التكمله
فارس: ها يا جماعه يلا مصر ..
يوسف طالع فارس: الحين انت روح مصر زين ..
الكل: ه ..
فاضل: والله خربتوا علينا السفره ..
علي: زين خيرها بغيرها .. ولا يهمكم باعزمكم كلكم على حسابي ..
يقاطعه عبدالعزيز: على وين ؟
علي: العزبه بعد وين ..
الكل: ..
سلمان: لا شرايكم نروح المكسيك ..
محمد باستغراب: المكسيك ؟
سلمان: اي .. عليكم التذاكر .. والوناسه والسكن خلوهم علي ..
يوسف: شلون خالي ؟
سلمان: تذكرون صاحبي الامريكي ؟
الكل: اي ي ي ..
سلمان: عنده شاليه في المكسيك على كيف كيفكم ..
فارس: والله فكره حلوه ..
سلمان: كل شي متوفر .. وناسه عبط جد كل شي ..
فاضل: شلون جد ؟
سلمان: يعني تبون تشوفون عصابات .. بيوريكم ..
عبدالعزيز: يلا قدام ..
سلمان: انا اتكلم جد .. لو بتتفقون نروح كلنا .. بكلمه يجهز لنا كل شي ونقابله في المكسيك .. وبعد يعرف واحد عنده حلبة سباق ..
علي: الله .. حلمي بيتحقق .. انا موافق .. وعن نفسي باخذ سيارتي معاي ..
يوسف: وانا بعد ..
عبدالعزيز: وانا بعد ..
فاضل: يالربع انا من الحين بطرش سيارتي ..
الكل: ه
سلمان: الحين قربنا الاجازه والكل خلص امتحاناته وماعندكم شي .. يلا نتفق عشان اكلم الريال ونروح جماعه ..
فارس: والله فكره حلوه و تجربه احلى ..
محمد: همممم .. انا كنت مفكر اسافر مع الاهل فينا ..
فارس: زين روح واستانس و ونسهم .. وبعد ما ترجع نروح ..
سلمان: اذا بنروح شهر 8 بيكون حر عندهم ..
علي: مو بنقعد فالشاليه ..
سلمان: اي ..
علي: بس حلاته .. انا ابي اغير لوني شوي ..
فاضل: الولد يبي يسوي برونز ..
الكل: ه
عبدالعزيز: والله فكره حلوه .. وخاصه حلبة السباق اللي قلت عنها .. احنا هني ما نقدر نطلع بسيايرنا تعرف الدوريات بيمسكونا وبتنسحب السياير ..
سلمان: صح .. وفالصيف مشددين ..
يوسف: الا يقعدون لنا على الوحده ..
فارس: خلاص انا برتب اموري ..
يوسف: وانا بعد ..
فاضل: انا اجازه ..
علي: انا باخذ اجازه ..
يوسف: انا بعد في اجازه ..
سلمان: انا برتب مع اللي معاي وباخذ اجازه .. بس باقي محمد ..
محمد: خلاص برتب اموري وبعد ما ارجع نروح ..
سلمان: حلو ..
يوسف: خالي اقولهم يجهزون العشا ؟
سلمان: اي يبه ..
طلع يوسف يقول لهنادي تقول للخدامه تجهز العشا وتخلي الدريول يجيبه الميلس .. كان يفكر في فاطمه حبيبة قلبه .. بس حس بفرح لما شاف ان سلمان داخل عليهم وهو فرحان .. رجع الميلس عند الشباب .. دخل الدريول وجاب العشا .. تعشوا الشباب .. وبعد العشا تموا يسولفون لين الساعه 12 ونص بالليل .. بعد ما طلعوا الشباب يوسف مسك خاله ..
يوسف: ها خالي بشر ..
سلمان مبتسم: ما في ببلاش هالايام ..
يوسف: خالي لا تلعب باعصابي ..
سلمان: .. كلمت بوفارس .. و حسيته رحب بالفكره وايد .. و مدح فيك والله .. قلت لها يشاور الاهل ويرد علينا .. ومن حقهم يسألون عنك ..
