{ نهاية حبك إعدامي } ...(قصة مميزة.. الإدارة)

هنادي: ليش خالي ؟
يوسف: مضايقك وجود زوجتي فالبيت ؟
سلمان: لا مو مضايقني .. شهالكلام يا يوسف .. بس تقدر تقول مقيدني ومقيدها هي بعد .. هي توها عروس واحسها مو ماخذه راحتها فالبيت .. دوم لافه هالشيله ..
يوسف: لا غلطان يا خالي .. هي من كثر ما تنزل تحت .. كل قعدتنا فوق .. وحتى ريما تجي تقعد معانا .. الا ماخذه راحتها بالعكس ..
سلمان: لا انا بشوف لي بيت صغيرون على قدي انا وبنوتي .. لين اشتري لي ارض وابني عليها ..
يوسف: لا ماله داعي هالكلام يا خالي ..
الجوهره: انا عندي اقتراح حلو وبيعجبكم ..
هنادي: قولي ..
الجوهره: شرايكم نشتري 4 اراضي جنب بعض .. ونبني عليها 4 فلل .. ونكون كلنا في مكان واحد ..
يوسف: فكره معقوله ..
هنادي: انا بكلم نواف واكيد مب قايل لأ ..
الجوهره: وانا بعد لي كلمت ابراهيم بيوافق ..
يوسف: ما بقى الا نسمع رايك يا خالي ..
هنادي: عاد مالك عذر ..
سلمان مبتسم: زين وانا موافق ..
هنادي: ياااااي ..
الكل ضحك على عفوية هنادي ..
يوسف حس ان سلمان خاله بيغير رايه .. وحل جوجو كان حلو .. تعشوا كلهم مع بعض .. يوسف استأذن عشان يمر على زوجته في بيت اهلها .. طلع من بيت اخته وكله شوق لحب حياته فطومته .. وصل بيت بوفارس ونزل .. دخل الميلس ولقى خالد وعبدالعزيز قاعدين يسولفون .. التفتوا عليه وابتسموا .. سلموا على بعض وقعدوا يسولفون شوي .. يوسف طلب من عبدالعزيز انه ينادي فاطمه عشلن يروحون البيت .. فاطمه لبست عبايتها وطلعت فالحوش صوب الميلس .. يوسف طلع لما انتبها لوجودها برا .. مشى ناحيتها ومسك يدها .. أشر لها صوب الصيص اللي عند باب الميلس ..
يوسف: تذكرين هالمكان ؟
فاطمه طالعته بخجل وابتسمت: وشلون انسى هالمكان .. ولو
يوسف: لازم نسوي نصب تذكاري هني ..
فاطمه حطت يدها على حلجها وضحكت بنعومه ..
يوسف يتغزل فيها: اموت في ضحتج ..
فاطمه: فديت قلبك ..
يوسف: يلا حبيبتي مشينا ؟
فاطمه: يلا حبيبي ..
اتجهوا لبيتهم ويوسف يحاول قد ما يقدر انه يخفف على فاطمه حزنها وهمها .. فاطمه تهدى نفسها لما يكون يوسف حولها ويكلمها ..
الساعه 10 بالضبط .. محمد وصل فارس عند الشركه وراح يتمشى لين يتصل له فارس بعد ما يخلص كلامه مع ابوه .. تم فالمكتب ينتظر ابوه .. دخل بوفارس الياعه 10 و خمس دقايق ..
بوفارس: شلونك يبه ؟
فارس مبتسم: الحمدلله .. اعلومك انت ؟
بوفارس: طيب ..
فارس: شو تشرب ؟
بوفارس: شاي احمر ..
فارس اتصل بالفراش وطلب له ولابوه شاي احمر .. بوفارس اعتدل في قعدته ودخل بالموضوع ..
بوفارس: فارس يبه نهاية هالاسبوع تلكم فاطمه وتقولها الاهل جاين بيتكم .. يدتك وفاطمه اختك بيمرون عليهم ..
فارس طالع ابوه وابتسم: والله يبه ..
