج جمانه موضي اتصلت

شهقت جمانه : يؤ والله نسيت اتصل

نوريه : عندها مفآجأه لج

جمانه : بتصل الحين

عن اذنك خالتي حصه " ام حمزه "

حصه : اذنج معج يمه

طبعا كانت عيونها على نورا من بداية جلستهم


نورا ضاعت علومها الاخت خصوصا انها خقت على حمزه


شقول لكم عن حمزه من طلع عبدالله تتوقعون تفكيره مع مين

مع جمانه على انه يحس نفسه نذل يفكر بوحده يعرف انها مب له

وحده حبها وتفكيرها لرجل واحد

تعتقدون القلب بينسى طارق !!!


دخل عبدالله على جمانه الي كانت بالصاله وتكلّم بس تفآجئ من صرختها


عبدالله : بسم الله عليك وانا ابوك شفيك

جمانه : يبه يبه اخيرا جاء من يعبرني

موضي سمت بنتها جمانه جمانه الصغيره يعني

ياااااااااهي وناسه

عبدالله : الله يديمها عليك تستاهلين يابعد عمري

جمانه : سوري موضي بروح اناقز عند اهلي

موضي وهي تمسح دموعها : روحي يابعد عمري


جمانه نست نفسها دخلت تصارخ وتضحك عليهم


نورا : يمه عمتي شفيك

نوريه : فرحانه يعني كل هذا عشان في وحده سميتك

جمانه : لا يمه بس موضي غير والله غير


حصه طارت عيونها ماتدري شسالفه

الجده تدخلت : ام حمزه ها ربيعتها سمت اسم بنتها عليها

حصه ابتسمت وعرفت ليش جمانه تصارخ

نورا : عمه يمكن الي بالقصه يحبونك ويسمون بناتهم عليك

ضربتها نهال بكوعها : الله لا يفضحنا الحين جاء دورك

قربت لهم جمانه : الله يقطع الي يسولف على مبزره



قطع كلامهم عبدالله الي دخل

تغطت حصه بسرعه عبدالله من فرحته لجمانه نسى الضيفه

طلع بسرعه لأنها فشيله بالمواقف هاذي

الشباب ادرى يعني

طلعت له نوريــــــــه

نوريه : الله يهداك بس نسيت المره

عبدالله : والله نسيتها دخلت وانا فرحان لجمانه


نوريه : معذور شو كنت تبى

عبدالله : ابي الشيخ سلمان وجيبي معه قهوه لحمزه


راح عنها والتفت وهو يقول : احبك ياقميل

هنا تنحنح وراهم عزام

طبعا نوريه ضاعت علومها ولدي وراي يعني تعرفون كلام الكبار يسوون عقل علينا


عبدالله التفت لعزام وعبس بوج : انت ماتلاحظ انك تخرب اللحظات السعيده دايم

عزام : يبه شدعوى شيبان وتتغازلون شخليتوا لي

عبدالله : لا يكثر امحق من شباب من زينك الحين

عزام : والله اني مطيّح انواع البنات بس انت ماتدري

تدخلت نوريه : صج يمه سعوديات عاد

التفت عبدالله : الحمد لله والشكر بس بدال ماتلعنين خيره تسألينه من بناته

عزام عطاهم ظهره وهو يقول : انا لوحده وبس


طلع وهم طايره عيونهم عزام معقوله يحب !!!



حمزه كان بالغرفه وقام يدور تعب وهو جالس وقف على احلى اطلاله بالعالم كله

قدام الكعبه مباشره

بس وهو واقف لمح شنطة يد فيها مغلف احمر

من اللقافه مدّ ايه ولقى كلمة احبك وورده حمرا مع المغلف


استغرب من تكون شنطته ياترى

بس سمع حركة احد وراه تركها وسوى نفسه يشوف المنظر

وهو منحرج مااقدر حتى يلتفت

عزام : من هنا !!!