يوسف بفرح: اكيد .. الله يبشرك بالخير يا خالي ..
سلمان: بس عاد قبل العرس يبيلك ندرسك ..
يوسف: ما يهمك خالي .. انا تلميذك ..
سلمان ويوسف: ..
يوسف: قلت لخواتي ؟
سلمان: اي كلمت جوجو اليوم العصر .. و هنوده كانت عندي وانا اكلم جوجو .. الله يكتبكم من نصيب بعض يا يوسف ..
يوسف: الله يسمع منك يا خالي ..
استأذن يوسف من خاله وراح غرفته .. كان فرحان وايد بكلام خاله ..
بعد وناسة الشباب محمد كان يفكر في رحلتهم للمكسيك .. حب انه ياخذ راي ساره في الموضوع .. دخل البيت وساره كانت تنتظره .. استقبلته بابتسامته وتهليل ..
ساره: هلا وغلا حبيبي ..
محمد: هلا فديتج ..
ساره خذت غترته وعلقتها .. وكانت مجهزه جلابية النوم على السرير ..
ساره: بتتسبح ولا ؟
محمد: لا بكره بتسبح ..
ساره: شو سويت اليوم حبيبي ..
محمد وهو يفصخ ثوبه: والله مثل كل يوم .. ميلس وتمشي ..
ساره وهي تاخذ ثوب محمد: فديت روحك .. شو رايك بكره ناخذ اليهال الالعاب شوي ..؟
محمد: زين .. بس نطلع من وقت ..
ساره: ولا يهمك حبيبي ..
قعد محمد مجابل التلفزيون .. تم يقلب فالقنوات .. ساره جابت له عصير ليمون بالنعناع .. حطته على الطاوله وقعدت جنبه .. محمد مسك يدها وباسها ..
محمد: زين جاهزه للسفره حياتي ؟
ساره: اي حبيبي .. بس شو رايك نغير ما نروح فينا ..
محمد: وين تبين تروحين .؟
ساره: نروح ألمانيا ..
محمد: ممممم .. زين حلو .. نغير الوج ليش لأ .. بس بقولج شي حياتي ..
ساره مبتسمه: قول فديت قلبك ..
محمد: بعد ما نرجع من ألمانيا .. بروح مع الشباب المكسيك ..
ساره باستغراب: المكسيك ؟!! ..
محمد: اي ..
ساره: شو اللي يوديكم هالبلاد ؟
محمد: واحد من الربع يعرف شباب هناك ..
ساره: يمه محمد المكسيك عاد .. هاي كلها عصابات ومخدرات ..
محمد: .. ما عليج هالريال بيضبطنا عدل ..
ساره: والله مادري عنكم انتوا يالريايل ..
محمد: زين بنقعد في ألمانيا 20 يوم .. يكفيكم ؟
ساره: اي وايد بعد .. من بيروح غيرنا مع اليهال ..
محمد: شوفي الريم وفضول ..
ساره: لا عمي قال بيروحون لندن مع بيت عمك ..
محمد: اي ي ي .. زين خلاص عيل بروح السفريات اغير الوج وأأكد الحجز ..
ساره: حلو ..
تموا يسولفون شوي وبعدين ناموا .. الكل نام الا فاطمه اللي كانت تفكر بكلام ابوها .. وكلام فارس .. احتارت وهي تفكر .. كل ما تتذكر الرساله تطلعها وتقراها .. والغريب فالموضوع انها لما ترقرى الرساله يصيدها شعور بالبلاده .. ما تصيح ولا تتأثر كلش .. بس كلمة ابوها وفارس اخوها هي اللي صيحتها .. تمت سهرانه طول الليل
الحين كلكم مستغربين اني ما جبت طاري بوفارس وردت فعله بعد ما كلمه سلمان .. لاتخافون الحين بقولكم ..