بوفارس مبتسم: اي يبه ..
فارس بوتاسه: جزاك الله خير يبه .. بس امي ؟
بوفارس رفع حاجب: شو فيها ؟
فارس: تعرف هي شو قالت لي اليوم ؟
بوفارس باهتمام: شو ؟
فارس: احلفت اني لو خذت هالبنت بتتبرى مني ..
بوفارس: .. ما عليك منها .. امك قلبها طيب ترا .. وانت تعرف معزتك عندها .. بتزعل بس مردها بترضى
فارس: بس خايف تجرح في بنت الناس ..
بوفارس: انت ابتعد لين تهدى الامور ..
فارس: ان شاءالله ..
بوفارس: خلك في شقتك ..
فارس انحرج: شدراك عنها ؟
بوفارس: انا اعرف كل شي ..
فارس نزل راسه: احم ..
بوفارس: ..
فارس: زين يبه بسألك ؟
بوفارس: قول يبه ..
فارس: انت مسمي فاطمه اختي عليها ؟
بوفارس: ه .. ليكون على بالك كنت واقع في غرامها ..
فارس وبوفارس:
فارس: شكلك جي ..
بوفارس: ه .. ما سميت فاطمه عليها .. بس انا حاب الاسم ..
فارس: اها ..
بوفارس: زين لا تنسى تبلغهم عن يدتك واختك ..
فارس: بس اي يوم بالضبط يبه ؟
بوفارس: خلها يوم الاربعاء ..
فارس مبتسم: ان شاءالله ..
بوفارس: ما قصرت على الشاي يبه .. انا اترخص الحين .. وانت شد حيلك ..
فارس مبتسم: ان شاءالله ..
طلعوا مع بعض عند باب الشركه .. بوفارس ركب سيارته وفارس انتظر محمد يمر ياخذه .. مر محمد على فارس وشاف الفرحه بعيون فارس ..
محمد: بشر ؟
فارس: خلاص بنتقدم لهم رسمي ..
محمد بوناسه: احلى خبر ..
فارس: فديت ابوي والله ..
محمد: اي والله فديت عمي .. صج مثله هالابو ينشد فيه الظهر ..
فارس: الحمدلله على كل حال ..
محمد: اكيد بتعزمني على شيشه على ذوقك ..
فارس: ماسمعك مافي ارسال و صوتك يقطع ..
محمد: ه .. يالعبيط .. زين خلاص انا بعزمك ..
فارس: خلاص كسرت خاطري بعزمك ..
محمد: غصبن عنك بتعزمني ..
فارس ومحمد: ..
احتفلوا الشباب فالشيشه مع سلمان .. وكانوا مبسوطين ..
بوفارس رجع البيت وهو مرهق وتعبان .. دخل الغرفه ولقى ام فارس قاعده اطالع التلفزيون .. اول ما شافته دخلت غرفتهم وسكرت الباب .. بوفارس وقف مكانه ورفع حاجب .. تم يفكر شوي .. وبعدين دخل الغرفه فتح الكبت وخذ له جلابية النوم وطلع .. راح غرفة الجسمي ونام عنده .. ام فارس عصبت على حركة بوفارس .. قام بوفارس قبل أذان الفجر وكعادته قعد كل اللي فالبيت للصلاة .. راحوا الشباب المسيد والحريم صلوا فالبيت .. رجعوا الشباب من المسيد وكملوا نومهم الا بوفارس اللي تم قاعد فالصاله ويفكر .. الساعه 5 ونص ام فارس نزلت المطبخ تجهز الريوق .. شافت بوفارس قاعد فالصاله وكان سرحان .. حست بالغيره بس صدت عنه وكملت شغلها ..
الساعه 9 ونص بوفارس متصل لبنته الغاليه فاطمه ..
فاطمه: صباح الخير بابا ..
بوفارس مبتسم: صباحج نور ياغاليه .. شحالج ؟
فاطمه: طيبه .. اخبارك انت ؟
بوفارس: طيب والحمدلله ..