دخل وراه عبدالله : الي قال هذا حمزه الي ازعجتنا فيه جمانه


التفت حمزه وعليه ابتسامه وقلب يضرب الف من انذكرت جمانه !!!



نروح لفينيسا الساحره


طارق كان برى الفندق يتأمل شكل الغروب الشمس

اقدر اقولكم ان عيونه كلها دموع حسره الم تفريط بوحده راحت وتركته

آآآه ياطارق راحت عنك جمانه بيفيد الالم

مااعتقد

دخل للفندق بعد مااحس نفسه طفح كيله من اتصالات وسميه الي من الصبح وهو تاركها لغروب الشمس


من راح للغرفه تفآجأ بصراخها : من الصبح يالظالم اتصل

مادري شصار فيك لا تقول لي مايبتها الياهل هني

يوم انك ماتبيني ليش تردني


بيني وبينكم من الصبح للغروب قويه شوي

طارق بدون نفس : كاني ييت نعوضها باجر بروح انام


كان مهدود شوي من الصدمه من كلام جمانه افرط بالتدخين يوم كامل مااكل شي الا يشرب دخان وبس

دخلت عليه وسميه : اكلت شي

طارق وهو يتلحف بالغطى : مااكلت وماابي شي طفي الليت


وسميه : شنو هذا كل هذا حنيه لها الله لا يوفجها جانها اخذتك مني قبل والحين


انتفض من مكانه طارق : الا هي لا تجيبين طاريها لا تقطعين قلبي زود

راحت ويارب يآخذ روحي من بعدها طفي الليت لا انام باللوبي


سكتت وسميه طلعت من عنده كانت تعتقد انه مااحبها كل هذا لجمانه

يعني مالي اي غلا

تجمعت الدموع بعيونها من القهر كانت تعتقد انها بتقدر تآخذ كل شي منه بس الظاهر انها ماراح تآخذ الا المغثه



جمانه والبنات توضوا علشان صلاة المغرب

عزام : يالله بنات بنروح للصلاة وعقبها عندي لكم مفآجأه حلوه

نورا : عم ماتلاحظ انك صرت رقيق

عزام : علمتني الرقه وانا عمك

صفرت نهال : لا اتعذب انا عسى مب هيفا وهبي

عزام : تخسي الا هي عاد احلى من الوصف محبوبتي


دخلت جمانه وهي تلبس عباتها

نورا : الحقي عمتي عزاموه يحب

ضربها عزام على كتفها : عمك يالبزر

جمانه : لا والله تطورات عيني بعينك ياطويل العمر من تعيسة الحظ قصدي سعيده

تقدم عليهم وهو يقول : تدرون ماتستاهلون المفآجأه يالشينات

لحقته نورا : لا عم واللي يسلمك بليز بليز وش المفآجأه

عزام : بشرط

نورا : تحكم ياعم بس وشو

عزام : حبي راسي


جرت شعره بقوه وحبته

عزام : الله يقلعك شعري ,, روحي بس مافي شي

جمانه : اقول اخلص وش عندك

عزام : يقولون رومانسيه وين ياعم الرومانسيه

جمانه انحرجت بس لأنها هالأيام مستانسه حزينه

مشاعر متضاربه فيهااا

عزام من شافها سرحت : لا خلاص بنزلكم بكرى على جده شرايكم

صرخوا البنات

عزام : الله يفشلكم يالله لا تفوتنا الصلاة


طلعوا وهو شااايل الشيخ سلمان كان شكله عذاب خصوصا ان عمره بدى يفهم الي حوله

يعني كبر شوي صار يلعب ويضحك والسعابيل تعذب

سكر ياناس


عزام : تقدموا بنات شوي

راحوا البنات قدام وهو التفت لجمانه وهو يقول : تدرين وين سافر طارق النذل

جمانه تحطمت من جواها بس كابرت : وين راح

عزام : شهر البصل لفينيسيا

لا تسألوني عن موقف جمانه كابرت وهي تمشي

بس الدموع تجمعت بعيونها والغصه منعت النفس عنها



ماتلاحظون عزام فيه غباء بعض الاحياان !!!!!