طبعا بعد ما طلع سلمان من عند بوفارس .. بوفارس فرح من خاطره .. لانه يموت في فاطمه وهي المفضله عنده ويوسف ولد ما ينعاف وبوفارس وايد يحبه .. فلما عرف ان يوسف تقدم لها طار من الفرحه .. على الساعه 11 بالليل كان مع ام فارس بالغرفه ..
بوفارس: شو اخبار العيال مع الامتحانات ؟
ام فارس: كلن قاط وي بكتابه .. فطيم فديتها ما تاكل كلش ولا تطلع من الغرفه .. حتى ويا مبين عليه التعب ومرايم فديتها ما نشوفها الا اوقات الاكل .. اما ايمان فديت قلبها احسن منهم شوي .. تطلع تقعد معانا شوي وترجع تدرس ..
بوفارس: الله يوفقهم وينجحهم ..
ام فارس: آمين ..
بوفارس: زين بقولج موضوع يخص فطيم ..
ام فارس عقدت جواجبها: سمالله على بنتي .. شو فيها ؟
بوفارس: ما فيها الا العافيه .. بس اليوم كلمني واحد يبغيها حق ولد اخته .. تعرفينه يوسف رفيج عزيز ؟
ام فارس ابتسمت: يوسف اللي وي سمح ماشاءالله عليه ؟
بوفارس: اي هاذي هو .. عاد كلمني خاله اليوم .. وقالي انه شاف فطيم وبغاها .. هو يدرس ويشتغل في نفس الوقت .. وتوه مخلص الجامعه .. والله يوسف ريال وينشد فيه الظهر .. ولا انتي عندج غير هالكلام ؟
ام فارس بفرح: والله رايي من رايك يا بوفارس .. بس بغيتها حق علي ولد عمها ..
بوفارس: علي .. لو بغاها كان تكلم .. خالد تكلم وملج بمريم ..
ام فارس: بس علي توه راجع من السفر وتوه مشتغل ..
بوفارس: لو يبغيها على الاقل بيخطبها لين سنه جدام ..
ام فارس: والله يا بوفارس .. اقول نصبر شوي .. انت كلم اخوك وشاوره ..
بوفارس: والله ما عندي مانع لو كلمته .. بس قلت لج لو علي يفكر في فطيم كان تكلم .. بكلم اخوانها بكره الصبح وبشوف رايهم ..
ام فارس: انا اقول لو تصبر شوي احسن ..
بوفارس: شو اللي اصبر عليه ؟
ام فارس: انت لمح لاخوك .. شوفه شو بيقول ..
بوفارس: يا حرمه .. الولد دخل من الباب .. والراي الاول والاخير لفطيم .. لو ما بغته بكلم محمد اخوي ..
ام فارس: زين اللي تشوفه ..
بوفارس: انا بكلمها بكره بعد ما ترجع من الجامعه .. بس انتي لا تجيبين لها طاري كلش ..
ام فارس بخضوع: ان شاءالله ..
بوفارس: جهزي لي الفراش بنام ..
ام فارس: ان شاءالله ..
راحت ام فارس تجهز الفراش لزوجها .. نام بوفارس وهو فرحان .. كان ينتظر بكره بفارغ الصبر .. عشان يزف هالخبر الحلو لاخوانها ..
" انت اغلى الناس ومن لي في غلاك .. وانت نبض القلب ملكه في ايديك .. مثل قلبك صافي لحبي جداك .. في الغلا والحب ابد مالك شريك "
هنادي كانت سهرانه مع نواف ..
نواف: خلاص حبيبتي بدا العد التنازلي ..
هنادي منحرجه: اي والله ..
نواف: كلها كم يوم و نجتمع تحت سقف واحد ..
هنادي: فديتك يا نواف ..
نواف: تدرين حبيبتي .. اول مره شفتج فيها لفتي انتباهي .. بس ما جيتي على بالي بعدها .. بس لما شفتج مره ثانيه ما قدرت اشيلج من بالي كلش ..
هنادي كانت منحرجه: ..............
نواف: افكر فيج كل يوم .. وكل ما شوف خالج .. اقول لازم اتعرف عليه .. لين جى اليوم اللي تعرفت فيه على خالج وبصراحه حبيته .. انسان هادي ودوم في حاله .. والدنيا كانت قاسيه معاه شوي ..