فاطمه: شو سر هالاتصال الحلو من الصبح ؟
بوفارس: ه .. فديتج رقيقه .. تبين تقولين شتبي بس جبتيها بطريقه انثويه حلوه ..
فاطمه: لا بابا ..
بوفارس تم يضحك على بنته ويلعوزها ..
بوفارس: زين سمعي يا بنتي ..
فاطمه باهتمام: هلا بابا ..
بوفارس: يوم الاربعاء يدتج بتروح تخطب حق فارس اخوج ..
فاطمه بوناسه: والله ..
بوفارس: ان شاءالله ..
فاطمه: يستاهل فديته ..
بوفارس: ابيج تروحين معاها ..
فاطمه: ان شاءالله فديت قلبك ..
بوفارس: عفيه على بنتي والله ..
فاطمه: الساعه كم بنزورهم ؟
بوفارس: بعد المغربيات ان شاءالله ..
فاطمه: زين من بيتصل يبلغهم ان احنا بنزورهم ؟
بوفارس: والله انج سنعه يا فطيم ..
فاطمه استانست على مدح ابوها لها ..
بوفارس: يدتج بتبلغهم ..
فاطمه: خلاص يوم الاربعاء بخلي يوسف يوديني بيت يدي العصر .. بصلي المغرب عندهم وبطلع من يدتي ..
بوفارس: ترا عمج هو اللي بيوصلكم ..
فاطمه: مب فارس؟
بوفارس: فارس بيركب معاه يوصف له البيت ..
فاطمه: زين ..
بوفارس: بارك الله فيج يا فطيم .. عسى الله يوفقج وين ما تروحين .. ويرزقج الذريه الصاله قولي آمين ..
فاطمه خنقتها العبره: آمين ..
بوفارس: فديت روحج .. يلا يبه اخلج مع اشغالج وديري بالج على نفسج ..
فاطمه: ان شاءالله ..
سكرت فاطمه من ابوها وراحت الكفتريا وشافت مناف .. أشرت لها من بعيد وسلموا على بعض بحراره ..
فاطمه حضنت مناف: الحمدلله على السلامه حبيبتي ..
مناف: الله يسلمج فديتج ..
فاطمه: ليش جي ضعفانه مناف ؟
مناف تضحك: اسوي رجيم ..
فاطمه ومناف: ه ..
فاطمه: تعالي نقعد نسولف .. والله لج وحشه يالدبه .. آخر مره شفتج فيها يوم عرسي ..
مناف: بس شهالحلاه .. العرس يسوي جي ..
فاطمه بخجل: .. عيونج الحلوات ..
مناف: اخبارج يا فطومه ..
فاطمه: الحمدلله ..
مناف: ها مافي شي بالطريق ..؟
فاطمه بدلع: لا تو الناس ..
مناف: عيني بعينج ..
فاطمه ضحكت: ه .. لا والله مافي شي ..
مناف: ..
فاطمه: مريم اختي حامل ..
مناف بوناسه: والله .. الف الف مبروك .. تستاهل والله يهون عليها .. وعقبال عروسنا ..
فاطمه: الله يبارك فيج حبيبتي .. وعقبال ما نشوفج انتي عروس يا مناف .. وان شاءالله نفرح فيج ..
مناف: الله يسلمج حبيبتي ..
فاطمه: تصدقين مناف .. عندي احساس قوي ان بنفرح فيج قريب ..
مناف تسارعت دقات قلبها " فديت قلبك يا فارس "
فاطمه: واحس قريب قريب بنفرح فيج ..
مناف بخجل: شاللي خلاج تقولين هالكلام ؟
فاطمه: مادري .. من اول ما طاحت عيني عليج اليوم وقلبي يقولي هالكلام ..
مناف: فديت قلبج يا فطومه ..
تموا يسولفون وجاتهم مريم بعد ما خلصت محاضرتها .. انضمت لهم وسلمت على مناف ومناف بارك لها بحملها
في نفس اليوم الساعه 5 فارس رايح صوب بيت مناف .. اتصل بفيصل ..




يتبع ..
__________________