ضللت اجمع رماد الذكريات

بين مقلتيّ

وصوت ذلك النورس الجريح

يعذب القلب الذي هواه

اخفقت في كل المنى

حتى انني فشلت بإمتحان حبك

لدرجة انك محوتني

من دفتر الذكريات

مااعظمها خفقات قلبي المجنونه

تناديك وتناجي الرب

بأن ينسيني هواك

لعل الجروح ترمى خلف الستار

والاعين تتعلق بالمنار

يااارب

رجوتك

اجعلني انسااااه







جمانه بعدها تحاول انها تركز بصلاتها من سجدوا بالصلاة بكت

بعيون تعذبت خلااص ماتقدر تكذب على نفسها وتقول انها نسته

كتمت الدموع بس كانت تهز

سلّم الشيخ من الصلاة وهي تدعي بنات اخوها استغربوا يعرفون عمتهم مهيب معهم

قلبها لواحد راااح

قلبها لشخص خدعها واوهمها بحبه

معقوله !!!!



سلمت جمانه وقامت وهي تمشي ورى عزام وحاضنه ولدها بكل قوتها يمكن تبي تحس بأمان

تحس انها مازالت مهمه عند احد

بأن وجودها بالكون والدنيا كلها لولدها




قامت وسميه على آهات وتألم من طارق

حست فيه صوته كأنه تعبان !!


وسميه تحاول تصحيه : طارق شنو فيك طارق

لمست حرارته لقتها مرتفعه


تخربطت لبست روبها وطارق مازال يهذري

شتسوي مااتعرف طلياني

لبست غشوتها من الخوف نزلت على طول شتسوي الاستقبال كيف تتفاهم معهم

وقفت عنده وهو طارت عيونه موظف الاستقبال

وحده نازله بالهشكل آخر اليل شعندها يعني


رحمه من رب العالمين كان فيه واحد عربي واقف وهي توصف للموظف

ان زوجها فيه حراره

تقدم بعد ماعرف انها تتكلم عربي

الرجل : اختي عاوزه حاقه

تمسكت وسميه فيه وهي تقول : اخوي زوجي بيموت عليه حراره تكفى مادري شفيه ابي دكتور

الرجل : اوكي انتي ماتزعليش انا حأوله دلوأتي



جابوا الدكتور ومن شافه قال لازم ينقل للمستشفى فورااا





جمانه كانت بالسوق بس فجأه طاح الكاس الي معها وانكسر

الي بالمحل استغربوا لأن شكلها ماجابت خبر الي انكسر

راح لها عزام وهي سرحانه ,,,

عزام : انا قلت لك لا تشيلين الولد معك

جمانه اسكتت

التفت عزام لصاحب المحل : بكم الكاس بعطيك سعره

شال الولد منها ودفعوا وطلعوا

وعزام ناسي سالفة شهر عسل طارق

ومب عارف ان جمانه من قلب العاشق وجعها قلبها فجأه

ممكن هالحب يوصل لدرجة انه يحس باللي يحب

تعتقدونها انتم بعد !!!!


دخلوا للمحل الثاني وجلست جمانه بالكرسي ماقدرت توقف

كانت نورا وعزام واقفين مع بعض

فجأه جاله اتصال من اللخبطه اول ماشاف الرقم فتح السبيكر

وصوت بناتي نااعم : هلا ياقلبي !!!!!!!!!!

مع طيران عيون نورا طبعا الي ماتوقعت عزام من هالنوع

يعني هاذي هي الي يحبها

او شسالفه بس !!!!

&&&&&&&&&&&&&&&&

انتهى البارت

*** كيف بيكون طارق وجمانه بعد

*** شسر البنيه الي مع عزام

*** حمزه يحب جمانه !! معقوله او مجرد اعجاب او شسالفته!!

*** اخيرا شكان المغلف الأحمر مع كلمة احبك الي شافها حمزه لمن يعني !!!