هنادي: اي والله خالي مسكين .. يعور قلبي .. عانا في حياته .. مره انا واختي كنا نسولف من فتره .. اقول لاختي احس خالي كبر وما يقدر يكمل .. قالت لي اللي يبي العلم بيخلص لو كان كبير فالسن ..
نواف: عدل كلام اختج .. شوفي اللي حسيته من خلال معرفتي بخالج .. انه يبي يرد شي بسيط للي ابوج الله يرحمه سواه له .. هو قالي شلون ابوج وقف معاه ورباه .. يقولي لو مو ابوج كان هو صايع ..
هنادي: فديته خالي والله ..
نواف: وبعدين .. خالج يبي يتطمن عليكم ..
هنادي: شلون ؟
نواف: يعني فرح لما اختج جاها نصيبها .. وانتي بعد .. بس الحين شايل هم يوسف ..
هنادي: تدري لاحظت هالشي .. لان كل ما قلنا له الفال لك .. يغير الموضوع على طول ..
نواف: بس خل يخلص من يوسف وعاد همتكم تقنعونه ..
هنادي: افا عليك بنقعد له على الوحده .. ماله عذر ..
نواف: ه .. ولو تبون اكلمه حاضرين ..
هنادي: حياتي والله ..
نواف: شوفي وحده من ربعج ولا ربع اختج ..
هنادي: يه عاد انت الحين شطيتني .. بكلم اختي من بكره ..
نواف: ..
هنادي: زين قولي فديتك شسويت على موضوع ذاك الريال ؟
نواف: والله رحت له لين البيت ..
هنادي بوناسه: والله ..
نواف: اي والله .. مو عيب ان الواحد يعتذر .. وشفيها يعني لو هو اقل مني فالفلوس .. بالعكس هالشي عطاني عزة نفس وتواضع .. رحت له البيت .. وهو استغرب زيارتي .. استسمحت منه وقلت له ارجع واختار الوظيفه اللي تعجبك .. لو تبي احطك مدير الفرع كامل ما يهمك ..
هنادي: زين هو شقالك ؟
نواف: استحى مني مسكين .. بس قلت له اني غلطان وربي كشفهم .. والله انه كان طيب ومتسامح .. وقالي انه ما زعل مني ويعتبرني مثل ولده ..
هنادي: وحليله والله ..
نواف: بعد ما اقنعته وارتحت وضميري ارتاح ..
هنادي: الحمدلله .. ومتى بيداوم ؟
نواف: بداية الاسبوع الجاي .. و زدت راتبه والله ..
هنادي: جزاك الله خير يا نواف ..
نواف: والله لو تشوفين الفرحه اللي حسيت فيها لما طلعت من عنده .. آآآه الحمدلله ..
هنادي: جزاك عند رب العالمين ..
نواف: فديت قلبج والله .. زين حبيبتي انا ابي ارتاح .. بكره عندي اجتماع مع كم شركه .. ولازم اروح المكتب من وقت عشان اخذ اوراقي وارتب بعض اموري قبل الاجتماعات ..
هنادي: زين حبيبي ..
نواف: الا بسألج ..
هنادي: قول حبيبي ..
نواف: متى بتخلصين امتحاناتج ؟
هنادي: خلاص بكره آخر امتحان بأذن الله ..
نواف: موفقه حبيبتي .. زين قعديني معاج من الصبح ..
هنادي: ان شاءالله ..
نواف: بتنامين ولا بتذاكرين ؟
هنادي: لا بس آخر مراجعه وبنام ..
نواف: زين حبيبتي شدي حيلج ..
هنادي: ان شاءالله حياتي ..
نواف: مع السلامه ..
هنادي: الله وياك ..
سكرت من نواف وتمت تراجع الماده اللي عليها بكره قبل ما تنام ..
يتبع ..
|
آخر 10 مشاركات
08-07-2007, 07:50
العرض العادي
